“14–20 Septemba. ‘Hae God I God blong Mi, mo Hem I Stap Sevem Mi’: Aesea 1–12,” Kam Folem Mi—Blong Hom mo Jos: OlTesteman 2026 (2026)
“14–20 Septemba. ‘Hae God I God blong Mi, mo Hem I Stap Sevem Mi,’” Kam Folem Mi: OlTesteman 2026
Profet Aesea I Tokbaot Finis Taem we Kraes Bae I Bon I Kam long Wol, i kam long Hari Andeson.
14–20 Septemba: “Hae God I God blong Mi, mo Hem I Stap Sevem Mi”
Aesea 1–12
Iven sapos hemia i fas taem we bae yu ridim buk blong Aesea, bae yu faenem ol skripja we oli saon semmak. Hemia i we, aot long evri profet blong Ol Testeman, Aesea i wan we plante long olgeta oli bin kwotem, o talem bakegen toktok blong hem long ol nara buk blong ol skripja, mo Sevya tu Hemwan i bin yusum ol toktok blong Aesea. Ol toktok blong Aesea bae oli kamaot plante taem long ol hym, mo ol nara tabu miusik.
?From wanem oli stap ripitim toktok blong Aesea plante taem? I tru se wan risen, i we, Aesea i bin gat presen ia blong talemaot toktok blong God long wan kaen lanwis we man i save tingbaot isi. Be i moa long hemia. Aesea i bin givim insperesen long ol profet blong plante jeneresen from se ol trutok we hem i bin stap tijim, oli pas tru long jeneresen bitwin 740 mo 701 BKB. Hem i raet abaot bigfala wok ia blong God blong pemaot ol man, we i moa bigwan bitim wan nesen, o wan taem. Aot long Aesea, Nifae i bin lanem se hem mo ol pipol blong hem, nomata we oli seperet long haf blong Isrel, oli bin stil pat blong ol kavenan pipol blong God. Olgeta we oli bin raetem Niu Testeman, oli bin faenem, insaed long Aesea, ol profesi abaot Mesaea we oli hapen stret long fored blong ae blong olgeta. Mo insaed long buk blong Aesea, Josef Smit i bin faenem insperesen from lata-dei wok ia blong mekem Isrel i kam tugeta, mo wok ia blong bildimap Saeon. ?Taem yu stap ridim Aesea ?wanem nao yu faenem?
Blong save moa abaot Aesea mo ol raeting blong hem, luk long “Aesea” long Gaed long Ol Skripja. Blong gat moa infomesen abaot taem we Aesea i bin laef, luk long 2 King 15–20 mo 2 Kronikel 26–32.
Ol aedia blong Stap Lanem Samting long Hom mo long Jos
Aesea 1–12
Ol toktok blong Aesea bambae oli kamtru.
Sevya i bin tijim se “evri samting we [Aesea] i talemaot oli bin hapen mo bae oli hapen folem ol toktok we hem i bin talemaot” (3Nifae 23:3). Taem yu stadi long buk blong Aesea, tingting blong stap mekem wan tebol blong ol profesi wetem ol heding olsem ia: Dei blong Aesea, Seves blong Sevya long wol ia, mo Ol las dei ia. Tekem not se plante long ol profesi blong Aesea oli bin kam tru moa long wan wei (luk long Bible Dictionary, “Isaiah”).
Presiden Oaks i bin tijim: “Buk blong Aesea i holem plante profesi we i luk olsem oli save hapen plante taem. I luk olsem wan i tekem o hapen long taem blong ol pipol blong Aesea o ol situesen blong nekis jeneresen blong hem. Wan narafala mining, we fulap taem i kamaot olsem wan saen, i poen i go long ol samting we oli stap hapen long medel blong taem, taem Jerusalem i bin brokdaon mo ol pipol blong hem oli seraot i go olbaot afta long krusifiksen blong pikinini blong God. Wan moa mining o wanem i hapen long sem profesi i joen wetem ol ol taem we stap hapen g kasem Seken Kaming blong Sevya. I tru se plante long ol profesi ia i save gat plante mining, i mekem se hem i impoten blong yumi lukaotem revelesen we i kam long Tabu Spirit blong helpem yumi blong andastanem stret mining blong olgeta” (“Scripture Reading and Revelation,” Ensign, Jan. 1995, 8).
Stap andastanem Aesea. Sevya i talem, “Yufala i mas stadi ol samting ia wetem strong tingting; from ol toktok blong Aesea oli bigwan tumas” (3 Nifae23:1; luk tu long ol ves ia 2–3). Yet, long plante, Aesea i wan buk we i had blong andastanem. Maet samfala aedia ia i save givhan:
-
Tingting hevi long ol simbol, ol pikja toktok we Aesea i bin yusum.
-
Askem yuwan, “?Wanem nao mi mi lanem abaot Jisas Kraes?” (luk long 1 Nifae 19:23).
-
Lukaotem ol topik we oli go stret wetem taem blong yumi tedei.
-
Yusum ol tul blong stadi, olsem diksonari, ol futnot, ol japta heding, mo Gaed long Ol Skripja.
Aesea 1; 3–5
Ol profet oli givim woning long saed blong sin mo promesem hop we i kam tru long fasin blong sakem sin.
Olsem ol profet long ol taem bifo, Aesea i gohed blong wonem ol pipol abaot ol situesen blong olgeta long saed blong spirit. Taem yu ridim Aesea 1; 3; 5, lukaotem ol toktok we oli yusum blong tokbaot wanem ol pipol oli stap gotru long hem long saed blong spirit (luk long, eksampol, Aesea 1:2–4, 21–23; 3:9, 16–17; 5:11–12, 20–23). ?Wanem ol semmak problem we yu luk long taem blong yumi tedei? Maet yu save lukaotem tu ol ves we oli givim woning abaot ol risal blong Ol man Isrel long ol situesen blong olgeta long saed blong spirit (olsem Aesea 1:7; 3:17–26; 5:5–7, 13–15).
Blong ademap long ol woning ia, Aesea i bin givim ol mesej blong hop blong pemaot man tru long Sevya (luk long, eksampol, Aesea 1:16–19, 25–27; 3:10; 4). ?Wanem nao yumi lanem abaot Lod, aot long ol mesej ia? ?Olsem wanem nao mesej ia blong Lod insaed long ol ves ia oli defren long wanem Setan i wantem yumi blong biliv long hem?
Olsem Aesea, ol profet tedei oli wonem yumi abaot sin mo ol risal blong olgeta, mo oli givim ol mesej blong hop we i kam tru long Jisas Kraes. ?Wanem ol eksampol we yu save tingting long hem? Maet yu wantem blong luklukbak long wan mesej blong jeneral konfrens we i pas, stap lukaotem ol woning mo ol promes olsem.
Aesea 2; 4; 11–12
God bae i mekem wan bigfala wok long ol las dei.
Plante long ol profesi blong Aesea, oli gat stret mining blong dei blong yumi tedei. Blong faenem olgeta, lukaotem ol toktok we oli tokbaot ol aksen toktok we bae i hapen long fiuja (olsem “bae i kam” o “bae i hapen”). Eksampol, lukaotem ol toktok ia taem yu stap ridim Aesea 2; 4; 11–12. Yu save taem tu blong riplesem olgeta wetem ol toktok we oli tokbaot ol aksen toktok blong naoia (olsem hem i o bae i). ?Wijwan long ol profesi ia we i givim insperesen long yu? ?Wanem nao yu lanem long ol profesi ia abaot Saeon, fasin blong stap bildim ol tempol mo kam tugeta blong Isrel?
Aesea 2:2–3 i stret speseli blong Ol Sent blong ol las dei ia. ?Olsem wanem ol profesi ia oli stap kam tru? ?Wanem nao yu lanem abaot ol “wei” mo “ol rod” insaed long haos blong Hem? (ves 3).
Luk tu long Aesea 5:26; “Antap Antap, antap tumas, flaeg blong God hem i flae,” STSP, pej 30.
Aesea 6
God nao i singaotem ol profet.
Long Aesea 6, talem bakegen stori blong taem we God i singaotem hem i kam wan profet. Taem yu stap ridim japta ia, ?wanem nao i tajem tingting blong yu long saed blong wanem we Aesea i stap gotru long hem? ?Olsem wanem japta ia i lidim wei we yu stap tingting long hem abaot Lod, ol profet blong Hem mo wok ia we God i singaotem olgeta blong mekem?
“Wan pikinini boe bae i bon long mifala, Bambae yu yu givim long mifala” (Aesea 9:6).
Aesea 7–9
God i promes blong sendem Jisas Kraes i kam olsem Sevya blong mi.
Long taem blong seves blong Aesea, Ol Man Isrel oli joen tugeta wetem Siria blong oli difendem olgeta agensem Asiria. Isrel mo Siria i bin wantem blong fosem Ahas, king blong Juda blong joenem tufala. Be Aesea i bin talem profesi finis se bae hemia i no save hapen mo i bin givim kaonsel long Ahas blong trastem Lod (Aesea 7:7–9; 8:12–13).
Taem we Aesea i givim kaonsel long Ahas, hem i talem sam profesi ia, we fulap oli save long ol, olsem olgeta profesi we oli stap long Aesea 7:14; 8:13–14; 9:2, 6–7. Hem i no klia tumas se wanem nao ol profesi ia oli minim long Ahas long tetaem ia, be oli stret long Jisas Kraes (luk tu long Matiu 1:21–23, 4:16, 21:44, Luk 1:31–33) Eksampol, ?from wanem Emanuel i wan gudfala taetel blong Sevya? (luk long Matiu 1:23) ?Olsem wanem nao Jisas Kraes i bin stap olsem wan “Kaonsela” o “Prins blong Pis” long yumi? (Aesea 9:6) ?Wanem moa yu lanem abaot Sevya long ol ves ia?
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Aesea 1:2–4, 16–19
From Jisas Kraes, mi save sakem sin mo kam klin.
-
Insaed long Aesea 1:2–4, yu mo ol pikinini blong yu i save faenem ol risen from wanem Lod i no glad wetem ol pipol. Tekem not long wei we oli komperem wetem ol animol insaed long ves 3—we hem i “masta” blong yumi? ?Olsem wanem nao yumi soem se yumi save Hem?
-
Blong luk hemia long Aesea 1:16–18, yu mo ol pikinini blong yu i save lukluk long wan samting we i red mo wan samting we i waet gud. O, yufala save wok tugeta blong wasem wan samting. ?Olsem wanem nao yumi no klin long saed blong spirit? ?Olsem wanem nao Jisas Kraes i stap helpem yumi blong kam klin? ?Wanem nao mi lanem abaot Sevya long ol ves ia? Serem wetem ol pikinini blong yu wanem filing i kam long yu abaot Hem mo wanem nao Hem i bin mekem blong yu.
Aesea 2:2–4
Insaed long tempol mi lanem abaot Jisas Kraes.
-
Aesea i tokbaot finis taem ia we “hil ya we haos blong mi i stap long hem” bae i pulum tingting blong pipol aot long “evri nesen” (Aesea 2:2). ?Olsem wanem nao yu save helpem ol pikinini blong yu blong oli filim glad blong stap go long haos blong Lod? Yu save invaetem olgeta blong dro wan pikja blong hom blong olgeta. Afta, ridim tugeta Aesea 2:2, mo invaetem olgeta blong droem wan pikja blong “haos blong Lod,” we hem i wan tempol. Ridim Aesea 2:3 tugeta. Invaetem olgeta blong ademap long ol pikja blong olgeta, plante pipol we oli stap kam long tempol, mo gat tu, ol famli blong olgeta.
-
Tugeta, yufala save ridim Aesea 2:2–3 mo faenemaot wan samting we i givim insperesen long yu mo ol pikinini blong yu blong go long tempol. Afta we yufala i ridim Aesea 2:4 tugeta, yufala save tokbaot olsem wanem tempol i givim pis long olgeta. Tingting blong singsing wan singsing abaot tempol, olsem, “I Love to See the Temple” (Children’s Songbook, 95). Helpem ol pikinini blong yu blong faenem ol toktok insaed long singsing ia, we i tijim, wanem i wan tempol mo wanem yumi stap mekem long tempol.
Sol Lek Tempol
Aesea 7:14; 9:6–7
Jisas Kraes i bin kam long wol blong stap olsem Sevya blong mi.
-
Blong introdiusum ol profesi blong Aesea abaot Kraes, yu mo ol pikinini blong yu i save tokbaot ol taetol blong ol pipol, olsem presiden, bisop o tija. ?Wanem nao ol taetol ia oli talem long yumi abaot ol pipol ia? Helpem ol pikinini blong yu blong lukaotem ol taetol nem we Jisas Kraes i gat, insaed long Aesea 7:14 mo 9:6–7 (luk tu long aktiviti pej blong wik ia). ?Wanem nao ol wanwan taetol ia oli tijim abaot Hem? ?Wanem bakegen nao yumi lanem abaot Jisas Kraes aot long ol ves ia?
-
Mo tu, yu save serem wetem ol pikinini blong yu “Profet Aesea” (insaed long Ol Stori long OlTesteman, 150–51). Stop wanwan taem, blong askem wanem Aesea i bin save abaot Jisas Kraes plante yia bifo Hem i bon. Afta, yu save yusum Matiu 1:21–23; Luke 1:31–33 blong tokbaot olsem wanem ol profesi blong Aesea insaed long Aesea 7:14; 9:6–7 oli bin kam tru.
1:18Isaiah the Prophet
Blong kasem moa aedia, luk long magasin blong Fren blong manis ia.