“21–27 Septemba. ‘From Samting Ya, Bambae Mi Mi Mekem Olgeta Oli Sek. Bambae Mi Stap Mekem Ol Samting blong Sapraes’: Aesea 13–14; 22; 24–30; 35,” Kam Folem Mi—Blong Hom mo Jos: OlTesteman 2026 (2026)
“21–27 Septemba ‘From Samting Ya, Bambae Mi Mi Mekem Olgeta Oli Sek. Bambae Mi Stap Mekem Ol Samting blong Sapraes,’” Kam Folem Mi: 2026
Tabu Bus, i kam long Brent Borup
21–27 Septemba: “From Samting Ya, Bambae Mi Mi Mekem Olgeta Oli Sek. Bambae Mi Stap Mekem Ol Samting blong Sapraes.”
Aesea 13–14; 22; 24–30; 35
Wan samting we Lod i askem ol profet blong mekem, hem i blong givim woning abaot ol risal blong sin. Long OlTesteman, plante taem, hemia i minim blong talem long ol man we oli gat ol rul long ol bigfala kingdom, se oli mas sakem sin. Hem i bin wan wok ia we i gat denja, be Aesea i no bin gat fraet, mo ol woning blong hem i go long ol kingdom blong dei ia—we i tekem Isrel, Juda, mo ol nesen raonabaot—oli bin tok stret mo oli bin klia (luk long Aesea 13–23).
Be, Aesea i bin gat tu wan mesej blong hop. Iven we ol taem we ol ples mo samting oli prapa lus evriwan long ol kingdom ia, olsem we hem i talem long profesi, oli bin hapen, Aesea i bin luk finis se bae i gat wan janis blong evri samting i kambak mo i kam niu. Lod bae i invaetem ol pipol blong Hem blong gobak long Hem. Bae Hem i mekem “ples we i sanbij nomo, we i hot tumas, bambae i gat bigfala lagun i stap long hem. Long graon we i drae we i drae, ol springwota bambae oli kamaot long hem” (Aesea 35:7). Bambae Hem i mekem “[wan wok blong sapraes]” (Aesea 29:14), mo bae i putumbak long Isrel, ol blesing ia we Hem i bin promesem olgeta. Aesea o eni narawan i no bin laef long tetaem ia blong luk gudfala wok ia. Be yumi stap luk tedei. Be wanem i tru, i we, !yumi pat long hem!
Ol aedia blong Stap Lanem Samting long Hom mo long Jos
Aesea 13:1–11, 19–2214:1–20
Hae tingting mo fasin blong wol bae i lus.
Long dei blong Aesea, Babilon i wan strong kingdom wetem wan man blong rul we i gat paoa. Naoia, Babilon i wan histri blong bifo. So from wanem nao mesej blong Aesea we i go long Babilon insaed long Aesea 13–14, i impoten long yumi tedei? From se Babilon i wan simbol blong hae tingting, griri mo sin, ol samting we oli stap raonem yet yumi tedei. Tingting abaot ol simbol taem yu stap ridim Aesea 13:1–11, 19–22; 14:1–20. Yu save stap tingting long ol kwestin olsem olgeta ia:
-
?Wanem samting yu luk se i semmak bitwin hae tingting blong king blong Babilon mo hae tingting blong Setan? (luk long Aesea 14:4–20; Moses 4:1–4). ?Wanem woning yu yu faenem we i blong yuwan, insaed long ol ves ia?
-
?Olsem wanem nao Sevya i givim “spel [long ol harem nogud blong yumi mo fraet blong yumi]”? (Aesea 14:3).
“Hem bambae i mekem we ded bambae i go lus olgeta” (Aesea 25:8).
Aesea 22:22–23; 24:21–23; 25:6–8; 26:19; 28:16
Jisas Kraes i Mesaea ia we oli talem se bae i kam.
Ol tijing blong Aesea, plante taem oli tokbaot misin blong Sevya, wetem sakrifaes blong Hem we i pem praes from sin, Laef Bakegen long Ded blong Hem, mo Seken Kaming. ?Wanem ol pat ia blong misin blong Hem we i kam long maen blong yu taem yu ridim ol ves ia: Aesea 22:22–23; 24:21–23; 25:6–8; 26:19; 28:16? ?Wanem nara ples long skripja bae yu yu faenem we i mekem yu yu tingbaot Sevya?
Givim ol janis long olgeta we oli stap lan blong serem testemoni abaot Jisas Kraes. “Blong stap wan tija blong gospel blong Jisas Kraes, i minim se blong helpem ol narawan oli andastanem mo dipen long tijing blong Hem, paoa blong pemaot man, mo stret lav blong Hem” (Tij Folem Wei blong Sevya, 8). Wan simpol wei blong mekem hemia evri taem we yu tij hem i blong askem wan kwestin olsem “Wanem nao yu faenem insaed long ol skripja long wik ia we i tijim yu wan samting abaot Sevya?” Afta, letem olgeta we oli stap lan, blong serem ol eksperiens blong olgeta mo mekem fet blong olgeta wanwan i kam moa strong.
Aesea 24:1–12; 28:1–8; 29:7–13; 30:8–14
Blong tanem yu i go longwe long Lod i mekem yu stap long denja long saed blong spirit.
Tru long sore blong Hem, Lod i sendem Aesea blong wonem ol kavenan pipol se oli stap go longwe long Hem. Luk sapos yu save faenem ol saen blong woning long saed blong spirit abaot hemia insaed long Aesea 24:5; 29:13; 30:8–12. ?From wanem ol fasin mo ol aksen ia oli gat denja long saed blong spirit?
Blong givim woning abaot fasin ia blong stap tanem yu i go longwe long Lod, Aesea i yusum sam fasin blong komperem samting we yu no save fogetem. Taem yu stap stadi long olgeta, askem yuwan olsem wanem taem yu tanem yu i go longwe long Lod i olsem:
-
Wan wol blong harem nogud mo i emti (Aesea 24:1–12).
-
Dring olsem gogo oli drong gud (Aesea 28:7–8).
-
Hanggri mo tosta (Aesea 29:7–10).
-
Wan brokbrok wol blong haos o graonpot (Aesea 30:13–14).
?From wanem i impoten long yu blong stap kolosap long Lod?
Aesea 29; 30:18–26; 35
Lod i save putumbak wanem we i lus o i brokbrok.
?Yu bin lusum wan samting we yu ting se bae yu neva faenem bakegen? O maet wan samting we i brok mo yu wari se bae yu neva save fiksim bakegen. Taem yumi tanem yumi go longwe long God, Setan i wantem yumi blong tingting se bae yumi neva save gobak o kam oraet bakegen. Be, Aesea i tokbaot sam gudfala samting we Lod bambae i mekem blong helpem yumi tanem yumi i gobak long Hem. ?Wanem nao yu lanem aot long Aesea 29:13–24; 30:18–26; 35 abaot Lod, lav blong Hem, mo paoa blong Hem? Yu save faenem wan toktok insaed long ol sentens ia we i givim hop long yu taem yu nidim hiling. Yu save luk tu insaed long mesej blong Sista Amy A. Wright “Kraes I Mekem I Kam Gud Samting we I bin Brok” (Liahona, Mei 2022, 81–84).
Wan wei we Lod i soemaot paoa mo sore blong Hem, hem i tru long Restoresen blong gospel blong Hem. Aesea 29 insaed long hem i gat samfala skripja we oli ron saedsaed long wanem i bin hapen long Restoresen. Eksampol:
-
Komperem Aesea 29:11–12 wetem 2 Nifae 27:6–26 mo Josef Smit—Histri 1:63–65.
-
Komperem Aesea 29:13–14 wetem Doktrin mo Ol Kavenan 4 mo Josef Smit—Histri 1:17–19.
-
Komperem Aesea 29:18–24 wetem taetol pej blong Buk blong Momon.
Long tingting blong yu, ?from wanem “gudfala wok” mo “sapraes wok” (Aesea 29:14) oli ol gudfala toktok blong eksplenem Lod i stap putumbak gospel blong Hem? ?Long wanem wei nao yu save help blong mekem ol profesi blong Restoresen i kam tru? Blong kasem ol aedia, luk insaed long mesej blong Elda Gerrit W. Gong “Evri Kantri, Famli mo Lanwis” (Liahona, Novemba 2020, 38–41).
Luk tu long “Restoresen blong Gospel blong Jisas Kraes we I Fulwan: Tu Handred Yia Ofisol Toktok I Go long Wol” (Gospel Laebri); “The Morning Breaks,” Hym, namba 1.
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Aesea 14:3; 25:8–9; 28:16
Jisas Kraes i save sevem mi aot long sin mo ded.
-
?Olsem wanem nao bae yu helpem ol pikinini blong yu blong oli luk Sevya insaed long ol raeting blong Aesea? Yu save helpem olgeta blong faenem ol toktok we oli rimaenem olgeta abaot Hem insaed long Aesea 14:3; 25:8; o 28:16. Oli save majem ol ves ia insaed long Aesea wetem ol nara ves we oli tij abaot Sevya, olsem Matiu 11:28–30; 1 Korin 15:53–57; Hileman 5:12. ?Wanem ol bigfala samting we Lod i bin mekem blong yumi?
-
Afta we yufala i ridim Aesea 25:8–9 tugeta, yufala save lukluk long ol pikja blong Sevya long Getsemane, long kros mo afta long Laef Bakegen long Ded blong Hem. Letem ol pikinini blong yu oli tokbaot wanem i stap hapen insaed long ol pikja mo from wanem oli lavem Jisas mo “glad from we hem i sevem yumi” (ves 9).
-
Yu save jusum blong talem long ol pikinini blong yu abaot taem we yu bin harem nogud from wan we yu lavem tumas i bin ded. Testifae abaot filing blong kamfot we i kam long yu tru long Jisas Kraes. Ol pikinini blong yu oli save dro wan fes we i stap krae mo afta, rapemaot ol wota blong ae taem, yufala i ridim Aesea 25:8 tugeta.
Bae Mi Mekem Wanem we Yu Yu Wantem, i kam long Ken Spencer
Aesea 25:4–6
Jisas i givim long mi “wan ples blong haed long strong win.”
-
?Yu mo ol pikinini blong yu i bin eksperiensem blesing blong stap sef long taem blong strong win o stap long sed long wan dei we i hot tumas? ?O, yu bin glad long wan kaekae taem we yu bin hanggri tumas? Tokbaot ol eksperiens ia taem yu stap ridim Aesea 25:4–6. ?Long wanem wei nao Jisas i olsem ol samting ia?
Aesea 29:11–18, 24
Restoresen blong gospel i wan “gudfala wok.”
-
Taem yu mo ol pikinini blong yu i ridim Aesea 29:14, serem wetem olgeta ol toktok we oli minim semmak samting olsem “gudfala wok” mo “sapraes wok.” Letem olgeta oli helpem yu blong faenem ol samting o ol pikja we oli ripresentem sam long ol gudfala wok blong Lod long ol las dei ia. Hemia i save tekem tu, wan kopi blong Buk blong Momon, wan pikja blong wan tempol, o wan pikja blong Fas Visen (i gat i stap long stat blong aotlaen ia). Afta invaetem ol pikinini blong yu blong oli save jusum wan aetem mo serem from wanem i wan gudfala wok long olgeta.
-
Wan singsing blong Restoresen blong gospel bae i go gud wetem Aesea 29, olsem “On a Golden Springtime” (Children’s Songbook, 88). Maet wan eksperiens blong yuwan we i save helpem ol pikinini blong oli andastanem wanem restoresen i stap minim. Eksampol, yu mo ol pikinini blong yu i save tokbaot wan samting we yu bin lusum mo olsem wanem yu faenem. Helpem ol pikinini blong yu blong komperem eksampol ia, i go wetem Restoresen blong gospel. Folem skripja ia Aesea 29:13–15, from wanem yumi nidim Restoresen? ?Wanem gudfala wok we Lod i stap mekem blong putumbak gospel blong Hem? (luk long aktiviti pej blong wik ia).
Blong kasem moa aedia, luk long magasin blong Fren blong manis ia.