“28 Septemba–4 Oktoba. ‘Yufala I Go Toktok Gud Long Ol Man blong Mi. Yufala i Leftemap Tingting blong Olgeta’: Aesea 40–49,” Kam Folem Mi—Blong Hom mo Jos: OlTesteman 2026 (2026)
“28 Septemba–4 Oktoba. ‘Yufala I Go Toktok Gud Long Ol Man blong Mi. Yufala i Leftemap Tingting blong Olgeta,’” Kam Folem Mi: OlTesteman 2026
Stap Hilim Blaen Man, i kam long Carl Heinrich Bloch, long Frederiksborg Museum blong National History
28 Septemba–4 Oktoba: “Yufala I Go Toktok Gud Long Ol Man blong Mi. Yufala i Leftemap Tingting blong Olgeta”
Aesea 40–49
“Leftemap Tingting” hem i fas toktok blong Aesea japta 40. Toktok ia i makem stat blong wan defren tiun, wan impoten mesej blong profet we i defren. Ol fasfala raeting blong Aesea oli bin stap givim woning long Isrel mo Juda se bae oli prapa spolem gud evriwan mo bae oli stap slef from ol sin blong olgeta. Be, ol profesi ia oli kam blong givim kamfot long Ol Jiu ova 150 yia long fiuja—afta we oli prapa spolem gud Jerusalem mo tempol, mo ol pipol oli stap prisena blong Babilon. Ol profesi ia oli go moa long fiuja bitim we i go long Ol Man Isrel we oli lus mo hat blong olgeta i brok. Ol profesi ia oli toktok long yumi, we samtaem tu, yumi filim se yumi lus, hat i brok mo yumi lusum rod.
Mesej blong Aesea i go long ol pipol blong hem mo long yumi i simpol nomo: “Yufala i no mas fraet” (Aesea 43:1). Evri samting i no lus. Lod i no fogetem yu, mo Hem i gat paoa ova long ol situesen we yu luk se yu nomo save kontrolem olgeta. ?Lod we i “wokem skae, wetem olgeta samting we i stap long hem” (Aesea 42:5), ?Hem i gat bigfala paoa bitim Babilon, bitim sin, bitim eni samting we i stap holemtaet yu i prisena? “Yufala i mas kambak bakegen long mi!” Hem i plis long yumi olsem, “!Mi mi mekem yufala i fri!” (Aesea 44:22). Hem i save hilim, putumbak, mekem i kam strong moa, fogivim, mo givim kamfot—eni samting we yu nidim, long situesen blong yu, blong Hem i pemaot.
Ol aedia blong Stap Lanem Samting long Hom mo long Jos
Aesea 40–49
Jisas Kraes i save givim kamfot mo hop long mi.
Taem Ol Man Isrel oli stap olsem prisena long Babilon, maet plante oli askem olgetawan sapos oli bin lusum ples blong olgeta blong oltaem, olsem wan pipol blong kavenan we God i jusum. Taem yu stap ridim Aesea 40–49, lukaotem ol skripja we bae oli bin givim yu kamfot mo hop. Blong wanwan skripja we yu faenem, tingting hevi mo raetemdaon wanem we Lod i save talem long yu long ol ves ia. Hemia samfala we yu save stat wetem:
-
40:11, 29–31:
-
41:10–13, 17–18:
-
42:6–7:
-
43:1–7, 25:
-
44:1–4, 21–24:
-
46:3–4:
-
49:7–16:
?Wanem nao yu filim se Lod i wantem yu blong save abaot Hem?
Bae yu save luksave se hym ia “Tijing blong Jisas Oli Stamba blong Yumi” (STSP, pej 6) i kamaot long ol toktok blong Aesea insaed long Aesea 41:10; 43:2–5; 46:4. Tingting blong stap singsing o lisin long hym ia, blong lukaotem ol toktok we i stret wetem ol toktok blong singsing mo ol ves ia blong Aesea. ?Olsem wanem nao Lod i bin mekem ol promes insaed long ol ves ia i kam tru long laef blong yu?
Luk tu long Patrick Kearon, “Hem I Raesap Finis wetem Paoa blong Hiling long Ol Wing blong Hem: Yumi Save Kam Moa Bitim Ol Man blong Win,” Liahona, Mei 2022, 37–40.
Yusum skripja we oli ademap. Samtaem yumi save andastanem moa gud OlTesteman sapos yumi putum insaed long stadi blong yumi ol ves we i kamaot long Buk blong Momon. Eksampol, ol profet insaed long Buk blong Momon, Nifae mo Jekob oli save kasem ol raeting blong Aesea insaed long ol buk we oli wokem long bras (luk long 1 Nifae 19:22–23), mo oli yusum ol profesi ia blong tij abaot Sevya. Blong lanem olsem wanem Nifae mo Jekob tufala i yusum Aesea 48–49 wetem ol pipol blong tufala, luk long 1 Nifae 22. Hemia i save helpem yu blong yusum ol japta ia long laef blong yuwan.
Taem yumi stap obei long Lod, yumi save gat pis olsem wan reva we i stap ron (Aesea 48:18
Aesea 40–49
“Yu yu wokman blong mi.”
Truaot long Aesea 40–49 Lod i stap toktok long “wokman” blong Hem mo ol “witnes” blong Hem. Ol toktok ia oli save stap tokbaot Jisas Kraes (luk long Aesea 42:1–7), i go wetem haos blong Isrel (luk long Aesea 45:4), mo i go wetem King Saeras we i bin letem ol pipol blong Jiu blong oli gobak long Jerusalem mo bildimbak tempol (luk long Aesea 44:26–28; 45:1–4). Mo tu, yu save tingting long olsem wanem ol sentens ia oli aplae long yu olsem wan wokman mo wan witnes blong Lod. Eksampol: tingting hevi long ol kwestin olsem:
Aesea 40:1–3, 9–11; 43:9–12. ?Long wanem wei nao yu yu wan witnes blong Jisas Kraes? ?Wanem ol “gud nius” we yu save serem olsem wan witnes blong Hem? Yu save pikjarem long maen se oli bin singaotem yu i go long ples blong witnes i stanap long hem, long taem blong wan kot long kot haos. Long kot tes ia, oli jajem Jisas Kraes from Hem i mekem klem ia we stap long Aesea 43:11 ?Wanem testemoni yu save givim blong sapotem wanem we Jisas i bin klemem? ?Wanem pruf nao long laef blong yu we bae yu soem?
Aesea 41:8–13; 42:6; 44:21. ?Wanem nao Lod i singaotem yu blong mekem? Tingting long ol koling blong Jos olsem ol narafala janis blong stap givim seves long Hem. ?Olsem wanem nao Hem “i putum mi” o i mekem yu rere blong kam wokman blong Hem? ?Olsem wanem nao Hem i sapotem yu taem yu givim seves?
Aesea 49:1–9 ?Wanem mesej nao yu faenem insaed long ol ves ia we i save help taem ol hadwok blong yu mo seves blong yu oli “no win, o oli blong nating nomo”? (ves 4).
Aesea 40:3–8, 15–23; 42:15–16; 47:7–11
Paoa blong God i moa bigwan bitim paoa blong wol.
Aesea i bin ripitim mo mekem ol pipol blong hem oli tingbaot se bigfala paoa blong God, i no gat wan samting i semmak long hem, iven sapos oli komperem long paoa ia blong wol we i stap raonem yumi. Lukaotem mesej ia taem yu stap ridim Aesea 40:3–8, 15–23; 42:15–16; mo 47:7–11 (teknot se japta 47 i go long hem we i holemtaet Isrel i prisena, we i Babilon). ?Wanem nao ol skripja ia oli stap tijim yu abaot ol samting blong wol ia? ?Wanem nao ol ves ia oli tijim yu abaot God? Tingting hevi se from wanem nao mesej ia, bae i impoten tumas long ol pipol blong Jiu we oli prisena i stap. ?From wanem i impoten tumas long yu?
Aesea 48:10; 49:13–16
Lod i save mekem mi kam klin evriwan tru long ol hadtaem blong mi.
Taem yu ridim Aesea 48:10, tingting hevi long “faea we i hot tumas, blong faenemaot se i gud, no i nogud,” blong yuwan. ?Olsem wanem nao Lod i stap mekem yu yu “kam klin evriwan”? Olsem wanem nao Aesea 49:13–16 i helpem yu taem yu stap safa long ol hadtaem?
Luk tu long “The Refiner’s Fire” (vidio), Gospel Library.
The Refiner's Fire
Blong kasem moa aedia, luk long ol magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Aesea 40:3–5
Mi save help blong mekem rere “rod blong Lod.”
-
Tingting long sam wei blong soem wanem i save minim blong “mekem rere [rod blong Lod],” olsem we oli tokbaot insaed long Aesea 40:3–5. Eksampol, yu mo ol pikinini blong yu i save stretem wan samting we i kruked, kliarem wan floa we samting i stap olbaot long hem, o kliarem wan rod we i gat tumas ston long hem. Mo tu, yu save soem ol pikja blong Jon Baptaes mo Josef Smit (luk long Gospel Art Buk, ol namba ia 35, 87). ?Olsem wanem nao oli bin mekem rod i rere blong Lod i kam? (luk long Luk 3:2–18; Doktrin mo Ol Kavenan 135:3 ?Olsem wanem nao yumi save help? Hemia i save kam wan janis blong tokbaot olsem wanem olgeta we oli gat Aronik Prishud oli help blong mekem rere rod blong Lod(luk long Doktrin mo Ol Kavenan 84:26–28).
Aesea 43:10
Mi save stap wan witnes blong Lod
-
Afta we tugeta yufala i ridim Aesea 43:10 , yufala i save tokbaot wanem i minim blong stap wan witnes. Serem wetem wanwan long yufala ol samting we yu bin eksperiensem we i mekem se yu save kam wan “witnes” blong—stap wan eksampol, wan kaekae we yu bin testem, wan ples we yu bin visitim, o wan man o woman we yu save. ?Hem i minim wanem blong stap wan witnes blong Lod? ?Wanem nao yumi save talem long ol narafala pipol abaot Hem?
Aesea 44:3–4; 45:8
Lod bae i “kapsaetem” ol blesing blong Hem long mi.
-
Afta we yufala i ridim ol ves ia, ol pikinini blong yu i save wotarem wan plant mo semmak taem, tokbaot ol blesing we Lod i bin kapsaetem long olgeta. ?Wanem nao i hapen long wan plant taem yumi givim wota long hem? ?Olsem wanem nao ol blesing blong Lod oli bin helpem yumi blong kam antap?
Ol “gudgudfala samting [o fasin blong yumi oli] olsem solwota we i stap brok long sanbij mo rif, we neva i save spel” (Aesea 48:18).
Aesea 48:17–18
Blong stap obei long ol komanmen blong God, i givim pis.
-
Ol pikja o ol vidio blong ol reva mo ol wef blong solwota i save helpem ol pikinini blong yu blong pikjarem long maen Aesea 48:18 (olsem ol pikja long aotlaen ia). Maet ol pikja blong yu bae oli glad blong stap muvmuvum ol han blong olgeta olsem wan reva mo ol wef blong solwota. ?Olsem wanem nao bae pis i semmak olsem wan reva? ?Olsem wanem nao stret mo gud fasin i save stap olsem ol wef? Tokbaot olsem wanem taem yu stap obei ol komanmen blong God, i bin helpem yu blong filim pis olsem wan reva o i strong olsem wan wef.
-
Tugeta, singsing wan singsing abaot ol komanmen, olsem “Keep the Commandments” (Children’s Songbook, 146–47). ?Wanem nao singsing ia i tijim yumi abaot from wanem yumi mas obei ol komanmen blong God?
Aesea 49:14–16
Lod bambae i neva fogetem mi.
-
Aesea 49:14–16 i save kam wan bigfala kamfot long ol pikinini blong yu long ol yia we i stap kam. Taem yu ridim ves 14, yu save tokbaot wanem i save mekem ol pipol oli filim se oli fogetem o sakemaot olgeta. ?Olsem wanem nao yumi save se Lod i no fogetem yumi?
-
Blong introdiusum ol ves 15–16, yu save askem ol pikinini blong yu abaot wan we bae oli neva fogetem hem, olsem wan memba blong famli o fren. Folem wanem we i stap long Aesea 49:15–16, ?from wanem bae Lod i neva fogetem yumi? Afta, yu save serem ol filing blong yufala abaot Jisas Kraes, wetem wanwan long yufala.
Blong kasem moa aedia, luk long magasin blong Fren blong manis ia.