“19–25 Oktoba. ‘Taem Mi No Wokem Yu Yet long Bel blong Mama blong Yu, Be Mi Mi Save Yu Finis’: Jeremaea 1–3; 7; 16–18; 20,” Kam Folem Mi—Blong Hom mo Jos: OlTesteman 2026 (2026)
“19–25 Oktoba. ‘Taem Mi No Wokem Yu Yet long Bel blong Mama blong Yu, Be Mi Mi Save Yu Finis,’” Kam Folem Mi: OlTesteman 2026
Jeremaea, i kam long Walter Rane
19–25 Oktoba: “Taem Mi No Wokem Yu Yet long Bel blong Mama blong Yu, Be Mi Mi Save Yu Finis”
Jeremaea 1–3; 7; 16–18; 20
Long fastaem, Jeremaea i no ting se bae hem i save kam wan gudfala profet. “Mi mi no save toktok,” hem i talem (Jeremaea 1:6). Be Lod i talem gud long hem: “Naoia, mi mi givim tok blong mi long yu” (ves 9). Jeremaea i filim se hem i wan “pikinini” we i no gat eksperiens (ves 6), be Lod i eksplenem se hem i rere finis bitim wanem hem i tingting long hem—Lod i bin odenem hem long koling ia iven bifo hem i bon i kam long wol ia (luk long ves 5). Mekem se Jeremaea i putumaot fraet blong hem, mo i akseptem koling ia. Hem i bin givim woning long ol king mo ol pris blong Jerusalem se, fasin ia blong priten blong stap tabu, bae i no sevem olgeta. “Pikinini” ia we i tingting se hem i no save toktok, i kam blong filim toktok blong God insaed long hat blong hem se i wan faea we i bon, mo hem i nomo save sarem maot blong hem (Jeremaea 20:9).
Stori blong Jeremaea i stori blong yu tu. God i bin save yu tu, bifo yu bon mo mekem yu rere from misin blong yu long laef ia. Wetem sam moa samting, wok ia i tekem wan samting we Jeremaea i bin luk finis: kam tugeta ia blong ol pipol blong God, wan afta wan, blong “tekem olgeta oli kam long Saeon” (Jeremaea 3:14). Mo iven sapos yu no save stret wanem blong mekem o talem, yu no mas fraet, … from Lod i talem se Hem i stap wetem yumi (Jeremaea 1:8, 19).
Blong gat wan bigfala pikja abaot buk blong Jeremaea, luk long “Jeremaea” insaed long Gaed long Ol Skripja.
Ol aedia blong Stap Lanem Samting long Hom mo long Jos
Jeremaea 1:4–19; 7:1–7; 20:8–9
Oli singaotem ol profet blong oli talem toktok blong God.
Pikjarem long maen se yu stap toktok long wan fren we i neva harem abaot ol profet, mo yu jusum blong eksplenem aedia ia wetem taem we God i singaotem Jeremaea blong kam wan profet insaed long Jeremaea 1:4–19. ?Wanem nao yu lanem insaed long ol ves ia we oli tijim wan samting abaot ol profet blong God? Mo tu, yu save lukluk insaed long Jeremaea 7:1–7; 20:8–9 mo wan singsing olsem “We Listen to a Prophet’s Voice” (Hym, namba 22).
Bae yu wantem tu blong tijim fren blong yu abaot profet we i stap laef tedei. ?I gat eni samting insaed long ol ves ia we i save help? Eksampol, ?wanem nao ol profet long dei blong yumi oli “pulumaot rus” o oli “brekemdaon”? ?Wanem nao oli “bildim” mo “stanemap”? (Jeremaea 1:10). ?Olsem wanem nao yu kam blong save se God nao i singaotem profet blong yumi we i stap laef tedei?
Luk tu long Ol Toktok blong Bilif 1:6, 9; “Why Do We Have Prophets?” (vidio), ChurchofJesusChrist.org.
Why Do We Have Prophets?
Jeremaea 1:5
God i bin save mi bifo mi bon i kam long wol ia.
?Wanem nao Jeremaea i lanem abaot hemwan insaed long Jeremaea 1:5? Olsem wan niufala profet we oli singaotem hem, ?from wanem nao infomesen ia i impoten long hem blong save?
Plante long ol samting we Jeremaea i bin lanem abaot hemwan insaed long Jeremaea 1:5 hem i tru tu abaot yu. God i bin save yu tu bifo yu bon mo i mekem yu rere from ol stret responsabiliti we oli blong yu. Blong lanem moa abaot laef blong yu bifo yu bon i kam long wol ia, ridim Alma 13:1–4; Doktrin mo Ol Kavenan 138:53–56; mo Ebraham 3:22–23. Yu save mekem lis blong ol trutok we yu faenemaot. ?From wanem nao infomesen ia i impoten blong yu save?
Blong lanem abaot olsem wanem ol trutok ia oli gat paoa long laef blong Elda Ahmad S. Corbitt, stadi long mesej blong hem “!Yu Save Karem Isrel I Kam Tugeta!” (Liahona, Mei 2021, 63–63). ?Olsem wanem nao, taem yu save abaot laef blong yu bifo laef long wol ia, i save jenisim wei blong yu blong stap laef long wol ia?
Hemia i wanem we Presiden Russell M. Nelson i bin talem abaot laef blong yu bifo laef long wol ia:
“Papa blong yu long Heven i bin save yu blong wan longfala taem. Yu, olsem boe o gel blong Hem, Hem i bin jusum yu blong kam long wol long taem ia, blong stap olsem wan lida long bigfala wok blong Hem long wol. Hem i jusum yu i no from ol pat blong bodi blong yu be from fasin blong yu long saed blong spirit olsem strong tingting, strong paoa long tingting, tru hat, tosta from trutok, hanggri from waes mo wan hat we i wantem blong givim seves long narawan.
“Yu bin developem sam long ol fasin ia long laef bifo laef ia. Ol narafala wan yu save developem olgeta long wol ia sapos yu traehad blong lukaotem olgeta” (“Decisions for Eternity,” Liahona, Nov. 2013, 107).
Tingting long sam situesen we bae yu fesem we maet hem i impoten long taem ia blong tingbaot ol trutok ia abaot laef blong yu bifo laef blong yu long wol ia. ?Wanem nao yu save mekem blong rimaenem yuwan abaot ol trutok ia?
Luk tu long Russell M. Nelson, “Decisions for Eternity,” Liahona, Nov. 2013, 106–9; Topics and Questions, “Foreordination,” “Premortal Life,” Gospel Library.
Insaed long Jeremaea 2:13, Lod i komperem laef blong ol pipol long saed blong spirit wetem “tank we i brok” mo i komperem Hemwan olsem “spring wota we i save givim laef.”
Jeremaea 2; 7
“Oli sakemaot mi mi olsem wan springwota we i save givim laef.”
Long draeples we Ol Man Isrel oli bin stap laef long hem, ol pipol oli putumgud gudfala wota we oli nidim tumas insaed long ol bigfala tank andanit graon we oli singaotem, lasitern. Long tingting blong yu, ? “tank we i brok” we oli tokbaot long Jeremaea 2:13 hem i simbol blong wanem? ?From wanem nao, blong kasem wota long wan springwota, i moa gud bitim blong stap dipen long lasitern [tank]? ?Hem i minim wanem blong ronwe long “springwota we i save givim laef”? Taem yu ridim Jeremaea 2 mo 7, luk olsem wanem ol pipol oli stap ronwe long wota we i save givim laef, blong Lod (luk long eksampol long, Jeremaea 2:26–28; 7:2–11). ?From wanem “wota we i givim laef” i wan gud simbol blong wanem we Sevya i givim long yu? Tingting long olsem wanem nao yu yu stap kasem wota we i stap givim laef.
Jeremaea 7 i stap tokbaot ol pipol we oli stap kam insaed long “haos blong Hae God ya… blong mekem wosip,” be ol aksen blong olgeta i no stret wetem fasin blong olgeta blong stap fetful (luk long ol ves 2–11). ?Wanem mesej nao yu yu filim se Lod i gat blong yu insaed long ol ves 21–23?
Yusum ol samting long lesen blong yu. Oltaem ol profet blong Lod oli stap komperem ol trutok long saed blong spirit i go wetem ol samting we yumi save. Tingting blong stap mekem semmak taem yu lanem samting mo tijim gospel. Eksampol, blong pikjarem long maen wanem we i hapen insaed long Jeremaea 2:13, yu save fulumap wota insaed long wan kontena we i krak o i bin brok o stap dring wota long wan springwota. Long wanem wei nao Jisas i olsem “springwota we i save givim laef”? Jeremaea 2:13 ?Olsem wanem bae yumi dring wota we i givim laef we i kam long Hem?
Jeremaea 3:14–18; 16:14–21
Lod i stap karem i kam tugeta ol pipol blong Hem.
Insaed long Jeremaea 16:14–15, Jeremaea i bin komperem kam tugeta blong Isrel long ol las dei ia i go wetem Eksodas blong Isrel long Ijip. Long tingting blong yu, ?from wanem bae kam tugeta ia i moa impoten long ol pipol blong God bitim Eksodas?
?Wanem nao Jeremaea 3:14–18; 16:14–21 i tokbaot abaot olsem wanem kam tugeta ia i stap hapen?
Long mesej blong hem “Hope of Israel,” Presiden Russell M. Nelson, olsem Jeremaea, i bin tijim se kam tugeta blong Isrel “hem i samting we i moa impoten we i stap tekem ples tedei” (worldwide youth devotional, June 3, 2018, Gospel Library). Ridim o lisin long mesej blong hem, mo luk sapos yu save faenemaot (a) olsem wanem Presiden Nelson i talem mining blong kam tugeta blong Isrel, (b) olsem wanem hem i tokbaot hamas hemia i impoten, mo (c) olsem wanem yu save pat long kam tugeta ia.
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Jeremaea 1:5
Papa long Heven i bin save mi, bifo mi bon i kam long wol ia.
-
Blong introdiusum impoten trutok we oli bin tijim insaed long Jeremaea 1:5, yu save soem pikja blong wan bebi long ol pikinini blong yu (o sapos i posibol, yufala i save lukluk ol pikja blong ol pikinini blong yu taem oli bebi). Askem ol pikinini blong yu sapos oli save weaples oli bin stap long hem bifo oli bin bon i kam long wol ia. Mo tu, yufala i save singsing tugeta long wan singsing we i stap tij abaot laef blong yumi bifo laef long wol ia olsem, “I Lived in Heaven” (Children’s Songbook, 4).
-
Sapos ol pikinini blong yu oli wantem blong lanem moa, yu save helpem olgeta blong faenem “Laef bifo Laef long Wol Ia” insaed long Gaed long Ol Skripja. Oli save lukaotem ol ansa blong “huia,” “wetaem,” mo “wanem” ol kwestin abaot laef bifo laef long wol ia.
Jeremaea 1:4–19
Oli singaotem ol profet blong oli talemaot ol toktok blong Lod.
-
Tingting blong stap soem ol pikja blong profet we i stap laef tedei o ol profet insaed long ol skripja (yu save faenem sam insaed long ol magasin blong Jos, mo Gospel Art Buk, mo Kam Folem Mi). Askem ol pikinini blong yu abaot wanem nao oli save abaot ol profet ia.
-
Blong tij abaot wanem ol profet oli mekem, yu save jusum sam ves we oli save help insaed long Jeremaea 1, olsem ol ves 5, 7, 10, mo 19. Wanwan long ol pikinini blong yu oli save jusum wan long ol ves ia, ridim, mo serem wan samting we oli lanem abaot ol profet.
Jeremaea 16:14–16
Mi save helpem ol pikinini blong Papa long Heven blong kambak long Hem.
-
Taem yu stap ridim Jeremaea 16:16, ol pikinini blong yu oli save priten blong stap “fising” o “lukaotem” ol samting raon long rum. Presiden Russell M. Nelson i bin komperem ol man blong pulum fis mo ol man blong sutum animol blong bus insaed long ves ia, wetem ol misinari (luk long“The Gathering of Scattered Israel,” Liahona, Nov. 2006, 81). ?Wanem nao ol misinari oli stap mekem? ?Olsem wanem nao yumi save help blong “fising” mo “lukaotem” Isrel we i seraot olbaot? (luk long“A Message for Children from Presiden Russell M. Nelson” [vidio], ChurchofJesusChrist.org).
3:30Video: A Message for Children from President Russell M. Nelson
Jeremaea 18:1–6
Mi save letem Lod i lidim laef blong mi, olsem wan man blong mekem graonpot i sepem graonpot.
-
Blong luklukgud long ol ves ia, yufala i save toktok raon o soem olsem wanem oli stap mekem graonpot (luk ol pikja long en blong aotlaen ia). ?Wanem mesej nao Lod i givim long yumi insaed long Jeremaea 18:1–6? ?Hem i minim wanem blong stap olsem graon ia long han blong Lod? (luk tu long Aesea 64:8). Blong luk wan nara stori we i komperem yumi long graon blong man blong wokem graonpot, luk long mesej blong Elda Richard J. Maynes “The Joy of Living a Christ-Centered Life” (Liahona, Nov. 2015, 27–30).
Blong kasem moa aedia, luk long magasin blong Fren blong manis ia.