“5–11 Oktoba. ‘Olgeta Samting We I Stap Mekem Yumi Harem Nogud, Hem I Karem Olgeta Evriwan’: Aesea 50–57,” Kam Folem Mi—Blong Hom mo Jos: OlTesteman 2026 (2026)
“5–11 Oktoba. ‘Olgeta Samting We I Stap Mekem Yumi Harem Nogud, Hem I Karem Olgeta Evriwan,’” Kam Folem Mi: OlTesteman 2026
Oli Stap Jikim Kraes, i kam long Carl Heinrich Bloch
5–11 Oktoba: “Olgeta Samting We I Stap Mekem Yumi Harem Nogud, Hem I Karem Olgeta Evriwan”
Aesea 50–57
Truaot long seves blong hem, Aesea i tokbaot wan strong man blong sevem ol man. Olgeta profesi ia, bae oli mas impoten tumas ia long Ol Man Isrel plante handred yia afta, taem we oli bin stap prisena long Babilon. Wan we bae i brekemdaon ol wol blong Babilon ia, i tru, bae hem i wan strong man blong faet. Be hemia i no kaen Mesaea ia we Aesea i bin tokbaot long ol japta 52–53: “Nao yumi lukluk nogud long hem, yumi tanem baksaed long hem. Hem i wan man we i harem nogud plante taem, mo i savegud olgeta samting we i stap mekem man i harem nogud. Yumi tanem fes blong yumi, olsem we hem i nating nomo, mo i no gat man i save lukluk i go long hem Be yumi, yumi ting se God nomo i stap panisim hem, hem nao i stap kilim hem, i stap mekem hem i harem nogud” (Aesea 53:3–4).
Taem Hem i bin sendem kaen man ia blong mekem man i kam fri, God i tijim yumi abaot tru fasin blong kam fri. Blong sevem yumi long strong rul, mo hadtaem, God i bin sendem Wan ia we Hemwan “oli mekem i strong tumas long hem, mo … [hem i harem nogud].” Long ples we sam oli ting blong luk wan laeon, be Hem i sendem wan smol sipsip i kam (luk long Aesea 53:7). I tru. Ol wei blong God oli no ol wei blong yumi (luk long Aesea 55:8–9). Jisas Kraes i mekem yumi kam fri, i no taem Hem i jes openem doa blong kalabus, be taem Hem i kam tekem ples blong yumi. Hem i karemaot ol jen blong krae sore mo harem nogud blong yumi, mo i tekem olgeta long Hemwan (luk long Aesea 53:4–5,12). Hem i no go stap longwe mo stap sevem yumi. Hem i stap safa wetem yumi, tru long ol aksen “[wan lav we i neva finis samtaem]” mo “[bae i neva gowe long yufala]” (Aesea 54:8, 10).
Ol aedia blong Stap Lanem Samting long Hom mo long Jos
Aesea 50–52
Fiuja i gud tumas long ol pipol blong Lod.
Iven we Ol Man blong Isrel oli spendem plante yia olsem prisena—mo iven we oli bin prisena from oli no mekem gud joes—Lod i bin wantem olgeta blong luk i go long fiuja wetem hop. ?Wanem nao yu faenem insaed long mesej blong Aesea we i stap givim hop long yu? Wan tebol olsem hemia ia i save helpem yu stadi:
|
Wanem mi lanem abaot God luk long eksampol, Aesea 50:2, 5–9; 51:3–8, 15–16; 52:3, 9–10) | |
|
Ol mesej blong hop (luk long eksampol, Aesea 50:9; 51:3–5, 11–12, 22–23; 52:9–10) | |
|
Wanem mi save mekem blong hop i kam tru (luk long eksampol, Aesea 50:10; 51:1–2, 6–9; 52:1–3, 9–11) |
Luk tu long Mosaea 12:20–24; 15:13–18; 3 Nifae 20:29–46; Doktrin mo Ol Kavenan 113:7–10; Russell M. Nelson, “Akseptem Fiuja Wetem Fet,” Liahona, Nov. 2020, 73–76.
From Lav, i kam long Angela Johnson
Helpem olgeta we oli stap lan blong oli kam long Jisas Kraes. “I no gat wan samting we yu mekem olsem wan tija bae i blesem olgeta we oli stap lan moa bitim we yu helpem olgeta oli save abaot Papa long Heven mo Jisas Kraes mo filim lav blong Olgeta” (Tij Folem Wei blong Sevya, 8). Taem yu stap rere blong tijim Aesea 50–57 long ol narawan, tingting long olsem wanem yu save helpem olgeta blong luk ol koneksen bitwin ol jalenj blong Isrel, ol profesi blong Aesea abaot Kraes, mo stap kasem tabu help blong wetem ol hadtaem blong olgetawan.
Aesea 53
Jisas Kraes i tekem long Hemwan ol sin mo harem nogud blong mi.
Samfala japta long skripja oli tokbaot misin ia blong pemaot man, we i blong Jisas Kraes; oli tokbaot hemia long wan moa naes wei long Aesea 53. Tingting long ol aktiviti olsem olgeta ia blong andastanem moa gud mo yusum ol tijing ia we oli gat paoa:
-
Tingting hevi o toktok raon long olsem wanem, oltaem ol stori mo ol muvi oli soem ol hiro we oli stap sevem ol pipol. Komperem ol samting we oli soem olgeta mo ol samting we oli soem Sevya insaed long Aesea 53.
-
Afta we yufala i ridim evri ves, stop smol, mo lukluk gud long wanem we Sevya i bin safa—ol harem nogud, mo ol fasin blong brekem loa we Hem i bin tekem—blong evri pipol, mo speseli, blong yu. Maet yu save riplesem ol toktok olsem “yumi” mo “blong yumi” wetem “mi” mo “blong mi” taem yu stap rid i go. ?Wanem filing o tingting nao, ol ves ia oli givim long yu olsem insperesen?
-
Tingting blong stap wajem vidio “My Kingdom Is Not of This World” (Gospel Library), mo tingting hevi long olsem wanem ol profesi insaed long Aesea 53 oli bin kam tru. ?Wanem nao long ol krae sore mo harem nogud ia we Sevya i stap tekem long bihaf blong yu?
5:25My Kingdom Is Not of This World
-
Faenem ol pikja blong ol samting we oli hapen raon long taem blong Atonmen blong Jisas Kraes (luk long Gospel Art Buk, ol namba ia 56–60). Afta, yu save faenem ol sentens insaed long Aesea 53 we i tokbaot wanem we i hapen long ol pikja ia. ?Wanem nao ol tijing ia oli givim insperesen long yu blong mekem?
Luk tu long “Yu Luk Ridima I Ded long Kros,” STSP, pej 16.
Aesea 54; 57:15–19
Jisas Kraes i wantem mi blong gobak long Hem.
Yumi evriwan i gat ol taem we yumi filim se yumi stap longwe long Lod from ol sin o ol wiknes blong yumi. Sam, oli givap hop ia se bae Hem i fogivim olgeta wan dei. Aesea 54 mo 57 oli ol gudfala japta blong ridim, blong mekem tingting blong yumi i kwaet mo blong leftemap tingting blong yumi long ol kaen taem olsem. Speseli insaed long Aesea 54:4–10; 57:15–19, ?wanem ol toktok nao oli tijim yu abaot olsem wanem Sevya i filim abaot yu? ?Wanem defren samting nao hemia i mekem insaed long laef blong yu taem yu yu save ol samting ia abaot Hem?
Presiden Dieter F. Uchtdorf i tijim:
I nomata se laef blong yumi i go rong olsem wanem. I no impoten tumas se sin blong yumi i doti olsem wanem, se konkon i bigwan hamas, se yumi stap yumiwan, o hat i brok. Iven olgeta we oli no gat hop, we oli laef wetem trabol tingting, we oli salem yumi, we oli salem tru fasin blong olgeta, o tanem olgeta agensem God, oli save bildimap olgeta bakegen
“Glad nius blong gospel i olsem: from plan we i no save finis blong stap glad, we Papa long Heven we i gat lav i givim, mo tru long Atonmen blong Jisas we i Kraes, Hem i save pemaot yumi long ples we yumi foldaon long hem mo mekem yumi kam klin gud bakegen, be tu, yumi save progres i go bitim wanem man i save tingting long hem mo kasem laef we i no save finis wetem Hem mo kam pat long bigfala glori blong God” (“He Will Place You on His Shoulders and Carry You Home,” Liahona, May 2016, 102).
Luk tu long Patrick Kearon, “Tingting blong God I blong Karem Yu Kam Hom,” Liahona, Mei 2024, 87–89.
Aesea 55–56
Lod i stap invaetem evriwan blong “yufala i holem ol tok blong promes blong mi.”
Blong plante jeneresen, Isrel i bin stap olsem kavenan pipol blong God. Be, plan blong God, oltaem insaed i gat moa bitim wan nesen, from se “[olgeta]evriwan we i tosta,” Lod i invaetem olgeta blong “kam” (Aesea 55:1). Kipim hemia long maen blong yu taem yu stap ridim Aesea 55 mo 56, mo tingting hevi long wanem nao i minim blong stap wan pipol ia blong God. ?Wanem nao hem i mesej blong God long olgeta we oli filim se oli seperet long Hem blong oltaem? (Aesea 56:3). Tingting blong makem ol ves ia we oli tokbaot ol fasin mo ol aksen blong olgeta we oli “stap holem ol tok blong promes” (luk long Aesea 56:4–7).
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Aesea 51–52
Lod i invaetem mi blong “[mi] kam strong bakegen.”
-
Bae i wan gud samting ol pikinini blong yu oli mekem tugeta blong oli faenemaot ol sentens olsem “wekap,” “girap,” mo “kam long paoa blong yu” insaed Aesea 51:9, 17; 52:1–2, 9 afta, oli save aktem ol toktok ia. Afta we oli mekem olsem, yu save tokbaot wanem i minim blong stap wekap, girap mo kam long paoa blong yu, long saed blong spirit. ?Wanem nao Lod i stap askem long yumi blong mekem long ol ves ia?
-
Mo tu, ol pikinini blong yu oli save ridim Aesea 51:1, 4, 7 mo faenemaot, huia Lod i stap toktok long olgeta mo wanem Hem i wantem olgeta blong mekem. ?Wanem i minim blong “lisin gud” long Lod? ?Olsem wanem nao yumi stap soem long Lod se yumi “lisin gud” long Hem?
Aesea 53:3–9
Jisas Kraes i tekem long Hemwan ol sin mo harem nogud blong mi.
-
Yu mo pikinini blong yu i save lukluk long sam pikja we oli sam soem safaring mo ded blong Jisas Kraes (luk long eksampol, Gospel Art Buk, ol namba ia 56, 57, 58). Afta, tugeta, yufala save ridim Aesea 53:3–6, 9 mo lukaotem ol toktok we oli stap tokbaot wanem we i stap hapen long ol pikja ia. Helpem ol pikinini blong yu blong andastanem se Aesea i bin serem ol trutok ia blong handred yia i pas finis bifo oli hapen. ?From wanem nao i impoten blong ol pipol oli mas save ol samting ia plante plante ia bifo i hapen? (luk long Alma 39:15–19
-
Afta we yufala i rid long Aesea 53:4, “Olgeta samting we i stap mekem yumi harem nogud, hem i karem olgeta evriwan,” ol pikinini blong yu oli save traem blong leftemap wan hevi samting (o priten blong leftemap wan). Tokbaot olsem wanem “sobodi” mo “filing blong harem nogud” o blong no glad i save filim, olsem se, oli hevi mo i had blong karem. ?From wanem nao Jisas i karem “ol harem nogud,” “ol sobodi,” mo “ol rabis fasin” o ol sin blong yumi? (luk tu long Alma 7:11–12).
Aesea 55:6
Mi save lukaotem Lod mo singaotem Hem.
-
Blong tijim ol pikinini blong yu abaot Aesea 55:6, yu save haedem pikja blong Jisas samples insaed long rum. Yu save invaetem ol pikinini blong yu blong faenem ol pikja mo talemaot wan wei we oli save “lukaot … mo yufala i save faenem hem.” Singsing wan singsing olsem “Seek the Lord Early” (Children’s Songbook, 108) we i save givim ol aedia long olgeta. Afta, yu save askem wan long ol pikinini blong haedem wan pikja mo ripitim aktiviti ia.
Aesea 55:8–9
Ol wei blong Lod oli moa hae bitim blong mi.
-
Afta we yu ridim Aesea 55:9, bae i wan gud samting blong mekem wetem ol pikinini blong yu blong oli stanap long wan stul mo tokbaot olsem wanem ol samting oli luk defren taem yu yu stap “moa hae.” O oli save droem wan pikja blong wanem we Aesea 55:9 i minim long olgeta. Afta, yu toktok raon long sam long ol wei blong Lod we oli hae bitim blong yumi. Eksampol: ?Wanem i wei blong Hem blong tritim ol man we oli mekem sin) (luk long Mak 2:15–17). ?Wanem i wei blong Hem blong stap lidim ol narafala man? (luk long Matiu 20:25–28). Serem wetem ol pikinini blong yu, olsem wanem yu bin lanem blong trastem ol tingting mo ol wei blong Hem we oli hae moa.
Blong kasem moa aedia, luk long magasin blong Fren blong manis ia.