“12–18 Oktoba. ‘Ol Man blong Mi! Bambae Mi Mi Kam long Taon Ya Jerusalem’: Aesea 58–66,” Kam Folem Mi—Blong Hom mo Jos: OlTesteman 2026 (2026)
“12–18 Oktoba. ‘Ol Man blong Mi! Bambae Mi Mi Kam long Taon Ya Jerusalem,’” Kam Folem Mi—Blong Hom mo Jos: OlTesteman 2026
Jisas Insaed long Laet blong Hem, i kam long Greg Olsen
12–18 Oktoba: “Ol Man blong Mi! Bambae Mi Mi Kam long Taon Ya Jerusalem”
Aesea 58–66
Long stat blong seves blong Hem, Jisas Kraes i bin visitim wan haos blong prea long Nasaret, we Hem i bin groap long hem. Hem i stanap long ples ia blong ridim ol skripja, i openem buk blong Aesea, mo i ridim wanem we, tedei, yumi save olsem Aesea 61:1–2. Nao, hem i anaonsem: “Tedei, long taem ya we yufala i stap lesin … God i stap mekem ol samting we tok ya i talem, oli kamtru.” Hemia i wan long ol stret tok we Sevya i bin talem, se Hem nao God i bin Jusum Hem, Hem we bae i hilim ol hat we oli brokbrok, mo blong talemaot long ol man se bae oli kam fri. (luk long Luk 4:16–21). Skripja ia, i tru, i kamtru long dei ia. Mo, olsem plante nara profesi blong Aesea, hem i kamtru long taem blong yumi tedei. Sevya i gohed blong hilim ol brokbrok hat we oli stap go long Hem. I gat yet plante we oli prisena mo oli nid blong kam fri. Mo i gat wan fiuja blong glori blong stap rere from—wan taem we Lod bae i “mekem niufala heven mo niufala wol bakegen,” (Aesea 65:17) mo “hem bambae i mekem we yumi kam stret man, mo we yumi stap presem hem long fes blong ol man blong ol narafala kantri” (Aesea 61:11). Taem yumi ridim Aesea, i openem ae blong yumi long wanem Lod i bin mekem finis, wanem Hem i stap mekem naoia, mo wanem bambae Hem i mekem yet blong ol pipol blong Hem.
Ol aedia blong Stap Lanem Samting long Hom mo long Jos
Aesea 58:3–12
Fasin blong livim kaekae i bildimap paoa long saed blong spirit mo stap blesem ol pipol we oli stap nid.
?From wanem eniwan i no save volontia blong no kakae taem we i gat kaekae i stap? Taem yu stadi long Aesea 58:3–12, yu save tingting long ol risen blong stap fast—mo tu wetem ol risen blong Lod blong stap givim loa ia. Hemia sam narafala kwestin blong tingting hevi long olgeta:
-
?From wanem samtaem fasin blong livim kaekae, man i luk olsem wan hevi samting blong mekem bitim wan blesing? (luk long Aesea 58:3–5). ?Olsem wanem nao ol tijing blong Lod insaed long japta ia i jenisim tingting ia [wan hevi samting blong mekem] long yu?
-
?Wanem nao i minim blong “katemaot ol rop blong nogud fasin” mo “brekem evri yok”? Aesea 58:6 ?Olsem wanem nao fasin blong livim kaekae i blesem ol narawan? (luk long ves 7).
-
?Long wanem wei nao, fasin blong livim kakae i tekem ol blesing i kam we oli stap tokbaot long Aesea 58:8–12
Insaed long mesej ia “?I No Hemia Nao Fasin blong Livim Kakae we Mi Bin Jusum?” (Liahona, Mei 2015, 22–25), i serem samfala eksampol long wei we ol pipol oli gat blesing ia taem oli bin livim kakae mo kasem fas ofring. ?Yu yu bin witnesem ol semmak blesing long laef blong yu?
Luk tu long “Bless Our Fast, We Pray,” Hym, namba 138; Topics and Questions, “Fasting and Fast Offerings,” Gospel Library.
Kam blong save gud ol pipol we yu stap tijim. Blong stap olsem wan tija we i olsem Kraes i blong yu kam blong save moa abaot ol pipol we yu stap tijim mo traehad blong andastanem wanem i stap long hat blong olgeta Yu save faenem wanem i bes wei we oli stap lan. Yu save askem ol kwestin, lisin gud mo lukluk gud. Antap long evriwan, prea blong kasem andastaning ia we Spirit nomo i save givim. Taem yu kam blong save gud wan man, yu save stap long wan moa gud ples blong helpem hem faenem mining mo paoa blong hemwan insaed long gospel blong Jisas Kraes. Taem yu andastanem gud tosta blong wan man, Spirit bae i tijim yu hao blong yu karemaot tosta ia wetem wota blong laef blong Sevya” (Tij Folem Wei blong Sevya, 13).
Aesea 58:13–14
Blong givim ona long Lod long Sabat, i tekem glad i kam.
?Sabat dei “i wan dei blong glad” blong yu? Taem yu stadi long Isaiah 58:13–14, tingting long olsem wanem yu save faenem moa glad long dei ia blong Lod. Eksampol, ?i minim wanem blong tanem yu “aot long ol samting we i mekem yu harem gud long tabu dei blong [Hem]”? ?Wanem nao i defren bitwin “[stap glad] long yuwan long Lod” mo “stap mekem wei blong yu nomo”?
Luk tu long Russell M. Nelson, “The Sabbath Is a Delight,” Liahona, May 2015, 129–32.
Aesea 59:9–21; 61:1–3; 63:7–9
Jisas Kraes I Sevya mo Ridima blong Mi.
Aesea 58–66 i gat plante refrens long misin ia blong Jisas Kraes, we i blong pem praes from sin. Lukaotem olgeta taem yu stap stadi. Speseli, tekem not long ol taetol mo ol toktok we oli yusum blong tokbaot Sevya. Eksampol:
-
Wanem filing mo tingting i kam long yu abaot mining blong toktok ia “man ia we bae i toktok long bihaf blong yumi” insaed long Aesea 59:16–21? ?Olsem wanem nao Sevya i winim ol situesen we oli tokbaot insaed long ol ves 9–15?
-
Taem Jisas Kraes i anaonsem long ol pipol blong Nasaret se hem i Mesaea, Hem i kwotem toktok we i stap long Aesea 61:1–3 (lukluk long Luk 4:16–21; luk tu long vidio “Jesus Declares He Is the Messiah,” Gospel Library). ?Olsem wanem nao Jisas i bin blesem yu mo ol narawan, long ol wei we oli tokbaot long ol ves ia? ?Olsem wanem nao Hem i bin givim ol samting we oli naes, be i no ol asis?
3:24Jesus Declares He Is the Messiah
-
?Wanem nao sam fasin blong lav blong Lod” we yu save “talem”? (luk long Aesea 63:7–9).
-
?Wanem nara refrens long Sevya yu yu faenem long Aesea 58–66?
Luk tu long Mosaea 3:7; Doktrin mo Ol Kavenan 133:46–53.
Wan Presen we I Laeti kam long Eva Timothy
Aesea 60; 62
“Mi mi Hae God, mi nomo bambae mi laet blong yufala, gogo i no save finis.”
Aesea 60 mo 62 oli stap tokbaot laet mo tudak, ol ae mo fasin blong luk, blong stap tijim wei we gospel blong Jisas Kraes bambae i blesem wol ia long ol las dei. Lukaotem ol aedia ia long Aesea 60:1–5, 19–20; 62:1–2. Taem yu stap ridim ol japta ia, tingting hevi long wei we God i stap pulum tugeta ol pikinini blong Hem aot long tudak i go long laet blong Hem. ?Wanem nao rol blong yu long wok ia?
Luk tu long 1 Nifae 22:3–12; 3 Nifae 18:24; Doktrin mo Ol Kavenan 14:9; Bonnie H. Cordon, “Blong Oli Save Luk,” Liahona, Mei 2020, 78–80.
Aesea 64:1–5; 65:17–25; 66
Kraes bambae i rul long wol ia long taem blong Mileniom.
Aesea i tokbaot wan wei taem we “ol trabol ia we oli kasem yufala bifo, bambae oli finis olgeta, yufala i nomo save tingbaot olgeta” (Aesea 65:16). I nomata we yumi luk se profesi ia i kam blong mekem plante samting i kamtru, long ful mining blong hem, dei ia i stap kam yet—taem Jisas Kraes bambae i kambak. Aesea i tokbaot dei ia long fiuja long Aesea 64:1–5; 65:17–25; 66. Tek not long hamas taem nao hem i yusum ol toktok olsem “glad” mo “stap glad.” ?From wanem kambak blong Sevya ia, i wan dei blong yu yu stap glad long hem? ?Wanem nao yumi save mekem blong rere from taem ia we bae Hem i kam?
Luk tu long Ol Toktok blong Bilif 1:10; Russell M. Nelson, “Fiuja blong Jos: Stap Mekem Wol I Rere blong Seken Kaming blong Sevya,” Liahona, Epril 2020, 6.
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Aesea 58:6–11
Fasin blong livim kakae i blesem mi mo ol narafala man we oli stap long nid.
-
Maet bes wei blong givim paoa long tingting blong ol pikinini blong livim kaekae—taem oli rere—i blong helpem olgeta blong andastanem ol stamba tingting blong Lod long loa ia. Tingting blong stap ridim tugeta Aesea 58:6–11 blong faenem ansa blong ol kwestin ia: ?From wanem yumi livim kaekae? ?Hao nao yumi livim kaekae? Mo tu, yu save lukaotem insaed long “Fast, Fasin blong Livim kaekae” insaed long Gaed blong Ol Skripja.
-
Sapos yu bin gat wan eksperiens wetem fasin blong livim kaekae we i gat mining, serem wetem ol pikinini blong yu. Mo tu, yu save askem long olgeta, olsem wanem bae oli save eksplenem long wan fren se from wanem Lod i bin givim loa ia long yumi.
Aesea 58:13–14
Sabat i save kam wan dei blong glad long mi.
-
Afta we yu ridim Aesea 58:13–14, yu save poenem long ol dei blong wik long wan kalenda mo invaetem ol pikinini blong yu blong talem ol dei wetem yu. Taem yufala kasem Sabat, askem olgeta blong singaotem dei ia “wan dei blong glad.” Talem long olgeta from wanem Sabat i wan dei blong glad long yu.
-
Serem wetem wanwan long yufala ol wei we yufala save “mekem yuwan yu glad long Lod” long Sabat ia. Maet ol pikinini blong yu oli save dro ol aedia blong olgeta mo putum olgeta i go insaed long wan “bokis blong ol samting blong glad long olgeta long Sabat.” Afta, taem oli nidim ol aedia abaot ol samting blong mekem long Sabat, oli pulumaot wan aedia aot long bokis.
Laet blong Yumi, i kam long Dan Wilson
Aesea 60:1–3
Sevya i olsem wan laet blong mi.
-
Yu save invaetem ol pikinini blong yu blong sarem ae blong olgeta taem yu stap ridim Aesea 60:1–3. Askem olgeta blong openem ae blong olgeta bakegen, taem oli harem toktok ia “laet” mo sarem ae, taem oli harem toktok ia “tudak.” Eksplenem se Jisas Kraes mo Gospel blong Hem oli olsem wan laet, we i helpem yumi blong luk rod blong yumi i gobak long Papa long Heven.
Aesea 65:17–25
taem we Jisas i kambak bakegen, Hem bae i karem pis mo glad i kam.
-
Aesea 65:17–25i stap tokbaot se wol ia bae i kam olsem wanem taem we Sevya bae i kambak bakegen. Taem yu stap ridim ol ves ia wetem ol pikinini blong yu, helpem olgeta blong lukaotem se, laef bae i defren olsem wanem long “niufala wol” we Aesea i tokbaot. ?From wanem hemia bae i wan taem blong stap “harem gud, gogo i no save finis”? (ves 18).
-
Mo tu, tugeta, yufala i save singsing wan singsing abaot Seken Kaming olsem “When He Comes Again” (Gospel Library) Serem wetem wanwan long yufala, wanem nao yufala i stap lukluk fored from long taem we Sevya i kambak. ?Wanem nao yumi save mekem blong rere from dei ia?
Blong kasem moa aedia, luk long magasin blong Fren blong manis ia.