“26 Oktoba–1 Novemba. ‘Olgeta we Naoia Oli Stap Harem Nogud, Oli Stap Krae, Mi Mekem Olgeta Oli Harem Gud Bakegen’: Jeremaea 31–33; 36–39; Ol Krae 1; 3” Kam Folem Mi—Blong Hom mo Jos: OlTesteman 2026 (2026)
“26 Oktoba–1 Novemba. ‘Olgeta we Naoia Oli Stap Harem Nogud, Oli Stap Krae, Mi Mekem Olgeta Oli Harem Gud Bakegen,’” Kam Folem Mi: OlTesteman 2026
Jeremaea I Stap Krae from Jerusalem I Stap Lus, i kam long Rembrandt van Rijn
26 Oktoba–1 Novemba: “Olgeta we Naoia Oli Stap Harem Nogud, Oli Stap Krae, Mi Mekem Olgeta Oli Harem Gud Bakegen”
Jeremaea 31–33; 36–39; Ol Krae 1; 3
Fas taem we Lod i singaotem Jeremaea i kam profet, Hem i talem long hem se misin blong hem i blong “pulumaot, … mo brekemdaon” (Jeremaea 1:10)—mo long Jerusalem i bin gat plante nogud fasin blong pulumdaon mo brekemdaon. Be, hemia i wan pat ia nomo blong misin blong Jeremaea—God i bin singaotem hem tu blong “wokem gud, … mo blong stanemap” olgeta (Jeremaea 1:10). ?Wanem nao oli save wokem gud mo stanemap long wan ples we faet blong ol kavenan pipol, i prapa spolem gud? Askem long wan nara wei, taem we sin o wanem we i kam agens long laef blong yumi i bin livim laef blong yumi i prapa nogud i stap, ?olsem wanem yumi save wokem gud bakegen mo stanemap samting? Ansa i stap long “wan man we i kamaot biaen long King Deved ya bifo. Man ya bambae i wan stret man, mo mi bambae mi putumap hem i kam king” (Jeremaea 33:15we Hem i Mesaea we God i promesem. Hem i tekem “wan niu kavenan” (Jeremaea 31:31wan kavenan we i nidim moa bitim wanem we man i luk aotsaed. Loa blong Hem, “mi bambae mi putum loa blong mi long tingting blong yufala, mo bambae mi raetemdaon long hat blong yufala.” Hemia nao ril mining blong “mi bambae mi God blong yufala, mo yufala bambae i man blong mi” (Jeremaea 31:33). Hem i wan samting we bae i hapen long wan ful laef, mo bambae yumi stap mekem mistek yet, mo bambae wanwan taem blong yumi krae sore. Be taem yumi mekem, Lod i promes se, “Olgeta we naoia oli stap harem nogud, oli stap krae, mi bambae mi leftemap tingting blong olgeta, mi mekem olgeta oli harem gud bakegen” (Jeremaea 31:13).
Blong gat wan bigfala lukluk long Buk blong Ol Krae, luk long “Ol Krae, Buk blong Ol” insaed long Gaed long Ol Skripja.
Ol aedia blong Stap Lanem Samting long Hom mo long Jos
Jeremaea 31; 33
Lod bae i tekemaot ol kavenan pipol blong Hem we oli stap olsem prisena.
Long Jeremaea 31; 33 Lod i luksave “krae mo konkon harem nogud” (Jeremaea 31:15) we Ol Man Isrel bae oli filim taem oli stap olsem prisena. Be, hem i givim ol toktok blong kamfot mo hop. Lukaotem olgeta taem yu stap ridim ol japta ia. ?Wanem ol promes we yu faenem we oli aplae long yu?
Jeremaea 31:31–34; 32:37–42
“Mi bambae mi God blong yufala, mo yufala bambae i kam man blong mi bakegen.”
Nomata we Ol Man Isrel oli bin brekem ol kavenan blong olgeta, Jeremaea i bin profesae se Lod bambae i stanemap bakegen wan niu “promes … we bambae i stap oltaem, gogo i no save finis” wetem olgeta (Jeremaea 31:31; 32:40). ?Wanem nao kavenan ia? Tingting blong stap lukaotem ol niu tingting insaed long Gaed long Ol Skripja, “Niu mo Kavenan We I Nogat En,” Gospel Laebri.
Taem yu ridim Jeremaea 31:31–34; 32:37–42, tingting hevi long:
-
Wanem hemia i minim long yu blong stap pat blong ol kavenan pipol blong God.
-
Wanem i minim blong oli raetem loa blong Hem insaed long hat blong yu.
-
Wanem Lod i promesem taem yu mekem ol kavenan wetem Hem.
-
Olsem kavenan rilesensip blong yu wetem Lod i stap jenisim yu.
?Wanem ol promes we yu bin mekem i go long God taem yu tekpat long ol tabu odinens? ?Long wanem wei nao Hem i stap mekem ol promes blong Hem i kam tru long yu?
Luk tu long David A. Bednar, “Stap Wetem Mi, mo Bae Mi stap Wetem Yu; From Hemia, Wokbaot Wetem M,” Liahona, Mei 2023, 123–26.
Jeremaea 36
Ol skripja oli gat paoa blong tanem mi, blong mi tanem baksaed blong mi long ivel.
Folem wanem we i stap long Jeremaea 36:2–3, ?from wanem nao Lod i komandem Jeremaea blong raetemdaon ol profesi blong hem? Taem yu stap ridim Jeremaea 36, tekem not long olsem wanem olgeta pipol ia oli bin filim abaot ol profesi ia:
-
Lod (luk long ol ves 1–3, 27–31)
-
Jeremaea (luk long ol ves 4–7, 32)
-
Baruk (luk long ol ves 4, 8–10, 14–18)
-
Jehu mo King Jehoakim (luk long ol ves 20–26)
-
Elnatan, Delaela, mo Gemaria (luk long ves 25)
Tingting hevi long wanem yu filim abaot ol skripja. ?Olsem wanem oli bin helpem yu blong tanem baksaed blong yu long ivel, o rabis fasin?
Jeremaea 37–39
Stap strong blong stap folem ol profet blong God.
Insaed long Jeremaea 37:1–3, 15–21; 38:1–6, 14–28, ?wanem pruf nao yu luk we i mekem se King Sedekaea i bin biliv long Jeremaea we i hem i tru profet blong Lod? ?Wanem pruf nao yu luk we i mekem se Sedekaea i no bin biliv? ?Wanem nao yu lanem aot long eksperiens ia? Taem yu ridim Jeremaea 39, tingting hevi long wanem bae i defren sapos we Sedekaea mo ol pipol blong hem oli bin folem profet mo obei ol komanmen blong Lod. (Komperem wanem i hapen long Sedekaea wetem wanem i hapen long famli blong Lihae 1 Nifae 1–2.)
Jeremaea 38:6–13; 39:15–18
Mi save stanap strong from wanem we i raet.
Ol wokman blong king oli bin filim se ol profesi blong Jeremaea oli stap mekem ol soldia blong olgeta oli no gat bigfala tingting blong faet, mekem se oli sakem Jeremaea i go insaed long wan wel we i fulap long sofmad (luk long Jeremaea 38:1–4). Insaed long Jeremaea 38:6–13, wanem tingting mo filing nao i kam long yu abaot Ebed Melek blong Itiopia? Luksave tu ol blesing we Lod i bin givim long Ebed Melek insaed long Jeremaea 39:15–18.
?Long wanem wei nao bae yu folem eksampol blong Ebed Melek?
Kraes blong Jeremaea
Ol Krae 1; 3
Lod i save karemaot harem nogud we yumi stap fesem from sin.
Buk blong Ol Krae, i wan grup blong ol poem we oli raetem afta we God i prapa spolem gud Jerusalem mo tempol blong hem. ?From wanem yu ting se hem i impoten blong oli protektem olgeta? Tingting se, ol pikja toktok we oli stap long Ol Krae 1 mo 3 wanem nao oli stap helpem yu blong andastanem abaot bigfala harem nogud we Isrel i bin filim. ?Wanem mesej blong hop long Kraes nao yu yu faenem? (luk speseli long Ol Krae 3:20–33; luk tu long Matiu 5:4; Jemes 4:8–10; Alma 36:17–20).
Presiden M. Russell Ballard i talemaot ol situesen we i save mekem se sam bae oli lusum hop, mo hem i givim kaonsel abaot wea ples blong faenem hop:
“Sam long yumi oli faenem laef blong olgeta i hevi wetem wari, harem nogud, mo sore. Plante oli filim se oli no save dil wetem ol problem we oli stap oltaem long wol ia. Ol narawan oli stap harem nogud from ol memba blong famli we oli lusum rod blong laef oli folem rod we i lidim olgeta i go daon long ples we gudfala standet mo valiu blong laef i no strong. … Plante oli lego olgetawan i go blong akseptem wiknes mo fasin nogud blong wol ia olsem ol samting we yumi save mekem i kam gud bakegen. Oli nomo gat hop
“…Sam long yumi maet bae oli lusum evri hop from ol sin mo fasin nogud. Wan man o woman i save go dip insaed long ol wei blong wol ia we hem i no lukim wan nara rod blong kamaot mo lusum evri hop. Singaot blong mi i go long olgeta we oli foldaon long trap ia blong Setan, hem i neva givap! Nomata lukluk i stap se i no moa gat hop o moa yumi go hop i stap blong lus plis biliv long mi, bae yu save gat hop oltaem. Oltaem” (“The Joy of Hope Fulfilled,” Ensign, Nov. 1992, 31–32).
Luk tu long “Come, Ye Disconsolate,” Hym, namba 115.
Helpem ol narawan blong tekem responsabiliti blong stap lanem samting. Samtaem i olsem se, isi wei blong tij i blong talem nomo long olgeta we oli stap lan wanem we yumi ting se oli mas save. Be, isi wei, oltaem hem i no bes wei. Elda David A. Bednar i bin tijim se: “Yumi no mas wantem blong stap talem ‘?Wanem bae mi talem long olgeta?’ Be kwestin we yumi save askem long yumiwan se ‘?Wanem nao mi save invaetem olgeta blong mekem? ?Wanem ol kwestin we i kam tru long insperesen blong mi save askem, sapos bae oli wantem blong ansa, bae i stat blong invaetem Tabu Spirit insperesen kam long laef blong olgeta?’” (evening with a General Authority, Feb. 7, 2020, broadcasts.ChurchofJesusChrist.org; luk tu long Tij Folem Wei blong Sevya, 25). I gat plante wei blong helpem olgeta we oli stap lan blong tekem responsabiliti blong stap lanem samting. Eksampol, insaed long aotlaen ia, oli invaetem olgeta we oli stap lan blong lukaotem, tingting hevi, mekem ol lis, lukluk ol pikja, tekpat long ol lesen we oli yusum samting, dro, serem mo yusum wanem we oli lanem.
Sam Aedia blong Tijim Ol Pikinini
Jeremaea 31:3
Papa long Heven mo Jisas Kraes Tufala i lavem mi “wan lav we i neva finis samtaem.”
-
Taem yu ridim Jeremaea 31:3 wetem ol pikinini blong yu, olgeta oli save helpem yu blong faenem ol samting (o pikja blong ol samting) we oli save stap gud blong longtaem, olsem wan aean koen, mo sam we oli no save stap gud blong longtaem, olsem wan pis blong frut. Yu save tokbaot wanem “neva save finis samtaem” i minim mo serem wetem wanwan long yufala olsem wanem yufala i bin filim “lav we i neva save finis” blong Papa long Heven.” Mo tu, tugeta, yufala save singsing wan singsing olsem “God Is Watching Over All” (Children’s Songbook, 229).
Jeremaea 31:31–34; 32:38–41
God bae i helpem mi blong kipim ol kavenan blong mi.
-
Maet ol pikinini blong yu bae oli glad blong stap droem wan sep blong hat long wan pis blong pepa mo afta, stap raet insaed long sep blong hat ia, wanem we oli lanem insaed long Jeremaea 31:31–34 abaot stap mekem kavenan wetem God. Maet yu wantem blong luklukbak long kavenan we oli mekem taem oli baptaes (luk long Mosaea 18:10, 13) mo toktok raon long wanem i minim oli raetem ol promes ia insaed long hat blong olgeta.
Jeremaea 36:1–4
Ol skripja oli toktok blong God.
-
Aktiviti pej blong wik ia i save helpem ol pikinini blong yu blong lanem abaot Jeremaea, Baruk mo king (luk long Jeremaea 36). Oli mekem tu ol aksen we i go stret wetem ol toktok insaed long Jeremaea 36:4–10, olsem blong stap raet insaed long wan buk (luk long ves 4) mo stap ridim ol skripja i go long ol pipol (luk long ol ves 8, 10).
-
Yu mo ol pikinini blong yu, yufala i save lukluk long wan buk blong ol pikinini, wan kopi blong ol skripja mo tokbaot olsem wanem ol buk ia, oli defdefren. ?Wanem i mekem ol skripja i spesel? Serem wetem wanwan long yufala sam long ol sentens insaed long skripja we oli spesel long yu, we i save givim insperesen.
Jeremaea 38:6–13
Mi save faet from wanem we mi save se i tru.
-
Yu save yusum pikja long en blong aotlaen ia blong helpem ol pikinini blong yu blong pikjarem long maen blong olgeta, stori blong Ebed Melek insaed long Jeremaea 38:6–13. Yu save helpem olgeta blong faenem wan ves we long ples ia, Ebed Melek i bin mekem wan samting blong soem strong paoa long tingting, blong helpem profet blong Lod. ?Wanem nao yumi save mekem blong soem se yumi save se profet blong yumi tedei, God i singaotem?
Ol Krae 1:1–2, 16; 3:22–26
Sevya i mekem i posibol blong mi kasem fogivnes long ol sin blong mi.
-
Blong introdiusum Ol Krae, maet yu wantem blong eksplenem long ol pikinini blong se, from we Ol Man Isrel oli no bin sakem sin, Jerusalem mo tempol, i bin prapa smas gud. Yu save serem wetem wanwan long yufala, wanem filing we bae i kam long yu, sapos yu bin stap laef long tetaem ia(luk long Ol Krae 1:1–2, 16). ?Long wanem wei nao mesej ia long Ol Krae 3:22–26 i bin givim hop long yu?
-
Mo tu, yu sve talem long wanwan long yufala abaot ol taem we yu bin filim nogud abaot wan nogud joes we yu bin mekem. ?Wanem nao yumi faenem insaed long Ol Krae 3:22–26 we i helpem yumi blong andastanem fasin blong fogiv ia we Jisas Kraes i stap givim?
Blong kasem moa aedia, luk long magasin blong Fren blong manis ia.