“9–15 Novemba. “I No gat wan Narafala God Nating we I save Sevem Man Olsem God Ya”: Daniel 1–7,” Kam Folem Mi—Blong Hom mo Jos: OlTesteman 2026 (2026)
“9–15 Novemba. ‘I No gat wan Narafala God Nating we I save Sevem Man Olsem God Ya,’” Kam Folem Mi: OlTesteman 2026
Daniel I Talemaot Mining blong Drim blong Nebukanesa, i kam long Grant Romney Clawson
9–15 Novemba: “I No gat wan Narafala God Nating we I save Sevem Man Olsem God Ya”
Daniel 1–7
Bae i no hapen se bae oli tok se bae oli sakem yu long wan faea, o hol wetem ol laeon insaed from bilif blong yu long Jisas Kraes. Be i no gat wan long yumi we bae i gotru long laef ia, mo no gat wan tes blong fet. Mekem se, yumi evriwan i save lanem samting aot long ol eksampol blong ol pipol olsem Daniel, Sadrak, Mesak, mo Abednego, we Rul blong Babilon i bin tekem olgeta oli prisena (luk long 2 King 24:10–16). Oli stap fesem wan kalja we oli no save gud, we i gat defren samting i impoten, oli bin fesem ol bigfala temtesen blong oli lego ol bilif mo ol stret mo gud kastom. Be yet, oli bin stap tru long ol kavenan blong olgeta. ?Olsem wanem oli mekem samting ia? Blong stap mekem olgeta smol mo simpol samting ia we God i bin askem long yumi evriwan—stap prea, stap livim kakae, stap jusum ol gudfala fren, stap trastem Hem, mo stap olsem wan laet long ol narawan. Semmak olsem Josef long Ijip, mo Esta long Pesia, Daniel mo ol fren blong hem long Babilon, oli bin holemtaet bilif blong olgeta long God, mo God i wokem ol merikel we i stap givim insperesen yet long olgeta we oli stap biliv tedei.
Blong gat wan bigfala lukluk long Buk blong Daniel, luk long, “Daniel” insaed long Bible Dictionary.
Ol aedia blong Stap Lanem Samting long Hom mo long Jos
Daniel 1; 3; 6
Mi save trastem Lod taem fet blong mi i fesem tes.
Long wan wei, yumi evriwan i stap laef long Babilon. Oltaem yumi fesem ol temtesen blong daonem ol standet blong yumi mo tanem fet blong yumi i go longwe long Kraes. Taem yu stap ridim Daniel 1, 3, mo 6, teknot long wei we Daniel, Sadrak, Mesak, mo Abednego, oli bin fosem olgeta blong oli mekem ol samting we oli bin save se i rong. ?Wanem nao ansa blong olgeta long ol situesen ia? (luk long Daniel 1:10–13; 3:15–18; 6:10). ?Wanem nao i risal blong fet blong olgeta? ?Wanem nao yu lanem aot long ol eksperiens, we i save helpem yu blong trastem Lod taem yu fesem agens? Mo tu, tingting long olgeta kwestin ia:
-
?Wetaem nao yu bin filim fos ia blong wan samting we yu save se i rong? ?Olsem wanem nao Lod i blesem yu taem yu kipim ol komanmen blong Hem?
-
?Be olsem wanem nao sapos bilif blong yu i no lidim yu long ol merikel we yu stap lukaotem? (Blong kasem wan eksampol, luk long Alma 14:8–13). Folem wanem yu ridim long Daniel 3:13–18, long tingting blong yu, ?olsem wanem nao bae Sadrak, Mesak, mo Abednego oli ansarem kwestin ia? ?Olsem wanem eksampol blong olgeta i save jenisim wei we yu yu kam blong fesem ol tes blong laef?
-
?Long wanem wei nao, ol joes blong yu we oli stret mo gud, i save lidim o narawan blong gat bigfala fet long Lod? (luk long Daniel 2:47; 3:28–29). Tingting long wanem samting nao bae ol joes blong yu i save mekem long ol narawan.
Luk tu long Dieter F. Uchtdorf, “Be Not Afraid, Only Believe,” Liahona, Nov. 2015, 76–79.
Traem blong blong mekem evriwan i tekpat. Sevya i “invaetem … evriwan blong kam long hem mo tekem pat blong gud fasin blong hem” 2 Nifae 26:33). Sapos yu stap tijim famli blong yu o wan klas, tingting hevi long ol wei we yu save givim janis long evriwan blong tekpat long sam wei. Eksampol, yu save givim wan sentens blong skripja long wanwan long olgeta, wan pat blong konfrens mesej o wan ves blong wan hym blong tingting hevi mo komen long hem. Yu no fosem eniwan blong tekpat, be givim ol janis long olgeta.
Sadrak, Mesak mo Abednego insaed long ples blong faea, i kam long William Maughan
Daniel 2
Jos Ia blong Jisas Kraes blong Ol Lata-dei Sent i kingdom blong God long wol ia.
Tru long revelesen, Daniel i bin luk se drim blong Nebukadnesa i stap talem finis fiuja blong ol kingdom blong wol ia, mo tu, fiuja blong kingdom blong God, we bae “rul blong hem bambae i no save finis samtaem” (Daniel 2:44). “Jos ia, i lata-dei kingdom ia we oli bin talem profesi blong hem,” Elda D. Todd Christofferson i bin tijim, “we man i no krietem, be God blong heven i stanemap mo i rolem olsem wan ston, we i no gat han i katemaot long maonten, blong i fulumap wol ia” (“Why the Church,” Liahona, Nov. 2015, 111). Tingabaot kingdom blong God long ol las dei ia taem yu stap ridim hao oli tokbaot ston ia long Daniel 2:34–35, 44–45. ?Wanem nao pat blong yu blong mekem, blong stap helpem profesi ia i kam tru?
Luk tu long “Hark, All Ye Nations!,” Hym, namba 264; “God Gave Them Knowledge” (vidio), ChurchofJesusChrist.org.
God Gave Them Knowledge
Daniel 2:1–30
Blong kasem revelesen i nidim blong rere from long saed blong spirit.
Taem yu luklukbak long Daniel 2:1–15, tingting long wanem filing bae i kam long yu sapos yu stap long situesen blong Daniel. ?Wanem nao Daniel i mekem? (luk long Daniel 2:16–18). ?Wanem nao yu save lanem aot long Daniel 1:17 abaot olsem wanem God i bin mekem Daniel i rere? ?Wanem yumi save lanem long ol toktok mo ol aksen blong Daniel afta we hem i kasem help blong Lod? (luk long Daniel 2:19–30).
Daniel 7:13–14
Jisas Kraes, Hem i Wan Pikinini Ia Nomo blong Papa we I No Save Finis.
Long taem blong ministri blong Sevya long wol ia, plante long Ol Man Jiu oli tingting long taetol ia “Pikinini blong man” long Daniel 7:13 i go long Mesaea we i stap kam. ?Wanem nao yu lanem abaot Mesaea insaed long Daniel 7:13–14? (luk tu long Moses 6:57).
Oltaem Sevya i tokbaot Hemwan olsem “Pikinini blong man.” Tingting blong tap luklukbak long sam eksampol insaed long: Matiu 25:31; Mak 9:31; 10:45. ?Wanem nao Hem i stap tijim abaot Hemwan insaed long ol ves ia? Insaed long Mak 14:61–64, Jisas i yusum taetol ia long las dei blong laef blong Hem long wol. Tekem not long ol askem blong ol pipol we oli harem Hem i talemaot Hemwan. Olsem wanem nao profesi blong Daniel abaot Pikinini blong Man, i jenisim ol filing blong yu abaot wanem i hapen long Hem insaed long Mak 15?
Olsem we ol pipol we oli no laekem Jisas we i stap talemaot Hemwan olsem “Pikinini blong man,” maet yu fesem tu ol hadtaem blong stap talemaot trutok. Komperem ol profesi insaed long Daniel 7:13–14 wetem ol promes insaed long Doktrin mo Ol Kavenan 121:29, 46.
Luk tu long Doktrin mo Ol Kavenan 49:6; Gaed long Ol Skripja, “Pikinini blong Man,” Gospel Library.
Sam Aedia blong Tijim Ol Pikinini
Daniel 1; 3; 6
Jisas bae i helpem mi blong mekem wanem we i raet taem mi filim se i had.
-
Blong helpem ol pikinini blong yu blong lanem samting aot long ol insperesen stori insaed long buk blong Daniel, yu save faenem ol pikja blong ol samting we oli hapen insaed long Daniel 1, 3, mo 6 (luk long aktiviti pej blong wik ia o long Gospel Art Buk, ol namba ia 23, 25, 26). Afta, yu save putum ol pikja i lukluk i godaon, mo invaetem wan pikinini blong tanem wan mo tokbaot stori we pikja i ripresentem. (Blong kasem help luk long “Daniel mo Ol Fren blong Hem,” “Sadrak, Mesak mo Abednego,” mo“Daniel mo Hol Ia blong Ol Laeon” insaed long Ol Stori long OlTesteman, 154–56, 160–62, 163–65.)
1:39Daniel and His Friends
1:39Shadrach, Meshach, and Abed-nego
1:45Daniel and the Lions’ Den
-
?Helpem ol pikinini blong blong yu blong tingting long ol situesen taem we maet oli fosem olgeta blong mekem wan rong joes, olsem Daniel mo ol fren blong hem i bin fesem long Daniel 1, 3, mo 6. Serem wetem wanwan long yufala, olsem wanem yu bin kasem blesing blong stap mekem raet joes nomata taem i had. Mo tu, tugeta, yufala save singsing wan singsing we i go wetem topik ia, olsem “Choose the Right” (Hym, namba 239).
Stap Trastem Waes Tingting we I Kam Tru long Toktok
Daniel 1:1–17
Papa long Heven bae i wantem mi blong lukaotem gud bodi blong mi.
-
Stap ridim stori abaot Daniel mo ol fren blong hem we oli no wantem akseptem mit mo waen, i save givim insperesen blong statem wan storian abaot loa blong helt we Papa long Heven i bin givim long yumi tedei Doktrin mo Ol Kavenan 89). Maet yu save lukaotem ol blesing we Daniel mo ol fren blong hem oli bin kasem mo komperem olgeta wetem ol blesing we oli promesem long Tok blong Waes (luk long Daniel 1:15–17 mo Doktrin mo Ol Kavenan 89:18–21).
Daniel 2
Jos Ia blong Jisas Kraes blong Ol Lata-dei Sent i kingdom blong God long wol ia.
-
Taem yu ridim Daniel 2:31–35, 44–45 wetem ol pikinini blong yu, yu save invaetem olgeta blong dro wan pikja blong drim blong Nebukadnesa. Pikja olgeta blong andastanem ston long drim i ripresentem Jos Ia blong Jisas Kraes blong Ol Lata-dei Sent. ?Wanem nao yumi lanem abaot Jos aot long drim ia? Ol pikinini blong yu oli save talem nem blong sam samting we Papa long Heven i mekem blong setemap Jos blong Hem long ol las dei ia. Sapos oli nidim help, yu save soem ol pikja blong ol samting we oli hapen stat long Restoresen blong Jos (luk long Gospel Art Buk, ol namba ia 90–95).
Daniel 6
Papa long Heven i wantem mi blong prea oltaem.
-
?From from blong stap prea long Papa long Heven i impoten tumas blong Daniel? Maet yu mo ol pikinini blong yu i save tokbaot kwestin ia taem yufala i ridim Daniel 6 tugeta. Afta, yufala save talem long yufala wanwan, from wanem prea i impoten long yu. Maet ol pikinini blong yu bae oli glad blong stap droem ol pikja blong olgetawan taem oli stap prea long taem blong ol defdefren situesen. Oli save yusum ol droing blong olgeta blong tijim olgetawan, se yumi save prea i go long Papa long Heven nomata weaples yumi stap long hem o wanem yumi nidim.
Blong kasem moa aedia, luk long magasin blong Fren blong manis ia.