Hosea 1–6; 10–14; Joel

Waef blong Hosea, Goma, i no bin fetful long hem, mo God i bin poen long nogud taem ia blong tijim Ol Man Isrel abaot wei we Hem i harem abaot olgeta mo abaot ol kavenan blong olgeta wetem Hem. Taem yu stap ridim Hosea 1–3, tingting hevi long wei we Lod i stap lukluk rilesensip we Hem i gat wetem ol kavenan pipol blong hem. ?Olsem wanem nao taem yumi mekem kavenan wetem Lod i olsem taem yumi mared? ?Olsem wanem nao taem yumi mestem blong kipim kavenan ia i semmak olsem yumi no fetful long hasban o waef blong yumi? (luk long Hosea 2:5–7, 13). ?Wanem nao Hosea 2:14–23 i tijim yu abaot lav mo sore blong Lod? ?Olsem wanem yu save soem se yu lavem Hem mo stap tru long Hem?

Long Hosea 14, lukaotem plante naesfala promes we Lod i stap mekem long olgeta we oli tanem olgeta i kam long Hem. ?Wanem nao sentens ia “bambae mi lavem yufala long olgeta tingting blong mi” i minim long yu? (ves 4). ?Wanem nao ol simbol abaot ol plant oli ripresentem long ol ves 5–8 i tijim yu abaot ol blesing blong Lod we i tekem tu, ol blesing blong sakem sin long yumi? Olsem pat long stadi blong yumi, tingting blong singsing o lisin long wan hym abaot sore blong Sevya olsem “Come unto Jesus” (Hym, namba 117).

Ol pipol long dei blong Hosea, oli bin givim ol animol blong ol mekem sakrifaes long olgeta, be oli bin stap brekem moa long ol impoten komanmen. Long tingting blong yu, ?hem i minim wanem se Lod “i no wantem fasin ya we yufala i stap kilim animol blong mekem sakrifaes long mi, mi wantem we oltaem, yufala i stap lavem mi. Mi wantem we yufala i save mi long laef blong yufala. Fasin ya i gud tumas long mi, i winim we yufala i stap bonem sakrifaes blong givim presen i kam long mi”? (Hosea 6:6). ?Wanem nao yu ting se i minim blong stret mo gud fasin i olsem wan klaod o olsem smol drop blong wota long ol lif long eli moning? (luk long Hosea 6:4). ?Stret mo gud fasin blong yumi, i mas olsem wanem? (Luk long Aesea 48:18; 1 Nifae 2:9–10).

Yu save ridim Matiu 9:10–13; 12:1–8 blong luk olsem wanem Sevya i bin yusum Hosea 6:6 long taem blong seves blong Hem. ?Olsem wanem nao ol skripja ia oli stap helpem yu blong andastanem ol toktok blong Hosea?

Taem yu stap rid long Joel 2:12–13, bae i helpem yu blong save se blong brekem o terem klos blong wan, i bin wan saen we man i luk, we i soem se yu krae sore mo yu harem nogud. ?Olsem wanem taem yumi stap terem hat blong yumi i defren long terem ol klos blong yumi?

?Wanem samting nao yu luk se i semmak bitwin dei blong yumi mo dei we Joel i bin luk finis? (luk speseli long Joel 2:1–2, 11, 18–32). ?Wanem filing i kam long yu abaot ol blesing blong Lod we oli promesem insaed long ves 18– 18? ?From wanem ol blesing oli gat valiu speseli long taem tedei?

Maet bae i wan intresting samting blong ridim wanem we Moronae i bin talem abaot Joel 2 taem hem i bin visitim Josef Smit long 1823 (luk long Josef Smit—Histri 1:41). ?Long wanem wei nao yu ting se ol profesi insaed long Joel 2:28–32 oli bin hapen long dei blong yumi? (luk tu long Ol Wok 2:1–21). ?Yu ting se i minim wanem se Lod bae i “givim Spirit blong [hem] long olgeta man”? (Joel 2:28).

Maet yu save tingting hevi long ol toktok blong Presiden Russell M. Nelson, i tijim yumi se, “Long ol dei we oli stap kam, bambae i no posibol blong laef long saed blong spirit, sapos yumi no gat Tabu Spirit i lidim, daerektem mo kamfotem yumi wetem paoa blong Hem” (“Revelesen blong Jos, Revelesen blong Laef blong Yumi,” Liahona, Mei 2018, 96). ?From wanem revelesen i impoten tumas long yu blong save laef yet long saed blong spirit?

?Wanem nao yu save mekem sapos yu filim se yu no fulap gud long Spirit? Hemia sam long ol eksampol we oli save help. ?Wanem nao ol pipol long ol skripja ia oli mekem blong kasem Spirit blong Lod we i gohed blong kamdaon long olgeta?

• Mosaea 4:1–3, 19–20; 18:7–11

• Hileman 6:34–36

• Doktrin mo Ol Kavenan 19:37–41

Taem yu ridim ol toktok blong Elda David A. Bednar, tingting hevi long wanem i minim long yu blong filim Tabu Spirit i kamdaon long yu, long evri dei laef blong yu:

“Oltaem yumi mekem i had long yumi blong kasem revelesen blong yumiwan. Mi stap minim se promes blong kavenan i, taem yumi respektem kavenan blong yumi, bae Tabu Spirit i stap oltaem olsem kompanion blong yumi. Be yumi tokbaot mo tritim olsem se yumi stap harem voes blong Lod tru long Spirit blong Hem i wan samting we i no stap hapen evri taem. … [Spirit] i mas stap wetem yumi evri taem. I no se evri smosmol seken, be sapos wan i traem bes blong hem—yu no nid blong stap stret evriwan—be sapos yu mo mi i mekem bes blong yumitu mo no komitim bigfala nogud fasin, bae yumi save putum tras long Tabu Spirit blong gaedem yumi

“… I luk olsem yumi biliv se Tabu Spirit i olsem tanda, i bigwan, mo i olsem laetning, be hem i kwaet mo i smol mo i gro sloslo folem taem” (“Elda David A. Bednar Discussion” [naet ia wetem wan Jeneral Atoriti, Feb. 7, 2020], broadcasts.ChurchofJesusChrist.org).

Luk tu long Gary E. Stevenson, “Ol Kwaet Toktok blong Spirit,” Liahona, Nov. 2023, 42–45; “Enemy Territory” (vidio), Gospel Library.

3:38

• Insaed long buk blong Hosea, Lod i komperem ol kavenan blong Hem wetem ol pipol blong Hem long wan mared. Blong lanem samting aot long fasin blong komperem samting ia, yu mo ol pikinini blong yu i save lukluk wan pikja blong wan woman we i mared o wan man we i mared mo tokbaot olsem wanem Papa long Heven i wantem wan hasban mo waef blong tritim tufala wanwan. Helpem ol pikinini blong yu blong faenem ol toktok insaed long Hosea 2:19–20 we i tokbaot olsem wanem, Lod i filim abaot yumi. ?Olsem wanem nao yumi soem long Lod se yumi lavem Hem mo bae yumi stap fetful long Hem?

• Hosea 10:12 i tokbaot planem ol sid, pikimap, taem mo ren blong invaetem yumi blong lukaotem Lod. Taem yu stap ridim ves ia, ?wanem nao ol gudfala tingting blong krietem samting bae i kam long maen blong yu we i save givim insperesen, long ol pikinini blong lukaotem Hem? Eksampol, ol pikinini blong yu oli save dro wan klok mo raetem ol wei we oli save lukaotem Lod long ol defdefren taem truaot long dei. Singsing wan singsing olsem “Anytime, Anywhere” (Gospel Library) i save helpem yu blong tijim se, hem i wan gud taem blong lukaotem Lod, evri taem.

• O, ol pikinini blong yu oli save mekem ol simpol aksen we i go wetem ol ves ia, olsem taem priten blong planem ol sid, pikimap ol vejetebol we oli rere blong karemaot, o stanap aotsaed taem i ren. Helpem ol pikinini blong yu blong rere blong stap planem wan sid mo pikimap ol gudfala frut, olsem blong stap laef long wan stret mo gud fasin mo stap kasem ol blesing blong Lod. Afta, yufala save talem long wanwan long yufala, abaot ol blesing we Lod i poremaot olsem ren long yumi taem yu stap traem blong lukaotem Hem.

• Blong tokbaot bigwan trutok we i stap insaed long Hosea 13:4 se i no gat wan Sevya, be, sapos nomo i gat Jisas Kraes nomo, yu save soem long ol pikinini blong yu ol pikja blong sam pipol, we i tekem tu, ol pikja blong Jisas. Ol pikinini blong yu oli save gat wanwan janis blong stap poen i i go long wan we i gat paoa blong sevem yumi aot long sin mo ded. Serem testemoni blong yu abaot Jisas Kraes mo Atonmen blong Hem.

• Ol pikinini blong yu oli save lukaotem ol toktok insaed long Hosea 13:4, 14 we i tokbaot Jisas Kraes. ?Wanem nao ol toktok ia oli tijim yumi abaot Jisas Kraes? Tingting blong stap helpem ol pikinini blong yu blong yusum Gaed long Ol Skripja blong faenem ol narafala skripja we i tijim se Jisas, Hem i Sevya mo Ridima blong yumi. Serem wetem wanwan long yufala, wanem yu filim abaot Jisas Kraes.

• Maet yu save helpem ol pikinini blong yu blong andastanem Joel 2:28–29 taem yu letem olgeta blong kapsaetem wan wota mo afta, komperem wetem wan smol drop blong wota. ?Wanem i minim blong Spirit i “kapsaet” long yumi?

• Taem yu ridim Joel 2:28–29 tugeta, yu save invaetem ol pikinini blong yu blong putum insaed nem blong olgeta wanwan insaed long ples blong ol sentens ia “ol boe blong yu” mo “ol gel blong yu.” Afta, helpem olgeta blong lukaotem ol skripja olsem Jon 14:16; Moronae 10:5; Doktrin mo Ol Kavenan 42:17 blong faenemaot olsem wanem Spirit i save helpem olgeta.