Psalmeve 49–51; 61–66; 69–72; 77–78; 85–86

Psalmeve 49 ka një mesazh për “njerëz të popullit dhe fisnikë, të pasur dhe të varfër” (vargu 2). Cili është ky mesazh sipas jush? Çfarë mendoni se vargjet te Psalmeve 62:5–12 i shtojnë atij mesazhi?

Leximi i këtyre psalmeve mund t’ju frymëzojë të përsiatni mënyrat se si tundohemi ta vëmë mirëbesimin për shëlbimin te diçka tjetër përveç Perëndisë (shihni te Psalmeve 49:6–7). Si ndikohet jeta juaj nga dëshmia juaj se “Perëndia … do ta shpengojë shpirtin t[uaj] nga pushteti i Sheolit [varrit]”? (Psalmeve 49:15.)

Mbreti David e shkroi Psalmeve 51 pasi kuptoi nevojën e tij të skajshme për falje, diçka që na nevojitet të gjithëve. Cilat vargje i përshkruajnë ndjenjat që keni pasur? Çfarë gjeni në këtë psalm që ju jep shpresë për faljen?

Gjithashtu mund të kërkoni te Psalmeve 51 për të dhëna rreth asaj se çfarë do të thotë të pendohesh. Bëje një listë të asaj që gjen. Shihni nëse mund t’i shtoni gjëra listës suaj duke kërkuar mesazhin e Presidentit Rasëll M. Nelson, “Ne Mund të Bëjmë më Mirë dhe të Jemi më të Mirë” (Liahona, maj 2019, f. 67–69).

Në ç’mënyrë do ta përshkruanit se si ndihemi kur marrim falje nëpërmjet Krishtit? Nëse ju nevojitet ndihmë për t’i përshkruar ndjenjat tuaja, mund të shihni vargjet te Psalmeve 51:1–2, 7–12; 85:2–9. Disa njerëzve u pëlqen të vizatojnë ose gjejnë figura për të shprehur ndjenjat e tyre; mund ta provoni këtë gjë. Gjithashtu mund të këndoni ose dëgjoni një himn rreth Shpëtimtarit, të tillë si “Qëndroj Plot Habi” (Himne, nr. 113).

Për t’u penduar, na nevojitet besim jo vetëm që Jezu Krishti mund të na pastrojë, por edhe që Ai do të na pastrojë. Çfarë gjeni te Psalmeve 86:5, 13, 15 që ju ndihmon të dini se Shpëtimtari është si i aftë ashtu edhe i gatshëm për të falur?

Shihni edhe tek Alma 36; Piter F. Mërs, “Ai Mund të më Shëronte Mua!”, Liahona, maj 2023, f. 39–41.

Përsiatni se si e fituat dëshminë tuaj për Jezu Krishtin dhe fuqinë e Tij shlyese. Më pas, teksa studioni te Psalmeve 51:13–15; 66:5–20; 71:15–24, mendoni për mënyrën se si mund t’i ftoni të tjerët të “[vijnë] dhe [ta] admiro[jnë] atë që Perëndia ka bërë” (Psalmeve 66:5). Nëse do të “trego[nit] atë që [Zoti] bëri për shpirtin t[uaj]” (Psalmeve 66:16), çfarë do të tregonit?

Çfarë do të thotë për ju që të “fl[isni] tërë ditën për drejtësinë [e Tij]”? (Psalmeve 71:24.)

Shihni edhe tek Alma 26.

Disa psalme përshkruajnë se si është të ndihesh i largët nga Perëndia dhe të kesh nevojë skajshëm për ndihmën e Tij (shihni te Psalmeve 63:1, 8; 69:1–8, 18–21; 77:1–9). Te Psalmeve 63; 69; 77–78, çfarë gjeni që u dha psalmistëve siguri përsëri?

Kur jeni në ankth, si ju ndihmon kjo të “kujto[ni] veprat e Zotit” dhe “mrekullitë e [Tij] të kohëve të kaluara”? (Psalmeve 77:11.) Disa nga ato mrekulli janë përshkruar te Psalmeve 78. Ndërsa lexoni rreth tyre, përsiatni për atë që ju ndihmon ta “vendos[ni] te Perëndia besimin … t[uaj]” (vargu 7).

• Për t’i ndihmuar fëmijët tuaj që të zbulojnë të vërtetat rreth pendimit te Psalmeve 51, mund të vizatoni një zemër të madhe. Më pas mund t’i ndihmoni fëmijët tuaj të shkruajnë brenda zemrës gjërat e këqija që Satani na tundon të bëjmë. Si i nxjerrim këto gjëra nga zemrat tona? Kërkojuni fëmijëve tuaj të gjejnë fjalën “zemër” te Psalmeve 51:10, 17. Flisni rreth asaj se çfarë na mësojnë këto vargje rreth pendimit. Lejojini fëmijët tuaj t’i fshijnë fjalët brenda zemrës dhe të shkruajnë fjalë të reja që përshkruajnë mënyrat se si Jezusi mund të na ndryshojë kur pendohemi.

• Nëse dëshironi, mund t’i ndihmoni fëmijët tuaj të mësojnë se çfarë do të thotë ta kesh “zemrën e thyer dhe të penduar” (Psalmeve 51:17). Ata me radhë mund të thyejnë diçka që ka një guaskë të fortë, si për shembull një vezë ose një arrë. Ju mund t’i ndihmoni ta krahasojnë guaskën me gjërat që na pengojnë për të ndier dashurinë e Atit Qiellor. Si mund t’ia hapim zemrën tonë Atij?

• Gjithashtu mund të shihni së bashku një figurë të Shpëtimtarit dhe t’u kërkoni fëmijëve tuaj se çfarë fjalësh do të përdornin për ta përshkruar Atë. Ftojini që të gjejnë fjalë që e përshkruajnë Atë te Psalmeve 86:5, 13, 15. Përse është e rëndësishme që t’i dimë këto gjëra për Të?

• Fëmijëve tuaj mund t’iu pëlqejë të vizatojnë figura të simboleve te Psalmeve 61:2–3. Si është Jezu Krishti si një “shkëmb” i lartë (vargu 2), “një strehë” dhe “një kështjellë e fortifikuar”? (Vargu 3.)

• Kërkojuni fëmijëve tuaj të tregojnë disa nga tregimet e tyre të parapëlqyera nga shkrimet e shenjta (figurat nga Libri i Figurave Artistike të Ungjillit mund të ndihmojnë). Çfarë na mësojnë këto histori rreth Zotit? Mund të lexoni së bashku te Psalmeve 66:16 dhe me radhë t’i përgjigjeni pyetjes: “Çfarë ka bërë Zoti për shpirtin tim?”

• Ndërsa lexoni së bashku te Psalmeve 77:11; 78:6–7, mund t’i tregoni njëri‑tjetrit se si përpiqeni t’i “kujto[ni] veprat e Zotit” (Psalmeve 77:11), përfshirë veprat e Tij në jetën tuaj. Si na ndihmon sakramenti që “gjithmonë t[ë] kujtoj[m]ë”? (Moroni 4:3; 5:2.)

• Pasi të lexoni me fëmijët tuaj te Psalmeve 71:8, ftojini të vizatojnë një gojë të madhe. Kërkojuni që t’ju ndihmojnë për ta mbushur gojën “plot” me figura ose fjalë që përfaqësojnë gjërat që mund t’ua themi të tjerëve rreth Jezu Krishtit.

• Mund të kaloni dorë më dorë një figurë të Jezu Krishtit. Personi që mban figurën, mund të thotë një gjë që di rreth Tij. Si mund t’i ndihmojmë njerëzit e tjerë që t’i dinë këto gjëra?

• Shumë nga psalmet janë si lutje ndaj Perëndisë. Ndërsa e lexoni librin e Psalmeve me fëmijët tuaj, mund t’u tregoni gjëra që mund t’i përdorim për të komunikuar me njerëz të cilët janë shumë larg, të tillë si një telefon ose një letër. Më pas lexoni te Psalmeve 86:7. Si e “kërkoj[më]” ne Atin Qiellor? Si na përgjigjet Ai ne?

• Mund të këndoni së bashku një këngë rreth lutjes, të tillë si “Lutja e një Fëmije” (Libri i Këngëve të Fëmijëve, f. 6–7; shihni edhe te Suzën H. Porter, “Lutju Atij”, Liahona, maj 2024, f. 77–79). Tregojini njëri‑tjetrit për raste kur Perëndia iu përgjigj lutjeve tuaja.