Jobit 1–3; 12–14; 19; 21–24; 38–40; 42

Kapitujt e parë të librit të Jobit theksojnë, në mënyrë poetike, rolin e Satanit si kundërshtari ose akuzuesi ynë; ata nuk përshkruajnë një ndërveprim aktual midis Perëndisë dhe Satanit. Ndërsa lexoni se çfarë tha Satani rreth Jobit (shihni te Jobit 1:9–11; 2:4–5), mund të pyesni veten: “Përse i qëndroj besnik Perëndisë?” Përse do të ishte e rrezikshme po t’i bindeshim Zotit vetëm për arsyen që sugjeroi Satani?

Çfarë ju bën përshtypje rreth përgjigjeve të Jobit kundrejt sprovave të tij? (Shihni te Jobit 1:20–22; 2:9–10.)

Miqtë e Jobit sugjeruan se Perëndia po e ndëshkonte atë (shihni te Jobit 4–5; 8; 11). Çfarë problemesh shihni te kjo ide? Lexojeni përgjigjen e Jobit te kapitujt 12–13. Çfarë dinte Jobi rreth Perëndisë që e ndihmoi të vazhdonte të mirëbesonte? Çfarë dini për Perëndinë, që ju ndihmon të përballeni me sfidat?

Nganjëherë, gjatë kohëve tona më të vështira, mësojmë të vërtetat më të rëndësishme. Përsiatini sprovat që përshkroi Jobi te Jobit 19:1–22 dhe të vërtetat që ai i shpalli te vargjet 23–27. Nga e dini se Shëlbuesi juaj jeton? Çfarë ndryshimi sjell në jetën tuaj kjo njohuri?

Merreni parasysh të këndoni ose dëgjoni një himn rreth Jezu Krishtit, të tillë si “E Di, Jeton Shëlbuesi Im” (Himne, nr. 74). Cilat fjalë nga ky himn shprehin ndjenjat tuaja rreth Tij?

Shihni edhe te Doktrina e Besëlidhje 121:1–12; 122.

Te Jobit 21–24, do të lexoni një debat midis Jobit dhe miqve të tij. Në thelb të këtij debati ishte një pyetje që shumë njerëz e kanë bërë: Pse vuajnë nganjëherë njerëzit e drejtë?

Megjithëse nuk i kemi të gjitha përgjigjet, në ungjillin e rivendosur të Jezu Krishtit kemi disa të vërteta që mund të na ndihmojnë për t’u dhënë kuptim fatkeqësisë dhe vuajtjes. Më poshtë janë shkrime të shenjta të ditëve të mëvonshme që përmbajnë disa prej këtyre të vërtetave. Çfarë ju mësojnë këto shkrime të shenjta rreth Atit Qiellor dhe planit të Tij?

• 2 Nefi 2:11–13

• Mosia 23:21–23; 24:10–16

• Ethëri 12:27

• Doktrina e Besëlidhje 58:3–5

• Abraham 3:22–26

Gjithashtu mund të lexoni mësimet nga Presidenti Spenser W. Kimball rreth fatkeqësisë tek “Tragedy or Destiny?” [“Tragjedi apo Fat?”] (Teachings of Presidents of the Church: Spencer W. Kimball [2011], f. 11–21.)

Nisur nga ajo që keni studiuar, si do t’i jepnit përgjigje një pyetjeje si: “Pse Perëndia lejon që të vuajnë njerëzit e drejtë?”

I acaruar nga akuzat e miqve të tij (shihni te Jobit 16:1–5; 19:1–3), Jobi në mënyrë të përsëritur e pyeti Perëndinë pse duhej të vuante kaq shumë (shihni te Jobit 19:6–7; 23:1–9; 31). Zoti nuk dha një arsye të qartë në librin e Jobit. Por Ai dha mësim një mesazh të rëndësishëm te kapitujt 38–40. Si do ta përmblidhnit atë mesazh? Për shembull, çfarë mësoni nga pyetjet e Zotit te Jobit 38:1–7, 18–24?

Do të vini re se Zoti i foli Jobit rreth disa prej krijimeve të Tij dhe veprave të tjera të fuqishme (shihni te Jobit 38–39). Mund t’i shihni disa prej atyre krijimeve (ose figura për ato). Si ju ndihmojnë këto gjëra të mendoni ndryshe rreth Perëndisë? Rreth sprovave tuaja? Si e ndryshuan ato këndvështrimin e Jobit? (Shihni te Jobit 42:1–6; shihni edhe te Moisiu 1:8–10.)

Këtu janë dy mesazhe nga konferenca e përgjithshme që mund të ndihmojnë për ta ndryshuar këndvështrimin tonë: Tamara W. Runia, “Të Shikuarit e Familjes së Perëndisë përmes Thjerrëzës Panoramike” (Liahona, nëntor 2023, f. 62–63, 67–69); Rasëll M. Nelson, “Mendoni Çelestialisht!” (Liahona, nëntor 2023, f. 117–120). Në secilin mesazh, kërkoni diçka që do të doni ta mbani mend herën tjetër kur sprovat tuaja të duken dërrmuese. Si do t’ia kujtoni vetes atë që mësuat?

• Nxitini fëmijët tuaj që t’ju tregojnë se çfarë dinë rreth Jobit. Nëse kanë nevojë për ndihmë, mund t’i drejtoni te Jobit 1:1, 13–22; 2:7–10 ose te “Jobi” (tek Tregime nga Dhiata e Vjetër, f. 145–147). Si iu përgjigj Jobi sfidave? (Shihni te Jobit 1:21; 2:10.)

  

  1:55

• Jobi ishte besnik gjatë sfidave të tij për shkak të asaj që dinte rreth Zotit. Ndoshta ju dhe fëmijët tuaj mund të shihni figura të Jezu Krishtit duke ndërvepruar me të tjerët (siç është figura më poshtë ose figurat te Libri i Figurave Artistike të Ungjillit). Flisni rreth asaj që dini për Të dhe se si është Ai. Këtu janë disa vargje që tregojnë atë që dinte Jobi rreth Zotit: Jobit 12:10, 13, 16; 19:25–27. Përse është me vlerë t’i dini këto gjëra rreth Tij?

• Jobi bëri një pyetje të rëndësishme te Jobit 14:14. Ndoshta ju dhe fëmijët tuaj me radhë mund të tregoni se si do t’i përgjigjeshit Jobit. Mund të shihni për ide tek Alma 11:42–44, në materialin filmik “In a Coming Day” [“Në Një Ditë të Ardhshme”] (Gospel Library) [Biblioteka e Ungjillit] ose në një këngë rreth Ringjalljes, të tillë si “Jezusi a Jetoi Sërish?” (Libri i Këngëve të Fëmijëve, f. 45).

1:11

• Kur Jobi ishte i trishtuar, miqtë e tij i thanë se Perëndia po e ndëshkonte ngaqë ai kishte mëkatuar (shihni te Jobit 22:5). Po të ishim miqtë e Jobit, si do të përpiqeshim për ta ndihmuar atë? Si mund t’i ndihmojnë të tjerët fjalët tona kur janë të trishtuar? (Shihni te Jobit 16:5.) Merreni parasysh të tregoni një ose më shumë prej figurave në këtë përvijim ndërsa i diskutoni këto pyetje.

• Merreni parasysh t’u kërkoni fëmijëve tuaj që të renditin disa cilësi të një miku të mirë dhe të thonë emrin e një miku që i ka këto cilësi. Më pas mund të shihni një figurë të Jezu Krishtit. Në ç’mënyra është Jezusi një mik i mirë për secilin prej nesh? Mund të mendoni për dikë që po kalon një kohë të vështirë. Planifikoni se si do të jeni një mik si Krishti për ta.

• Pasi t’i lexoni vargjet te Jobit 19:23–27, ju dhe fëmijët tuaj mund të flisni rreth mënyrës se si e dini që Shëlbuesi ynë jeton. Mund të punoni së bashku për ta vendosur dëshminë tuaj (ose vizatimet e Shpëtimtarit) në një libër (shihni vargun 23).

• Gjithashtu mund të këndoni një këngë që dëshmon për Shpëtimtarin, të tillë si “E Di, Jeton Shëlbuesi Im” (Himne, nr. 74). Jepni fraza nga himni që e forcojnë besimin tuaj tek Ai. Përse është e rëndësishme që të dimë se Jezu Krishti jeton?