Ezdras 1; 3–7; Nehemias 2; 4–6; 8

Pasi Persia e pushtoi Babiloninë, Zoti e frymëzoi mbretin persian, Kirin, për të dërguar një grup judenjsh në Jerusalem për të rindërtuar tempullin. Ndërsa lexoni tek Ezdras 1, vini re se çfarë bëri Kiri për t’i mbështetur judenjtë në këtë punë të rëndësishme. Si e shihni Zotin të punojë nëpërmjet burrave dhe grave përreth jush, përfshirë njerëz që nuk janë anëtarë të Kishës së Tij? Çfarë ju sugjeron kjo rreth Zotit dhe punës së Tij?

Shihni edhe tek Isaia 44:24–28.

Kur babilonasit e pushtuan Jerusalemin, ata e plaçkitën tempullin dhe e dogjën atë komplet (shihni te 2 Mbretërve 25:1–10; 2 Kronikave 36:17–19). Si mendoni, si mund të ishit ndier po të kishit qenë njëri prej judenjve që ishin dëshmitarë të kësaj? (Shihni te Psalmeve 137.) Vini re se si u ndien judenjtë, dekada më vonë, kur u lejuan të ktheheshin dhe të rindërtonin tempullin (shihni tek Ezdras 3:8–13; 6:16–22). Kjo mund t’ju nxitë që të përsiatni vetë ndjenjat tuaja rreth Zotit dhe shtëpisë së Tij. Përse është ndërtimi i një tempulli një arsye për të kremtuar?

Puna e Zotit rrallëherë shkon pa hasur kundërshtim. Kjo ishte e vërtetë për përpjekjet që drejtoheshin nga Zorobabeli dhe Nehemia. Ja një qasje e thjeshtë që mund t’ju ndihmojë të mësoni nga këto histori dhe të merrni parasysh se si mund ta bëni punën e Zotit pavarësisht nga kundërshtimi:

Puna e Perëndisë për Zorobabelin (Ezdras 4:3):

Puna e Perëndisë për Nehemian (Nehemias 2:17–18):

Puna e Perëndisë për mua:

Kundërshtimi me të cilin u përball Zorobabeli (Ezdras 4:4–24):

Kundërshtimi me të cilin u përball Nehemia (Nehemias 2:19; 4:1–3, 7–8; 6:1–13):

Kundërshtimi me të cilin përballem unë:

Si u përgjigj Zorobabeli (Ezdras 5:1–2):

Si u përgjigj Nehemia (Nehemias 2:20; 4:6, 9; 6:3–15):

Si mund të përgjigjem unë:

Për t’ju ndihmuar që ta krahasoni përvojën e Nehemias me jetën tuaj, mund të studioni mesazhin e Presidentit Diter F. Uhtdorf “Jemi Duke Bërë një Punë të Madhe dhe nuk Mund të Zbresim” (Liahona, maj 2009, f. 59–62), veçanërisht dy pjesët e fundit. Ndërkohë që mendoni për punën që ju ka dhënë Perëndia, mund të studioni dokumentin “Tema e Të Rejave” ose “Tema e Kuorumeve të Priftërisë Aarone” (Gospel Library) [Biblioteka e Ungjillit]. Ose mund të shihni një himn si “Si Motra në Sion” (Himne, nr. 204) ose “Ju Pleq t’Izraelit” (Himne, nr. 205).

Si mendoni, çfarë do të thotë që ta kemi “marrë me zemër punën” në shërbimin ndaj Shpëtimtarit? (Nehemias 4:6.) Çfarë do të thotë që të keni “dor[ën] mirëdashëse [të] Perëndisë … mbi [ju]” kur bëni punën e Tij? (Nehemias 2:8; shihni edhe te Nehemias 2:18; Ezdras 7:6, 9, 27–28.) Si e keni parë dorën e Tij në përpjekjet tuaja për t’i shërbyer Atij?

Gjatë brezave në robëri, judenjtë patën mundësi të kufizuar përdorimi të “libri[t] [të] ligjit të Moisiut” (Nehemias 8:1). Te Nehemias 8, Ezdra ua lexoi ligjin njerëzve. Çfarë gjeni në këtë kapitull që tregon se si u ndien Ezdra dhe populli i tij rreth Perëndisë dhe fjalës së Tij? (Shihni veçanërisht vargjet 1–12.) Çfarë tregon në jetën tuaj se si ndiheni rreth Perëndisë dhe fjalës së Tij?

Shihni edhe te Mësime të Presidentëve të Kishës: Ezra Taft Benson (2014), f. 121–131.

• Për t’iu mësuar fëmijëve tuaj rreth gëzimit që ndien judenjtë kur u rindërtua tempulli i tyre, mund t’u tregoni një figurë si ajo më poshtë. Flisni rreth arsyeve përse këta njerëz mund të qenë të lumtur që të ishin në shtëpinë e Zotit. Gjithashtu mund t’u tregoni fëmijëve tuaj përse tempulli është një vend gëzimi për ju. Si ju ka ndihmuar tempulli që të ndiheni më afër Atit Qiellor dhe Shpëtimtarit?

• Ndërsa lexoni me fëmijët tuaj tek Ezdras 3:10–13, ndihmojini të gjejnë fjalë që tregojnë se si u ndien judenjtë kur po rindërtohej tempulli. Kur të arrini në fund të vargut 13, ndoshta mund të bërtitni së bashku nga gëzimi. Ndihmojini fëmijët tuaj të mendojnë për arsyet për të qenë të gëzuar që Zoti na ka dhënë tempuj. Si mund ta tregojmë atë gëzim?

• Merreni parasysh të këndoni me fëmijët tuaj një këngë rreth tempullit, të tillë si strofa e dytë e këngës “Welcome Home” [“Mirë se Vini në Shtëpi”] (Gospel Library) [Biblioteka e Ungjillit]. Pas secilit varg, mund të ndaleni për t’i kërkuar një fëmije të tregojë diçka që atij ose asaj i pëlqen shumë rreth tempullit. Gjithashtu mund të shihni fotografi të tempujve ndërkohë që këndoni.

• Tregojuni fëmijëve tuaj historinë e Nehemias (shihni te Nehemias 2:17–20; 6:1–9; ose “Nehemia” tek Tregime nga Dhiata e Vjetër, f. 173–174). Ndërsa lexoni te Nehemias 2:20, ju dhe fëmijët tuaj mund të “fillo[ni]” duke u ngritur në këmbë dhe të bëni sikur po ndihmoni për ndërtimin e mureve të Jerusalemit. Ose fëmijëve tuaj mund t’iu pëlqejë të ndërtojnë një mur me blloqe ose sende të tjera. Ndërsa e bëjnë atë, mund t’i ndihmoni të mendojnë për gjërat e rëndësishme që Ati Qiellor dëshiron që ne t’i bëjmë.

  

  1:38

• Ndërsa lexoni te Nehemias 6:9, ftojini fëmijët tuaj të ngrenë dorën kur të dëgjojnë të thoni frazën “forco duart e mia”. Tregojuni fëmijëve për një rast kur e ndiet se Perëndia jua forcoi duart për të bërë punën e Tij.

• Lexoni me zë të lartë disa fraza nga Nehemias 8:2–3, 5–6, 8–9, 12, të cilat përshkruajnë atë që bënë njerëzit kur e dëgjuan Ezdrën të lexonte shkrimet e shenjta. Ndërsa lexoni, fëmijët tuaj mund t’i luajnë me role këto fraza. Më pas, mund t’i tregoni njëri‑tjetrit se si ndiheni kur i lexoni ose dëgjoni shkrimet e shenjta.

• Ndërsa lexoni së bashku te Nehemias 8:8, mund t’i pyesni fëmijët tuaj se çfarë i ndihmon t’i kuptojnë shkrimet e shenjta. Tregojuni atyre se si t’i përdorin ndihmat e studimit të shkrimeve të shenjta, të tilla si Udhëzuesi për Shkrimet e Shenjta dhe Tema dhe Pyetje (Gospel Library) [Biblioteka e Ungjillit]. Ftojini fëmijët tuaj të tregojnë diçka që kanë mësuar rreth Shpëtimtarit nga shkrimet e shenjta.