Esera 1; 3–7; Neemia 2; 4–6; 8

Ina ua uma ona faatoilaloina e Peresia ia Papelonia, sa musuia e le Alii ia le tupu o Peresia, o Kuresa e auina atu se vaega o tagata Iutaia i Ierusalema e toe fau le malumalu. Ao e faitau i le Esera 1, ia matau le mea na faia e Kuresa e lagolago ai tagata Iutaia i lenei galuega taua. O a ni auala o e vaaia ai le Alii o galue e tauala atu i alii ma tamaitai o siomia oe, e aofia ai latou e le o ni tagata o Lana Ekalesia? O le a se mea o fautua atu e lenei mea ia te oe e uiga i le Alii ma Lana galuega?

Tagai foi i le Isaia 44:24–28.

Ina ua osofaia e Papelonia ia Ierusalema, sa latou faamo’amo’aina le malumalu i le gaoia o mea ma susunu e tau i le palapala (tagai i le 2 Tupu 25:1–10; 2 Nofoaiga a Tupu 36:17–19). Mata o le a sou lagona pe ana e i ai o se tasi o tagata Iutaia o e na vaaitino i lenei mea? (tagai i le Salamo 137). Matau ia faalogona o tagata Iutaia, i le fiasefulu tausaga mulimuli ane, ina ua faatagaina i latou e toe foi ma toe fau le malumalu (tagai i le Esera 3:8–13; 6:16–22). E ono uunaia ai oe e mafaufau loloto i ou lava lagona e uiga i le Alii ma Lona maota. Aisea e avea ai le fausia o se malumalu ma se mafuaaga e faamanatu ai?

E seāseā ona alu le galuega a le Alii e aunoa ma le tetee. Sa moni lenei mea i taumafaiga na taitaia e Serupapelu ma Neemia. O se auala faigofie lenei e mafai ona fesoasoani ia te oe e aoao ai mai nei tala ma mafaufau pe faapefea ona e faia le galuega a le Alii e ui lava i mea faafeagai:

Galuega a le Atua mo Serupapelu (Esera 4:3):

Galuega a le Atua mo Neemia (Neemia 2:17–18):

O le galuega a le Atua mo a’u:

O le tetee na feagai ma Serupapelu (Esera 4:4–24):

O le tetee na feagai ma Neemia (Neemia 2:19; 4:1–3, 7–8; 6:1–13):

O le tetee o loo ou feagai:

O le auala na tali atu ai Serupapelu (Esera 5:1–2):

O le auala na tali atu ai Neemia (Neemia 2:20; 4:6, 9; 6:3–15):

O le auala e mafai ona ou tali atu ai:

Mo se fesoasoani e faatusatusa ai aafiaga o Neemia i lou olaga, atonu e mafai ona e suesue i le savali a Peresitene Dieter F. Uchtdorf, “We Are Doing a Great Work and Cannot Come Down” (Liahona, Me 2009, 59–62), ae maise lava vaega mulimuli e lua. A o e mafaufau e uiga i le galuega ua tuuina mai e le Atua ia te oe, atonu e mafai ona e suesueina le “Autu a Tamaitai Talavou” po o le “Autu o Korama a le Perisitua Arona” (Potutusi o le Talalelei). Pe mafai foi ona e vaai i se viiga e pei o le “Galulue e Pei o Ni Uso i Siona (Mo Tamaitai)” (Viiga, nu. 196) po o le “Outou Faifeau o Isaraelu (Mo Tane)” (Viiga, nu. 198).

O le a lou manatu o le a le uiga o le i ai o “se loto i le galuega” i le auauna atu i le Faaola? (Neemia 4:6). O le a le uiga o le i ai “o le aao alofa o … le Atua i [ou] luga” a o e faia Lana galuega? (Neemia 2:8; tagai foi i le Neemia 2:18; Esera 7:6, 9, 27–28). Na faapefea ona e vaaia Lona aao i au taumafaiga e auauna atu ia te Ia?

Mo augatupulaga na faatagataotauaina, sa faatapulaaina le faaaogaina e tagata Iutaia o “le tusi o le tulafono a Mose” (Neemia 8:1). I le Neemia 8, na faitau atu ai e Esera le tulafono i tagata. O le a se mea e te maua i lenei mataupu o loo faaalia ai lagona o Esera ma lona nuu e uiga i le Atua ma Lana afioga? (tagai faapitoa i fuaiupu 1–12). O le a se mea i lou olaga e faaalia ai ou lagona e uiga i le Atua ma Lana afioga?

Tagai foi i le Aoaoga a Peresitene o le Ekalesia: Ezra Taft Benson (2014), 115–24.

• Ina ia aoao lau fanau e uiga i le olioli na lagona e tagata Iutaia ina ua toe fausia lo latou malumalu, e mafai ona e faaali atu ia i latou se ata e pei o lea o loo i lalo. Talanoa e uiga i le mafuaaga atonu e fiafia ai nei tagata e i ai i le maota o le Alii. E mafai foi ona e ta’u atu i lau fanau le mafuaaga ua avea ai le malumalu ma se nofoaga o le olioli mo oe. Na faapefea ona fesoasoani le malumalu ia te oe e te latalata atili ai i le Tama Faalelagi ma le Faaola?

• A o e faitauina faatasi ma lau fanau le Esera 3:10–13 , fesoasoani ia i latou e sue upu lea o loo faaalia ai lagona o tagata Iutaia ina ua toe fausia le malumalu. A oo atu i le faaiuga o le fuaiupu 13, atonu e mafai ona outou alalaga faatasi mo le olioli. Fesoasoani i lau fanau e mafaufau i mafuaaga e olioli ai ona ua tuuina mai e le Alii ia i tatou malumalu. E mafai faapefea ona tatou faaalia lenā olioli?

• Mafaufau e usu se pese e uiga i le malumalu faatasi ma lau fanau, e pei o le fuaiupu lona lua o le “Welcome Home” (Potutusi o le Talalelei). A maeʻa laina taitasi, malolo e fesili i se tamaitiiti e faasoa mai se mea e fiafia i ai e uiga i le malumalu. E mafai foi ona e vaai i ata o malumalu a o outou pepese.

• Faasoa atu i lau fanau le tala ia Neemia (tagai i le Neemia 2:17–20; 6:1–9; po o le “Neemia” i le Tala o le Feagaiga Tuai, 173–74). A o e faitauina le Neemia 2:20, e mafai ona e “tutulai” ma lau fanau ma faafoliga e fesoasoani e fausia puipui o Ierusalema. Pe atonu foi e fiafia lau fanau e fausia se puipui i poloka po o isi mea faitino. A o latou faia, e mafai ona e fesoasoani ia i latou e mafaufau i mea taua e finagalo le Tama Faalelagi tatou te faia.

  

  1:38

• A o e faitauina le Neemia 6:9, valaaulia lau fanau e sii o latou lima pe a latou faalogo atu o e fai mai “faamalosi mai o’u lima.” Tau atu i tamaiti e uiga i se taimi na e lagonaina ai le faamalosia e le Atua o ou lima e faia Lana galuega.

• Faitau leotele nisi o fasifuaitau mai le Neemia 8:2–3, 5–6, 8–9, 12 lea e faamatala ai mea na faia e tagata ina ua latou faalogo o faitauina e Esera tusitusiga paia. A o e faitau, e mafai e lau fanau ona faatinoina nei fuaitau. Ona mafai lea ona outou faasoa atu i le tasi ma le isi outou lagona pe a outou faitau pe faalogo i tusitusiga paia.

• A o outou faitau faatasi i le Neemia 8:8, e mafai ona e fesili atu i lau fanau po o le a se mea e fesoasoani ia i latou ia malamalama ai i tusitusiga paia. Faaali atu ia i latou le auala e faaaoga ai fesoasoaniga mo le suesueina o tusitusiga paia e pei o le Taiala i Tusitusiga Paia ma Autu ma Fesili (Potutusi o le Talalelei). Ia valaaulia lau fanau e faasoa atu se mea ua latou aoaoina e uiga i le Faaola mai tusitusiga paia.