Eseta

Na aoao mai Peresitene Dieter F. Uchtdorf e faapea o i tatou taitoatasi “e tula’i i se tulaga uiga ese, ma ua i ai se galuega taua e na o [tatou] lava e mafai ona faia. … Ua tuuina atu e le Alii ou tiutetauave mo se mafuaaga. Atonu e i ai ni tagata ma ni loto e na o oe lava e mafai ona maua ai ni aafiaga mo le lelei. Atonu e leai lava se tasi e mafai ona faia i le ala lava lea e tasi” (“Faamaualuga Le Mea E Te Tu Ai,” Liahona, Nov. 2008, 56).

A o e faitau i le tala ia Eseta, mafaufau loloto i le ala e faatatau ai lenei faamatalaga ia te ia. Vaavaai mo auala na mafai ona faia e le Alii mo ia e laveai ai sa Iuta (tagai i le, mo le faataitaiga, Eseta 2:21–23; 3:10–14; 4:14–16). Ona mafaufau loloto lea pe na faapefea ona Ia tuuina atu ia te oe avanoa e faamanuia ai isi. O a ni isi o tulaga po o sootaga lea na Ia taialaina ai oe “mo se aso faapenei”? (Eseta 4:14). Afai o i ai sou faamanuiaga faapeteriaka, mafaufau e faitau e aoao atili ai e uiga i le galuega mai le Alii mo oe e fai. O le a se mea e mafai ona e faia e faataunuu ai lenei galuega?

Tagai foi i le “For Such a Time as This” (vitio), ChurchofJesusChrist.org.

13:55

I le tusi a Eseta, tatou te aoao ai mai le faamaoni o Eseta ma Moretekai, a e ua tatou aoao mai foi mai le faamaualuga ma le ita o Hamanu. Ao e faitau i le Eseta 3; 5:9–14, mafaufau e matau lagona, upu, ma amioga a Hamanu. O a ni mea o latou faaalia e uiga ia te ia ma ana faaosofiaga? O a ni taunuuga sa fetaiai ma ia? (tagai i le Eseta 7). O le faitau e uiga ia Hamanu e ono faaosofia ai oe e iloilo po o a ni mea e faaosofia ai ou lagona ma faatinoga. Pe o musuia oe e fai ni suiga? E mafai faapefea ona e liliu atu i le Faaola mo le fesoasoani?

Tagai foi i le Faataoto 16:32; Alema 5:28.

Matau ia tulaga na taitai atu ai Eseta ma tagata uma o Iutaia e anapopogi (tagai i le Eseta 3:13; 4:1–3, 10–17). Na faapefea ona avea le anapogi o se faamanuiga ia i latou? (tagai i le Eseta 5:2–3; 8:11–12). Aisea ua fetalai mai ai le Alii ia tatou anapopogi? (tagai i Autu ma Fesili, “Anapogi ma Taulaga Anapogi,“ Potutusi o le Talalelei) Mafaufau pe mafai faapefea ona e faia e avea ai le anapogi o se faamanuiaga maoae atu i lou olaga.

Tagai foi i le Isaia 58:6–12; “Fasting: Young Single Adult Ward, Amanda” (vitio), ChurchofJesusChrist.org.

2:41

Ina ua puipuia e Moretekai ma Eseta o laua talitonuga, ma o la tagata, sa o la tuu o laua ola i se tulaga lamatia. Atonu e itiiti ni taunuuga ogaoga o a tatou filifiliga, ae o le faia o le mea sa’o e mafai lava ona manaomia ai le lototele. O le a se mea ua tatou aoao mai i le Eseta 3:1–4; 4:10–17 e uiga i le i ai o le lototoa e fai le mea sa’o? Ia matau taunuuga eseese na oo ia Moretekai ma Eseta ina ua uma ona faaali atu le lototoa (tagai i le Eseta 3:5–11; 5:1–4). O le a le mea na manaomia ona iloa e Eseta ma Moretekai e uiga i le Atua e faia ai filifiliga na la faia?

Mafaufau i tulaga e te manaomia ai le lototele e puipuia le mea sa’o. O le a se mea ua e aoaoina mai ia Eseta ma Moretekai lea e mafai ona fesoasoani ia te oe e maua ai le lototele i le Alii?

O le lototele o Eseta na taitai atu ai i “se aso lelei e fiafia ai” (tagai i le Eseta 9:17–19). Na faapefea ona tuuina atu ia te oe e le lototele faaKeriso “se aso lelei e fiafia ai”?

Tagai foi i le “Lototele,” “Lototele e Tu Na’o Oe” (vitio), Potutusi o le Talalelei; “Vaivai ’Ea Fanau a Siona?,” Viiga, nu. 159.

3:17

4:20

• Atonu e te lagona le musuia e faaaoga le Eseta 2:7 e aoao ai lau fanau e uiga i le fesoasoani atu i tagata o le aiga o loo manaomia le fesoasoani, e pei ona faia e Moretekai mo Eseta. E mafai ona outou faitauina faatasi le fuaiupu pe aotele i au lava upu. Ona mafai lea ona outou mafaufau ma lau fanau i tagata o le aiga o e atonu e manaomia la tou fesoasoani. Fai se fuafuaga e fesoasoani ai ia i latou.

• O faataitaiga a Eseta ma Moretekai e mafai ona fesoasoani i lau fanau ia malamalama ai o le lototoa o lona uiga o le faia o le mea sa’o e tusa lava pe e te fefe. Mafaufau e tusi fuaitau sa lototoa Moretekai ina ua ia … ma sa lototoa Eseta ina ua ia …. A o outou aoaoina faatasi le tala ia Eseta, e mafai e lau fanau ona fautuaina mai ni auala e faauma ai fuaiupu. E mafai ona e faitauina le Eseta 3:1–11; 4:10–17 po o le “Eseta le Masiofo” (i le Tala o le Feagaiga Tuai, 166–70) pe vaai i ata o loo i le otootoga lenei. Ona tusi lea O le a ou faaalia le lototele e ala i le …, ma valaaulia lau fanau e lisi ni mea e finagalo le Tama Faalelagi latou te faia e manaomia ai le lototele. O se pese e uiga i le lototele, e pei o le “Ia Fai Le Mea Tonu” (Tusipese a Tamaiti, 158), e mafai ona fesoasoani.

  

  2:45

• E mafai foi ona e aoao mai e uiga i taimi na lototele ai Iesu Keriso—mo se faataitaiga, ina ua Ia puapuagatia mo a tatou agasala i Ketesemane ma luga o le satauro (tagai i le Mataio 26: 36–39; 27: 33–35). Fai atu i lau fanau e faasoa mai se taimi na latou lototoa ai, ma faasoa atu foi ou lava aafiaga.

• O le faitauina o le Eseta 4:1–3, 10–17 e mafai ona fesoasoani ia te oe e aoao ai lau fanau e uiga i le anapogi. Aisea na anapopogi ai Eseta ma tagata Iutaia? Tau atu i lau fanau le mafuaaga e te anapogi ai. E mafai foi ona e fesili atu ia i latou pe faapefea ona latou faamatala atu le anapogi i se uo e lei faia muamua lava. E mafai faapefea ona tatou fesoasoani i a tatou uo ia malamalama i faamanuiaga e oo mai i le anapogi?

• Uunaia lau fanau e mafaufau i se mea latou te ono manaomia ai le fesoasoani a le Alii. Fautua atu ia latou faia lena vaega o la latou anapogi i le Aso Sa anapogi e sosoo ai.

• Fesoasoani i lau fanau ia malamalama ina ua fefe Eseta, sa faamalosiau atu Moretekai ia te ia e ala i le faamalamalama atu faapea na fesoasoani le Alii ia te ia e avea ma masiofo “mo se taimi faapenei” (Eseta 4:14). O le ā le uiga o le tala lea a Moretekai? Talanoa le tasi i le isi e uiga i le auala na avea ai Eseta ma se meafaigaluega mo le Alii. E mafai faapefea ona avea i tatou ma meafaigaluega mo le Alii?

• E mafai faapefea ona e fesoasoani i lau fanau ia malamalama po o le a le meafaigaluega? Atonu e mafai ona e valaaulia se tasi e taina se pese i se mea faamusika pe faaali atu se ata o se tasi o faaaogaina se meafaigaluega. Ona mafai lea ona e talanoa e uiga i le avea ma meafaigaluega i aao o le Atua.