Salamo 1–2; 8; 19–33; 40; 46

A o e faitauina le Salamo, atonu e te mātauina le tele o taimi e faaalia ai e tusitala le fefe, faanoanoa, po o le popole. O lagona faapena o ni lagona ua masani ai, e faapena foi i tagata faatuatua. Ae o le mea e musuia ai le Salamo o fofō latou te ofoina mai foi, e aofia ai le faalagolago atoatoa i le Alii. A o e faitauina le Salamo 1; 23; 26–28; 46, tusi i lalo:

• O valaaulia ia faalagolago i le Alii:

• Upu e faamatala ai o Ia.

• O upu e faamatala ai le filemu, malosi, ma isi faamanuiaga Na te tuuina mai:

• O upu e faamatala ai i latou o e faalagolago ia te Ia:

Ia vaavaai foi mo ata ma faatusa manino o loo faaaoga e le Salamo e aoao atu ai e uiga i le Faaola. Mo se faataitaiga, i le Salamo 23, o a mea e o’o mai i le mafaufau ona o fuaitau e pei o le “i le mea o i ai le vao mu’a ou te taoto ai” po o “vai e tafe lemu” (fuaiupu 2)? O le a se mea e faatusa i ai le “laau” ma le “tootoo” (fuiupu 4) faamafanafana? O le a se uiga o la tatou “ipu” (fuaiupu 5) ua taumasuasua?

E i ai ni Salamo ua faasino atu i le soifuaga i le olaga nei o Iesu Keriso. Na vaai foi Kerisiano i taimi o le Feagaiga Fou i nei fesootaiga. Mafaufau e faitau mau faasino nei. Vaavaai mo fesootaiga i le va o upu o loo i nei salamo ma le soifuaga o le Faaola:

• Salamo 2:1–3 ma le Galuega 4:24–28

• Salamo 2:7 ma Galuega 13:30–33

• Salamo 22:1 ma le Mataio 27:45–46

• Salamo 22:7–8 ma le Mataio 27:39–43

• Salamo 22:16 ma le Luka 23:32–33

• Salamo 22:18 ma le Mataio 27:35

• Salamo 31:5 ma le Luka 23:46

O a ni mea ua e aoao mai i nei fesootaiga? O a valoaga ma folafolaga faatusitusiga paia e lei faataunuuina lava? O a ni mea ua e maua i nei folafolaga lea e tuuina atu ia te oe le faamoemoe mo le lumanai?

O le faitauina o Salamo 8; 19;33 e ono mafai ona musuia ai oe e mafaufau i le tele o foafoaga matagofie a le Alii. Gauai atu i ou lagona ao e [faitau]. Atonu foi e te manao e usu pe mafaufau loloto i upu o se pese e faatatau i nei salamo, e pei o le “Ua SIli Oe” (Viiga, 46). O faapefea ona “tala mai” e foafoaga a le Alii “le mamalu o le Atua” ia te oe (Salamo 19:1).

O nisi nei o viiga na musuia e le Salamo:

• Salamo 23: “O le Ali’i o Lo’u Leoleo Mamoe” (Viiga, nu. 60)

• Salamo 23:6; 150: “Praise to the Lord, the Almighty” (Hymns, no. 72)

• Salamo 26:8: “We Love Thy House, O God” (Hymns, no. 247)

• Salamo 27:1: “O Iesu Lo’u Sulu” (Viiga, nu. 49)

• Salamo 33:1–6; 95:1–6: “Le Lalolagi Manaia” (Viiga, nu. 50)

• Salamo 37:3–9: “Be Still, My Soul” (Hymns, nu. 124)

• Salamo 148: “Foafoaga Uma a le Atua” (Viiga, nu. 39)

I le Salamo, o upu e pei o le molimau, tulafono, poloaiga, ma faamasinoga e mafai ona faasino i le afioga a le Alii. Ia manatua lena mea a o e faitauina le Salamo 19:7–11. O le a se mea ua fautuaina mai ia te oe i nei fuaiupu e uiga i le afioga a le Alii? O le a se mea o aoao atu e le Salamo 29 ia te oe e uiga i Lona siufofoga? I lou aafiaga, o faapefea ona tutusa le afioga po o le siufofoga o le Alii i nei faauigaga?

Ona sa fausia le malumalu i Ierusalema i luga o se mauga, o le fuaitau “mauga o Ieova” (Salamo 24:3) e mafai ona faasino i le malumalu po o le afioaga o le Atua. O le a se mea ua faaopoopo atu e lenei mea i lou malamalama i le Salamo 24? O le a le uiga ia te oe o le i ai o “lima mamā, ma le loto mamā”? (fuaiupu 4). A o e faitauina le Salamo 26–27, o le a se isi mea ua e aoaoina e uiga i le maota o le Alii?

E i ai taimi, atonu tatou te lotovaivai ai e faalogo e manaomia ona tatou mama ina ia ulufale atu ai i le afioaga o le Atua. O le mea moni, tatou te tauivi uma lava, ma e leai se tasi o i tatou e lelei atoatoa. O le a se faamoemoe ua e maua i le savali a Elder David A. Bednar “O Lima Mama ma se Loto e Mama”? (Liahona, Nov. 2007, 80–83). E mafai faapefea ona e faaaogaina lana savali e fesoasoani ai i se tasi ua lagona le lofituina i le manao ia atoatoa? Mafaufau pe mafai faapefea ona e maua le fesoasoani a le Faaola i au taumafaiga ia i ai “lima mama, ma se loto e mama.”

Tagai foi i le Bradley R. Wilcox, “O Le Agavaa E Le o Le Atoatoa,” Liahona, Nov. 2021, 61–67.

• Mafaufau e tusi le O le Alii o … Valaaulia lau fanau e vaavaai mo auala e faamaea ai lena fuaiupu e faaaoga ai mau e pei o nei: Salamo 23:1; 27:1; 28:1; 28:7; 32:7; 46:1. O le a se mea o aoao mai e nei fuaiupu e uiga i le auala e mafai ona fesoasoani mai ai le Alii ia i tatou?

• E mafai ona outou talanoaina ma lau fanau mea e manaomia e se tamai mamoe ina ia saogalemu ma maloloina. Ona, a o outou faitau faatasi le Salamo 23, fesoasoani i lau fanau e faatusatusa mea e faia e le leoleo mamoe mo se tamai mamoe ma mea o loo faia e Iesu mo i tatou. O le a le mea tatou te manaomia ia saogalemu ai faaleagaga ma soifua maloloina? Usu faatasi se pese atonu e tuu atu ai ia i latou ni manatu, e pei o le “Le Alofa o Lo’u Faaola,” (Tusipese a Tamaiti, 42--43).

• A o outou faitauina faatasi le Salamo 24:3 , e mafai e lau fanau ona vaavaai mo upu e faamanatu atu ai ia i latou le malumalu. E mafai foi ona latou vaai i se ata o se malumalu. Ona mafai lea ona outou faitau faatasi le fuaiupu 4 e iloa ai po o ai e mafai ona ulufale atu i le malumalu. E mafai ona e talanoa e uiga i le auala e palapala ai lima ma le auala tatou te faamamaina ai. E faapefea ona tatou palapala faaleagaga? E faapefea ona fesoasoani le Faaola e faamama i tatou faaleagaga?

• Afai e ia te oe fanau laiti, e mafai ona e valaaulia i latou e faafoliga o loo fetagisi ao e faitau mai le Salamo 30:5, “E afe ane le tagi i le afiafi.” Ona fai atu lea ia faaalia le fiafia a o e faitau, “A o le alaga fiafia i le taeao.” Toe fai lenei fasifuaitau mo ni nai taimi.

• Faaali atu se ata o le Faaola, ma ta’u atu i lau fanau mea na Ia faia mo oe lea na aumai ai ia te oe le olioli. E mafai foi ona e tuu atu ia tofu tamaiti ma se taimi e uu ai le ata ma faasoa atu mea na faia e Iesu lea e aumaia ai ia i latou le olioli.

• Fesoasoani i lau fanau e tauloto le laina muamua mai le Salamo 46:10: “Ina soia, ma ia outou iloa o A’u lava o le Atua.” O le a le uiga o le “ina soia/fifilemu”? Atonu e mafai ona e faaaluina sina taimi e faataitai ai le fifilemu. E mafai foi ona outou faasoa atu i le tasi ma le isi ni aafiaga pe a “fifilemu” lea e faamalosia ai la outou sootaga ma le Atua. Fesoasoani i lau fanau e mafaufau i taimi i le aluga o le aso e mafai ai ona latou “fifilemu” e lagona le latalata atu i le Tama Faalelagi.