“Juļae 27–O̧kwōj 2. ‘N̄a Ij Kōm̧m̧an Juon Jerbal Eļap’: Ezra 1; 3–7; Nihimaia 2; 4–6; 8,” Itok, Ļoor Eō—N̄an M̧weeo im Kabun̄ in: Kallim̧ur M̧okta 2026 (2026)
“Juļae 27–O̧kwōj 2. ‘N̄a Ij Kōm̧m̧an Juon Jerbal Eļap,’” Itok, Ļoor Eō: Kallim̧ur M̧okta 2026
Ewōr Juon Jerbal Eļap Ij Kōm̧m̧ane, jān Tyson Snow
Juļae 27–O̧kwōj 2: “N̄a Ij Kōm̧m̧an Juon Jerbal Eļap”
Ezra 1; 3–7; Nihimaia 2; 4–6; 8
RiJu ro raar kalbuuj ilo Babylon emaron̄ iumin 70 iiō. Rekar luuji Jerusalem im tampeļ eo, im elōn̄ rekar meļo̧kļo̧k aer wūjlepļo̧k n̄an kien ko an Anij. Ak Anij ekar jab meļo̧kļo̧k er. Ilo m̧ool, E ekar kwaļo̧k n̄an rikanaan ro An, “Inaaj lowōj kom̧, im Inaaj kajejjet naan ko Aō rem̧m̧an kōn kom̧ bwe in In karo̧o̧l kom̧” (Jeremaia 29:10). M̧ool n̄an kanaan in, Irooj eaar kōm̧m̧ane juon iaļ n̄an an armej ro An rooltok—n̄an Jerusalem im, eļaptata, n̄an bujen ko aer. Im E ekar kajerkak rijerbal ro me raar kōttōprak “juon jerbal eļap” (Nihimaia 6:3): Juon kabna etan in Zirubbabel eaar eddo in lale ekkal eo an m̧weeo im̧ōn Irooj. Ezra, juon pris im rūjeje, eaar jipan̄ armej ro ukōtļo̧k būruer n̄an kien eo an Irooj. Im Nihimaia eaar tōl ekkal eo an wōrwōr ko reppen ipeļaakin Jerusalem. Raar iioon jum̧ae ko, ak raar bar bōk jipan̄ jān ijoke jab kar kōtmāne. En̄jake ko aer emaron̄ waļo̧k im im̧we en̄jake ko ad kōnke bar kōj jej kōm̧m̧ane juon jerbal eļap. Im āinwōt er, jerbal eo ad eļapļo̧k n̄an kōm̧m̧ane ilo m̧weeo im̧ōn Irooj, kien eo an Irooj, im jetōbin kōjparok eo jej loe ilo E.
Kōn juon etale ekadu kōn bok ko an Ezra im Nihimaia, lale “Ezra” im “Nihimaia” ilo Bible Dictionary.
Ļōmņak ko n̄an Ekkatak ilo M̧weeo im ilo Kabun̄ in
Ezra 1
Irooj ej im̧we armej n̄an kōttōprak jibadbad ko An.
Ālkin an Pōrsia anjo̧ jān Babilon, Irooj eaar im̧we kiin̄ eo an Pōrsia, Sairōj, n̄an jilkinļo̧k juon kurup in ri Ju n̄an Jerusalem n̄an bar kalōk tampeļ eo. Ilo am̧ riiti Ezra 1, lale ta eo Sairōs eaar kōm̧m̧ane n̄an jipan̄ ri Ju ro ilo jerbal in eaorōk. Ewi wāween am̧ lo an Irooj kōjerbal em̧m̧aan im kōrā ro ipeļaakum̧, ekoba armej ro rejjab uwaan Kabun̄ in? Ta eo ilo elmokot in ej katakin eok kōn Irooj im jerbal eo An?
Bar lale Aiseia 44:24–28.
Ezra 3:8–13; 6:16–22
M̧weeo im̧ōn Irooj ej juon jikin m̧ōņōņō.
Ke riBabilon ro rekar deļo̧n̄e Jerusalem, rekar koote tampeļ eo im tile aolepān (lale 2 Kiin̄ Ro 25:1–10; 2 Kronikel 36:17–19 Ekōjkan am̧ ļōmņak kwomaron̄ kar en̄jake n̄e en kar kwe juon iaan riJu ro raar kam̧ool men in? (lale Sam Ko 137). Lale wāween an kar riJu ro en̄jake, bukwi iiō tokālik, ke rekar kōtļo̧k aer bar jepļaak im bar kalōk tampeļ eo (lale Ezra 3:8–13; 6:16–22). Men in emaron̄ im̧we eok n̄an kōļmenļo̧kjeņ kōn en̄jake ko am̧ make kōn Irooj im m̧weeo Im̧ōn. Etke ekkal tampel ej juon jibadbad n̄an kōjeraam̧m̧an?
Tampeļ eo ilo Zirubbabel; pija in jān Sam Lawlor
Ezra 4–7; Nihimaia 2; 4; 6
Ewōr juon jerbal an Anij eaorōk n̄an aō kōm̧m̧ane.
Jerbal eo an Irooj ejakutkut an ejjeļo̧k mennin jum̧ae. Men in em̧ool kōn jibadbad eo Zirubbabel im Nihimaia raar tōl e. Juon in bun̄ten epidodo me emaron̄ jipan̄ eok ekkatak jān bwebwenato kein im ļōmņak ekōjkan am̧ maron̄ kōm̧m̧ane jerbal eo an Irooj jekdoon mennin jum̧ae.
Jerbal eo an Anij n̄an Zirubbabel (Ezra 4:3):
Jerbal eo an Anij n̄an Nihimaia (Nihimaia 2:17–18):
Jerbal eo an Anij n̄an n̄a:
Jum̧ae ko Zirubbabel eaar iooni (Ezra 4:4–24):
Jum̧ae ko Nihimaia eaar iooni (Nihimaia 2:19; 4:1–3, 7–8; 6:1–13):
Jum̧ae ko n̄aij iooni:
Ta eo Zirubabbel eaar kōm̧m̧ane (Ezra 5:1–2):
Ta eo Nihimaia eaar kōm̧m̧ane (Nihimaia 2:20; 4:6, 9; 6:3–15):
Ta eo imaron̄ kōm̧m̧ane:
N̄an jipan̄ keidi en̄jake eo an Nihimaia n̄an mour eo am̧, kwomaron̄ ekkatak enaan eo an Būreejtōn Dieter F. Uchtdorf “We Are Doing a Great Work and Cannot Come Down” (Liaona, Māe 2009, 59–62), eļaptata jekjōn ko ruo āliktata. Ilo am̧ ļōmņake jerbal eo Anij ekar lewaj n̄an kwe, kwomaron̄ ekkatak “Unin tōl an Doulul eo an Jiron̄ ro” ak “Unin Tōl eo an Doulul eo an Priesthood eo an Aron” (Gospel Ļaibrāre). Ak kwomaron̄ lale juon al āinwōt “As Sisters in Zion” (Hymns, no. 309) ak “Ye Elders of Israel” (Hymns, no. 319).
Ilo am̧ ļōmņake ta meļeļein n̄an “m̧ōņōņō in jerbal” ilo jerbal eo an Rilo̧mo̧o̧r? (Nihimaia 4:6). Emaron̄ ta meļeļein n̄e epād “pein aō Anij … em̧m̧an [ioom̧]” ilo am̧ kōm̧m̧ane jerbal eo An? (Nihimaia 2:8; bar lale Nihimaia 2:18; Ezra 7:6, 9, 27–28). Ewi wāween am̧ lo Pein ilo kijejeto ko am̧ n̄an jerbal n̄an E?
Nihimaia 8
Ij jeraam̧m̧an n̄e ij ekkatak jeje ko rekwojarjar.
Iumin iiō in kōm̧akoko, eaar dik an riJu ro bōk “bok in kien Moses” (Nihimaia 8:1). Ilo Nihimaia 8, Ezra eaar riiti kien eo n̄an armej ro. Ta eo kwoj loe ilo jebta in me ej kwaļo̧k elmen an Ezra im armej ro an kar en̄jake kōn Anij im naan eo An? (lale eļaptata eoon 1–12). Ta ko ilo mour eo am̧ rej kwaļo̧k elmen am̧ en̄jake kōn Anij im naan eo An?
Bar lale Teachings of Presidents of the Church: Ezra Taft Benson (2014), 115–24.
N̄an eļapļo̧k, lale enaan eo an allōn̄ in ilo Liaona im N̄an Kōkajoorļo̧k Jodikdik ro māākjiin.
Ļōmņak ko n̄an Katakin Ajri ro
Ezra 3:8–13; 6:16–22
M̧weeo im̧ōn Irooj ej juon jikin m̧ōņōņō.
-
N̄an katakin ajri ro nejum̧ kōn m̧ōņōņō eo riJu ro raar en̄jake ke tampeļ eo aer eaar bar ekkal, kwomaron̄ kwaļo̧k n̄an er juon pija āinwōt pija in ilaļ. Kōnono kōn etke armej rein remaron̄ kar m̧ōņōņō n̄an pād ilo m̧weeo im̧ōn Irooj. Kwomaron̄ bar jiron̄ ajri ro nejum̧ etke tampeļ eo ej juon jikin m̧ōņōņō n̄an kwe. Elmen an kar tampeļ jipan̄ eok epaakeļo̧k Jemedwōj Ilan̄ im Rilo̧mo̧o̧r eo?
-
Ilo am̧ riit Ezra 3:10–13 ippān ajri ro nejum̧, jipan̄ er pukot naan ko me rej kwaļo̧k jon̄an an kar riJu ro en̄jake ke tampeļ eo ekar bar ekkal. N̄e koottōpar jem̧ļo̧kin eoon 13, bōlen kwomaron̄ lam̧ōj ilo m̧ōņōņō ippān doon. Jipan̄ ajri ro nejum̧ ļōmņak kōn unin m̧ōņōņō bwe Irooj eaar letok tampeļ n̄an kōj. Ewi wāween ad kwaļo̧k m̧ōņōņō in?
-
Ļōmņak in al juon al kōn tampeļ ippān ajri ro nejum̧, āinwōt eoon eo kein karuo ilo “Welcome Home” (Gospel Library). Ālkin kajjojo ļain, kwomaron̄ bōjrak im kajjitōk ippān juon ajri n̄an kwaļo̧k juon men em̧m̧an ippān kōn tampeļ. Kom̧ maron̄ bar lale pictures of temples ilo ami al.
Nihimaia 2:17–20; 6:1–9
Irooj enaaj jipan̄ eō kōm̧m̧ane “jerbal eo eļap” An.
-
Kwaļo̧k n̄an ajri ro nejum̧ bwebwenato in Nihimaia (lale Nihimaia 2:17–20; 6:1–9; ak“Nihimaia” ilo Bwebwenato ko jān Kallim̧ur M̧okta, 173–74). Ilo ami riiti Nihimaia 2:20, kwe im ajri ro nejum̧ maron̄ “jutak” im kōtanke kwomij jipan̄ kalōk wōrwōr ko an Jerusalem. Ak ajri ro nejum̧ remaron̄ m̧ōņōņō in ekkal wōrwōr kōn būļak ko an men ko jet. Ilo ami kōm̧m̧ane, kwomaron̄ jipan̄ er ļōmņak kōn men ko raorōk Jemedwōj Ilan̄ ekōņaan bwe jen kōm̧m̧ane.
1:38Nehemiah
-
Ilo am̧ riiti Nihimaia 6:9, karuwanene ajri ro nejum̧ n̄an kajutak peier n̄e rej ron̄ am̧ ba “ kakajoor pā kā peiū.” Jiron̄ļo̧k ajri ro nejum̧ kōn juon tōre ke kwaar en̄jake an Anij kōkajoor pā ko peiūm̧ n̄an kōm̧m̧ane jerbal eo An.
Nihimaia 8:1–12
Jeje ko rekwojarjar rej juon kōjeraam̧m̧an.
-
Kōļap ainikien am̧ riit jet naan jān Nihimaia 8:2–3, 5–6, 8–9, 12 me rej kōmeļeļeik ta ko armej ro raar kōm̧m̧ani ke raar ron̄ an Ezra riiti jeje ko rekwojarjar. Ilo am̧ riit, ajri ro nejum̧ remaron̄ arin naan kein. Innām kom̧ maron̄ kwaļo̧k n̄an doon ewi wāween ami en̄jake n̄e kom̧wij riit ak ron̄jake jeje ko rekwojarjar.
-
Ilo ami riit ippān doon Nihimaia 8:8, kwomaron̄ kajjitōk ippān ajri ro nejum̧ ta eo ej jipan̄ er meļeļe kōn jeje ko rekwojarjar. Kwaļo̧k n̄an er wāween kōjerbal kein jipan̄ ko an jeje ko rekwojarjar āinwōt Unin Tōl n̄an Jeje ko Rekwojarjar im Topics and Questions (Gospel Library). Karuwanene ajri ro nejum̧ n̄an kwaļo̧k juon men raar ekkatak kōn Rilo̧mo̧o̧r jān jeje ko rekwojarjar.
Kappukot m̧ool ko ejjeļo̧k jem̧ļo̧kier ilo jeje ko rekwojarjar. “Jeje ko rekwojarjar … robrak kōn m̧ool ko an gospel, jet iien ebōk kijejeto n̄an loi. Ilo am̧ ekkatak ippān doon jān jeje ko rekwojarjar, bōjrak im kajjitōk ippān ro kwoj katakin er ta m̧ool ko an gospel in rej kūli. Jipan̄ er lo elmen an m̧ool kein iookļo̧k karōk in lo̧mo̧o̧r eo an Jemedwōj Ilan̄. Jet iien m̧ool ko indeeo rej kōnono kaki ilo jeje ko rekwojarjar, im jet iien rej kōmeļeļeik bwebwenato ko im mour ko an armej ro jej riit kōn er. Emaron̄ bar jipan̄ n̄an etale ippān doon jekjek in bwebwenato in etto an eoon ko kom̧wij riiti, im bar meļeļein eoon ko im elmen aer jerbal n̄an kōj rainin” (Katakin ilo Wāween eo an Rilo̧mo̧o̧r, 22).
N̄an eļapļo̧k, lale ennaan eo an allōn̄ in ilo Jera māākjiin.