“Juļae 20–26. ‘Mejem Rej N̄an Kwe’: 2 Kronikel 14–20; 26; 30,” Itok, Ļoor Eō—N̄an M̧weeo im Kabun̄ in: Kallim̧ur M̧okta 2026 (2026)
“Juļae 20–26. ‘Mejem Rej N̄an Kwe,’” Itok, Ļoor Eō: 2026
Jar eo an Kiin̄ Jihoshapat, jān Keeley Rae
Juļae 20–26: “Mejem Rej N̄an Kwe”
2 Kronikel 14–20; 26; 30
Kar jepoole Laļ eo an Juda Jarin tariņae ro jān jilu laļ ko an rikōjdat ro raar aolep m̧aaj ilo juon wōt iien, keppopo n̄an pata. Ilo iien lukkun aikuj in, Jihoshapat, Kiin̄ in Juda, ear oktakļo̧k Aelōn̄ in Kiin̄ eo an lan̄ im laļ. Jihoshapat ear ain armej ro an ilo tampeļ eo im jar. Ekar kwaļo̧k m̧ōjņo in kanniōk eo an im kar akweļap n̄an lo̧mo̧o̧r. Ilo uwaake eo An, Irooj ear kallim̧ur kōn kōjparok, “Kom̧win jab mijak im jab lōļn̄o̧n̄” (2 Kronikel 20:17).
Emaron̄ ejjeļo̧k jarin tariņae ilo m̧aan kōjām ko ad n̄an kamijak kōj, ak jet iien jej en̄jake an kōjdat im nana jepool kōj. Iaļan lo̧mo̧o̧r eo an ejja āinwōt eo Jihoshapat eaar pukote, im jar ko ad remaron̄ āinwōt eo kar an: “O amwōj Anij, … ejjeļo̧k amwōj maron̄ ņae jar in eļap rej itok ņae kōm, im kōm jaje ta eo kōmin kōm̧m̧ane, a mejem rej n̄an Kwe” (2 Kronikel 20:12).
Ilo 2 Kronikel 14–30, kom̧ naaj riit kōn Jihoshapat im kiin̄ ro jet ilo Juda. Ļōmņak ekōjkan an tōmak in oktak ko aer, anjo̧ ko, im apan̄ ko maron̄ jerbal n̄an mour eo am̧ make.
Kōn juon etale ekadu kōn bok 2 Kronikel, lale “Chronicles” in the Bible Dictionary.
Ļōmņak ko n̄an Ekkatak ilo M̧weeo im ilo Kabun̄ in
2 Kronikel 14–16
Lōke Anij enaaj bōktok n̄an eō aenōm̧m̧an.
Ke Asa ear kiin̄ in Juda, eaar jelm̧ae elōn̄ kapan̄pan̄ ko—āinwōt kōj aolep rainin. Ilo am̧ riit kōn mālijjon̄ ko eaar jelm̧ae, lale ia eo eaar likut lōke eo an ie im an kar oktak iumin iien.
|
Eoon in Jipan̄ |
Apan̄ ko Asa ear jelm̧ae |
Ia eo Esa eaar likut an lōke ie |
|---|---|---|
Eoon in Jipan̄ 2 Kronikel 14:9–12 | ||
Eoon in Jipan̄ 2 Kronikel 15:1–8 | ||
Eoon in Jipan̄ 2 Kronikel 16:1–10 |
Etke jet iien ej bōjrak ad lōke Irooj? Ta ko jet kwoj bar ekkatak jān mour eo an Asa?
Bar lale Elder D. Todd Christofferson, “Jemdo̧o̧n eo Ad ippān Anij,” Liaona, Māe 2022, 78–80.
2 Kronikel 18
Imaron̄ jutak kōn m̧ool eo, jekdo̧o̧n ke ejjab bun̄bun̄.
Rikanaan Maikeia emaron̄ kar en̄jake eļap abņōņō n̄an antoone jeraam̧m̧an n̄an kiin̄ ro Jihoshapat im Ehab ilo pata eo aer ņae Syria. Lale kam̧ool ko an abņōņō in ilo 2 Kronikel 18:1–12. Ta kam̧ool ko in peran im m̧ool eo an Maikeia kwoj loi ilo eoon 13–27? (Kile bwe ilo eoon 14, Maikeia ej letok juon uwaak ekakūtōtō, lukkun uwaak eo an epād ilo eoon 16.) Elmen an naan ko an Maikeia kar kūrm̧ool ilo eoon 28–34?
Ta jet jekjek ko me komaron̄ jelm̧ae āinwōt an kar Maikeia jelm̧ae? Ta eo ej lewaj am̧ peran n̄an jutak kōn Irooj im katak ko An?
Ilo raan ko an Kiin̄ Jihoshapat, jilu laļ raar kakure Jerusalem.
2 Kronikel 20:1–25
Ilo iien ko reppen, imaron̄ oktakļo̧k n̄an Anij im rikanaan ro An.
Ilo am̧ riiti 2 Kronikel 20:1–12, pukot ta eo Kiin̄ Jihoshapat ear kōm̧m̧ane ke laļ ko rej itok in kakure Juda. Ekōjkan am̧ maron̄ mour kake m̧akutkutko an ilo jekjek ko rekapan̄pan̄ kwoj jelm̧ae?
Uwaak eo an Irooj n̄an jar eo an Jihoshapat epād ilo eoon 14–17. Ta naan ko kwoj loe ijo me remaron̄ kaenōm̧m̧an eok ak juon armej kojeļā kajeen ilo iien ko reppen?
Raan eo tok juon, armej in Jerusalem ro raar diwōjļo̧k im jelm̧ae jarin tarin̄ae ro rej jum̧ae er. Ilo am̧ riiti 2 Kronikel 20:20, pukot enaan eo Jihoshapat ear leļo̧k n̄an armej in Jerusalem ro. Elmen an naan ko an kar kūrm̧ool? (lale eoon 22–23). Elmen an kar Anij kōjeraam̧m̧an eok kōn am̧ tōmak ilo E im ļoor rikanaan ro An?
Būreejtōn Russell M. Nelson eaar ba: “En̄jake eo aō ej bwe iien eo kwoj bōjrak am̧ likūt kakōļļe in kajjitōk ko ālkin naan ko an rikanaan im likut exclamation point ko, im kōm̧m̧ane, kōjeraam̧m̧an ko renaaj lutoktok. Ijan̄in kar kajjitōk ippa make, ‘N̄āāt eo rikanaan eo ej kōnono āinwōt juon rikanaan im n̄āāt eo ejjab?’ Ikdeleel eo aō ej, ‘Ekōjkan aō āinwōt e?’” (in Lane Johnson, “Russell M. Nelson: A Study in Obedience,” Ensign, Aug. 1982, 24).
Bar lale Katak im Bujen Ko 21:4–6; “A Secure Anchor” (pija in alooj), Gospel Library; “Kōm̧m̧ani kālet ko reim̧we,” N̄an Kōkajoorļo̧k Jodikdik Ro: Juon Tōl n̄an Kōm̧m̧ani Kālet Ko (2022), 4–5.
A Secure Anchor
Kile enaan in m̧ool ko. Elder Neal A. Maxwell eaar katakint: “Jeje ko rekwojarjar rej letok n̄an kōj katak ko raorōk Im n̄e meram an Jetōb ej jerbale tōrerier, rej rebōlbōl kōn en̄jake in selestial me ej kabbōl iaļ eo jej aikuj ļoore” (“According to the Desire of [Our] Hearts,” Ensign, Nov. 1996, 21). Ilo am̧ ekkatak jeje ko rekwojarjar, ļōmņak in bōk iien n̄an kile, kakōļļeik, im kejōkļo̧kjen kōn enaan in ekaju ak ekajoor. Jet waanjon̄ak maron̄ loi ilo 2 Kronikel 14:11; 15:7; 18:13; 20:15; 26:5. Bar ta jet “katak ko raorōk” kwomaron̄ loe?
2 Kronikel 26:3–21
Utiej ej tōl n̄an kakure
Āinwōt kiin̄ ko jet rellōn̄ an Juda, iien kakien eo an Uzziah eaar ijjino kōn juon tōprak eļap ak eaar jem̧ļo̧k ilo kabūrom̧ōjm̧ōj. Kappukot jon̄ak in ilo 2 Kronikel 26. Ta eo kwoj ļōmņak ekar iien oktak eo ilo mour eo an Uzziah?
Ilo am̧ riit eoon 16–23, ļōmņak bwe iien in, pris wōt remaron̄ itiil kāāntōļ ilo tampeļ eo. Etke kwoj ļōmņak Kiin̄ Uzziah ear jab pokake Anij? Ta eo kwoj ekatak jān en̄jake in ekabūrom̧ōjm̧ōj?
Bar lale “Be Thou Humble,” Hymns, no. 130.
2 Kronikel 30
Imaron̄ erom̧ juon rikōm̧m̧an aenōm̧m̧an.
Ilo 2 Kronikel 30, Hezekiah ekar kiin̄ an Juda. Ear karuwanene Kingdom eo juon an Israel n̄an aindoon ilo Jerusalem n̄an kōjeraam̧m̧an Kwojkwoj in Kijone eo—juon men me elōn̄ iiō in an ri Israel ro jab kōm̧m̧ane (lale eoon 1–12). Ta eo ej im̧we eok kake karuwanene eo im ekōjkan an kar rilotak ro an Israel im ro rej bōk eddoon ilo Juda ļōmņak kake?
Kōnke elukkun kar to, jet iaan rilotok ro n̄an Jerusalem raar jab jeļā kōn meļeļe wāween aer bōk koņaer ilo Kwojkwoj in Kijone eo. Ilo am̧ riiti 2 Kronikel 30:18–27, ta eo kwoj ekkatak jān uwaak eo an Hezekiah im tōprak in uwaak eo an?
Bar lale Russell M. Nelson, “Rikaenōm̧m̧an ro Jej Aikuji,” Liaona, Māe 2023, 98–101.
N̄an eļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik Ro māākjiin.
Ļōmņak ko n̄an Katakin Ajri ro
2 Kronikel 14–16; 20
Imaron̄ lōke Anij.
-
N̄an kwaļo̧k kadkad in ļōmņak eo n̄an lōke Anij, kwomaron̄ kwaļo̧k n̄an ajri ro juon men kwoj lōke bwe enaaj kōjattoik eok n̄e ewōt, āinwōt juon umbrella ak jacket. Kōtļo̧k bwe ren kōnono kōn etke jemaro̧n̄ lōke men kein. Innem jipan̄ er keidi menin n̄an lōke eo ad ilo Irooj. Etke jej lōke E n̄an kōjpārok kōj ilo jetōb?
-
Kwomaron̄ jipan̄ ajri ro nejum̧ kappukot ekōjkan an kar Kiin̄ Esa im Kiin̄ Jihoshapat uwaak n̄an apan̄ ko ilo aer lōke Irooj (lale 2 Kronikel 14:11; 20:3–5, 12). Kwaļo̧k n̄an doon wāween ko jet kom̧ maron̄ kwaļo̧k n̄an Irooj ke kom̧wij lōke E.
2 Kronikel 20:1–29
Anij enaaj ron̄jake im uwaake jar ko aō.
-
Peij in m̧akutkut eo an wiik in emaron̄ jipan̄ ajri ro meļeļe bwebwenato in jar eo an Jihoshapat im uwaak eo an Irooj. Kwe im ajri ro nejum̧ maron̄ kōnono kōn iien ko me Anij eaar ron̄ im uwaak e jar ko ami. Ļōmņak in kobaik iien ko me uwaak ko raar itok ilo wāwee ko jet ak iien ko me kwaar jab kōtmane. Juon al kōn jar, āinwōt “I Pray in Faith” (Children’s Songbook, 14) emaron̄ jipan̄ kalōk tōmak eo an ajri ro.
2 Kronikel 26:3–23
Imaron̄ in ettā.
-
N̄an ekkatak kōn kauwōtata ko an utiej, ajri ro nejum̧ remaron̄ kalōk juon tawōr kōn būļak ko ak kap jiddik ko. Ilo aer likut kajjojo būļakak kap ioon tawōr eo, jipan̄ er kile juon iaan tōprak ko an Uzzaia jān 2 Kronikel 26:3–15. Alkin aer kadedeļo̧k tawōr eo, kōnono ippān ajri ro nejum̧ elmen an kar Uzzaia kar kōm̧m̧an bwe en aetok im kajoor wōt. Ta eo en kar kawōtlo̧ke? Innām, ilo am riiti eoon 16, komaron̄ kōnono kōn ta meļeļein bwe būruōn en “utiejḷọk n̄an kakure eo [ad]” Kwaļo̧k n̄an ajri ro ta eo ear waļo̧k n̄an Uzzaia ilo eoon 16–23. Kōtļo̧k bwe ren rupe tawōr eo aer. Kōnono kōn ta eo jemaron̄ kōm̧m̧ane n̄an pād wōt ilo ad ettā.
King Hezekiah and the People Thank God, © Lifeway Collection/licensed from goodsalt.com
2 Kronikel 30
Imaron̄ erom̧ juon rikōm̧m̧an aenōm̧m̧an.
-
Pija eo ilōn̄ ej kwaļo̧k iien eo Hezekiah eaar karuwaneneik ro riturin Juda jān Kingdom eo an Israel n̄an kōjeraam̧m̧an Kwojkwoj in Kijone eo ippāer. Kwomaron̄ lale pija in ippān ajri ro nejum̧ im riit 2 Kronikel 30:18–19, eo me ej kōmeļeļe ke jet iaan rilotok ro raar jab karreok er make ekkar n̄an kakien eo an Moses. Ta eo Hezekiah ear kōm̧m̧ane? Elmen an kar menin kōm̧m̧an bwe rilotok ro ren en̄jake? Jipan̄ ajri ro nejum̧ ļōmņak ekōjkan aer maron̄ āinwōt Hezekiah ilo wāween aer kōm̧m̧an n̄an ro jet.
N̄an eļapļo̧k, lale enaan eo an allōn̄ in ilo Jera māākjiin.