Itok, Ļoor Eō
Ļōmņak ko n̄an Keememeji: “Jisōs Enaaj Ba n̄an Aolepān Israel, ‘Ro̧o̧ltok”

“Ļōmņak ko n̄an Keememeji: ‘Jisōs Enaaj Ba n̄an Aolepān Israel, ‘Ro̧o̧ltok,”’” Itok, Ļoor Eō—N̄an M̧weeo im Kabun̄ in: Kallim̧ur M̧okta 2026 (2026)

“Ļōmņak ko n̄an Keememeji: ‘Jisōs Enaaj Ba n̄an Aolepān Israel, “Ro̧o̧ltok,”’” Itok, Ļoor Eō: Kallim̧ur M̧okta 2026

pija ej bōk jikin ļōmņak ko

Ļōmņak ko n̄an Keememeji

“Jisōs Enaaj Ba n̄an Aolepān Israel, ‘Ro̧o̧ltok’”

Ilo āne jemdān ilo Sinai, Moses ekar aiin ajri ro nejin Israel im̧aan toļ eo. Ijo Irooj ekar kwaļo̧k bwe E ekar kōņaan ukōt kurup in me rekar rikōm̧akoko n̄an juon kurup in armej ekajoor. “Im kom̧naaj n̄an Eō,” Ekar ba, “juon aelōn̄ in pris ro, im aelōn̄ e kwōjarjar” (Exodus 19:6). E kar kallim̧ur bwe renaaj eddōk im jeraam̧m̧an, jekdo̧o̧n n̄e rikōjdat ro rellōn̄ļo̧k, im kajoor rej jepool er.

Aolepen menin eban bōk jikin kōn riIsrael rekar bōnbōn ak kajoor ak kapeel. Enaaj tōprak, Irooj eaar kōmeļeļe, eļan̄n̄e renaaj “eo̧ron̄ [ainikien], n̄an kōjparok bujen eo [An]” (Exodus 19:5). Kajoor eo an Anij, ejjab eo aer make, enaaj kōm̧m̧an aer peran.

Men̄e riIsrael ro raar jab aolep iien pokake ainikien Anij, im aolep iien eaar bōjrak aer kōjparok bujen eo An. Elōn̄ raar kabun̄ n̄an anij ko jet im kar bōk iminene ko im m̧anit ko ipeļaakier. Raar elļo̧k jān lukkuun men eo me eaar kōjenolo̧k juon laļ—bujen jemjerā eo aer ippān Anij. Ijelo̧kin an kajoor an Anij kōjparok er, ejjeļo̧k mennin kōbōjrak rikōjdat ro an.

Ejepelōklōk Eo

Elōn̄ iien ikōtaan 735 and 720 BC,(m̧okta jān Kraist) Ri Assyria ro raar jodik Northern Kingdom an Israel, ijo jikin jon̄oul iaan bwij ko jon̄oulruo, im bōk taujin ri Israel n̄an kōmakoko ilo jikin ko rellōn̄ ilo Assyria. RiIsrael rein kar jino jeļā kake er āinwōt “bwij ko rejako,” ilo m̧ōttan ko kōnke kar joļo̧k er jān lāmoren eo aer im rekar ejepelōklōk ilubwiljin laļ ko. Ak rekar jako ilo juon en̄jake em̧ūlaļ: ium̧win elōn̄ tōre ko ekar jako aer en̄jake kōn wōn er āinwōt armej in bujen ro an Anij.

Ejjab to elōn̄ armej ilo Southern Kingdom in Juda raar bar elļo̧k jān Irooj. Ri Assyria ro raar bar kakure im bōk laļ eo; Jerusalem wōt ear pād ilo kōjpārok ilo kabwilōn̄lōn̄. Tokālik, ikōtaan 597 im 580 BC, ri Babylon ro raar kakure Jerusalem, ekoba tampeļ ko, im raar bōk bujen armej n̄an kōm̧akoko. Tarrin 70 iiō tokālik, kar kōtļo̧k aolep riJuda ro bwe ren jepļaak n̄an Jerusalem im bar kalōk tampeļ eo. Ijoke, elōn̄ raar pād wōt ilo Babylon.

Kijeek ej kakure Jerusalem

The Destruction of Jerusalem by Nebuzar-adan, jān William Brassey Hole, © Providence Collection/licensed from goodsalt.com

Ilo an iien m̧ootļo̧k, riIsrael ro jān aolep bwij ko raar “jeepepļo̧k … kōn juon kōto i peļaakin aolep aelōn̄ ko raar jaje kajjier” (Zekaraia7:14). Jet iar ear tōl er n̄an jikin ko jet. Ro jet raar etal jān Israel bwe ren ko jān kōm̧akoko ak kōn un ko ikkijeen kien ak jukjuk in pād eo.

Jej ņaetan aolep iien kein ejjepelōklōk eo an Israel. Im eaorōk n̄an jeļā kōn ejepelōklōk eo kōn jet un ko. Ilo juon men, ej juon unin kōnono eļap ilo Kallim̧ur M̧okta—elōn̄ rikanaan ro jān Kallim̧ur M̧okta raar kam̧ool kōn wōtlo̧k ilo jetōb me kar kōm̧m̧an aer ejepelōklōk. Innām raar lo jān m̧aan im kakōlkōl kake. Jet iaer raar mour ie. Menin ejipan̄ n̄an keememej n̄e kwoj riiti bok in Aiseia, Jeremaia, Amos, im rikanaan ro jet ilo m̧ōttan ko ālik an Kallim̧ur M̧okta. Kōn jeļā in ilo kōlmenļo̧kjen, n̄e kwoj riiti kanaan ko aer kōn Assyria im Babylon, kabun̄ n̄an ekjab im kōmakoko, kakkure im bar kōkāāl, kwonaaj jeļā ta eo rej kōnnaan kake.

Meļeļe kōn ejjepelōklōk eo an Israel enaaj jipan̄ eok meļeļe ļo̧k kōn Bok in Mormon, kōnke Bok in Mormon ej juon rekoot in juon ra in Israel eo ejepelōklōk. Rekoot in ej ijjino ippān Liai im baam̧le eo raar diwōjļo̧k jān Jerusalem iturinļo̧k 600 BC, m̧okta jān aer ri Babylon ro kakure. Liai eaar juon iaan rikanaan ro raar kanaan kōn ejepelōklōk eo an Israel. Im baam̧le eo an raar jipan̄ kakūrm̧ool kanaan eo, bōk ra in Israel eo aer im katōke ilo jikin eo rājet ilo laļin in, Amedka kan.

Aiintok Doon

Ijoke, ejepelōklōk eo an Israel, ej rājet in wōt bwebwenato eo. Irooj eaar jab meļo̧kļo̧k armej ro An, im E ejjab elļo̧k jān er, jekdo̧o̧n n̄e rej elļo̧k jān E. Kanaan ko rellōn̄ me Anij enaaj ekar kajeplōklōk Israel raar itok ippān elōn̄ kallim̧ur ko bwe juon raan E naaj aiintok er.

Raan eo ej rainin—rainin ad. Aiintok doon eo em̧ōj an kar jino wōt. Ilo 1836, taujin iiō ālkin an kar Moses aiintok armej in Israel ro ioon Toļ Sainai, ekar waļo̧ktok ilo Kirtland Tampeļ n̄an leļo̧k n̄an Josep Smith “ki ko an aintok Israel jān m̧ōttan ko emān in laļ” (Katak im Bujen ko 110:11). Kiiō, kōn tōl an armej ro rej kabwijer kii ko, ro bwijjin Israel rej aiintok er jān aolep laļ ijoke rijerbal ro an Irooj remaron̄ etal ieļo̧k.

Moses ej waļo̧k n̄an Josep Smith an Oliver Cowdery ilo Kirtland Tampeļ

Moses, Elias, im Ilaija rej Waļo̧ktok ilo Kirtland Temple, jān Gary E. Smith

Būreejtōn Russell M. Nelson ekar likūt bwe aiintok doon in “ej juon men eaorōk ej bōk jikin ilo laļ in rainin. Ejjeļo̧k bar juon men rej keidi n̄an jon̄an kilepen, ejjeļo̧k bar juon men rej keidi n̄an jon̄an aorōkin, ejjeļo̧k bar juon men rej keidi n̄an jon̄an aibojooj in. Im eļan̄n̄e kwoj kāālet n̄an, eļan̄n̄e kwoj kōņaan, komaron̄ juon m̧ōttan eo eļap.”

Ewi wāween ad jipan̄? Ta meļeļein n̄an aiintok Israel? Meļeļein ke bwe bwij ko jon̄oul ruo ren jepļaakļo̧k n̄an laļ eo raar jokwe ie m̧oktaļo̧k? Ilo m̧ool, meļeļein eļapļo̧k, eļapļo̧k an indeeo. Āinwōt an kar Būreejtōn Nelson kar kōmeļeļeiki:

“N̄e jej kōnono kōn aiintok, jej ba m̧ool in eaorōk: aolep kajjojo ajri ro nejin Jemedwōj Ilan̄, jim̧or ilo rejete ko an rōn̄ōl eo, rej aikuj ron̄jake ennaan eo an gospel eo kar kōjepļaaktok an Jisōs Kraist. …

“Jabdewōt iien kwoj kōm̧m̧ane jabdewōt men me ej jipan̄ jabdewōt armej—ilo jim̧or jait ko an ran̄ōl eo—bōk juon bun̄tōn m̧aanļo̧k n̄an kōm̧m̧ani bujen ko ippān Anij im bōk kain̄i ko remenin aikuj n̄an aer an peptaij im ko an tampeļ, kwoj jipan̄ aiintok Israel. Epidodo āinwōt in.”

Menin ej waļo̧k, āinwōt an Aiseia ba, “kajjo iami” (Aiseia 27:12) ak, āinwōt an Jeremaia kar antoone, “juon jikin kweilo̧k, im ruo jān juon baam̧le” (Jeremaia 3:14).

Aiintok Israel ej meļeļein bar kōjepļaaktok ro nejin Anij n̄an Ippān. Meļeļein kōjepļaak tok er n̄an bujen jem̧jerā Ippān. Meļeļein bar ejaake juon “aelōn̄ e kwōjarjar” Eto An kar karōk bwe en ejaake (Exodus 19:6).

Ro̧o̧ltok

Āinwōt juon eo eaar kōm̧m̧an bujen ippān Anij, kwoj uwaan m̧weeo im̧ōn Israel. Em̧ōj am̧ aiintok, im kwoj juon riaiintok ro. Bwebwenato eo aetok in wōt epepen an armej in bujen ro ej walōn̄ļo̧k n̄an iien ļapļap eo, im kwe kwoj juon eo eaorōk ilo bwebwenato in. Iien eo in n̄an an “Jisōs enaaj ba n̄an aolepān Israel, ‘ro̧o̧ltok.’”

En̄in ej enaan eo kōn riaiintok ro: Ro̧o̧ltok n̄an bujen eo. Ro̧o̧ltok n̄an Zaion. Ro̧o̧ltok n̄an Jisōs Kraist, Eo Ekwojarjar an Israel, im E naaj karo̧o̧ltok eok n̄an Anij, eo Jem̧am̧.

Kakeememej ko

  1. Lale Duteronomi 28:1–14.

  2. Lale 2 Kiin̄ Ro 17:6–7; 2 Kronikel 36:12–20.

  3. Lale 2 Kiin̄ Ro 17:1–7. Jon̄oul bwij ko rekar pād ilo kōm̧akoko jān ippān riAssiria ro, kar Reuben, Simeon, Issachar, Zebulun, Dan, Naphtali, Gad, Asher, Ephraim, im Manasseh. Bwij in Livai eaar ajeededļok ilo bwij ijoko jikin bwij ko jet bwe ren maron̄ kōm̧m̧ane eddo in pris ko aer.

  4. Lale 2 Kiin̄ Ro 19; Aiseia 10:12–13.

  5. Lale 2 Kiin̄ Ro 24–25; 2 Kronikel 36; Jeremaia 39; 52.

  6. Lale Ezra 1; 7; Nihimaia 2.

  7. Lale 2 Nipai 1:1–5; Omni 1:15–16.

  8. Lale 2 Kiin̄ Ro 25:22–26; Jeremaia 42:13–19; 43:1–7.

  9. Ilo AD 70, riRom ro raar kakure Jerusalem im tampeļ ko ie, im riJu ro raar ejepelōklōk ipeļaakin elōn̄ laļ.

  10. Lale Jeremaia 29:18; Ezekiel 22:15; Hoseia 9:17; Amos 9:9; 1 Nipai 1:13.

  11. Lale 1 Nipai 15:12.

  12. Lale 1 Nipai 1:13, 18–20; 10:12–14.

  13. Lale Aiseia 5:26; 27:12; 54; Jeremaia 16:14–15; 29:14; 31:10; Ezekiel 11:17; 34:12; 37:21–28; Zekaraia 10:8; 1 Nipai 10:14; 22:25; 3 Nipai 16:1–5; 17:4.

  14. Russell M. Nelson, “Hope of Israel” (nokon eo an jodikdik ipeļaakin laļin, June 3, 2018), Gospel Library.

  15. Russell M. Nelson, “Hope of Israel.”

  16. Lale 2 Nipai 30:2.

  17. “Kiō Jen Mōņōņō,” Hymns, no. 22.