2 Kiin̄ Ro 2–7

Kabwilōn̄lōn̄ ko rej kwaļo̧k n̄an kōj kajoor an Anij. Remaron̄ jipan̄ kōj anjo̧ jān mour ko reppen ilo mour in—āinwōt juon āne em̧ōrā eo ej aikuj dān erreo (lale 2 Kiin̄ Ro 2:19–22) ak juon ūlūl eo aikuj in pukote (lale 2 Kiin̄ Ro 6:4–7). Ak eļapļo̧k an aorōk, kabwilōn̄lōn̄ ko remaron̄ ukōtļo̧k kōj n̄an Irooj. Ilo am̧ riit 2 Kiin̄ Ro 2–6, ļōmņak in laajrake kabwilōn̄lōn̄ ko kwoj loi, im kōļmenļo̧kjeņ kōn katak in jetōb ko kwoj ekkatak jān kajjojo iaer.

Kwomaron̄ bar kōņaan keidi kabwilōn̄lōn̄ ko Ilaija eaar kōm̧m̧ane ippān kabwilōn̄lōn̄ ko Kraist eaar kōm̧m̧ani (lale 2 Kiin̄ Ro 4:8–37 im Luk 7:11–16; 2 Kiin̄ Ro 4:42–44 im Jon 6:1–13; 2 Kiin̄ Ro 5:1–15 im Luk 17:11–19). Ta kabwilōn̄lōn̄ ko rej katakin eok kōn Rilo̧mo̧o̧r im rikanaan ro An?

Bar lale 2 Nipai 26:12–13; 27:23; Moronai 7:35–37; jekjōn eo “Kajoor in Jetōb eo ej Im̧we Jerbal eo” in Russell M. Nelson, “Kajoor in Jetōb eo ej Im̧we Jerbal eo,” Liaona, Māe 2022, 99–100.

Irooj eaar im̧we Ilaija n̄an kanaan kōn men ko rej itok—ekkā wōt, men ko me āinwōt epen aer naaj kar waļo̧k. Ilo am̧ riiti 2 Kiin̄ Ro 4:8–17; 7:1–16, ļōmņak kōn elmen am̧ uwaake naan eo an Irooj jān rikanaan ro An rainin. Ta katak ko, kanaan ko, ak kallim̧ur ko kwar ron̄ jān rikanaan ro remour? Ta eo kwoj kōm̧m̧ane n̄an kōjerbal tōmak ilo naan ko aer?

Bar lale 3 Nipai 29:6; Katak im Bujen Ko 1:37–38; “Teachings of Presidents” collection, Gospel Library.

Ilo am̧ riit 2 Kiin̄ Ro 5, ļōmņak in keidi an Neaman lepa ippān apan̄ ko ilo jetōb kwoj iooni.

Ewōr ke juon armej āinwōt “rikaṃakoko” ilo mour eo am̧, me ej kōketak eok n̄an kappukot tōl kōn apan̄ eo am̧ jān rikanaan ro an Irooj? (lale eoon 2–3, 13).

Ta eo Irooj ej karuwanene eok n̄an kōm̧m̧ane me enaaj ejaad pidodo—āinwōt “Kwōn tutu, im kwōnaaj erreo”? (eoon 13). Ta eo emaron̄ dāpij eok jān am̧ mour kōn karuwainene in An epidodo?

Elmen am̧ maron̄ kwaļo̧k ettā āinwōt kar Neaman?

Je wāween an en̄jake eo an Neaman jelōt tōmak eo an ilo Anij in Israel (lale eoon 15 Ta eo kwomaron̄ ekkatak jān menin?

Bar lale Luk 4:27; 1 Piter 5:5–7; Alma 37:3–7; Ether 12:27; L. Whitney Clayton, “Whatsoever He Saith unto You, Do It,” Liahona, May 2017, 97–99; “Naaman and Elisha” (pija in alooj), Gospel Library.

14:30

Ilo am̧ kajjieon̄ ļoor Kraist, em̧ōj ke am̧ en̄jake āinwōt rijerbal eo edik an Ilaija—ejjeļo̧k bōnbōn in im emijak? Ļōmņak ke kwoj pinej tarrin ilo am̧ riiti 2 Kiin̄ Ro 6:8–23. Elmen an bwebwenato eo ukōt wāween am̧ ļōmņak im en̄jake kōn mālijjon̄ ko, eddo ko, im kijejeto ko am̧ n̄an mour kōn gospel in?

Ilo am̧ kōļmenļo̧kjeņ, ļōmņak kōn naan ko an Būreejtōn Henry B. Eyring: “Āinwōt rikarejaran Ilaija, elōn̄ļo̧k ippam̧ jān ro rej jum̧ae eok. Ro jet rej pād ippam̧ koba maron̄ lo er kōn mej ko mejām̧ make. Irooj enaaj kotak eok im ilo iien naaj kōm̧m̧ane ilo An kūr ro jet n̄an jutak ippam̧ (“O Ye That Embark,” Liahona, Nov. 2008, 58).

Ļōmņak in kōm̧m̧ane juon laajrak in “bwe ro rej rie [eok]” (eoon 16)—armej ro Anij eaar likūt ilo mour eo am̧ n̄an jipan̄ eok. Kwomaron̄ kajjitōk Ippān n̄an jipan̄ eok jeļā wōn ro ilo an kōpelļo̧k mejān jetōb eo am̧. E kar bōlen bar likūt eok ilo mour ko an ro jet n̄an jipan̄ er. Elmen am̧ maron̄ bōk kajoor im jipan̄ jān doon?

N̄āāt eo kwar en̄jake jipan̄ eo me Irooj ej kōmeļeļeik ilo Katak im Bujen Ko 84:88?

Kwomaron̄ bar ekkatak enaan eo an Sister Michelle D. Craig “Mej ko n̄an Loļo̧kjeņ” (Liaona, Nob. 2020, 15–17). Kajjitōk ippam̧ make, “Ta eo Anij ekōņaan bwe in loe?”

Kōnnaan kōn bwebwenato ilo 2 Kiin̄ Ro 6:8–23, Elder Ronald A. Rasband eaar ba: “Emaron̄ lōn̄ ak emaron̄ ejjeļo̧k jariot ko an kijeek rej jilkintok n̄an kōļapļo̧k mijak ko ad im bōk demon ko ad, ak katak in ealikkar. Irooj ej pād ippād, ļōmņak kōn kōj im kōjeraam̧m̧an kōj ilo wāween ko E wōt emaron̄ kōm̧m̧ani. Jar emaron̄ bōktok kajoor im revelesōn ko me jej aikuj n̄an likūti iolap in ļōmņak ko ilo Jisōs Kraist im katok in pinmuur eo An. Irooj ejeļā bwe ilo jet iien jenaaj en̄jake mijak. Emōj aō pād ijeņ im barāinwōt kwe. … Ilo Kabun̄ in jemaron̄ dik ilo oran ilo wāween an lal in bōnbōn, bōtaab eļan̄n̄e jenaaj kōppeļļo̧k māj in jetōb ko ad, ‘bwe ro rej rie kōj relōn̄ jān ro rej rie er’ [2 Kiin̄ Ro 6:16]” (“Kom̧win Jab Lōļn̄o̧n̄,” Liaona, Okt. 2018, 18, 19). Elmen am̧ naaj kōjerbal naan kein n̄an jipan̄ juon armej eo ej en̄jake ikūm̧kūm̧ im mijak?

Bar lale “Dearest Children, God Is Near You,” Hymns, no. 96.

• Ālkin am̧ jipan̄ ajri ro nejum̧ meļeļe ta in kabwilōn̄lōn̄, karuwainene er n̄an kōm̧m̧ane juon laajrak in waanjon̄ak in kabwilōn̄lōn̄ ko. Pija ko ilo Bok In Gospel Pija ak Itok, Ļoor Eō remaron̄ jipan̄. Innām remaron̄ pukot kabwilōn̄lōn̄ ko ilo 2 Kiin̄ Ro 4:1–7, 14–17, 32–35, 38–44. Ta eo kabwilōn̄lōn̄ kein rej katakin kōn Jemedwōj Ilan̄?

• Kwe im ajri ro nejum̧ kōnono kōn elmen an Anij kwaļo̧k An iakwe ilo kabwilōn̄lōn̄ ko. Kom̧ maron̄ al ippān doon juon al āinwōt “God’s Gracious Love” (Gospel Library).

• Jipan̄ ajri ro nejum̧ ekkatak bwebwenato eo ilo 2 Kiin̄ Ro 5:1–3, 9–14. Ļōmņak in kōjerbal “Ilaisha Ej Kōmour Neaman” (ilo Bwebwenato ko jān Kallim̧ur M̧okta, 134–37) ak pijain Neaman ilo unin tōl eo an wiik in. Etke Neaman eaar jab karreo ilo Reba Jordan, jekdo̧o̧n n̄e Ilaija eaar jiron̄e ke enaaj kōmour nan̄inmej eo an? Elmen an kar Neaman jeraam̧m̧an ke eaar ļoor ta eo Ilaija eaar jiron̄e. Kom̧ maron̄ kwaļo̧k n̄an doon en̄jake ko ke kom̧ kar pokake Irooj, jekdo̧o̧n n̄e kwaar jab lukkuun lōke ta eo kom̧ kōņaan kar kōm̧m̧ane.

  

  1:52

• Kom̧ maron̄ bar kalikkar 2 Kiin̄ Ro 5:13, ijo rijerbal ro an Neaman raar jipan̄e kāālet n̄an pokake rikanaan Ilaija. Ajri ro nejum̧ remaron̄ kōnono kōn wāween ko remaron̄ jipan̄ ro m̧ōttaer im baam̧le eo aer ron̄jake im pokake rikanaan eo.

• Kwe im ajri ro nejum̧ maron̄ ļōmņak ke juon jarin tariņae ej jepool kom̧ kōn jāje, kidia, im jāriōt. Elmen am̧ naaj kar en̄jake? Ta eo kwonaaj kar kōm̧m̧ane? Innām ajri ro nejum̧ remaron̄ kiil mejāer ilo am̧ riiti 2 Kiin̄ Ro 6:16–17 n̄an er. (Bar lale “Ilaisha im jarin tariņae eo an Irooj,” ilo Bwebwenato ko jān Kallim̧ur M̧okta, 138–39, ak pija eo ilo jemļo̧k in unin tōl in.) N̄e kwōj bōk naan ko “kapeļļo̧k mejān” (eoon 17), kajjitōk bwe ajri ro ren kōpelļo̧k mejāer. Kōnono kōn ta eo rijerbal eo ear loe. Kwaļo̧k n̄an ajri ro nejum̧ wāween ko kwar en̄jake bwe Irooj eaar pād ippam̧ ilo iien ko reppen, jekdo̧o̧n men̄e kwar make iaam̧.

  

  1:9