Sam Ko 1–2; 8; 19–33; 40; 46

Ilo am̧ riiti Sam Ko, kwomaron̄ lo ewi ekūtkūt in an rijejej ro kwaļo̧k mijak, būrom̧ōj, im ikum̧kum̧. En̄jake kein ekkā aer waļo̧k n̄an aolep, jekdo̧o̧n armej in tōmak. Ak men eo ej kom̧m̧an an Sam Ko kōreilok kōj ej bwe rej bar letok mennin ņa mejļan men otemjej, ekoba lōke Irooj. Ilo am̧ riiti Sam Ko 1; 23; 26–28; 46, je:

• Kūr ko n̄an lōke Irooj.

• Naan ko rej kōmeļeļeik E.

• Naan ko me rej kōmeļeļeik aenōm̧m̧an, kajoor, im kōjeraam̧m̧an ko E ej litok.

• Naan ko rej kōmeļeļeik armej ro rej lōke E.

Bar alooje pija eo im kōkkaļļe ko n̄an kōjerbal Sam ko n̄an kwaļo̧k kōn Rilo̧mo̧o̧r. N̄an waanjon̄ak, ilo Sam Ko 23, ta naan ko āinwōt “ej kababu eō ilo meļaaj in wūjooj e maroro” ak “dān ko re ļae” (eoon 2) rej itok n̄an ļōmņak eo am̧? Ta eo “aļaļ” im “jokoņōm̧” eo rekaenōm̧m̧an (eoon 4) rej kakōļļein? Emaron̄ ta meļeļein bwe “kab” ko ad (eoon 5) ren lutokļo̧k?

Jet iaan sam ko rej kalikkar kōn mour eo an Jisōs Kraist ioon laļin. Rikūrjin ro ilo iien ko an Kallim̧ur Ekāāl raar bar lo ekkeijel kein. Ļōmņak in riiti eoon in jipan̄ kein ilaļ. Kappukot ekkeijel ko ikōtaan naan ko ilo sam ko im mour eo an Rilo̧moo̧r:

• Sam Ko 2:1–3 im Jerbal 4:24–28

• Sam Ko 2:7 im Jerbal 13:30–33

• Sam Ko 22:1 im Matu 27:45–46

• Sam Ko 22:7–8 im Matu 27:39–43

• Sam Ko 22:16 im Luk 23:32–33

• Sam Ko 22:18 im Matu 27:35

• Sam Ko 31:5 im Luk 23:46

Ta ko kwoj ekkatak jān am̧ etale ekkeijel kein? Ta kanaan im kallim̧ur ko an jeje ko rekwojarjar me rejan̄in kūrm̧ool? Ta ko kwoj loe ilo kallim̧ur kein me ej lewaj am̧ kōjatdikdik n̄an ilju im jekļaj?

Riiti Sam Ko 8; 19; 33 emaron̄ im̧we eok n̄an lōmņaki kom̧m̧anm̧an ko rellōn̄ im aiboojoj an Irooj. Lukkuun lale en̄jake ko am̧ n̄e kwoj kōm̧m̧ane menin. Kwomaron̄ bar kōnaan al ak lin̄ūri naan ko an al eo me ej ekkeijelļo̧k ippān sam ko, āinwōt “How Great Thou Art” (Hymns, 86). Elmen am kōm̧m̧anm̧an ko an Irooj “kwaḷọk jerbal an pein” n̄an eok? (Sam Ko 19:1).

Erkein bar jet al ko reim̧we jān Sam Ko:

• Sam Ko 23: “The Lord Is My Shepherd” (Hymns, no. 108)

• Sam Ko 23:6; 150: “Praise to the Lord, the Almighty” (Hymns, no. 72)

• Sam Ko 26:8: “We Love Thy House, O God” (Hymns, no. 247)

• Sam Ko 27:1: “The Lord Is My Light” (Hymns, no. 89)

• Sam Ko 33:1–6; 95:1–6: “For the Beauty of the Earth” (Hymns, no. 92)

• Sam Ko 37:3–9: “Be Still, My Soul” (Hymns, no. 124)

• Sam Ko 148: “All Creatures of Our God and King” (Hymns, no. 62)

Ilo Sam Ko, naan ko āinwōt naan in kam̧ool, ekjab, kakien, im ekajet remaron̄ iokļo̧k naan eo an Irooj. Likūt ilo kōļmenļo̧kjeņ eo am̧ ilo am̧ riiti Sam Ko 19:7–11. Ta eo eoon kein rej kallikare n̄an eok kōn naan ko an Irooj? Ta eo Sam Ko 29 ej katakin eok kōn Ainikien? Ilo en̄jake eo am̧, em̧ōj ke an naan ak ainikien Irooj kar jejjet n̄an kōmeļeļe ko?

Kōnke tampeļ eo ilo Jerusalem ekar ekkal ioon toļ, naan eo “toļ in Jeova” (Sam Ko 24:3) emaron̄ iokļo̧k tampeļ ak n̄an m̧aan mājen Anij. Ta eo men in ej kobaik waj n̄an jeļā eo am̧ kōn Sam Ko 24? Ta meļeļein n̄an kwe n̄e ej “erreo pein, im būruon e kwōjarjar”?(eoon 4). Ilo am̧ riiti Sam Ko 26–27, ta ko jet kwoj ekkatak kōn m̧weeo im̧ōn Irooj?

Jet iien, jemaron̄ ebbweer n̄e jej ron̄ ke jej aikuj erreo n̄an deļo̧n̄e m̧aan mājen Anij. Ilo m̧ool, kōj aolep jej apan̄, im ejjeļo̧k iaad eweeppān. Ta kōjatdikdik ko kwoj loi ilo enaan eo an Elder David A. Bednar “Clean Hands and a Pure Heart”? (Liahona, Nov. 2007, 80–83). Ekōjkan am̧ maron̄ kōjerbal enaan in n̄an jipan̄ juon armej eo ej en̄jake eddodo in kōņaan weeppān? Ļōmņake ekōjkan am̧ bōk jipan̄ eo an Rilo̧mo̧o̧r ilo kijejeto eo am̧ n̄an “erreo pein, im būruon e kwōjarjar”

Bar lale Bradley R. Wilcox, “Mour Erreo Ejjab Meļeļein Ejjeļo̧k Likjab,” Liaona, Okt. 2021, 61–67.

• Ļōmņak in je Irooj ej … karuwaneneik ajri ro neūm̧ n̄an pukot wāween ko n̄an kam̧ōj jantōj eo ilo aer kōjerbal eoon ko āinwōt kein: Sam Ko 23:1; 27:1; 28:1; 28:7; 32:7; 46:1. Ta ko eoon kein rej katakin kōj kōn wāween an Irooj jipan̄ kōj?

• Kwomaron̄ kōnono ippān ajri ro nejūm̧ ta eo juon ļaam̧ eaikuji n̄an pād ilo kōjparok im ājmour. Innām, ilo ami riit ippān doon Psalm 23, jipan̄ ajri ro nejūm̧ keidi ta eo juon seperd ej kōm̧m̧ane n̄an juon ļaam̧ ippān ta eo Jisōs ej kōm̧m̧ane n̄an kōj. Ta eo jej aikuji bwe jen jokne im emourur ilo jetōb? Al ippān doon juon al me emaron̄ leļo̧k aer ļōmņak, āinwōt “I Feel My Savior’s Love” (Children’s Songbook, 74–75).

• Ilo ami riit Sam Ko 24:3 ippān doon, ajri ro nejūm̧ remaron̄ pukot naan ko me rej kakeememej er kōn juon tampeļ. Remaron̄ bar kalimjōk pijain juon tampeļ. Innām kom̧ maron̄ riit ippān doon eoon 4 n̄an ekkatak wōn ro remaron̄ deļo̧n̄e tampeļ. Kwomaron̄ kōnono kōn ekōjkan an pā ko ettoon im elmen ad maron̄ karreoiki. Elmen ad ettoon ilo jetōb? Elmen an Rilo̧mo̧o̧r jipan̄ kōj erreeoilo jetōb?

• N̄e ewōr ajri jiddik, komaron̄ karuwanene er n̄an riab jan̄ ilo am̧ riit jān Sam Ko 30:5, “jan̄ enaaj pād wōt ilo bon̄.” Innām kajjitōk ippāer n̄an kwaļo̧k aer m̧ōņōņō ilo am̧ riit “A lan̄lōn̄ enaaj itok n̄e e jibbōn.” Āliji naan in jejjo̧ alen.

• Kwaļo̧k juon pija in Rilo̧mo̧o̧r, im jiron̄ ajri ro nejūm̧ ta E kar kōm̧m̧ane n̄an kwe me ej boktok n̄an eok m̧ōņōņō. Kwomaron̄ bar leļo̧k n̄an kajjojo ajri iien n̄an jibwe pija eo im kwaļo̧k ta eo Jisōs eaar kōm̧m̧ane n̄an boktok n̄an er m̧ōņōņō.

• Jipan̄ ajri ro nejūm̧ kakilōklōke ļain eo kein kajuon jān Sam Ko 46:10: “Kom̧win pād wōt im jeļā bwe N̄a Anij.” Emaron̄ ta meļeļein “pād wōt”? Bōlen kwomaron̄ joļo̧k jidik iien n̄an ekatak ikōn̄ wōt. Kwomaron̄ bar kwaļo̧k n̄an doon en̄jake ko me “pād wōt” eaar kōkajoorļo̧k jemjerā eo am̧ ippān Anij. Jipan̄ ajri ro nejūm̧ ļōmņak kōn iien ko ilo juon raan me raar maron̄ “pād wōt” n̄an en̄jake epaakeļo̧k Jemedwōj Ilan̄.