“Julahe 27–Ohkohs 2. ‘Nga Oruh Sie Orekma Yohk’: Ezra 1; 3–7; Nehemiah 2; 4–6; 8,” Fahsruh, Fahsr Tukuk—Nuhke Lohm Sesr ac Alu ah: Wuhlweacng Mahtuh 2026 (2026)
“Julahe 27–Ohkohs 2. ‘Nga Oruh Sie Orekma Yohk,’” Fahsruh, Fahsr Tukuk: Wuhlweacng Mahtuh 2026
Oasr Orekma Yohk Se Nga Enenuh in Oruh, sel Tyson Snow
Julahe 27–Ohkohs 2: “Nga Oruh Sie Orekma Yohk”
Ezra 1; 3–7; Nehemiah 2; 4–6; 8
Mwet Jew elos an ye kohs sin Babylon ke lusen yac 70 (itngucul). Kuhnanuclac acn Jerusalem ac tempuhl lalos, ac puhkantwen selos muhlkuhnlah olwelah lalos in liyacacng masap luhn God. Tuhsruhk God el tiacna muhlkuhnuhloslac. El tuh fahk ke mwet pahluh Lal, “Nga fah muhtwacta nuh yuruwos, ac ahkpwacyei wuhlwelah luhk in fohlohkihnkowosme nuh yen suwos” (Jeremiah 29:10). Fahsr fal nuhke kahs in pahluh se inge, Leum el sang inkacnek nuh sin mwet Lal in fohlohk—kwewana nuh fin acn Jerusalem ac, yohk srihpaciyac, nuhke olwelah lalos. Ac El sruhkwack mwet in kuhlwacnsap suc ahkfahsryelah “sie orekma yohk” (Nehemiah 6:3): Sie kafuhnah pahngpahng Zerubbabel karihngihn sifilpac muhsahyak luhn lohm sin Leum. Ezra, sie mwet tol ac mwet sihm, el tuh kahsruh mwet uh in fohlohklac sifilpac liyacacng masap luhn Leum. Ac Nehemiah el kol sifilpac muhsahlah luhn sinkac luhn acn Jerusalem. Elos sun lainyac ke ma elos oruh inge, tuhsruhk elos eis pac mwe kahsruh ke ma elos tiac nuhnkuh muh ac sang kahsruh nuh selos. Ma elos puhlakihn inge kuh in fahkwack ma pwacye nuh sesr ac mokle kuht ke srihpen kuht oacyacpac oruh sie orekma yohk. Ac oacna orekma lalos, orekma lasr yohk ma kuht enenuh in oruh ke lohm sin Leum, masap luhn Leum, ac karihngihnyuck ke ma kawihl kuht konwacack Sel.
Nuhke mwe ahkuhtweyac nuhke puk luhn Ezra ac Nehemiah, liye “Ezra” ac “Nehemiah” ke Pwacpuhl Tiksinacri an.
Mwe nuhnak nuhke Lutlut Lohm ah ac Alu
Ezra 1
Leum el mokle mwet uh in ahkfahsryelah orekma Lal.
Tukun acn Persia tuh kuhtanglac acn Babylon ah, Leum el mokle tohkohsrah luhn acn Persia, Cyrus, in suhpwaclah sie u in mwet Jew nuh Jerusalem in sifilpac muhsahelah tempuhl we ah. Ke kom riti Ezra 1, nuhnkuh ke ma Cyrus el oruh in kahsruh mwet Jews ke orekma yohk srihpac se inge. Kom fuhkah liye Leum ke el orekmakihn mukul ac muhtwacn ma raunikomlac, wi pac mwet ma tiac mempuhr ke Alu Lal? Meac ma se inge ahkkahlwemye nuh sum kacl Leum ac ke orekma Lal?
Liye pac Isaiah 44:24–28.
Ezra 3:8–13; 6:16–22
Lohm sin Leum pa acn in engan se.
Ke mwet Babylon elos kuhtanglah acn Jerusalem ah, elos kuhnahoslah tempuhl sac ac fuhrweack (liye 2 Kings 25:1–10; 2 Chronicles 36:17–19). Kom nuhnkuh tuh ac fuhkah puhla lom kom fin wi sie sin mwet Jews ah liye ke motom ma se sikyak inge? (liye Psalm 137). Akihlen puhla luhn mwet Jews ingacn, ke yac singucul kuhtuh tohkoh, ke elos tuh kuh in fohlohk ac sifilpac muhsahelah tempuhl lalos (liye Ezra 3:8–13; 6:16–22). Ma se ingacn kuh in mokle kom in motko ke puhla lom sifacna kacl Leum ac ke lohm Sel. Efuh muhsah luhn tempuhl uh sie srihpac in ahkfuhlwactyeyuck?
Tempuhl fin acn Zerubbabel; sroal sel Sam Lawlor
Ezra 4–7; Nehemiah 2; 4; 6
Oasr orekma yohk srihpac God el use nuh sihk nga in oruh.
Orekma luhn Leum suhkwac tiac ahkfohsyeyuck. Ma se inge pwacye nuhke orekma ma kolyuck sel Zerubbabel ac Nehemiah. Pa inge sie ohiyac fihsrwacsr ma kuh in kahsrwekom in lotwelah liki sramsram inge ac nuhnkuh lah kom ac fuhkah oruh orekma luhn Leum finne oasr lainyac:
Orekma luhn God nuh sel Zerubbabel (Ezra 4:3):
Orekma luhn God nuh sel Nehemiah (Nehemiah 2:17–18):
Orekma luhn God nuh sihk:
Mwe lain ma sonol Zerubbabel (Ezra 4:4–24):
Mwe lain ma sonol Nehemiah (Nehemiah 2:19; 4:1–3, 7–8; 6:1–13):
Mwe lain ma sunyuc:
Oruh lal Zerubbabel (Ezra 5:1–2):
Oruh lal Nehemiah (Nehemiah 2:20; 4:6, 9; 6:3–15):
Fuhkah oruh luhk ke pacl nga sun lainyuck:
In kapsruh ma sikyak nuh sel Nehemiah nuh ke moul lom an, kom kuh in lutlut ke mwe fahkwack lal Prestuhn Dieter F. Uchtdorf “We Are Doing a Great Work and Cannot Come Down” (Liahona, May ohk2009, 59–62), yohkna section luo sahflah an. Ke kom nuhnkuh ke orekma God el usot nuh sum, kom kuh in lutlut ke “Young Women Theme” kuh “Aaronic Priesthood Quorum Theme” (Gospel Library). Kuh kom kuh in liye soko on in alu oacna “As Sisters in Zion” (Hymns, no. 309) kuh “Ye Elders of Israel” (Hymns, no. 319).
Kom nuhnkuh tuh mac kalmeyac in “oasr sie nuhnak in orekma” ke orekma luhn Mwet Lahngo? (Nehemiah 4:6). Meac kalmeyac in “pahol God oasr feim” ke kom oruh orekma Lal? (Nehemiah 2:8; liye pac Nehemiah 2:18; Ezra 7:6, 9, 27–28). Kom liye pahol fuhkah wi kom ke srihke lom in kuhlwacnsuhpwacl?
Nehemiah 8
Nga insewowo ke nga lutlut ke ma suhmuhslah.
Ke fihl nuhke fihl ke elos an ye kohs, mwet Jew elos koflah in riti pacl nuhkwewa “ke puk luhn masap lal Moses” (Nehemiah 8:1). Ke Nehemiah 8, Ezra el riti masap uh nuh sin mwet lal. Meac kom sokwack ke sapta se inge ma ahkkahlwemye puhla lal Ezra ac mwet lal kacl God ac ke kahs Lal? (liye pac verses 1–12). Meac se ke moul lom ma ahkkahlwemye ke puhla lom kacl God ac kahs Lal?
Liye pac Teachings of Presidents of the Church: Ezra Taft Benson (2014), 115–24.
Nuhke kuhtuh pac liye ma nuhke mahlwem inge ke Liahona ac Mwe Ahkkweye Mwet Fuhsr mackuhsin.
Mwe Nuhnak nuhke Luti Tuhlihk
Ezra 3:8–13; 6:16–22
Lohm sin Leum pa acn in engan se.
-
Kom kuh in sang tuhlihk an in liye petsac se ten inge in lotwelos ke engan se ma mwet Jew puhla ke tempuhl lalos sifilpac muhsahyak ah. Sruhmuhn lah efuh mwet inge engan ke elos muhta ke lohm sin Leum. Kom kuh pac in fahk nuh sin tuhlihk an efuh tempuhl uh acn in engan se nuh sum. Tempuhl uh kahsrwekom fuhkah in puhla fototo nuh sin Pahpah Inkuhsrao ac Mwet Lahngo?
-
Ke kom riti Ezra 3:10–13 sin tuhlihk ngacn, kahsrwelos in konwacack kahs ma ahkkahlwemye puhla luhn mwet Jew ke tempuhl lalos sifilpac muhsaheyucklac ah. Ke kom sun sahflahiyacn verse 13, sahp kom kuh in tuhkweni sasa ke engan. Kahsruh tuhlihk an in nuhnkuh ke kuhtuh srihpac in engan ke Leum el use tempuhl nuh sesr uh. Kuht ac fuhkah ahkkahlwemye engan se ingacn?
-
Nuhnkuh in wi tuhlihk an yuck soko on ke tempuhl, oacna ke fohs ahkluo ke “Welcome Home” (Gospel Library). Tukun kais sie lain, kom kuh in tui kihtin pacl in siyuhk sie tuhlihk an in sruhmuhn sie ma el luhngse ke tempuhl. Kom kuh pac in liye petsac ke tempuhl ke kom on uh.
Nehemiah 2:17–20; 6:1–9
Leum el fah kahsreyuc in oruh “orekma yohk” Lal.
-
Sruhmuhn nuh sin tuhlihk an sramsram kacl Nehemiah (liye Nehemiah 2:17–20; 6:1–9; kuh “Nehemiah” ke Sramsram ke Wuhlweacng Mahtuh, 173–74). Ke kom riti Nehemiah 2:20, kom ac tuhlihk an kuh in “tuyak” ac oruh in na muh kowos kahsruh muhsahi sinkac luhn acn Jerusalem. Kuh tuhlihk an sahp ac luhngse muhsahi sie sinkac ke plak kuh kuhtuh ma sahyac. Ke elos oruh uh, kom kuh in kahsrwelos in nuhnkuh ke ma yohk srihpac Pahpah Inkuhsrao el kena kuht in oruh.
1:38Nehemiah
-
Ke kom riti Nehemiah 6:9, fahk tuhlihk an in sruhlwack paholos ke elos lohng ke kom fahk “oruh tuh nga in kuh.” Fahk nuh sin tuhlihk an ke sie pacl kom puhla god el ahkfokokoye kom in oruh orekma Lal.
Nehemiah 8:1–12
Ma suhmuhslah uh mwe insewowo.
-
Lihksrweni riti kuhtuh pohloh kahs ke Nehemiah 8:2–3, 5–6, 8–9, 12 ma ahkuhtweyac ke ma mwet ah oruh ke elos lohng Ezra el riti ma suhmuhslah. Ke kom rit uh, tuhlihk an kuh in oruh pohloh kahs inge. Tohkoh na kom kuh in sruhmuhn nuh sin kais sie sin sie puhla lom ke kom riti kuh lohng ma suhmuhslah inge.
-
Ke komtacl tuhkweni riti Nehemiah 8:8, kom kuh in siyuhk sin tuhlihk an lah meac kahsrwelos in kahlwem ke ma suhmuhslah uh. Lotwelos lah elos ac orekmakihn fuhkah mwe kahsruh nuhke lutlut ke ma suhmuhslah oacna ke Guide to the Scriptures ac Topics and Questions (Gospel Library). Fahk nuh sin tuhlihk an in sruhmuhn sie ma elos lotwelah kacl Mwet Lahngo ke ma suhmuhslah uh.
Suk ke mwe luti pwacye ma tiac eklac ma oasr lun ma suhmuhslah. “Ma suhmuhslah uh … sesseslah ke ma pwacye ke wosasuc, tuhsruhk kuhtuh pacl uh enenuh kuht in lihksrweni lohacng in kuh in sokwack ke ma inge. Ke kom tuhkweni lutlut ma suhmuhslah uh, tui ac siyuhk selos suc kom luti lah meac mwe luti pwacye ke wosasuc elos akihlen uh. Kahsrwelos in liye lah ma pwacye inge fuhkah kuhpahsr nuhke plwacn in molwelah luhn Pahpah Inkuhsrao. Kuhtuh pacl uh mwe luti pwacye uh sihmlac kahlwem oasr in ma suhmuhslah uh, ac kuhtuh pacl luhmweyucklac oasr ke sramsram ac moul luhn mwet ma kuht riti kac inge. Ac kuh pac in kahsruh in tuhkweni lutlut ke ma sikyak emet ke fohs kom riti an, wi pacna kalmeyacn fohs inge ac orekmakihnyuck fuhkah nuhke moul lasr misenge” (Teaching in the Savior’s Way, 22).
Nuhke kuhtuh pac liye ma nuhke mahlwem inge ke Friend mackuhsin an.