Etira 1; 3–7; Neemia 2; 4–6; 8

Imwiin tokanikain Botia iaoia I-Baburon, te Uea e kaungaa rinanon te tamnei uean Botia, ae Tairati, bwa e na kanakoia tabeman Iutaia nako Ierutarem bwa a na manga katea te tembora. Ngkai ko wareka Etira 1, ataia bwa tera ae e a tia ni karaoia Tairati ni boutokaia Iutaia inanon te mwakuri ae kakawaki aio. Ko kanga n noora ana mwakuri te Uea rinanoia mwaane ao aine irarikim, ni ikotaki ma naake tiaki kaain Ana Ekaretia? Tera ae tuangko te bwai aei n taekan te Uea ao Ana mwakuri?

Taraa naba Itaia 44:24–28.

Ngke a buakana Ierutarem kaain Bwaburon, a kimoai bwain nanon te tembora ao ni kabuekia nako aontano (taraa 2 Uea 25:1–10; 2 Rongorongo 36:17–19). Tera am namakin ngke arona bwa ngkoe temanna mai ibuakoia Iutaia ake a kakoaua aio? (taraa Taian Areru 137). Noria bwa tera aia namakinna Iutaia, imwiin te tai, ngke a kariaiakaki bwa a na oki ao ni manga katea te tembora (taraa Etira 3:8–13; 6:16–22). Anne e na kona n anaa nanom n iangoa oin am namakin nakon ana auti te Uea. Bukin tera katean te tembora e karika ae ti na kimarimari?

Ana mwakuri te Uea e bon kuri kangaanga ae e na totokoaki. Aio e bon koaua n te mwakuri are e kairaki iroun Terubabera ao Neemia. Aio te kawai ae bebete are e kona ni buokiko n reiakinaki man karaki aikai ao n iangoia bwa ko na kanga ni karaoa ana mwakuri te Uea n aki tabe ma te kakaitara:

Ana mwakuri te Atua ibukin Terubabera (Etira 4:3):

Ana mwakuri te Atua ibukin Neemia (Neemia 2:17–18):

Ana mwakuri te Atua Ibukiu:

Te kakaitara are e rinanona Terubabera (Etira 4:4–24):

Te kakaitara are e rinanona Neemia (Neemia 2:19; 4:1–3, 7–8; 6:1–13):

Te kakaitara are I rinanona:

E kanga ni kaeka Terubabera (Etira 5:1–2):

E kanga ni kaeka Neemia (Neemia 2:20; 4:6, 9; 6:3–15):

N na kanga ni kaeka:

Ibukin te ibuobuoki ni kabotaua ana taneiai Neemia nakon maium, ko kona ni kamatebwaia ana marooro Beretitenti Dieter F. Uchtdorf “Ti Karaoa te Mwakuri ae Korakora ao Tiaki Kona n Ruo” (Riaona,, Meei 2009, 59–62), ai moarara riki te kabanea ni mwakoro ake uoua. Ngkai ko tabe n iangoa te mwakuri are e a tia n anganiko te Atua, ko kona ni kamatebwaia te “Young Women Theme” ke te “Aaronic Priesthood Quorum Theme” (Gospel Library). Ke ko kona n taraa te anene n taromauri n aron “As Sisters in Zion” (Anene n Taromauri, nambwa 309) ke “Ye Elders of Israel” (Anene n Taromauri, nambwa 319).

Tera ae nanonaki n “iai nanom ni mwakuri” n ana mwakuri te Tia Kamaiu? (Neemia 4:6). Tera ae nanonaki ni karekea “bain Atuau … ae raoiroi i [aomi]” ngkai ko karaoa Ana mwakuri? (Neemia 2:8; taraa naba Neemia 2:18; Etira 7:6, 9, 27–28). Ko kanga n tia n noora baina inanon am kekeiaki ngke ko beku Ibukina?

Ibukiia rooro ake a mena inanon te tautaekanaki, e kangaanga irouia Iutaia karekean “te boki are ana tua Mote” (Neemia 8:1). N Neemia 8, Etira e wareka te tua nakoia aomata. Tera ae ko kunea inanon te mwakoro aei ae e kaotia bwa e kanga aia namakin Etira ma ana aomata ibukin te Atua ao Ana taeka? (taraa ai moarara riki kiibu 1–12). Tera te bwai inanon maium are e kaota am namakin ibukin te Atua ao Ana taeka?

Taraa naba Aia Reirei Beretitenti n te Ekaretia: Ezra Taft Benson (2014), 115–24.

• N reireiniia am ataei taekan te kimareirei are a namakinna Iutaia ngke e a manga kateaki aia tembora, ko kona ni kaota nakoia teuana te tamnei n aekan ane inano. Maroroakinna bwa bukin tera aomata aikai a kukurei ngkai a roko n ana auti te Uea. Ko kona naba n tuangiia am ataei bwa bukin tera ngkai te tembora bon te tabo ni kimwareirei ibukim. E na kanga te tembora n tia ni buokiiko n namakina kaaniam nakon Tamara are i Karawa ao te Tia Kamaiu?

• Ngkai ko wareka Etira 3:10–13 ma am ataei, buokiia ni kunei taeka are a kaota aron aia namakin Iutaia ngke e a tia n tei te tembora. Ngkana ko a roko n tokin te kibu 13, tao kam kona ni kaai n takaruaea aron te kimwareirei. Buokiia am ataei n iangoa bukina ngkai ti riai ni kimwareirei bwa te Uea e a tia n anganiira taian tembora. Ti na kanga ni kaota te kimwareirei anne?

• Iangoa anenean kunan te tembora ma am ataei, n aron kauouan kibun “Welcome Home” (Gospel Library). Imwiin rain tatabeua, tooki n titirakina te ataei n tibwaua te bwai teuana are a tatangiria teuanne ke neienne ibukin te tembora. Ko kona n taraa tamnein te tembora ngkai ko tabe n anene.

• Karakina rongorongon Neemia nakoia am ataei (taraa Neemia 2:17–20; 6:1–9; ke “Neemia” inanon Karaki man Te O Tetemanti, 173–74). Ngkai ko wareka Neemia 2:20, ko kona ngkoe ma am ataei n “teirake” aongkoa are kamwa ibuobuoki ni katea oon Ierutarem. Ke tao a na bae n unga am ataei ni katea te oo ma taian kai ke bwaai riki tabeua. Ngkai a karaoia, ko kona ni buokiia ni iangoi bwaai aika a rangi ni kakawaki are e tangiria Tamara are i Karawa bwa ti na karaoi.

  

  1:38

• Ngkai ko wareka Neemia 6:9, kaoiia am ataei ni katei baia ngkana a ongo ae ko kangai “kakorakora baiu.” Tuangiia ataei taekan te tai ngke ko namakina iai te Atua ni kakorakora baim ni karaoa Ana mwakuri.

• Warekia ni kabaibati tabeua kiibuntaeka man Neemia 8:2–3, 5–6, 8–9, 12 are e kabwarabwara bwa tera ae a karaoia aomata ngke a ongo taekan Etira ngke e warekii koroboki aika tabu. Ngkai ko wareware, a kona am ataei ni katea kain taian kibuntaeka aikai. Ngkanne kam kona n tibwatibwa imarernami bwa e kanga ami namakin ngke kam wareka ke n ongo taekan koroboki aika tabu.

• Ngkai kam kaai ni wareka Neemia 8:8, ko kona n titirakiniia am ataei bwa tera are e buokiia ni mataata ni koroboki aika tabu. Kaotia nakoia aron kabonganan buoka ibukin kamatebwaian koroboki aika tabu n aron Bwaai ni Kairi nakon Koroboki aika Tabu ao Topics and Questions (Gospel Library). Kaoiia ataei n tibwaua te bwai teuana are a reiakinna n taekan te Tia Kamaiu man koroboki aika tabu.