“Iango Aika a na Ururingaki ao ni Iangoaki: Warekan te Otooto n te O Tetemanti,” Nakomai, Iriirai—Ibukin te Mweenga ao te Taromauri: Te O Tetemanti 2026 (2026)
“Warekan te Otooto n te O Tetemanti,” Nakomai, Iriirai: Te O Tetemanti 2026
Iango Aika a na Ururingaki ao ni Iangoaki
Warekan te Otooto n te O Tetemanti
Ni booki n te O Tetemanti man Karikani Bwaai ni karokoa Etita, angiin ae ti kunei bon taian karaki—rongorongo aika koreaki ake a kabwarabwarai taai aika a kakaongora man te nonoori n tamnei. Noa e kabaa te ake, Mote e kainaomataia tibun Iteraera, Anna e tataro bwa e a reke natina te mwaane, ao a mwaiti riki. Ni moa mairoun Iobi, ti kunei tein koroboki aika a kakaokoro. Inanon booki aikai, taan korea te O Tetemanti a kabonganai taetae n otooto ni kabwarabwara aia namakin ae nano ke taetae ni burabeti aika rangi ni kakawaki n te kawai ae na rangi n ururingaki.
Ti a kaman tia n noori tabeua katooto n te otooto aika a uamae ni kabutai booki aika rongorongo ngkoa n te O Tetemanti. Man ana boki Iobi nako banen te O Tetemanti, e na mwaiti riki mai iai ae ti na noori. Ana boki Iobi, Taian Areru, ao Taeka n Rabakau e kuri angiina taian otooto, ake a riki bwa mwakoron aia koroboki burabeti n aron Itaia, Ieremia, ao Amota. Ibukina bwa warekan te otooto e kaokoro man warekan te karaki, matataam iai e kainnanoa te anga ae kaokoro. Aikai tabeua iango ake a na kona ni buokiko ni kunei riki nanoia inanon te otooto n te O Tetemanti.
Kinaakin Riki te Otooto n Ebera
Te moan, e na kona ni buokiko bwa ko na ataia bwa te otooto n Ebera inanon te O Tetemanti e aki boboto iaon te kuna, n aekakin nako otooto tabeua. Ao e ngae ngke tangin te taeka, takakaro iaon taian taeka, ao kaokiokan tangina bon bwaai aika e taneiai te aba iai n te otooto n Ebera n taai ake ngkoa, bwaai aikai a bon aki rairaki nakon taian taetae tabeua. Teuana te bwai ae ko na nooria, e ngae n anne, bon kaokiokan taeka ni katautau ke iango, n tabetai aranaki bwa “te booraoi.” Aio teuana te katooto ae bebete mairoun Itaia:
Karina korakoram, O Tion;
karini kunnikaim aika tamaroa, O Ierutarem. (Itaia 52:1)
Taian Areru 29 angiin ana rain a kuri ni booraoi—n aron te katooto:
E mwaaka bwanaan te Uea;
moan te mimitong bwanaan te Uea. (Taian Areru 29:4)
Ao aio te katooto n ataakina bwa te kauoua n rain titebo ma are te moan are e kabebetea ni kamataata raoi te rongorongo:
I anganingkami naba itiakini wii n ami kaawa ni kabane,
ma te kainnano ngkai akea te amarake n ami tabo ni kabane. (Amota 4:6)
Inanon katooto aikai, e kaokioka oin te iango ma kakaokoro aika a uarereke te tia otooto. Te aro aei e kona ni katuruturua te iango are e kaokiokaki ngkae e kabonganaaki taian kakaokoro nakon kabwarabwaraana riki ae bwanin ke ni karikirakea.
N tabeua keiti, kibun taeka aika uoua aika ti te arona a kabongana te taetae ae bebete ni katerei iango aika kauntaba, n aron ae inanon te katooto aio:
E raira nako te un te kaeka ae nimamannei:
ma e karika te un te taeka ae kananomaraki. (Taeka n Rabakau 15:1)
Te aekaki ni booraoi aei e aki maninanti. Taan korokaraki a bon karaoia ma nanoia. E buokiia ni kabwarabwarai namakin n tamnei ke koaua ma te mwaaka ao te tamaroa. Ngaia are ngkana ko ataa te boraoi n te koroboki n te O Tetemanti, titirakiniko i bon iroum e kanga ni buokiko bwa kona mataata n ana rongorongo te tia korokaraki. N aron te katooto, tera ae kataia n taekinna Itaia ni kairekerekean “korakora” ma “kunnikai aika tamaroa” ao “Tion” ma “Ierutarem”? (Itaia 52:1). Tera ae ti na kona n taekina te kibun taeka ae “te kaeka ae nimamanei” ngkana ti ataia bwa “taeka aika kananomaraki” bon kaitaraana? (Taeka n Rabakau 15:1).
E Kamaiua Tamneiu,, iroun Walter Rane
Te Otooto n Ebera kanga te Rao ae Boou
Tabeman aomata a kabotaua warekan te otooto nakon te kaitibo ma te aomata ae boou. Warekan te otooto n te O Tetemanti, ngkanne, titebo ma ko kaitibo ma temanna man te aba ae raroa ke katei man aban tinaniku are e kaokoro aia taetae mangaira—ao taraan ae e riaonuoua tengaa ana ririki ni maiu. Te aomata aio e na bae n taekin bwaai aika akea ara atatai iai n te moan tai, ma tiaki nanon anne bwa akea bonganan te bwai are a na taekinna. Ti bon tii kainnanoia ae ti na kabanea ara tai mangaiia, ni kataia n tarai bwaai man aron are a noria. Ti na bon kunea naba bwa mai nanora, ti ataira raoi i bon imarenara. Ao ngkana ti kaota te taotaonakinnano ao te nanoanga, n tokin te tai ao ara ikikina ae boou e na riki bwa te rao ae ti tatangiria.
Ngaia are ngkana ko wareka te rongorongo mairoun Itaia, n aron te katooto, iangoia bwa am moan reitaki nakon am ikikina ae boou. Titirakiniko i bon iroum, “Tera au namakin ae bwanin?” E kanga am namakin n te rongorongo—e ngae ngke ko aki atai taeka ni kabane? Ngkanne manga moan warekia riki, tabeua riki te tai ngkana e riai. Iangoia warekia ni kabaibati; tabeman a kunea bwa iai riki nanona aika a raka n te kawai anne. Atai taeka aika a onoti ake e rinei Itaia, ai moarara riki taian taeka are ko a katamneia te bwai ae rangi n itiaki n am iango. Tera am namakin ae reke man tamnei akanne? Tera ae a katerea ibukin ana namakin Itaia? Ni kamwaita riki am kamatebwai iaon aia taetae taan korea te O Tetemanti, e na mwaiti riki ae ko na kunea bwa a bon rinei aia taeka ma aia anga ni kamataata aia rongorongo ae nano n te maiu n tamnei.
Taian boem a kona n riki bwa raao aika kakateke ibukina bwa a buokiira bwa ti na mataata n ara namakin ao ara taneiai. Taian boem n te O Tetemanti a bon rangi n onoti, ibukina bwa a buokiira bwa ti na mataata n ara namakin ao ara taneiai aika a rangi ni kakawaki—ake iai rekerekeia n aron ara reitaki ma te Atua.
Ngkai ko kamatebwaia te otooto n te O Tetemanti, uringnga bwa kamatebwaian booki aika tabu e bon rangi ni bongana ngke e kairiira nakon Iesu Kristo. Tarai kanikina, taeka aika katamneiaki n te iango, ao koaua ake a katea am onimaki Irouna. Kakauongo nakon ana wirikiriki te Tamnei ae Raoiroi ngkai ko kamatebwai.
Rabakau iaon Booki ao Koroboki
Teuana te karinan n otooto n te O Tetemanti e aranaki irouia taan rabakau bwa “rabakau iaon booki ao koroboki.” Iobi, Taeka n Rabakau, ao te Minita a bwaka iaan te karinan aei. Ngkai taian areru a kabwabwara aron te namakin n nebonebo, tanginiwenei, ao n taromauri, rabakau iaon booki ao koroboki a boboto iaon taeka n reirei aika akea tokina ke aia titiraki taan rabakau aika a nano. Ana boki Iobi, n aron te katooto, e kunea ana motiraoi te Atua ao oin bukina itinanikun marakin te aomata. Taeka n rabakau e anga reirei iaon ae ko na kanga ni kanakoraoa maium, n raonaki ma taeka n reirei aika rikorikoaki ao ni bwaatinaki man rooro ake mangkoa. Ao taian minita a taraa n nanououa n aia titiraki bwa tera oin bukin te maiu i bon irouna—ngkai a taraa ni uarereke bwaai ao ni karina n riki, ti na kunea iaa nanona ni koaua? Ko bae n iangoi booki ao koroboki kanga marooro aika iango raoi ma taan kairiiri aika kaunganano ake a kan tibwai aia nonoori ibukin te Atua ao te Aonaaba are E karikia—ao a na bae ni buokiko ni kamataatako riki nakon otam are mai imwaaina.