“Turai 20–26. ‘A Mena Matara I Aom’: 2 Rongorongo 14–20; 26; 30,” Nakomai, Iriirai—Ibukin te Mweenga ao te Taromauri: Te O Tetemanti 2026 (2026)
“Turai 20–26. ‘A Mena Matara I Aom,’”: Nakomai, Iriirai: 2026
Ana Tataro te Uea Ieotiabata, iroun Keeley Rae
Turai 20– 26: “A Mena Matara I Aom”
2 Rongorongo 14–20; 26;30
E katobibiaki te Abanuea ae Iuta. Taanga ni buaka aika tenikoraki man abaia aia kairiribai a bane ni waaki, n tauraoi nakon te buaka. Inanon te tai ae a rangi ni kainanoa iai buokaia, Ieotiabata, ae Uean Iuta, e tan nakon Uean karawa ao aonaaba. E bootiia ana aomata Ieotiabata n te tembora ao n tataro. E kakoaua ae iai mamaraia n rabwataia ao e bubuti ibukin kainaomatakiia. Ni kaekakina, e berita te Uea bwa E na anga kamanoaia: “Kam na tai maaku, ao a na tai bwara nanomi” (2 Rongorongo 20:17).
Tao a na akea ekakinakoara n te taanga ni buaka n ara mataroa ni kakamakuira bwa a na kamateira, ma n tabetai ti namakina ae ti katobibiaki n te kakaitara ao te buakaka. Kawaira ni kamaiuaki bon ti tearona ma are e ukoria Ieotiabata, ao ara tataro a kona n titebo ma ana tataro naba: “O Atuara, … akea korakorara ae ti kona iai n eka nako te koraki ae bati aei ae a roko n ekira nako; ao ti aki ata arora ae ti na karaoia: ma a mena matara i aom” (2 Rongorongo 20:12).
Inanon 2 Rongorongo 14–30, ko na wareka taekan Ieotiabata ao ueea ake tabeman i Iuta. Iangoia bwa e kanga aia onimaki are e reke, tokanikaia, ao kakaewenako ni kona ni mwakuri nakon oin maium.
Ni kakimototoan rongorongon te boki ae 2 Rongorongo, taraa “Rongorongo” n te Bible Dictionary.
Iango ibukin te Kamatebwai n te Mweenga ao n te Taromauri
2 Rongorongo 14–16
Te onimaki iroun te Atua e na uota nakoiu te rau.
Ngke Ata bon uean Iuta, e kaitaraaki ma kangaanga aika mwaiti—n aron ae ti kaitarai ni boong aikai. Ngkai ko wareka taekan kakatai ake e kaitarai, noria bwa e katuka iia ana onimaki ao e kanga ni bitaki inanon te tai ae maan.
|
Ronorongo aika tauraoi ibukin te ibuobuoki |
Kangaanga ake e kaitarai Ata |
E katuka iia ana onimaki Ata |
|---|---|---|
Ronorongo aika tauraoi ibukin te ibuobuoki 2 Rongorongo 14:9–12 | ||
Ronorongo aika tauraoi ibukin te ibuobuoki 2 Rongorongo 15:1–8 | ||
Ronorongo aika tauraoi ibukin te ibuobuoki 2 Rongorongo 16:1–10 |
Bukin tera n tabetai ti toki man onimakinan te Uea? Tera riki ae ko reiakinna man maiun Ata?
Taraa naba D. Todd Christofferson, “Ara Reitaki ma te Atua,” Riaona, Meei 2022, 78–80.
2 Rongorongo 18
I kona ni kamanoa te koaua, e ngae ngkana e aki rangi ni boutokaaki.
Te burabeti ae Mikaia tao e namakina rawawatan ae e na taekina aron tokanikaia ueea aika Ieotiabata ao Aaba n aia bobuaka ni kaitaraia I-Turia. Kakaei kakoaua n aron te rawawata anne inanon 2 Rongorongo 18:1–12. Tera kakoaua ae ko kunei n ninikorian ao etietin Mikaia inanon kiibu 13–27? (Noria bwa inanon te kibu 14, e anga ana kaeka Mikaia ae kaitaraan are e na anga; ma bon ana kaeka raoi are n te kibu 16.) A kanga ni koro nanon ana taeka Mikaia ni kiibu 28–34?
Tera bwaai aika a kona n riki are e na karekea te rawawata iaom n aron are e kaitarai Mikaia? Tera ae karekea korakoram bwa ko na tei ni matoa ibukin te Uea ao Ana reirei?
N ana bong te Uea ae Ieotiabata, teniua aba aika a buakana Ierutarem.
2 Rongorongo 20:1–25
Inanon taai ni kangaanga, I kona n tan nakon te Atua ao Ana burabeti.
Ngkai ko wareka 2 Rongorongo 20:1–12, kakaea bwa tera ae karaoia te Uea ae Ieotiabata ngke a roko aba aika mwaiti n ekanako Iuta. Ko na kanga ni kamwakura te waaki aei inanon taian kangaanga ake ko kaitarai?
Ana kaeka te Uea nakon ana tataro Ieotiabata e kuneaki n kiibu 14–17. Tera mwakoro n taeka ae ko kunei ikanne are e kona n anganiko te rau ke temanna ae ko kinaa inanon taai ni kangaanga?
N te bong are imwina, a otinako ana aomata Ieotiabata ni kaitaraia te taanga ni buaka ake a roko. Ngkai ko wareka 2 Rongorongo 20:20, kakaea bwa tera te rongorongo are e anga Ieotiabata nakoia aomata i Ierutarem. A kanga ni kakoroaki nanon ana taeka? (taraa kibu 22–23). E kanga n tia ni kakabwaiako te Uea ngkai ko Kakoauaa ao ni iriiriia Ana burabeti?
E taku Beretitenti Russell M. Nelson: “Au taneiai bon aei bwa n te tai are ko katoka titirakinan aia rongorongo burabeti ao n onea mwina ni katuruturua te namakin iai, ao ni karaoi, a na bwaro kakabwaia. I aki kakangai, ‘Ningai ae e taetae iai te burabeti bwa te burabeti ao ningai ae e aki iai?’ Te bwai ae I tangiria bon, ‘N na kanga n riki n ai arona’” (in Lane Johnson, “Russell M. Nelson: A Study in Obedience,” Ensign, Aug. 1982, 24).
Taraa naba Reirei ao Berita aika Tabu 21:4–6; “A Secure Anchor” (witeo), Gospel Library; “Karaoi rinerine aika kairaki n te tamnei,” Ibukin Kakorakoraia Kairake: Te Kairi Ibukin Karaoan Rinerine (2022), 4–5.
A Secure Anchor
Kunei taeka aika a koaua aika a bebete. E reirei Unimwaane Neal A. Maxwell: “Koroboki aika tabu a anganiira reirei aika mwaiti aika taiman. Ao ngkana otan te Tamnei e ringii iteran reirei aika kakaokoro, a kanakoi otaia aika bwain tiretio ao ni kaotanakoa te kawai are ti na iria” (“According to the Desire of [Our] Hearts,” Ensign, Nobembwa 1996, 21). Ngkai ko kamatebwai koroboki aika tabu, iangoia n anaa te tai ni kinai, mwakenii, ao ni iangoi raoi rongorongo aika a kimototo ma a korakora. Tabeua katooto a kona ni kuneaki n 2 Rongorongo 14:11; 15:7; 18:13; 20:15; 26:5. Tera riki “reirei aika taiman” ae ko kona ni kunei?
2 Rongorongo 26:3–21
Te kainikatonga e karekea te kamaunaaki.
N aiaroia uean Iuta, e moana ueana Utia n rangi ni korakora baika e katiai ma n tokina e rinanon te rawawata. Nora aron te baeten aei n 2 Rongorongo 26. I bon iroum tera ae e karika te bitaki inanon maiun Utia?
Ngkai ko wareka kiibu 16–23, uringnga bwa n te tai aei, bon ti ibonga aika a kariaiakaki bwa a na kabuoka te karea are e boiarara n te tembora. Bukin tera te Uea ae Utia e aki ongotaeka nakon te Uea? Tera ae ko reiakinna man te bwai ae riki ae kananokawaki aei?
Taraa naba “Be Thou Humble,” Anene n Taromauri, nambwa 130.
2 Rongorongo 30
I kona n riki bwa te tia raoi.
Inanon 2 Rongorongo 30, Etekia bon uean Iuta. E kaoa ana kairiribai are te Aba n Uea ae Iteraera ni bootaki i Ierutarem ni bukamarua te Toa are Teriao—te bwai ae a tuai man kakaraoia kaain Iteraera inanon ririki aika bati (taraa kiibu 1–12). Tera am namakin ae ko karekea man te kakao ao e kanga ni butimwaeaki—irouia ake a kaoaki Iteraera ao iroun are e booa te bootaki i Iuta?
Ibukina bwa e a rangi ni maan te tai, tabeman iruwa ake a nako Ierutarem aki ataa te bwai ae riki ao a na kangaa n ira te Toa are te Riao. Ngkai ko wareka 2 Rongorongo 30:18–27, tera ae ko reiakinna man ana kaeka Etekia ao te bwai ae riki mai mwin ana kaeka?
Taraa naba Russell M. Nelson, “A Kainnanoaki Taan Raoi,” Riaona, Meei 2023, 98–101.
Ibukin iango riki tabeua, taraa te beeba ni kaongora n te namwakaina aio n te Riaona ao Ibukin Kakorakoraia Kairake maekatiin.
Iango ibukin Reiakinaia Ataei
2 Rongorongo 14–16; 20
I kona n onimakina te Atua.
-
Ni kaota te iango iaon onimakinan te Uea, ko kona ni kaota nakoia am ataei te bwai ae ko onimakinna ae na kamanoko ngkana e bwaka te karau, n aron te kiaba ke te kunikai ae maten. Kariaia bwa a na maroroakinna bwa bukin tera ti onimakini bwaai aikai. Imwina buokiia bwa a na katitebooi akanne ma ara onimaki iroun te Uea. Bukin tera ti Onimakinna bwa E na kawakiniira ni maiun tamneira?
-
Ko kona ni buokiia am ataei ni kunea bwa e kanga te Uea Atia ao te Uea Ieotiabata ni kaeka nakon kangaanga man onimakinan te Uea (taraa 2 Rongorongo 14:11; 20:3–5, 12). Tibwaia i marenami kawai ake ko kaotia iai nakon te Uea bwa ko Onimakinna.
2 Rongorongo 20:1–29
E na ongo ao ni kaekai au tataro te Atua.
-
N te iteraniba n te waaki ni kakukurei n te wiiki aei e kona ni buokiia am ataei ni mataata iaon te karaki n ana tataro Ieotiabata ao Ana kaeaka te Uea. Kam kona ngkoe ma am ataei n tibwai taai ngke te Uea e ongo ao ni kaekaki am tataro. Iangoia ni kaairii inanona taai ngke te kaeka a roko ni kawai ke n taai ae ko aki kantaningaia. Te anene iaon te tataro, n aron “I Pray in Faith” (Aia Boki n Anene Ataei, 14), e kona ni buoka karekean aia onimaki ataei.
2 Rongorongo 26:3–23
I kona n nanorinano.
-
N reiakina taekan te kangaanga n te kainikatonga, a kona am ataei ni katea te taawa man taian buraoki ke man mwangko aika uarereke. N aia tai ni katokatokai buraoki ke mwangko iaon te taawa, buokiia n nora teuana te bwai ae karaoia ae tamaroa Utia man 2 Rongorongo 26:3–15. Imwin kabwaninan katean te taawa, marooro ma am ataei bwa e kanga Utia ni kateia ni karietaa ao n kamatoatoaa. Tera ae e na kona ni bwaki iai? Imwina, ngkai kam wareka kibu 16, ko kona ni maroroakinna bwa tera ae e nanonaki ni karekea nanora bwa e na “karietaki ao [ti] karaoa ae buakaka.” Tibwaia ma am ataei bwa tera ae e riki nakon Utia ni kiibu 16–23. Kariaia bwa a na urua aia taawa. Maroroakinna bwa tera ae ti kona ni karaoia n tiku n nanorinano.
Te Uea Ekekia ao Ana Aomata a Karabwa te Atua, © Lifeway Collection/licensed from goodsalt.com
2 Rongorongo 30
I kona n riki bwa te tia raoi.
-
Te tamnei ae ieta e kaota Etekia ngke e kaoiia aba ake irarikin Iuta man te Aba n Uea ae Iteraera ni bukamarua te Toa are te Riao ma ngaiia. Ko kona n tara te tamnei aei ma am ataei ao ni wareka 2 Rongorongo 30:18–19, are e kabwarabwaraa bwa tabeman iruwa aki kaitiakiia ni kaeineti nakon ana tua Mote. Tera ae e karaoia Etekia? E kanga karaoan aei n anga te namakin nakoia iruwa? Buokiia am ataei bwa a na iangoia bwa a na kanga ni karaoa ae aiaron Etekia n aron buokakiia aomata tabeman.
Ibukin iango riki tabeua, taraa te beeba ni kaongora n te namwakaina aio n Te Rao maekatiin.