2 Uea 2–7

Kakai a kaota mwaakan te Atua. A kona ni buokiira n tokanikai iaon kangaanga n te maiu ae mamate—n aron te aba ae mwautakataka are e kainanoa te ran ae e itiaki (taraa 2 Uea 2:19–22) ke te angaraa ae bua are e kainanoa manga kuneana (taraa 2 Uea 6:4–7). Ma ae moan te kakaawaki, a kona kakai ni kaokiira nakon te Uea. Ngkai ko wareka 2 Uea 2–6, iangoia korei rinanin taian kakai ake ko kunei, ao iangoi reirei n te maiu n tamnei ake ko reiakin man te kakai teuana ma teuana.

Ko na kona naba ni katitebooi kakai ake e karaoi Eritai ma kakai ake e karaoi Iesu Kristo (taraa 2 Uea 4:8–37 ao Ruka 7:11–16; 2 Uea 4:42–44 ao Ioane 6:1–13; 2 Uea 5:1–15 ao Ruka 17:11–19). Tera ae a reireiniko kakai aikai iaon te Tia Kamaiu ao Ana burabeti?

Taraa naba 2 Nibwaai 26:12–13; 27:23; Moronaai 7:35–37; te mwakoro ae “Ukori ao kantaningai kakai” iroun Russell M. Nelson, “Mwaakan Karaoan ae Raoiroi,” Riaona, Meei 2022, 99–100.

Te Uea e angan Eritai rinanon te tamnei bwa e na taetae ni burabetii bwaai aika a na roko—bon bwaai, aika a taraa ni kangaanga bwa a na riki. Ngkai ko wareka 2 Uea 4:8–17; 7:1–16, iangoia bwa ko kanga ni kaeka nakon ana taeka te Uea rinanoia Ana burabeti ni boong aikai. Tera anga reirei, taetae ni burabeti, ke berita ake ko ongo mairouia burabeti aika a maiu? Tera ae ko karaoia ni mwakuri inanon te onimaki iaon aia taeka?

Taraa naba 3 Nibwaai 29:6; Reirei ao Berita aika Tabu 1:37–38; “Teachings of Presidents” collection, Gospel Library.

Ngkai ko wareka 2 Uea 5, iangoia ni kabotaua reberan Naman ma kakaewenako n te maiu n tamnei ake ko kaitarai.

Iai ae ai aron “te ataeiaine ae karako” inanon maium, ae e kaungako n ukorii kairiiri iaon taian kakaewenako ae ko kaitarai mairoun Ana burabeti te Uea? (taraa kiibu 2–3, 13).

Teraa ae e kaoko iai te Uea bwa ko na karaoia ae kanga e taraa n rangi ni bebete—n aron “tebotebo, ao ko na itiaki”? (kibu 13). Tera ae totokoiko man butimwaean Ana kakao ae bebete?

Ko na kanga ni kaota te nanorinano n aron ae karaoia Naaman?

Ataia bwa e kanga ana taneiai Naaman n roota ana onimaki iroun Atuan Iteraera (taraa te kibu 15). Tera ae ko kona n reiakinna man aei?

Taraa naba Ruka 4:27; 1 Betero 5:5–7; Aramwa 37:3–7; Ita 12:27; L. Whitney Clayton, “Whatsoever He Saith unto You, Do It,” Riaona, Meei 2017, 97–99; “Naaman and Elisha” (witeo), Gospel Library.

14:30

Ngkai ko keiaki ni iriira Kristo, ko a tia n namakina aron are e namakinna ana toro ae e kairake Eritai—a konaaki ni mwaitiia ao a maaku? Iangoia ae ko riki n ai aroia ngkai ko wareka 2 Uea 6:8–23. E kanga te rongorongo aei ni bita aron am iango ao namakin i aon kataakim, katabeam, ke am kekeiaki ni maiuakina te euangkerio?

Ngkai ko iangoia, iangoa ana taeka Beretitenti Henry B. Eyring: “N aron ana toro Eritai, a mwaiti riki ake a mena irarikim nakoia naake ko nooria bwa a kaitarako. Tabeman ake a mena irarikim ko aki kona n nooria ni matam n rabwata. E na tabekikorake te Uea ao e na bon karaoia inanon te tai man weteaia tabeman bwa a na mena irarikim” (“O Ye That Embark,” Riaona,Nobembwa 2008, 58).

Iangoia ni korei ni karinanii naake “a mena [iroum]” (kibu 16)—aomata ake e karokoia te Atua ni maium ni boutokaiko. Ko na bae ni butiia bwa E na buokiko ni kinaiia man kaurean matam n te taratara n tamnei. Tao E a tia naba ni katikuko inanon maiuia tabeman bwa ko na buokiia. Kam na kanga ni karekea te korakora ao te boutoka i bon i marenami?

Ningai ae ko a tia ni karekea te boutoka are e kabwarabwara te Uea n Reirei ao Berita aika Tabu 84:88?

Ko kona naba ni kamatebwaia ana marooro Titita Michelle D. Craig “Eyes to See” (Riaona, Nobembwa 2020, 15–17). Titirakiniko, “Tera ae tangiria te Atua bwa N na noria?”

N okira te karaki are n 2 Uea 6:8–23, e taku Unimwaane Ronald A. Rasband: Tao a na iai ke a na akea ara kaa ni buaka te ai ae roko ni kabuanakoa maakura ao n tokanikai iaon ara kangaanga, ma e mataata te reirei. E tabe te Uea ibukira, e atai arora ao e kakabwaiaira n aro nako are bon ti ngaia ae E kona ni karaoi. Te tataro e kona ni karuoa te korakora ao te kaotioti are ti kainnanoia ni kabotoa ara iango iaon Iesu Kristo ao Ana angakarea ni kamaiu n Ana mwakuri ni kamaiu. E ataia te Uea bwa iai taai aika ti na namakina iai te maaku. I a tia ni maaku ao ngkoe naba. … Inanon te Ekaretia aei ti bon bae ni karako mwaitira n aron ana wareware te aonaaba n aron ara kairoro, ma ngkana ti kauki matara n tamnei, ‘bwa a mwaiti riki aika a mena iroura nakoia ake a mena irouia’ [2 Uea 6:16]” (”Tai Maaku,” Riaona, Nobembwa 2018, 18, 19). Ko na kanga ni kabonganai taeka aikai ni buoka temanna are e namakina te bwaranano ke te maaku?

Taraa naba “Dearest Children, God Is Near You,” Anene n Taromauri, nambwa 96.

• Imwina buokiia am ataei ni kamatataia bwa tera te kakai, kaoiia bwa a na korei katooto ni kakai n aron ae a ataia. Tamnei i nanon te Boki n Tamnein te Euangkerio ke Nakomai, Iriirai e kona n ibuobuoki. Imwina a kona n kakaei taian kakai i nanon 2 Uea 4:1–7, 14–17, 32–35, 38–44. Tera ae a reireiia kakai aikai ibukin Tamara are i Karawa?

• Kam kona ngkoe ma am ataei ni marooro bwa e kanga te Atua ni kaota Ana tangira rinanon taian kakai. Kam kona naba ni botaki n anenea te anene n aron “God’s Gracious Love” (Gospel Library).

• Buokiia am ataei n reiakina te karaki i nanon 2 Uea 5:1–3, 9–14. Iangoia ni kabongana “E Kamaiua Naaman Eritai” (n Karaki man te O Tetemanti, 134–37) ke tamnein Naaman inanon te kabwarabwara n te wiiki aei. Bukin tera e aki tangiria Naaman n tebotebo i nanon te Karanga are Ioretan, e ngae ngke e taku Eritai bwa e na marurungi iai man aorakina? E kanga ni kakabwaiaaki Naaman ngke e ira ana kaetieti Eritai? Kam kona n tibwaia i marenami baike kam rinanona ngke ko ongotaeka nakon te Uea, e ngae ngke ko aki koaua raoi bwa ko kan karaoia.

  

  1:52

• Ko na bae naba ni katuruturua 2 Uea 5:13, ike ana toro Naaman e buokia ni baireia bwa e na ongotaeka nakon te burabeti Eritai. A kona am ataei ngkanne ni marooro iaon kawai are a kona iai ni buokiia raoraoia ke kaain aia utu n ongo nakon ao n ongotaeka nakon te burabeti.

• Ko kona ngkoe ao am ataei ni katamneia bwa kam a otabwaniniaki irouia taani buaka ma aia kabaang, aoti, ao aia kaa ni buaka. E kanga am namakin? Tera ae ko kona ni karaoia? A kona ngkanne am ataei ni kamatuui mataia ngkai ko wareka 2 Uea 6:16–17 nakoia. (Taraa naba “Eritai ao Ana Tanga ni Buaka te Uea,” inanon Karaki man te O Tetemanti, 138–39, ke te tamnei are ni kabanean te kabwarabwara n te wiiki aei.) Ngkana ko roko n te taeka “kaurei matana,” (kibu 17), tuangiia ataei bwa a na kaurei mataia. Maroroakinna bwa tera ae e noria te toro. Tibwaia ma am ataei kawai ake ko a tia iai n namakinna bwa te Uea e raoniko inanon tain am kangaanga, e ngae ngke e tara n ae bon ti ngkoe.

  

  1:9