“Iango Aika a na Ururingaki ao n Iangoaki: ‘E na Kangai Iesu nakon Iteraera ni kabaneia, “Okiri Mweengami,”’” Nakomai, Iriirai—Ibukin te Mweenga ao te Taromauri: Te O Tetemanti 2026 (2026)
“Iango Aika a na Ururingaki ao n Iangoaki: ‘E na Kangai Iesu nakoia Iteraera ni Kabaneia, “Okiri Mweengami,”’” Nakomai, Iriirai—Te O Tetemanti: 2026
Iango Aika a na Ururingaki ao ni Iangoaki
“E na Kangai Iesu nakon Iteraera ni Kabaneia, ‘Okiri Mweengami’”
N rereuan Tinai, Mote e ikotiia natin Iteraera i boton te maunga. Ikekei ao E tangiria te Uea bwa e na bita aia kurubu tooro aikai aika akea aia iango nakoia aomata aika korakora. “Ao kam na riki bwa au,” E taku, “koraki n ibonga, ma te botan aomata ae tabu” (Te Otinako 19:6). E berita bwa ana maiu ao ni maiuraoi, riki ngkana a katobibiaki irouia aia kairiribai aika korakora, man mwaaka.
Ana bane n riki bwaai aikai tiaki bukina bwa a mwaiti aia koraki ke ni korakora ke ni mwatai. E na riki, e kabwarabwara te Uea, “ao ngkana kam boni kan ongo bwana[na], ma ni kawakini [Ana] berita” (Te Otinako 19:5). Bon man mwakan te Atua, tiaki mwaakaia, anne e na karikiia bwa a na korakora.
Ma a teimatoa tibun Iteraera n aki ongo ni Bwanaan te Atua, ao i mwiina a katoka kawakinan Ana berita. A mwaiti aika a manga taromauri atua riki tabeua ao ni waakin karaoan taian katei ake a katobibiia. A totokoa te moan bwaai are e karikiia bwa te botanaomata aika okoro—aia reitaki n te berita ae tabu ma te Uea. N akean mwaakan te Atua ni kamanoia, akea te bwai ae kona n katoka aia kairiribai.
Te Maenako
Tabeua te tai i marenan tao 735 ao 720 IK, a ninia te Abanuea i aon Iteraera Meang i aon Iteraera kaain Aturia, ae mwengaia baronga aika tengaun ma uoman, ao ni uotiia nako ngaa kaain Iteraera bwa taenikai nakon mwakoron ana Embwaea Aturia aika kakaokoro. Kaain Iteraera aikai a kinaki n araia ae “baronga aika bua,” bukina ngkai a kamwaingaki man abaia ao ni maenako ibuakon aaba ake tabeua. A bua naba n te kawai ae kakawaki: inanon te tai a kabua kinakiia ae ngaia bon ana aomata ni berita te Atua.
Ma n tokina ao a mwaiti aomata n Abanuean Iuta mai i Maiaki ake a tannako naba mairoun te Uea. A buakana ao n taua aon angiin te abanuea anne naba I-Aturia; bon te kamiimi bwa ti Ierutarem ae kamanoaki Rimwi, i marenan 597 ao 580 IK, a kamauna aon Ierutarem I-Baburon, ni ikotaki ma te tembora, ao ni kairiianako aika a mwaiti bwa taenikai. Tao 70 te ririki imwiina, nikiraia Iuta a kariaiakaki bwa ana oki nako Ierutarem ao ana manga katea te tembora. Ma, a mwaiti aika a tiku i Bwaburon.
The Destruction of Jerusalem by Nebuzar-adan (Uruakan Ierutarem iroun Nebutaretan),, iroun William Brassey Hole, © Providence Collection/licensed man goodsalt.com
Ngkai e a waaki nako te tai, a “maenako … kaain Iteraera man baronga ni kabane n te ukeukenanti nako buakoia botanaomata ni kabaneia ake a aki ataia” (Tekaria 7:14). Tabeman a kairaki nako iroun te Uea nakon aba tabeua. Tabeman a kitana Iteraera n birinako man te tautoronaki ke ibukin aroaro n tautaeka ke ibukin aron te maiu.
Ti arana te bwai ae riki aei bwa maenakon Iteraera. Ao e kakawaki bwa ko na ata bukin tabeua te maenako. Ibukin te bwai teuana, bon atun te rongorongo ae kakawaki n te O Tetemanti—a mwaiti burabeti n te O Tetemanti aika a kakoaua te bwaka n tamnei ae moan te buakaka nakoia kaain Iteraera ake a maenako. A kaman nooria ao n anga te kauring iai. Tabeman mai buakoia a bon maeka i nanona. E na kona ni buokiko anne ngkana ko wareki aia boki Itaia, Ieremia, Amota, ao a mwaiti riki booki ni mwakoron te O Tetemanti ake imwiina. Ma te atatai aio n te iango, ngke ko wareki aia taetae ni burabeti ibukin Aturia ao Baburon, taan taromauriia boua ao taenikai, te uruaki ao n tokina kaokan bwaai, ko na ataia bwa tera te bwai ae a taekinna.
Ataakin maenakoia Iteraera e na buokiko n ataa raoi naba Ana Boki Moomon, ibukina bwa Ana Boki Moomon bon te rekooti ni mwangan maenakon Iteraera. E moanaki te rekooti aei ma ana utu Riaai ni kiitana Ierutarem n tao 600 IK, imwain aia buaka kaain Baburon. Riaai bon temanna mai ibuakoia burabeti ae taetae ni burabetiia maenakon Iteraera. Ao a ibuobuoki ana utu ni kakoroa nanon te taetae ni burabeti anne, n anai mwangan te bata are Iteraera ao n unikia n iteran te aonaaba are teuana, n aban Amerika.
Te Bobotaki
Ma, maenakon Iteraera, bon iteran te karaki. E aki mwaninga taekaia ana aomata te Uea, ao e aki naba kitaniia, e ngae ngke a tia ni mwanuokinna. Taetae ni burabeti aika mwaiti ae na maenako Iteraera a raonaki ma ana berita te Atua aika mwaiti are n te bong teuana ao e na ikotiia.
Te bong anne bon te bong aei—ara bong. E a tia ni moanaki te ikoikotaki. N te 1836, ngaa n ririki imwiin ae ikotiia kaain te bata are Iteraera Moote i boton te Maunga are Tinai, e kaoti n te Kirtland Tembora n angan Iotebwa Timiti “kingin ikotakiia Iteraera man mwakoron te aonaaba ake aua” (Reirei ao Berita aika Tabu 110:11). Ngkai, ma aia kairiiri naake iai irouia kiing, kain ana baronga Iteraera are a tia n ikotaki man aaba ni kabane are a kona n nako iai ana toro te Uea.
Mote, Eriati, ao Eria A Kaoti inanon te Kirtland Tembora,, iroun Gary E. Smith
E a tia Beretitenti Russell M. Nelson n atonga te ikotaki aei bwa “te bwai ae moan te kakawaki ae e riki n te aonaaba ni bong aikai. Akea riki kabotauan abwabwakina, akea riki kabotauan kakawakina, akea riki kabotauan mimitongina. Ao ngkana ko kan rineia, ngkana ko tangiria, ko kona n riki bwa kaaina ae bubura ngkoe.”
Ti na kangaa n ibuobuoki? Tera ae nanonaki bwa ko na ikota Iteraera? E nanonaki bwa kaokan baronga ake tengaun ma uoman n oki nakon te aba are a tia ni maekanna ngkoa? Ni bon arona e nanonaki n te bwai ae korakora riki, ao n ae akea tokina. N aron are e kabwarabwara Beretitenti Nelson:
“Ngkana ti taetae iaon te ikoikotaki, ti taekina kakawakin te koaua aei: ni kabaneia natin Tamara are i Karawa, n iteran taian roki aika uoua, e tau n ongoraeaki rongorongon ana euangkerio Iesu Kristo ae kaokaki. …
N te tai are ko karaoa iai te bwai teuana are buoka temanna—n iteran te rabuna aika uoua—touan te mwaneka nakon karaoan berita aika tabu ma te Atua ao ni karekei aia otenanti ni bwabetito ao n te tembora aika kakawaki, ko buokia n ikota Iteraera. Bon te bwai ae bebete n aron anne.”
E riki aei, n aron are e taekinna Itaia, “n tatabemaningkami” (Itaia 27:12) ke, n aron are e a kaman taekinna Ieremia, “n tatabeman mani kaawa nako, ao kaka uoman man utu nako” (Ieremia 3:14).
Ikotakin Iteraera e nanonaki n ae kaokakin natin te Atua n oki nako Ina. E nanonaki n ae kaokakiia nakon reitakiia n aia berita ae tabu ma Ngaia. E nanonaki n ae manga katean te “botanaomata ae tabu” E iangoia ni kateia n te tai ae maan n nako (Te Otinako 19:6).
Okiri Mweengami
N aron temanna are e a tia ni karaoa te berita ae tabu ma te Atua, bon kain te bata are i Iteraera. Ko a tia ni kaokaki, ao ngkoe te tia ikotiia. Karakinan bwaai aika kakawaki aika riki tebubua te ririki n nako are e moanaki ma te berita ae tabu bon kateana nakon kabanean tamaroana, ao ngkami bon taan mwakuriia. Ngkai aio te tai ngke “E na kangai Iesu nakoia kaain Iteraera, ‘Okiri mweengami.’”
Aio aia rongorongo taan ikoikoti: Okiri mweengami nakon te berita ae tabu. Okiri mweengami nako Tion. Okiri mweengami nakon Iesu Kristo, Atuaia Iteraera ae Tabu, ao E na uotiko nakon mweengan te Atua, Tamam.