“Turai 13–19. ‘E Onimakina te Uea ae Atuaia Iteraeral’: 2 Uea 16–25,” Nakomai, Iriirai—Ibukin te Mweenga ao te Taromauri:Te O Tetemanti 2026 (2026)
“Turai 13–19. ‘‘E Onimakina te Uea ae Atuaia Iteraera,’” Nakomai, Iriirai: Te O Tetemanti 2026
The Flight of the Prisoners (Birinakoia Buure), iroun James Jacques Joseph Tissot ao tabeman
Turai 13–19: “E Onimakina te Uea ae Atuaia Iteraera”
2 Uea 16–25
Irarikin ana mwakuri ni mitinare ae tamaroa te burabeti are Eria, aomata n te Abanuea are i Meangin Iteraera aki rairi nanoia. Ao n tokina ana Embwaea Aturia a kaaitara ao ni kamaenakoia ana baronga Iteraera ake tengaun. N te tai naba anne, Abanuean Iuta i Maiaki e aki rangi ni karaoa ae raoiroi; taromaurian te boua n anti e a buta ikekei.
Ribuakon buan te tamnei aei, rongorongon koroboki aika tabu a taekinaki iai uoman uea mai Iutaia ake, n te tai anne, a kaokiia aia aomata nakon te Uea. Temanna bon Etekia. N ana tai n tautaeka, e a tokanikai Aturia iaon Iuta. Ma Etekia ma ana aomata a kaota onimakinan te Uea, are e kainaomata Ierutarem inanon kawai aika kamimi. Imwina, imwiin manga kitanan te koaua, Iotia e a riki bwa te uea. E kaungaaki teutana man bokin ana tua Mote, Iotia e a karekei katamaroa are e a manga kabooui maiuia inanon te aro angiia ana botannaomata.
N aron Iteraera ao Iuta, ti bane ni karaoi rinerine aika a tamaroa ao aika a buakaka. Ngkana ti namakinna bwa ti riai ni katamaroai maiura, ti na ninikoria ni butimwaai bwaai aika uoua aika a kakawaki aikai n ririki aika a rootongitongo n rongorongon Iuta ngkoa. Tao ana banna ni katooto Etekia ao Iotia a kona ni kaungai nanora n “ti onimakina te Uea ae Atuara” (2 Uea 18:22).
Iango ibukin te Kamatebwai n te Mweenga ao n te Taromauri
2 Uea 18–19
ITi kona n teimatoa n onimakina te Uea ngkana e kataaki aau onimaki.
Angiina mai ibuakora a rinanon taai ake a kataaki iai ara onimaki. Ibukin Etekia ao ana aomata, teuana mai ibuakon kakaewenako akanne a roko ngke a roko i Ierutarem ana taanga I-Aturia. Ngkana ko wareka 2 Uea 18–19, iangoia ngke arona bwa ko maeka i Ierutarem n te tai aio. Ko na kanga n tia n namakinna, te katoto, n ongo bwainikirinakiia I-Aturia i inanon 2 Uea 18:28–37, 19:10–13? Tera ae ko na kaman karaoia? Kabotaua bukina irouia I Aturia ngkai tibun Iteraera a na aki onimakina te Uea ma bukina iroun Tatan are e anga ibukira bwa ti na nanououa n ara onimaki n te bong aei. Ko kona naba ni kabotaua bukina irouia I Aturia ma bukina iroum bwa tera bukina ngkai ko bon onimakina te Uea.
Tera ae ko reiakinna man te bwai ae karaoia Etekia n te bwai ae riki aei? (taraa 2 Uea 19:1–7, 14–19). E kanga ana kaeka te Uea? (taraa 2 Uea 19:35–37). Bukin tera n am iango ngkai Etekia e teimatoa ni kakaonimaki? (taraa 2 Uea 18:5–7). Iangoia raoi bwa e kanga ni kamatoako te Uea n am tai ni kangaanga. Tera ae ko namakinna bwa e kaungaaki nanom bwa ko na karaoia ni karikirakea am onimaki Irouna?
Ana rongorongo Jeffrey R. Holland “Fear Not: Believe Only!” (Riaona, Meei 2022, 34–36) iai ana reirei ae rangi n ibuobuoki n taai ni maaku ao n nanououa. Te anene n taromauri n aron “Ti na Waaki Nako” (Anene n taromauri, nambwa 243) iai naba ana rongorongo ae kaunganano. Tera ae ko kunea inanon bwaai n ibuobuoki aikai aika a kona ni buokiko?
Taraa naba 2 Rongorongo 31–32; 3 Nibwaai 3–4; Jörg Klebingat, “Botumwaka n Iriira Iesu ni Boong aika Kaitira,” Riaona, Meei 2022, 107–10.
Kabonganai bwaai n ibuobuoki ni kamatebwaian koroboki aika tabu. E a tia te Ekaretia ni katauraoi bwaai n ibuobuoki ni buokiko bwa ko aonga ni mataata ni booki aika tabu. N aron te katooto, n te Gospel Library ko kona ni kunea te Bwai ni Kairi nakon Koroboki aika Tabu, Atuun reirei ao Titiraki, ao ana maekatiin te Ekaretia. N reitaki ma anne, ngkai ko wareware n te O Te Tetemanti, ko kona ni kunei rongorongo aika a rangi n ibuobuoki ao n atatai “Iango aika a na Ururingaki ao n Iangoaki n taian rongorongo inanon Nakomai, Iriirai. Te rongorongo ae atuunaki n “Iesu E na Taetae nakoia Iteraera ni Kabane, ‘Come Home’” e na kona ni buoka am kamatebwai n 2 Uea 16–25.
2 Uea 19:20–37
Bwaai ni kabane a mena inanon bain te Uea.
Tennakeriba, ae Uean Aturia, iai bukina ae raoiroi irouna ni kakoaua ae ana tanga ni buaka a na bon tokanikai iaoia kaain Ierutarem (taraa 2 Uea 17; 18:33–34; 19:11–13). Ma iai ana rongorongo te Uea ni kaineti ma Tennakeriba, ae anganaki rinanon te burabeti ae Itaia. E koreaki mwiina inanon 2 Uea 19:20–34. Tera koaua aika ko kunei man ana rongorongon te Uea buokiko ni karekea am onimaki inanon te Uea ao Ana babaire?
2 Uea 21–23
Taian Koroboki aika Tabu e kona n raira nanou nakon te Uea.
Ko a tia n namakinna ae iai bwain te tamnei ae akea iroum? Tao ko namakinna bwa e kona ni kakorakoraaki am retaki ma te Atua. Tera ae e a tia ni buokiko n rairiko Nakoina? Iangoi raoi titiraki aikai ngkana ko wareka 2 Uea 21–23, bwa e kanga Abanuean Iuta ni bwaka mairoun te Uea iaan te Uea ae Manate (taraa 2 Uea 21) ao e kanga te Uea are Iotia ni buokiia aomata ni kaokiia Nakoina (taraa 2 Uea 22–23). E kanga ao bukin tera ngkai e bitaki Iotia ao ana aomata? (taraa 2 Uea 22:8–11; 23:1–6, 21, 24).
Beretitenti Spencer W. Kimball e arana karakinan te Uea ae Iotia “teuana mai buakon karaki aika a tamaroa man koroboki aika tabu” (Teachings of Presidents of the Church: Spencer W. Kimball [2006], 62). Wareka ana taeka Beretiitenti Kimball ibukin te Uea are Iotia (iteraniba 62–64). Tao ko kona n iangoa te taneiai ngke te karaki man koroboki aika a tabu “iai korakorana [n riki]” inanon maium. Tera ae ko na kona ni karaoia bwa ko aonga ni karekei riki taneiai n aron anne?
Taraa naba Aramwa 31:5; “Josiah and the Book of the Law” (video), Gospel Library.
Josiah and the Book of the Law
2 Uea 23:1–25
Te berita ae tabu bon te motinnano ma te nano ae bwanin imarenau ao te Uea.
Tera te namakin ae kakukureiko ibukin te berita ae tabu are e karaoia Iona inanon 2 Uea 23:3? Ngkai ko reitinako ni wareka mwakoro 23, ataia tera are e karaoia Iotia ni kaota ana motinnano nakon te Uea (taraa naba te tamnei ni kabanean te kamataata aei). Ko na kanga ni kaota am motinnano Nakoina?
Ibukin iango riki tabeua, taraa te beeba ni kaongora n te namwakain aio n te Riaona ao Ibukin Kakorakoraia Kairake maekatiin.
Iango ibukin Reiakinaia Ataei
2 Uea 18:3–6; 19:14–19
I kona n onimakina Tamara are i Karawa ao Iesu Kristo.
-
N 2 Uea 18:3, 5–6, buokiia am ataei ni kunea bwa e kanga n riki Etekia bwa te uea ae raoiroi. Ngkanne ngkai kam kaai ni bane ni wareka 2 Uea 19:14–19, a kona ni kunea bwa e kanga ni kaotia ae e onimakin te Uea. Ko kona n taraa tamnein Iesu ao maroroakinna bukin tera bwa ti na onimakinna. Ti na kanga ni kaotia bwa ti kakoaua te Uea?
2 Uea 22:1–7
Tamara are i Karawa ao Iesu Kristo a kona n onimakinai.
-
N 2 Uea 22:1, buokiia am ataei ni kunea bwa iraua ana ririki Iotia ngke e riki bwa te uea. Tera ae ti reiakinna in rongorongon Iotia inanon te kibu 2? Iangoa te waaki ni kakukurei are e kona ni kamataata bwa iriiran te Uea ao tiaki te “rairaki nakon te angatai ke te angamaing.”
-
Taan mwakuri are a kabwarabwaraaki inanon 2 Uea 22:3–7 a onimakinaki ma te mwane are e na kabonganaaki ibukin manga katean te tembora “bukina bwa a karaoa te aro ae kakaonimaki” (te kibu 7. Imwiin warekan kiibu aikai, ko kona ngkoe ma am ataei ni maroroakini bwaai ake ko a tia n onimakinaki iai. Ti na kanga n riki n onimakinaki n aroia taan mwakuri inanon kiibu aikai?
Te tia koroboki ae uota te niira ni boki ae koroboki aika tabu nakon te Uea ae Iotia, kamataata n te tamnei iroun Robert T. Barrett
2 Uea 22:8–11; 23:2–3
A reireinai koroboki aika tabu bwa N na iriira Iesu Kristo.
-
Ni kabwarabwara karakinan te Uea ae Iotia inanon 2 Uea 22–23, ko kona ni karabai katoton koroboki aika tabu n te tabo teuana bon inanon te ruu. Kaoiia am ataei bwa a na kakaea. Ngkanne ko kona ni tibwauaia tera ae e na riki ngkana temanna mai buakoia ana ibonga Iotia e kunei koroboki aika tabu inanon te tembora (taraa 2 Uea 22:8–11; taraa naba “te Uea ae Iotiah” inanon Karaki man Te O Tetemanti, 148–49). Tera ae e na riki nakoira ngkana akea iroura koroboki aika tabu? Tibwauaia imarenami bukin tera ngkai ko kukurei ngkai a reke iroura koroboki aika tabu ni boong aikai.
1:36King Josiah
-
Imwiin warekan 2 Uea 23:2–3, ko kona ngkoa ma am ataei ni maroroakin koroboki aika abu are a kaunga nanom bwa ko na “nakonako n ira nanon te Uea” (te kibu 3). Kam kona naba n anenea te kuna iaon koroboki aika tabu, n aron “Search, Ponder, and Pray” (Aia Boki n Anene Ataei, 109).
2 Uea 23:1–3
N na kawakin au berita aika tabu ma te Atua.
-
Ngke Iotia ao ana aomata a reakini ana tua te Atua, a karaoa te berita ae tabu bwa a na maiuakini. Wareka rongorongon aei ma am ataei inanon 2 Uea 23:1–3, ao buokiia ni kunei mwakoro n taeka ni kaotia bwa a kanga aomata n namakina ana tua te Uea. Tao a kona am ataei n teirake ao ni maroroakinn bwa tera nanon te “[teirake] nakon te berita ae tabu.” Ngkanne a kona n nakonako n te tabo teuana ao n maroroakinna bwa tera nanon te “nakonako n ira nanon te Uea.” Imwiina a kona ni katokai baia iaon burooia ao iangoia kawai are ti kona ni kawakin iai ara berita aika “ma nano[ra] ni kabanea.”
Ibukin iango riki tabeua, taraa te beeba ni kaongora n te namwakaina aio n Te Rao maekatiin.