“July 27–August 2. ‘Ami Nnam Akamba Utom’: Ezra 1; 3–7; Nehemiah 2; 4–6; 8,” Di, Tiene Mi—Eke Ufɔk ye Ufɔk Abasi: Akani Testament 2026 (2026)
“July 27–August 2. ‘Ami Nnam Akamba Utom,’” Di, Tiene Mi: Akani Testament 2026
Ami Menyene Akamba Utom Ndinam, emi Tyson Snow ewetde
July 27–August 2: “Ami Menyene Akamba Utom Ndinam”
Ezra 1; 3–7; Nehemiah 2; 4–6; 8
Mbon Jew ema edi mbon ŋkpɔkɔbi ke Babylon ke ŋkpɔ nte isua Ata-ye-duop. Mmɔ ema etaba Jerusalem ye temple, ndien ediwak ema efre eŋwɔŋɔ mmɔ ye mbet Abasi. Edi Abasi ikifreke mmɔ. Ke akpanikɔ, Enye ama ɔdɔhɔ oto ke prophet Esie ete, “Ami nyedise mbufo, nyuŋ nnam eti ikɔ mi kabaŋa mbufo, ke ndinam mbufo enyɔŋ edi” (Jeremiah 29:10). Ke akpanikɔ nte prophecy emi edide, Jehovah ama asiak usuŋ ɔnɔ ikɔt Esie ndinyɔŋ ndi—Jerusalem ye akpan-akpan, mme ediomi mmɔ mbiba. Ndien Enye ama emenede mme isuŋ-utom emi ekenamde “akamba utom” (Nehemiah 6:3): Ada ibuot ukara emi ekekotde Zerubbabel ekese abaŋa nte ekefiakde ebɔp ufɔk Jehovah. Ezra, oku ye ewet-ŋwed, ama anwam mme owo ndiwɔŋɔde mme esit mmɔ mfiak nka mbet Jehovah. Ndien Nehemiah akada usuŋ ke ndifiak mbɔp mme ibibene ukpeme nkanade Jerusalem. Mmɔ ema ekut ubiɔŋɔ, edi mmɔ ŋko ema enyene unwam eto mme ebiet emi mmɔ mikidotke enyin. Mme ifiɔk mmɔ ekeme nditeme nyuŋ nnɔ nnyin nsin-ifik koro nnyin ŋko inam akamba utom. Ndien nte eke mmɔ, utom nnyin enyene ediwak ŋkpɔ ndinam ke ufɔk Jehovah, mbet Abasi, ye spirit ukpeme emi nnyin ikutde ke Enye.
Ke ndise ke usɔp mbaŋa mme ŋwed Ezra ye Nehemiah, se “Ezra” ye “Nehemiah” ke Bible Dictionary.
Mme Ekikere Ndikpep-ŋkpɔ ke Ufɔk ye Ufɔk Abasi
Ezra 1
Abasi ɔnɔ mme owo ifiɔk ndinam mme uduak Esie.
Ke ini Persia ama akan Babylonia, Abasi ama ɔnɔ edidem Persia, Cyprus, ifiɔk ete ɔnɔ usuk mme Jew eka Jerusalem ekefiak ebɔp temple. Nte afo okotde Ezra 1, se se Cyprus akanamde ndinwam mme Jew oro ke akpan utom emi. Didie ke afo okut nte Abasi anamde utom oto irenowo ye iban emi edude ke ŋkanarade fo, esinede mbon emi midighe mbon ufɔk Abasi Esie? Nso ke emi ɔnɔ fi ekikere abaŋa Jehovah ye utom Esie?
Se ŋko Isaiah 44:24–28.
Ezra 3:8–13; 6:16–22
Ufɔk Ͻbɔŋ edi ufɔk idaresit.
Ke ini mbon Babylon ekeŋwanade ye Jerusalem, mmɔ ema eyip ke temple enyuŋ efɔp enye enim ke isɔŋ (se 2 Ndidem 25:1–10; 2 Chronicles 36:17–19). Afo ekere ke ekpetie fi didie edieke afo ekpedide kiet ke otu mme Jew emi okokutde emi? (se Psalm 137). Se nte mme Jew ekesede, ke ediwak isua ama ekebe, ke ini ekeyakde mmɔ ete efiak enyɔŋ edi enyuŋ edifiak ebɔp temple (se Ezra 3:8–13; 6:16–22). Oro ekeme ndinam fi ɔduŋɔde abaŋa mme ekikere fo kabaŋa Jehovah ye ufɔk Esie. Ntak emi ndibɔp temple edide ntak ndidara?
Temple Zerubbabel; ndise emi Sam Lawlor owutde
Ezra 4–7; Nehemiah 2; 4; 6
Abasi enyene akpan utom ɔnɔ mi ndinam.
Utom Abasi isiwakke edinyene ubiɔŋɔre. Emi ekedi akpanikɔ kabaŋa mme utom Zerubbabel ye Nehemiah. Emi edi mmem mmem usuŋ emi ekemede ndiŋwam fi ekpep oto mme mbuk emi nyuŋ ŋkere mbaŋa nte afo ekemede ndinam utom Abasi usehe ubiɔŋɔre:
Utom Abasi eke Zerubbabel (Ezra 4:3):
Utom Abasi eke Nehemiah (Nehemiah 2:17–18):
Utom Abasi eke mi:
Ubiɔŋɔre emi Zerubbabel okokutde (Ezra 4:4–24):
Ubiɔŋɔre emi Nehemiah okokutde (Nehemiah 2:19; 4:1–3, 7–8; 6:1–13):
Ubiɔŋɔre eke ami ŋkutde:
Nte Zerubbabel ɔkɔbɔrɔde (Ezra 5:1–2):
Nte Nehemiah ɔkɔbɔrɔde (Nehemiah 2:20; 4:6, 9; 6:3–15):
Nte ŋkemede ndibɔrɔ:
Kabaŋa uŋwam ndidomo ifiɔk Nehemiah ye uwem fo, afo emekeme ndikpep etop President Dieter F. Uchtdorf “We Are Doing a Great Work and Cannot Come Down” (Liahona, May 2009, 59–62), akpan akpan akpatre ikpehe iba. Nte afo ekerede abaŋa utom emi Abasi ɔnɔde fi, afo emekeme ndikpep “Young Women Theme” mme “Aaronic Priesthood Quorum Theme” (Gospel Library). Mme emekeme ndise ikwɔ nte “As Sisters in Zion” (Mme ikwɔ, no. 309) mme “Ye Elders of Israel” (Mme ikwɔ, no. 319.
Afo ekere ke ɔwɔrɔ nso ndinyene “esit ndinam utom” ke utom Andinyaŋa? (Nehemiah 4:6). Ekeme ndiwɔrɔ nso ndinyene “eti ubɔk … Abasi ke idem [fo]” nte afo anamde utom Esie? (Nehemiah 2:8; se ŋko Nehemiah 2:18; Ezra 7:6, 9, 27–28). Didie ke afo okut ubɔk Esie ke mme ukeme fo ndinam utom nnɔ Enye?
Nehemiah 8
Ediɔŋ mi ke ini ŋkotde ŋwed Abasi.
Ke ediwak emana ke ini ekedude ke ŋkpɔkɔbi, mme Jew ikisimeke “ŋwed mbet Moses” (Nehemiah 81). Ke Nehemiah 8, Ezra ama okot mbet ɔnɔ mme owo. Nso ke afo okut ke ibuot ŋwed emi emi owutde ete ke Ezra ye ikɔt esie ema ekop ebaŋa Abasi ye ikɔ Esie? (se akpan akpan mme ufaŋ 1–12). Nso ke uwem fo owut nte afo ekerede abaŋa Abasi ye ikɔ Esie?
Se ŋko Teachings of Presidents of the Church: Ezra Taft Benson (2014), 115–24.
Ke se iwakde ikan emi, se ke Liahona eke ɔfiɔŋ emi ye For the Strength of Youth magazines.
Mme Ekikere Ndikpep Nditɔ-ɔwɔŋ
Ezra 3:8–13; 6:16–22
Ufɔk Jehovah edi ebiet idaresit.
-
Man ekpep nditɔ fo abaŋa idaresit emi mme Jew ekenyenede ke ini ekefiakde ebɔp temple mmɔ, emekeme ndiwut mmɔ ndise nte utɔ emi ke idak. Tiŋ mbaŋa ntak mbon emi ekemede ndinem esit ndidu ke ufɔk Jehovah. Afo ŋko emekeme ndidɔhɔ nditɔ fo ntak emi temple edide ebiet idaresit ɔnɔ fi. Didie ke temple anwam fi esik ekpere Ete ke Heaven ye Andinyaŋa?
-
Nte afo okotde Ezra 3:10–13 ye nditɔ fo, wam mmɔ eyom mme ikɔ emi owutde nte mme Jew ekekerede ke ini ekefiakde ebɔp temple. Ke ini esimde utit ufaŋ 13, emekeme ndisio mkpo idara ye kiet eken. Ŋwam nditɔ fo ekere ebaŋa mme ntak ndidara ete ke Jehovah ɔnɔ nnyin mme temple. Didie ke nnyin ikeme ndiwut idara oro?
-
Kere baŋa ndikwɔ ikwɔ abaŋade temple ye nditɔ fo, utɔ nte ɔyɔhɔ ufaŋ iba eke “Welcome Home” (Gospel Library). Ke ekurede udim kiet kiet, afo emekeme nditre man ɔdɔhɔ yak eyen kiet abuana se enye amade abaŋa temple. Afo ŋko emekeme ndise mme ndise temple ke ini ekwɔde ikwɔ.
Nehemiah 2:17–20; 6:1–9
Ͻbɔŋ eyenwam mi ndinam “akwa utom” Esie.
-
Buana ye nditɔ fo mbuk Nehemiah (se Nehemiah 2:17–20; 6:1–9; mme “Nehemiah” ke Mbuk Akani Testament, 173–74). Nte afo okotde Nehemiah 2:20, afo ye nditɔ fo emekeme “ndidada” enyuŋ enam nte ebɔp ibibene Jerusalem. Midighe nditɔ fo ekeme ndibre mbre ke ndibɔp ibibene ye itait me mme ŋkpɔ efen. Nte mmɔ enamde emi, afo emekeme ndinwam mmɔ ekere ebaŋa mme akpan ŋkpɔ emi Ete ke Heaven oyomde nnyin ete inam.
1:38Nehemiah
-
Nte afo okotde Nehemiah 6:9, kot nditɔ fo ete emenede ubɔk mmɔ ke ini ekopde nte afo ɔdɔhɔde “sɔŋɔ mme ubɔk mi.” Tiŋ nnɔ nditɔ baŋa ini emi afo okokopde nte Abasi ɔkɔsɔŋɔde mme ubɔk fo ndinam utom Esie.
Nehemiah 8:1–12
Mme ŋwed Abasi edi edidiɔŋ.
-
Kot uyo ɔwɔrɔ usuk mme ikɔ ke Nehemiah 8:2–3, 5–6, 8–9, 12 emi etiŋde abaŋa se mme owo ekenamde ke ini mmɔ ekekopde nte Ezra okotde ŋwed Abasi. Nte afo okotde, nditɔ fo ekeme ndinam edinam nto mme ikɔ emi. Ndien afo emekeme ndibuana ye kiet eken se afo ekerede ke ini okotde mme okopde mme ikɔ Abasi emi.
-
Nte mbufo ekotde Nehemiah 8:8kiet, afo emekeme ndibup nditɔ fo se inwamde mmɔ ndifiɔk mme ikɔ Abasi emi. Wut mmɔ nte ekamade mme ŋkpɔ ukpepŋkpɔ nte Ndausuŋ nka ke Mme Ŋwed Abasi ye Ibuot Ikɔ ye Mbume (Gospel Library). Kot nditɔ fo ete ebuana se mmɔ ekpepde ebaŋa Andinyaŋa ke mme ŋwed Abasi.
Eyom nsinsi akpanikɔ ke mme ŋwed Abasi. “Mme ŋwed Abasi … eyɔhɔ ye mme akpanikɔ gospel, edi usuk ini ada ntiŋ-enyin ndikut mmɔ. Nte mbufo edianade kiet ekpep eto mme ŋwed Abasi, tre nyuŋ bup mbon emi afo ekpepde akpanikɔ ke gospel emi mmɔ ekutde. Nwam mmɔ ndikut se mme akpanikɔ emi ebuanade ye uduak edinyaŋa eke Ete ke Heaven. Usuk ini ewet mme nsi nsi akpanikɔ emi ke mme ŋwed Abasi, ndien usuk ini emen mmɔ ewut ke mme mbuk ye mme uwem mme owo emi nnyin ikotde ibaŋa. Ekeme ŋko ndinwam ndiduŋɔde kiet mbaŋa mbuk eset eke mme ufaŋ emi afo okotde, kpa ye se mme ufaŋ emi ewɔrɔde ye nte mmɔ ebehede nnyin mfin” (Ndikpep ke Usuŋ eke Andiyaŋa,22).
Ke se iwakde ikan emi, se ke Friend magazine eke ɔfiɔŋ emi.