1 King 12–13; 17–22

?Olsem wanem nao bae yu tokbaot mistek we King Rehoboam, pikinini boe blong Solomon i bin mekem long 1 King 12:1–14? ?Wanem ol Fasin Olsem Hemia blong Kraes nao we i bin save helpem Rehoboam blong sevem kingdom blong hem? (luk long ves 7; Matiu 20:25–28; Mosaea 2:10–21). ?Olsem wanem nao yu save yusum ol fasin ia olsem wan lida—nomata se long wan koling blong Jos o olsem wan lida blong laef blong yuwan?

Profet Elaeja i bin askem wan wido blong givim kaekae long hem mo wota bifo i fidim hemwan mo pikinini boe blong hem we i stap hanggri tumas ia. ?From wanem bae Hem i mekem hemia? Rikwes blong Elaeja, bae oli luk olsem wan blesing long smol famli ia. Oli nidim blesing blong Lod, mo sakrifaes i karem ol blesing oli kam—we i tekem tu blesing blong gat wan fet we i strong moa.

Taem yu ridim 1 King 17:8–16, pikjarem long maen se yu nao wido ia. ?Wanem nao i tajem yu abaot wido ia? Mo tu, yu save mekem wan lis blong ol joes we i nidim fet long Jisas Kraes (blong ol eksampol, luk long Blong Ol Yut Oli Kam Strong: Wan Gaed Buk blong Mekem Ol Joes [2022]). ?Wanem nao yu lanem aot long wido ia abaot stap eksesaesem fet?

?Olsem wanem nao ol aksen blong Elisa long 1 King 19:19–21 oli semmak long ol aksen blong wido ia?

Tingbaot ol sakrifaes we yu bin mekem blong folem Sevya. ?Wanem nao 1 King 17:8–16; 19:19–21 i tijim long yu abaot ol sakrifaes ia? ?Olsem wanem nao save blong yu abaot Sevya i helpem yu taem Hem i askem yu blong mekem sakrifaes? ?Long wanem wei nao Hem i bin blesem yu?

Luk tu long Matiu 4:18–22; 6:25–33; Luk 4:24–26; “Elijah and the Widow of Zarephath” (vidio), Gospel Laebri; “When Faith Endures,” Hym, namba 128.

10:13

Ol Man Isrel, maet oli bin filim se oli gat gudfala risen blong wosipim Bal, we oli save olsem god blong strong win mo ren. Afta long tri yia blong ples i drae, oli nidim tumas ren. Mo blong stap wosipim Bal, oli akseptem long saed blong sosol mo king mo kwin i sapotem. Taem yu ridim 1 King 18, tingting abaot from wanem wan long dei blong yumi, maet hem i no strong blong stap folem Lod. ?Long japta ia, wanem nao yu ting se Lod i stap traem blong tijim abaot Hemwan? ?Wanem ol eksperiens we i bin helpem yu blong stap strong blong stap folem Sevya?

Luk tu long D. Todd Christofferson, “Choice and Commitment” (worldwide devotional for young adults, Jan. 12, 2020), Gospel Laebri.

Sore tumas se merikel antap long Hil Kamel i no bin mekem misin blong Elaeja i kam isi nomo. I tru, laef blong hem i stap long denja, mo hem i mas haed long wan hol blong bigfala ston long draeples. Long ples ia, hem i gat trabol blong faet wetem filing blong stap hemwan mo slak tingting; nao hem i bin gat wan eksperiens wetem Lod we i defren long wanem i bin hapen long Hil Kamel. ?Wanem nao, eksperiens we Elaeja i gotru long hem long 1 King 19:1–18 i tijim yu abaot wei we Lod i stap toktok long yu long ol taem blong nid blong yu?

Tingting hevi long ol taem we yu filim se Lod i bin toktok long yu . ?Olsem wanem nao bae yu tokbaot wei we Hem i toktok wetem yu? ?From wanem nao tufala toktok ia, “kwaet” mo “smol” oli ol gudfala wei blong tokbaot voes blong Spirit? ?Wanem ol narafala toktok we yu faenem insaed long Hileman 5:30; Doktrin mo Ol Kavenan 6:22–23; 11:12–14? ?Wanem nao yu nid blong mekem blong kasem daereksen blong Lod oltaem moa?

Luk tu long Ol Sam 46:10.

• Blong helpem ol pikinini blong yu blong lanem ol stori blong fet long 1 King 17, yu save soem ol pikja o ol samting long olgeta blong soemaot moa klia ol stori ia, olsem ol pijin, bred o wan boe. Taem yu talem long ol pikinini blong yu abaot ol stori ia, invaetem olgeta blong faenem ol pikja o samting we i go wetem wanwan stori ia. “Profet Elaeja” (long Ol Stori long OlTesteman, 121–24) i save helpem yu blong talem ol stori ia. ?Wanem nao wanwan stori ia oli tijim yumi abaot stap soem fet long Jisas Kraes?

  

  1:58

• Helpem ol pikinini blong yu blong tingting long ol wei we oli save soem fet blong olgeta long Jisas Kraes. Singsing wetem olgeta wan singsing abaot fet olsem, “I Have Faith in the Lord, Jesus Christ” (Gospel Laebri), mo serem wetem wanwan long olgeta wanem yu lanem abaot fet long singsing ia.

• Maet ol pikinini blong yu oli save droem wan pikja blong wanem we Lod i askem long wido blong givim long Elaeja (luk long 1 King 17:12–13) mo wanem we wido i kasem afta (luk long 1 King 17:15–16). (Luk tu long aktiviti pej blong wik ia.) Oli save lukaotem tu ol pikja blong ol narafala pipol we oli lego wan samting we oli wantem blong kasem wan samting we i moa gud. Invaetem ol pikinini blong yu blong faenem ol pikja insaed long Gospel Art Buk o Kam Folem Mi. ?Wanem nao Lod i askem long yumi blong givim olsem sakrifaes? ?Long wanem wei nao Hem i blesem yumi?

• Taem yufala i ridim 1 King 18:17–39 tugeta, ol pikinini blong yu oli save jusum wan ves mo dro wan pikja blong wanem we ves ia i tokbaot. Oli save yusum ol pikja blong olgeta blong talem stori long toktok blong olgetawan nomo. (Luk tu long “Elaeja mo Ol Pris blong Bal,” long Ol Stori long OlTesteman, 125–28.)

  

  2:17

• Helpem ol pikinini blong yu blong tingting long ol situesen olsem taem we maet oli nidim blong disaed blong folem, o blong no folem Jisas Kraes. Maet oli save dro ol pikja blong olgetawan we oli stap mekem raet joes. Serem wetem wanwan long yufala from wanem yu jusum blong folem Jisas.

• Taem yu talem sot stori long 1 King 19:9–12, invaetem ol pikinini blong yu blong mekem ol aksen blong ripresentem strong win, etkwek mo faea. Afta, invaetem olgeta blong stap kwaet taem yufala i talem tugeta, long kwaet voes se, “biaen long faea ia, profet i harem we Hae God i stap tok smosmol long hem” (ves 12). (Luk tu long “Lod I Toktok long Elaeja,” long Ol Stori long OlTesteman, 129–31.) Talem long ol pikinini blong yu abaot ol taem we yu bin eksperiensem kwaet, smol voes blong Tabu Spirit.

  

  1:48

• Long kwaet fasin, singsing long wan singsing abaot Spirit, olsem “The Still Small Voice” (Children’s Songbook, 106–7). ?Wanem nao i stap pulumaot tingting blong yumi blong stap luksave Spirit? ?Wanem nao i save helpem yumi blong harem Hem?