“6–12 Julae. ‘I Gat Wan Profet I Stap Long Isrel’: 2 King 2–7,” Kam Folem Mi—Blong Hom mo Jos: OlTesteman 2026 (2026)
“6–12 Julae. ‘I Gat Wan Profet I Stap Long Isrel,’” Kam Folem Mi: OlTesteman 2026
Long En blong Reva, i kam long Annie Henrie Nader
6–12 Julae: “I Gat Wan Profet I Stap Long Isrel”
2 King 2–7
Stamba misin blong wan profet hem i blong tijim mo testifae long Sevya Jisas Kraes. Rekod blong yumi long saed blong profet Elisa, i no gat tumas tijing o testemoni blong hem. Wanem we i gat long rekod, hem i ol merikel we Elisa i mekem, we i tekem tu we hem i mekem wan pikinini i girap bakegen long ded (luk long 2 King 4:18–37), i fidim fulap man wetem wan smol basket kaekae (luk long 2 King 4:42–44), mo i hilim wan we i gat leprosi (luk long 2 King 5:1–14). So, from se yumi no gat ol toktok blong Elisa abaot Kraes, yumi gat ministri mo ol merikel blong Elisa, we oli testifae abaot Kraes. Oli ol samting we oli soemaot se Lod i givim laef, i fidim mo hiling paoa blong Hem. Ol merikel oli hapen moa oltaem long laef blong yumi bitim samtaem we yu save luksave. Blong luk olgeta, yumi nid blong lukaotem fet we Elisa i bin gat taem hem i prea long bihaf blong yangfala wokman ia: “Hae God. Plis yu openem ae blong man ya, blong hem i luk paoa blong yu” (2 King 6:17).
Blong moa infomesen abaot 2 King, luk long “King, books of” insaed long Bible Dictionary.
Ol aedia blong Stap Lanem Samting long Hom mo long Jos
2 King 2–6
God i save mekem ol merikel insaed long laef blong mi.
Ol merikel oli soem long yumi paoa blong God Oli save helpem yumi blong winim ol hadtaem long laef blong wol ia—olsem wan ded graon we i nidim klin wota (luk long 2 King 2:19–22) o akis we handel blong hem i kamaot we oli nidim blong mekem gud bakegen (luk long 2 King 6:4–7). Be wanem we i moa impoten i we, ol merikel oli save tanem yumi i go long Lod. Taem yu stap ridim 2 King 2–6, tingting blong mekem wan lis blong ol merikel we yu faenem, mo tingting hevi long ol lesen long saed blong spirit we yu lanem aot long wanwan long olgeta.
Maet ol memba blong klas oli save faenem se bae i givim olgeta insperesen blong stap komperem sam long ol merikel we Elisa i bin mekem wetem ol merikel we Jisas Kraes i bin mekem (luk long 2 King 4:8–37 mo Luk 7:11–16; 2 King 4:42–44 mo Jon 6:1–13; 2 King 5:1–15 mo Luk 17:11–19). ?Wanem nao ol merikel ia oli stap tijim yumi abaot Sevya mo ol profet blong Hem?
Luk tu long 2 Nifae 26:12–13; 27:23; Moronae7:35–37; seksen “Lukaotem mo wet ol merikel” long Russell M. Nelson, “Paoa blong Faea blong Spirit,” Liahona, Mei 2022, 99–100.
Elisa I Lukaot long Pikinini Boe blong Sunamaet, i kam long Frederic Leighton
2 King 4:8–17; 7:1–16
Lod bae i mekem ol toktok blong Hem oli hapen we i bin givim long ol profet blong Hem.
Lod i givim insperesen long Elisa blong profesae abaot ol samting we oli stap kam—oltaem, hem i ol samting we yumi no stap luk i hapen oltaem. Taem yu ridim 2 King 4:8–17; 7:1–16, tingting abaot olsem wanem yu ansa long toktok blong Lod we i kam tru ol profet blong Hem tedei. ?Wanem nao ol tijing, ol profesi, o ol promes we yu harem long wan profet we i stap laef? ?Wanem nao yu stap mekem blong tekem aksen tru long fet, long ol toktok blong olgeta?
Luk tu long 3 Nifae 29:6; Doktrin mo Ol Kavenan 1:37–38; “Teachings of Presidens” collection, Gospel Laebri.
2 King 5
Taem mi putum tingting blong mi i stap daon mo mi stap obei, bae Jisas Kraes i save hilim mi.
Taem yu ridim 2 King 5, tingting blong stap komperem leprosi blong Neman wetem wan jalenj long saed blong spirit, we yu stap fesem.
?I gat wan we i olsem “smol gel ya i stap wok,” long laef blong yu, we i stap leftemap tingting blong yu blong lukaotem daereksen blong help wetem ol jalenj long profet blong Lod? (luk long ol ves 2–3, 13).
?Olsem wanem nao Lod i stap invaetem yu blong mekem we maet i luk olsem i simpol—olsem “swim, mo kam gud bakegen”? (ves 13). ?Wanem nao i stap stopem yu blong stap akseptem ol simpol invitesen blong Hem?
?Olsem wanem nao yu save soem fasin blong putum tingting i stap daon, olsem we Neman i bin mekem?
Tekem not long wei we eksperiens blong Neman i tajem gud fet blong hem long God blong Isrel? (luk long ves 15) ?Wanem nao yu save lanem long hemia?
Luk tu long Luk 4:27; 1 Pita 5:5–7; Alma 37:3–7; Ita 12:27; L. Whitney Clayton, “Whatsoever He Saith unto You, Do It,” Liahona, Mei 2017, 97–99; “Naaman and Elisha” (vidio), Gospel Laebri.
Naaman and Elisha
Komperem ol skripja wetem laef blong yu. Samtaem hem i moa isi blong faenem wan mining blong yuwan long olgeta skripja taem we yu komperem ol samting blong wol wetem ol samting long saed blong spirit. Eksampol, taem yu stadi long 2 King 2–7, yu save komperem ol situesen long laef blong yu wetem o samting olsem, leprosi, wan akis we yu rentem, Jodan Reva o wan bigfala ami we i stap kam. ?Wanem ol lesen nao maet Lod i gat blong yu insaed long ol stori ia?
2 King 6:8–23
“Yu no fraet. Olgeta long saed blong yumi oli plante moa, i winim olgeta ia.”
Taem yu traem blong folem Kraes, yu bin eva filim olsem yang wokman blong Elisa—plante tumas mo gat bigfala fraet? Pikjarem long maen blong yu se yu stap long ples blong hem, taem yu stap rid 2 King 6:8–23. ?Olsem wanem nao stori ia i jenisim wei we yu tingting mo filim abaot ol hadtaem blong yu, ol responsabiliti blong yu, o ol hadwok blong yu blong laef folem gospel?
Taem yu stap tingting hevi, tingting long ol toktok blong Presiden Henry B. Eyring: “Olsem wokman blong Elisa, i gat plante we oli stap wetem yu, bitim olgeta we oli go agens long yu. Sam long olgeta we oli stap wetem yu, bae yu no save luk olgeta wetem ae blong bodi blong yu. Bae Lod i karem yu antap, mo bae i gat sam taem we, bae Hem i singaotem ol narawan blong stanap wetem yu” (“O Ye That Embark,” Liahona, Novemba 2008, 58).
Tingting blong stap mekem wan lis blong “olgeta we oli stap wetem [yu]” (ves 16)—ol pipol we God i bin putum olgeta long laef blong yu blong sapotem yu. Maet yu askem Hem blong helpem yu blong poenemaot olgeta,taem hem i openem ol ae blong yu long saed blong spirit. Maet Hem i bin putum yu tu long laef blong ol narawan blong helpem olgeta. ?Olsem wanem nao yu save kasem paoa mo sapot long wanwan long yufala?
?Wetaem nao yu bin filim sapot we Lod i tokbaot long Doktrin mo Ol Kavenan 84:88?
Mo tu, maet yu stadi long mesej blong Sista Michelle D. Craig “Ol Ae blong Luksave” (Liahona, Novemba 2020, 15–17). Askem yuwan. “?Wanem nao God i wantem mi blong luk?”
Blong stap gobak long stori we i stap insaed long 2 King 6:8–23, Elda Ronald A. Rasband i talem: “Maet yumi no gat ol hos mo ol faea kat blong ronemaot ol fraet blong yumi mo winim ol devel blong yumi, be lesen i klia. Lod i stap wetem yumi, i gat tingting long yumi mo i stap blesem yumi long ol wei we Hem nomo i save mekem. Prea i save singaotem paoa mo revelesen we yumi nidim blong putum tingting blong yumi long Jisas Kraes, mo sakrifaes blong Hem we i pem praes from yumi. Lod i bin save se, samtaem, bambae yumi fraet. Mi bin stap long ples ia, mo yufala tu. … Long Jos ia, maet namba blong yumi i smol long wei we wol i stap kaontem paoa, be taem yumi openem ae blong spirit blong yumi, ‘olgeta long saed blong yumi oli plante moa, i winim olgeta ya’ [2 King 6:16]” (“Yufala I No Mekem Tingting blong Yufala I Trabol,” Liahona, Novemba 2018, 18–19). ?Olsem wanem nao bae yu yusum ol toktok ia blong helpem wan we i filim wari tumas o fraet?
Luk tu long “Dearest Children, God Is Near You,” Hym, namba 96.
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
2 King 4
God i save mekem ol merikel oli hapen insaed long laef blong mi.
-
Afta we yu helpem ol pikinini blong yu blong andastanem wanem i wan merikel, invaetem olgeta blong mekem lis blong plante eksampol blong ol merikel olsem we oli save tingbaot. Ol pikja long Gospel Art Buk o Kam Folem Mi i save help. Afta, oli save lukaotem ol merikel long 2 King 4:1–7, 14–17, 32–35, 38–44. ?Wanem nao ol merikel ia oli tijim abaot Papa long Heven?
-
Yu mo ol pikinini blong yu i save tokbaot olsem wanem God i bin soem lav blong Hem tru ol merikel. Tugeta, yufala save singsing wan singsing olsem, “God’s Gracious Love” (Gospel Laebri).
Stanap olsem wan Witnes, i kam long Kwani Povi Winder
2 King 5:1–15
Mi save jusum blong mekem wanem we God i komandem mi blong mekem tru long profet blong Hem.
-
Helpem ol pikinini blong yu blong lanem stori ia long 2 King 5:1–3, 9–14. Tingting blong stap yusum “Elisa I Hilim Neman” (long Ol Stori long OlTesteman, 134–37) o pikja blong Neman long aotlaen blong wik ia. ?From wanem Neman i no wantem blong wasem hem insaed long Jodan Reva, nomata se Elisa i bin talem se hemia i save hilim sik blong hem? ?Olsem wanem nao Neman i kasem blesing taem hem i bin folem instraksen blong Elisa? Maet yu save serem wetem wanwan long yufala, ol eksperiens blong taem we yu bin obei long Lod, iven taem yu no sua se yu wantem blong mekem.
1:52Elisha Heals Naaman
-
Mo tu, yu save tokbaot plante 2 King 5:13, long ples we wokman blong Neman i helpem hem blong disaed blong obei long profet Elisa. Afta, ol pikinini blong yu oli save tokbaot ol wei we oli save helpem ol fren o ol memba blong famli blong olgeta blong lisin mo obei long profet.
2 King 6:8–17
Mi no stap miwan.
-
Yu mo ol pikinini blong yu i save pikjarem long maen se wan ami i raonem yufala wetem ol naef blong faet, ol hos mo ol wilkat. ?Bae yu filim olsem wanem? ?Wanem nao bae yu mekem? Afta, ol pikinini blong yu oli save sarem ae blong olgeta taem yu ridim 2 King 6:16–17 long olgeta. (Luk long tu long “Elisa mo Ami blong Lod,” long Ol Stori long OlTesteman, 138–39, o pikja long en blong aotlaen ia.) Taem yu kasem toktok ia “yu openem ae blong man ya” (ves 17), askem ol pikinini blong openem ae blong olgeta. Tokbaot wanem we wokman i bin luk. Serem wetem ol pikinini blong yu, ol wei we yu bin filim se Lod i stap wetem yu long ol taem blong ol jalenj blong yu, iven yu filim se yu stap yuwan.
1:9Elisha and the Lord’s Army
Blong kasem moa aedia, luk long magasin blong Fren blong manis ia.