“Ol Tingting blong Kipim long Maen: ‘Mo Jisas I Se, Ol Man blong Isrel, “Kam Hom,”’” Kam Folem Mi—Blong Hom mo Jos: OlTesteman 2026 (2026)
“Ol Tingting blong Kipim long Maen: ‘Mo Jisas I Se, Ol Man blong Isrel, “Kam Hom,”’” Kam Folem Mi: OlTesteman 2026
Ol Tingting blong Kipim long Maen
“Mo Jisas I Se, Ol Man blong Isrel ‘Kam Hom’”
Long draeples long Sinae, Moses i karem i kam tugeta ol pikinini blong Isrel daon long wan stamba blong wan hil. Long ples ia, Lod i talem se Hem i wantem jenisim ol grup blong pipol ia we oli jes kamaot long slef blong oli kam wan pipol we i gat paoa. Hem i talem: “Be yufala bambae i tabu, yufala i man blong mi nomo, mo bambae yufala i pris” (Eksodas 19:6). Hem i promes se bae oli kam antap mo gat sakses, iven taem we ol samting we i raonem olgeta, oli bigwan, ol enemi we oli gat moa paoa.
Evri samting ia bae i hapen i no from se Ol Man Isrel oli gat bigfala namba, o oli strong o oli gat skil. Bae i save hapen, Lod i eksplenem, sapos oli save “obei long voes [blong Hem], i tru, mo kipim kavenan blong [Hem]” (Eksodas 19:5). Paoa blong God, i no blong olgetawan, bae i mekem oli kam moa strong.
Yet Ol Man Isrel oli no bin obei oltaem long voes blong Hem, mo afta sam taem, oli stop blong kipim ol kavenan blong Hem. Plante oli stat blong wosip long ol narafala god mo stat blong karem ol defren kastom raon long olgeta. Oli sakemaot wanem nao i mekem olgeta blong kam wan nesen, seperet long evri nara nesen —rilesensip blong kavenan blong olgeta wetem Lod. Sapos i no gat paoa blong God we i stap protektem olgeta, i no bin gat eni samting blong stopem ol enemi blong olgeta.
Seraot Ia
Samtaem bitwin 735 mo 720 B.K.B., Ol Man Asiria oli tekova Not Kingdom blong Isrel, hom blong olgeta ten traeb blong ol twelef traeb, mo karem taosen blong Ol Man Isrel oli kam ol prisena long defren pat Kingdom blong Asiria. Ol Man Isrel ia oli save olgeta olsem “laen blong Isrel we oli bin lus,” long wan wei, from se oli bin karemaot olgeta long graon blong olgeta mo seraotem olgeta long ol narafala nesen. Be oli lus long impoten wei ia: afta samtaem oli lusum save ia abaot aedentiti blong olgeta olsem ol kavenan pipol blong God.
Long en, plante pipol long Saot Kingdom blong Juda tu oli bin tanem olgeta i go longwe long Lod. Asiria i bin atakem mo winim kolosap bigfala pat blong kingdom ia tu, be Jerusalem nomo we i wan merikel we i sef i stap. Afta long taem ia 597 mo 580 BK, Ol Man Babilonia oli smasem gud Jerusalem, we i tekem tu, tempol mo karem plante pipol oli kam prisena. Samples 70 yia afta, oli letem haf blong traeb blong Juda we i stap blong oli gobak long Jerusalem mo oli bildimbak tempol. Be, plante oli stap long Babilon.
Nebusa-adan I Prapa Spolem Gud Jerusalem, i kam long William Brassey Hole, © Providence Collection/oli karem laesens long goodsalt.com
Taem i stap pas i go, Ol Man Isrel aot long evri laen, “Nao from we oli mekem olsem, mi mi kam olsem hariken, mi ronemaot olgeta oli go stap long ol narafala kantri” (Sekaraea 7:14). Sam, Lod i lidim olgeta i go aot long ol narafala graon. Ol narawan oli aot long Isrel blong ronwe mo kam fri o from politik o ol ekonomi risen.
Yumi singaotem ol taem ia blong seraot blong Isrel. Mo hem i impoten blong save abaot seraot ia from plante risen. Wan samting, hem i stamba topik blong OlTesteman—Plante profet long OlTesteman oli ol witnes long hadtaem ia we i lid i go long seraot ia blong Isrel. Oli bin luk finis mo kasem woning from hemia. Sam long olgeta oli bin laef tru long hem. Hemia i help bigwan blong tingbaot taem we yu ridim ol buk blong Aesea, Jeremaea, Amos mo ol narafala profet long ol las pat blong OlTesteman. Wetem tingting ia i stap long maen, taem yu rid abaot ol profesi blong olgeta abaot Asiria mo Babilon, fasin blong wosipim aedol mo blong kam olsem ol prisena, harem nogud mo restoresen, bae yu save wanem oli stap tokbaot.
Blong andastanem seraot ia blong Isrel bae i helpem yu andastanem Buk blong Momon tu, from se Buk blong Momon hem i wan rekod blong wan branj blong Isrel we i seraot. Rekod ia i stat wetem famli blong Lihae we i ronwe long Jerusalem samples long 600 B.K.B., bifo we Babilonia i faet agensem Jerusalem. Lihae i wan long ol profet we i profesae abaot seraot ia blong Isrel. Mo ol famli blong hem i helpem hem blong mekem profesi ia i kamtru, I tekem branj blong olgeta blong haos blong Isrel mo planem olgeta long narasaed blong wol, long Ol Amerika.
Kam Tugeta Ia
Be, seraot ia blong Isrel, i haf blong storian ia nomo. Lod i no fogetem ol pipol blong Hem, o i lego olgeta, iven sapos oli bin lego Hem. Ol plante profesi we God bae i save seraotem Isrel i bin go wetem plante promes se bae wan dei Hem bae i karem olgeta i kam tugeta.
Dei ia hem i tedei—dei blong yumi. Kam tugeta ia i stat finis. Long 1836 taosen yia afta we Moses i karem Isrel i kam tugeta long stamba blong Hil ia Sinae, hem i kamaot long Ketlan Tempol blong givim long Josef Smit “ol ki blong wok blong karem Isrel i kam wanples aot long ol fo pat blong wol” (Doktrin mo Ol Kavenan 110:11). Naoia, anda long daereksen blong olgeta we oli holem ol ki ia, ol traeb blong Isrel oli stap karembak olgeta long evri nesen long ples we ol wokman blong Lod i save go long hem.
Moses, Elaeas, mo Elaeja Oli Kamaot long Ketlan Tempol, i kam long Gary E. Smith
Presiden Russel M. Nelson i singaotem kam tugeta ia—“samting ia we i moa impoten we i stap tekples long wol tedei. I nogat samting we yu save komperem, we i bigwan tumas olsem, we i impoten tumas olsem, mo i hae mo i tabu tumas olsem. Mo sapos yu jusum, sapos yu wantem, yu save tekpat bigwan long hem.”
?Olsem wanem nao yumi save helpem olgeta? ?I minim wanem blong karem Isrel i kam tugeta? ?I minim se bae i karembak ol twelef traeb ia i go long kantri we oli stap long hem fastaem? Be, hemia i minim wan samting we i moa bigwan, we i bigwan moa we i no save finis. Olsem we Presiden Nelson i eksplenem:
“Taem yumi stap tokbaot, kam tugeta, yumi stap talem stamba trutok ia nomo: evriwan long ol pikinini blong Papa blong yumi long Heven, long tugeta saed blong vel, i nidim blong harem mesej blong gospel blong Jisas Kraes we i kambak. …
“Eni taem we yu mekem eni samting we i helpem eniwan—long eni saed blong vel—tekem wan step i go fored blong stap mekem ol kavenan wetem God mo mekem baptaes mo ol tempol odinens we i nid long bihaf blong olgeta, yu stap help blong karem Isrel i kam tugeta. Hem i simpol olsem ia nao.”
Hemia i hapen, olsem we Aesea i talem, “Bambae hem i tekem olgeta olsem wan we i tekemaot kakae blong wit” (Aesea 27:12) o, olsem we Jeremaea i talem, wan man long wan taon, mo long evri famli blong yufala, bambae mi tekemaot tu man long wan famli” (Jeremaea 3:14).
Kambak blong Isrel o Karembak Isrel, i minim blong karembak ol pikinini blong God oli gobak long Hem. Hem i minim blong putumbak kavenan rilesensip blong olgeta wetem Hem. Hem i minim blong putumbak bakegen “[tabu nesen]” we Hem i bin proposem blong putumbak longtaem finis (Eksodas 19:6).
Kam Hom
Olsem wan we i bin mekem kavenan wetem God, yu yu pat blong haos blong Isrel. Oli karembak yu finis, mo wok blong yu i blong karembak ol narawan. Blong ol plante handred yia blong ol nambawan stori blong ol kavenan pipol i stap kam antap moa, mo yu wan ki pleia. Naoia hem i taem blong “Jisas i se, Ol Man blong Isrel ‘Kam Hom.’”
Mesej ia i blong ol olgeta ia we oli stap karem ol pipol oli kam tugeta: Kam hom long kavenan. Kam hom long Saeon. Kam hom long Jisas Kraes, Tabu Wan blong Isrel, mo bae Hem i karem yu i go long hom long God, Papa blong yu.