2 King 16–25

Plante long yumi i gotru long jalenj blong fet blong yumi. Blong Hesekia mo ol pipol blong hem, wan long ol jalenj ia i kam taem we ami blong Asaria oli kam kolosap long Jerusalem. Taem yu ridim 2 King 18–19, pikjarem long maen se yu stap long Jerusalem long taem ia. Wanem nao bae yu bin filim, eksampol, stap harem Ol Man Asiria oli stap toktok strong long 2 King 18:28–37; 19:10–13? ?Wanem nao bae yu bin mekem? Komperem ol risen blong Ol Man Isrel blong no trastem Lod wetem ol risen we Setan i stap givim long yumi blong gat tu tingting long fet blong yumi tedei. Mo tu, yu save luk wanem i defren aot long ol risen blong Ol Man Asaria wetem ol risen blong yu se from wanem yu save trastem Lod.

?Wanem nao yu lanem aot long aksen blong Hesekia long situesen ia? (luk long 2 King 19:1–7, 14–19). ?Wanem ansa nao i kam long Lod? (luk long 2 King 19:35–37). ?From wanem yu ting se Hesekia i gohed blong stap fetful? (luk long 2 King 18:5–7). Tingting hevi long olsem wanem Lod i bin givim sapot long yu long ol taem blong jalenj. ?Wanem nao yu filim insperesen blong mekem se tras blong yu long Hem i kam antap?

Mesej blong Presiden Jeffrey R. Holland “!No Fraet: Biliv Nomo!” (Liahona, Mei 2022, 34–36) i gat ol kaonsel we oli save help bigwan long ol taem blong fraet o gat tingting i fasfas. Wan hym olsem “Yumi Mas Gohed” (STSP, pej 10) i save gat tu ol mesej blong leftemap tingting. ?Wanem nao yu faenem insaed long ol risos ia we bae i helpem yu?

Luk tu long 2 Kronikel 31–32; 3 Nifae 3–4; Jörg Klebingat, “Strong Disaepol long Taem blong Ol Las Dei,” Liahona, Mei 2022, 107–10.

Senakerik, king blong Asaria, i bin gat wan gudfala risen blong biliv se ol ami blong hem bae oli winim Jerusalem (luk long 2 King 17; 18:33–34; 19:11–13). Be Lod i gat wan mesej folem Senakerik, we Hem i bin givim long profet Aesea. Oli bin rekodem insaed long 2 King 19:20–34. ?Wanem ol trutok nao yu faenem insaed long mesej blong Lod we i helpem yu blong gat fet long Hem mo long plan blong Hem?

?Yu yu no bin stap filim olsem se yu stap lusum wan samting long saed blong spirit? Maet yu filim se rilesensip blong yu wetem God i save kam moa strong. ?Wanem nao i helpem yu blong yu gobak long Hem? Tingting hevi long ol kwestin ia taem yu ridim 2 King 21–23, we i tokbaot olsem wanem Kingdom blong Juda i kamaot long Lod long han blong King Manase (luk long 2 King 21) mo olsem wanem King Josaea i bin helpem olgeta blong tanem olgeta i gobak long Lod (luk long 2 King 22–23). ?Olsem wanem mo from wanem Josaea mo ol pipol blong hem oli bin jenis? (luk long 2 King 22:8–11; 23:1–6, 21, 24).

Presiden Spencer W. Kimball i singaotem stori blong King Josaea, “wan long olgeta nambawan stori insaed long evri skripja” (Teachings of Presidens of the Church: Spencer W. Kimball [2006], 62). Ridim ol toktok blong Presiden Kimball abaot Josaea long (ol pej 62–64). Bae yu save tingting long wan eksperiens taem we wan toktok blong skripja “i wok bigwan” long yu. ?Wanem nao bae yu mekem blong kasem moa eksperiens olsem ia?

Luk tu long Alma 31:5; “Josiah and the Book of the Law” (vidio), Gospel Laebri.

12:25

?Wanem nao yu filim abaot kavenan we Josaea i bin mekem long 2 King 23:3? Taem yu gohed blong ridim japta 23, tekem not long wanem we Josaea i bin mekem blong soem komitmen blong hem long Lod (luk tu long pikja long en blong aotlaen ia). ?Olsem wanem nao yu save soem komitmen blong yu long Hem?

• Long 2 King 18:3, 5–6, i save helpem ol pikinini blong yu blong faenemaot wanem i bin mekem Hesekia i wan gudfala king. Afta, tugeta taem yufala i ridim 2 King 19:14–19, oli save faenemaot olsem wanem hem i soem se hem i trastem Lod. Yu save lukluk long wan pikja blong Jisas mo tokbaot from wanem yumi save trastem Hem. ?Olsem wanem nao yumi save soemaot se yumi gat tras long Lod?

• Long 2 King 22:1, helpem ol pikinini blong yu blong faenemaot hamas yia blong Josaea taem we hem i bin kam king. ?Wanem nao yumi lanem abaot Josaea long ves 2? Tingting long wan aktiviti we i save soemaot blong stap folem Lod mo no stap tanem “i go long saedsaed long raet han o long lef.”

• Ol wokman we oli tokbaot olgeta long 2 King 22:3–7 oli trastem olgeta wetem mane blong yusum blong bildimbak tempol “from we fasin blong olgeta i stret mo gud” (ves 7). Afta we yufala i ridim ol ves ia, yu mo ol pikinini blong yu i save tokbaot ol samting we Lod i bin trastem yu wetem. ?Olsem wanem nao bae oli save trastem yumi, semmak olsem ol wokman long ol ves ia?

• Blong introdiusum stori blong King Josaea long 2 King 22–23, yu save haedem wan kopi blong ol skripja long wanples insaed long rum. Invaetem ol pikinini blong yu blong faenem. Afta, yu save serem wanem i bin hapen taem wan long ol pris blong Josaea i bin faenem ol skripja insaed long tempol (luk long 2 King 22:8–11; luk tu long “King Josiah” long Ol Stori long OlTesteman, 148–49). ?Wanem bae i hapen long yumi sapos yumi no gat ol skripja? Serem wetem wanwan long yufala, from wanem yu glad se yumi gat ol skripja tedei.

  

  1:36

• Afta we yufala i ridim 2 King 23:2–3, yu mo ol pikinini blong yu i save tokbaot ol skripja we oli bin givim insperesen long yufala blong “obei long Lod” (ves 3). Mo tu, tugeta, yufala i save singsing wan singsing abaot stap ridim ol skripja, olsem “Search, Ponder, and Pray” (Children’s Songbook,109).

• Taem Josaea mo ol pipol blong hem oli bin lanem ol komanmen blong God, oli mekem wan kavenan blong laef folem olgeta. Ridim abaot hemia wetem ol pikinini blong yu long 2 King 23:1–3, mo helpem olgeta blong faenem ol toktok o ol sentens we oli soem wanem nao ol pipol oli bin filim abaot ol komanmen blong Lod. Maet ol pikinini blong yu oli save stanap mo tokbaot wanem i minim blong “holem ol loa blong hem mo ol tok blong hem.” Afta, oli save wokbaot raon mo tokbaot wanem i minim blong “obei long hem (Lod).” Nekis wan, oli save putum han blong olgeta long hat blong olgeta mo talem sam wei we yumi save kipim ol komanmen “wetem ful hat blong [yumi].”