Lod I Toktok long Elaeja

King Ehab i talem long Kwin Jesebel se Lod i winim ol pris blong Bal. Jesebel i kros, mo i talem se bae hem i kilimded profet Elaeja.

1 King 19:1–2

Blong hem i stap sef, Elaeja i aot long graon blong Isrel. Hem i travel blong 40 dei mo 40 naet, hem i livim kakae taem hem i stap wokbaot i go. Nao, hem i kasem Hil Sinae, mo i faenem wan hol blong ston blong haed insaed long hem. Lod i talem long Elaeja blong go long top blong maonten ia, blong mekem se Hem i save toktok wetem Elaeja.

1 King 19:3, 8–11

Wan strong win i kam, mo i brebrekem ol ston raon long hol blong ston ia, oli pisis. Afta long hemia, wan etkwek i kam i seksekem graon. Afta, wan faea i stat. Elaeja i harem ol bigfala saon blong win, graon i seksek, mo faea. Be voes blong Lod i no stap long ol bigfala noes ia.

1 King 19:11–12

Afta, Elaeja i harem wan voes we i kwaet, i stap mo i no laod. Hem i bin save se, hemia i Lod. Lod i askem long Elaeja se hem i stap mekem wanem long ples ia.

1 King 19:12–13

Elaeja i talem se hem i stap haed blong mekem se hem i stap sef. Oli bin kilimded evri profet, mo ol pipol oli stap sakemaot Lod.

1 King 19:14

Lod i leftemap tingting blong Elaeja mo i talem long hem se i gat plante Man Isrel we oli stap wosipim Lod yet. Lod i askem Elaeja blong gobak hom, mo mekem wan nara profet i rere. Niufala profet ia, nem blong hem i, Elisa.

1 King 19:15–18