“ວັນທີ 1–7 ເດືອນມິຖຸນາ. ‘ໃຈຂອງຂ້ານ້ອຍເຕັມລົ້ນດ້ວຍຄວາມຊົມຊື່ນຍິນດີໃນພຣະຜູ້ເປັນເຈົ້າ’: ນາງຣຸດ; 1 ຊາມູເອນ 1–7,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)

“ວັນທີ 1–7 ເດືອນມິຖຸນາ. ‘ໃຈຂອງຂ້ານ້ອຍເຕັມລົ້ນດ້ວຍຄວາມຊົມຊື່ນຍິນດີໃນພຣະຜູ້ເປັນເຈົ້າ,’” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026

Whither Thou Goest [ແມ່ໄປທີ່ໃດລູກກໍຈະໄປທີ່ນັ້ນ], ໂດຍ ແຊນດີ ຟະເຣັກໂກທັນ ກາກອນ

ວັນທີ 1–7 ເດືອນມິຖຸນາ: “ໃຈຂອງຂ້ານ້ອຍເຕັມລົ້ນດ້ວຍຄວາມຊົມຊື່ນຍິນດີໃນພຣະຜູ້ເປັນເຈົ້າ”

ນາງຣຸດ; 1 ຊາມູເອນ 1–7

ບາງເທື່ອເຮົາຈິນຕະນາການວ່າ ຊີວິດຂອງເຮົາຄວນຢູ່ໃນເສັ້ນທາງທີ່ແຈ່ມໃສ ນັບແຕ່ຕອນເລີ່ມຕົ້ນຈົນຈົບ. ທ້າຍທີ່ສຸດ, ໄລຍະທາງທີ່ສັ້ນທີ່ສຸດລະຫວ່າງຈຸດສອງຈຸດກໍແມ່ນເສັ້ນຊື່. ແຕ່ຊີວິດກໍເຕັມໄປດ້ວຍຄວາມລ່າຊ້າ ແລະ ທາງອ້ອມ ທີ່ນຳພາເຮົາໄປໃນທິດທາງທີ່ບໍ່ຄາດຄິດ.

ນາງຣຸດ ແລະ ນາງຮັນນາເຂົ້າໃຈເລື່ອງນີ້ດີ. ນາງຣຸດບໍ່ແມ່ນຄົນອິດສະຣາເອນ, ແຕ່ນາງໄດ້ແຕ່ງງານກັບຄົນອິດສະຣາເອນ, ແລະ ເມື່ອສາມີຂອງນາງໄດ້ຕາຍໄປ, ນາງຕ້ອງເລືອກ. ນາງຄວນຈະຄືນໄປຫາຄອບຄົວຂອງນາງ ແລະ ຄືນສູ່ຊີວິດທີ່ຄຸ້ນເຄີຍບໍ, ຫລື ນາງຈະນ້ອມຮັບເອົາຄວາມເຊື່ອຖືຂອງຊາວອິດສະຣາເອນ ແລະ ບ້ານໃໝ່ກັບແມ່ຍ່າຂອງນາງ? (ເບິ່ງ ນາງຣຸດ 1:4–18). ແຜນຂອງນາງຮັນນາໃນຊີວິດແມ່ນການມີລູກ, ແຕ່ນາງບໍ່ສາມາດມີລູກໄດ້, ແລະ ນັ້ນເຮັດໃຫ້ນາງເຕັມໄປ “ດ້ວຍຄວາມຂົມຂື່ນ” (ເບິ່ງ 1 ຊາມູເອນ 1:1–10). ຂະນະທີ່ທ່ານອ່ານກ່ຽວກັບນາງຣຸດ ແລະ ນາງຮັນນາ, ໃຫ້ພິຈາລະນາສັດທາທີ່ພວກເຂົາຕ້ອງມີ ເພື່ອທີ່ຈະເດີນໄປໃນເສັ້ນທາງທີ່ບໍ່ຄາດຄິດ. ແລ້ວຄິດກ່ຽວກັບການເດີນທາງຂອງທ່ານເອງ. ມັນແຕກຕ່າງຈາກການເດີນທາງຂອງນາງຣຸດ ແລະ ນາງຮັນນາ—ແລະ ຂອງຄົນອື່ນໆອີກ. ແຕ່ຕະຫລອດທົ່ວການທົດລອງ ແລະ ສິ່ງທີ່ເກີດຂຶ້ນແບບບໍ່ຄາດຄິດລະຫວ່າງຕອນນີ້ເຖິງຈຸດໝາຍປາຍທາງນິລັນດອນຂອງທ່ານ, ທ່ານສາມາດຮຽນທີ່ຈະເວົ້າແບບດຽວກັບນາງຮັນນາວ່າ, “ໃຈຂອງຂ້ານ້ອຍເຕັມລົ້ນດ້ວຍຄວາມຊົມຊື່ນຍິນດີໃນພຣະຜູ້ເປັນເຈົ້າ” (1 ຊາມູເອນ 2:1).

ເບິ່ງ ຄູ່ມືພຣະຄຳພີ ສຳລັບພາບລວມຂອງພຣະທຳ ນາງຣຸດ ແລະ 1 ຊາມູເອນ ນຳອີກ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ນາງຣຸດ

ພຣະເຢຊູຄຣິດສາມາດປ່ຽນຄວາມເສົ້າສະຫລົດໃຈເປັນໄຊຊະນະໄດ້.

ຊີວິດນັ້ນຍາກສຳລັບແມ່ໝ້າຍ ບໍ່ວ່າຈະຍຸກສະໄໝໃດ. ແຕ່ເມື່ອສາມີຂອງນາງຣຸດໄດ້ຕາຍໄປ, ສະຖານະການຂອງນາງກໍຍາກເປັນພິເສດ. ໃນວັດທະນະທຳຂອງຊາວອິດສະຣາເອນ ໃນເວລານັ້ນ, ຜູ້ຍິງທີ່ປາດສະຈາກສາມີ ຫລື ລູກຊາຍ ບໍ່ມີສິດທີ່ຈະມີທີ່ດິນ ແລະ ມີຫົນທາງພຽງແຕ່ໜ້ອຍດຽວທີ່ຈະຫາລ້ຽງຊີບ. ຂະນະທີ່ທ່ານອ່ານເລື່ອງລາວຂອງນາງຣຸດ, ໃຫ້ສັງເກດເບິ່ງວ່າ ພຣະຜູ້ເປັນເຈົ້າປ່ຽນຄວາມເສົ້າສະຫລົດໃຈໃຫ້ກາຍເປັນພອນອັນຍິ່ງໃຫຍ່ແນວໃດ. ທ່ານສັງເກດເຫັນຫຍັງແດ່ກ່ຽວກັບນາງຣຸດ ທີ່ອາດຊ່ວຍເຫລືອນາງໄດ້? ໂບອາດໄດ້ຊ່ວຍກູ້ນາງຣຸດຈາກສະຖານະການທີ່ສິ້ນຫວັງຂອງນາງແນວໃດ? (ເບິ່ງ ນາງຣຸດ 4:4–10). ທັງນາງຣຸດ ແລະ ໂບອາດເປັນເໝືອນດັ່ງພຣະເຢຊູຄຣິດແນວໃດ?

ເບິ່ງ “Be Still, My Soul,” Hymns, no. 124 ນຳອີກ.

ນາງຣຸດ; 1 ຊາມູເອນ 1

ເຮົາສາມາດເຊື່ອໃຈໄດ້ວ່າ ພຣະເຈົ້າຈະນຳພາ ແລະ ຊ່ວຍເຫລືອເຮົາ ບໍ່ວ່າສະຖານະການຂອງເຮົາຈະເປັນແນວໃດກໍຕາມ.

ບາງທີທ່ານກໍເຄີຍທຸກທໍລະມານກັບການສູນເສຍຄັ້ງຍິ່ງໃຫຍ່, ເຊັ່ນດຽວກັບທີ່ນາງຣຸດ ແລະ ນາງນາໂອມີໄດ້ສູນເສຍ (ເບິ່ງ ນາງຣຸດ 1:1–5). ຫລື ບາງເທື່ອ, ເຊັ່ນດຽວກັບນາງຮັນນາ, ທ່ານຄອງຄອຍຖ້າພອນທີ່ທ່ານຍັງບໍ່ໄດ້ຮັບເທື່ອ (ເບິ່ງ 1 ຊາມູເອນ 1:1–10). ແມ່ຍິງເຫລົ່ານີ້ໄດ້ສະແດງສັດທາຂອງພວກນາງໃນພຣະເຈົ້າແນວໃດ? ທ່ານຮຽນຮູ້ຫຍັງແດ່ຈາກຕົວຢ່າງຂອງພວກເຂົາ?

ແນ່ນອນ, ບໍ່ແມ່ນທຸກຄົນທີ່ອະທິຖານຂໍລູກຈະໄດ້ມີລູກ, ແລະ ບໍ່ແມ່ນທຸກຄົນທີ່ຄູ່ຄອງເສຍຊີວິດຈະແຕ່ງງານໃໝ່. ແຕ່ທຸກຄົນທີ່ຫັນໄປຫາພຣະຜູ້ຊ່ວຍໃຫ້ລອດຈະໄດ້ຮັບຄວາມຊ່ວຍເຫລືອ ແລະ ການນຳພາຈາກພຣະອົງ. ໃຫ້ພິຈາລະນາວ່າ ທ່ານໄດ້ “ມາເພິ່ງພາອາໄສ” ພຣະຜູ້ເປັນເຈົ້າແນວໃດ (ນາງຣຸດ 2:12) ໃນຊ່ວງເວລາທີ່ຍາກລຳບາກ.

ເບິ່ງ Amy A. Wright, “Abide the Day in Christ,” Liahona, Nov. 2023, 9–11 ນຳອີກ.

ນາງຮັນນາ ແລະ ລູກຂອງນາງ — For This Child I Prayed [ຂ້ານ້ອຍໄດ້ອະທິຖານຂໍລູກນຳພຣະອົງ], ໂດຍ ແອວສະແປດ ຢັງ

1 ຊາມູເອນ 2; 4–7

ເພື່ອທີ່ຈະຮັບຄວາມຊ່ວຍເຫລືອຈາກພຣະຜູ້ເປັນເຈົ້າ, ເຮົາຕ້ອງໄວ້ວາງໃຈພຣະອົງ ແລະ ເຊື່ອຟັງພຣະບັນຍັດຂອງພຣະອົງ.

ເມື່ອສັດຕູຂອງພວກເຂົາບຸກໂຈມຕີ, ຊາວອິດສະຣາເອນໄດ້ຄິດວ່າ ການຄອບຄອງຫີບພັນທະສັນຍາເທົ່ານັ້ນ ຈະປົກປ້ອງພວກເຂົາໄດ້. ຂະນະທີ່ທ່ານອ່ານ 1 ຊາມູເອນ 4–6, ໃຫ້ຄິດກ່ຽວກັບວ່າ ເປັນຫຍັງມັນຈຶ່ງບໍ່ໄດ້ຜົນ. (ໃຫ້ສັງເກດການກະທຳທີ່ບໍ່ຊອບທຳຂອງພວກລູກຊາຍຂອງເອລີ, ຜູ້ທີ່ໄດ້ຮັບໃຊ້ເປັນປະໂລຫິດໃນຫໍເຕັນສັກສິດນຳອີກ, ໃນ 1 ຊາມູເອນ 2:12–25.) ທ່ານຄິດວ່າ ພຣະຜູ້ເປັນເຈົ້າກຳລັງພະຍາຍາມຈະສອນສິ່ງໃດແດ່ໃຫ້ກັບຜູ້ຄົນຂອງພຣະອົງ? ທ່ານຮຽນຮູ້ຫຍັງແດ່ຈາກສິ່ງທີ່ເກີດຂຶ້ນກັບຊາວຟີລິດສະຕິນຫລັງຈາກໄດ້ຍຶດຫີບພັນທະສັນຍາມາໄດ້? (ເບິ່ງ ບົດທີ 5–6). ທ່ານຮຽນຮູ້ຫຍັງແດ່ຈາກຄວາມພະຍາຍາມຂອງອິດສະຣາເອນໃນການໄດ້ຮັບການປົກປ້ອງຈາກພຣະຜູ້ເປັນເຈົ້າໃນ 1 ຊາມູເອນ 7?

ທ່ານອາດໄດ້ຮັບການດົນໃຈໂດຍການອ່ານບົດກະວີແຫ່ງການສັນລະເສີນຂອງນາງຮັນນາໃນ 1 ຊາມູເອນ 2:1–10. ທ່ານພົບຫຍັງແດ່ໃນຖ້ອຍຄຳຂອງນາງທີ່ສາມາດຊ່ວຍພວກລູກຊາຍຂອງເອລີ ແລະ ຊາວອິດສະຣາເອນທີ່ເຫລືອໄດ້?

1 ຊາມູເອນ 3

ເຮົາສາມາດໄດ້ຍິນ ແລະ ເຊື່ອຟັງສຸລະສຽງຂອງພຣະຜູ້ເປັນເຈົ້າ.

ໃນບາງຄັ້ງ, ທ່ານອາດຮູ້ສຶກຄືກັນກັບຊາມູເອນ, ຜູ້ທີ່ໄດ້ຍິນສຸລະສຽງຂອງພຣະຜູ້ເປັນເຈົ້າ ແຕ່ບໍ່ຮູ້ຈັກມັນ. ເຊັ່ນດຽວກັບເຮົາທຸກຄົນ, ຊາມູເອນຕ້ອງໄດ້ຮຽນຮູ້ວິທີຮູ້ຈັກສຸລະສຽງຂອງພຣະຜູ້ເປັນເຈົ້າ. ຂະນະທີ່ທ່ານສຶກສາ 1 ຊາມູເອນ 3, ທ່ານຮຽນຮູ້ຫຍັງແດ່ຈາກຊາຍໜຸ່ມຄົນນີ້ກ່ຽວກັບການໄດ້ຍິນ ແລະ ການເຊື່ອຟັງສຸລະສຽງຂອງພຣະຜູ້ເປັນເຈົ້າ? ທ່ານອາດຄົ້ນຄວ້າຂໍ້ພຣະຄຳພີເຫລົ່ານີ້ເພີ່ມເຕີມ ແລະ ເຮັດລາຍການຄູ່ມືທີ່ສາມາດຊ່ວຍໃຫ້ຄົນຄົນໜຶ່ງຮູ້ຈັກສຸລະສຽງຂອງພຣະຜູ້ເປັນເຈົ້າ: 1 ກະສັດ 19:11–12; ລູກາ 24:15–32; 3 ນີໄຟ 11:3–7; ຄຳສອນ ແລະ ພັນທະສັນຍາ 6:22–23; 8:2–3; 9:7–9.

ໃນຄັ້ງອື່ນໆ, ທ່ານອາດຮູ້ສຶກວ່າ ຟ້າສະຫວັນປິດ ແລະ ພຣະເຈົ້າບໍ່ຢາກສື່ສານກັບທ່ານ. ປະທານຣະໂຊ ເອັມ ແນວສັນ ໄດ້ກ່າວວ່າ, “ພຣະເຈົ້າ ຢາກ ກ່າວກັບທ່ານແທ້ໆບໍ? ແມ່ນແລ້ວ!” (“Revelation for the Church, Revelation for Our Lives,” Liahona, May 2018, 93–96). ຂະນະທີ່ທ່ານສຶກສາຂ່າວສານຂອງປະທານແນວສັນ, ທ່ານພົບຫຍັງແດ່ທີ່ດົນໃຈທ່ານໃຫ້ໄດ້ຍິນ ແລະ ເຊື່ອຟັງສຸລະສຽງຂອງພຣະຜູ້ເປັນເຈົ້າ? ປະທານແນວສັນເຊື້ອເຊີນໃຫ້ທ່ານເຮັດຫຍັງ, ແລະ ພອນໃດແດ່ທີ່ເພິ່ນສັນຍາໄວ້? ທ່ານຍັງສາມາດພົບຄຳເຊື້ອເຊີນ ແລະ ພອນທີ່ໄດ້ສັນຍາໄວ້ກ່ຽວກັບການເປີດເຜີຍໃນ “ເດີນໄປໃນຄວາມສະຫວ່າງຂອງພຣະເຈົ້າ” (ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ, 16–20) ນຳອີກ. ໃຫ້ຄິດທີ່ຈະເລືອກສິ່ງໜຶ່ງທີ່ທ່ານສາມາດເຮັດໄດ້ເພື່ອທີ່ຈະ “ເພີ່ມຄວາມສາມາດທາງວິນຍານຂອງທ່ານໃນການຮັບການເປີດເຜີຍ.”

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ນາງຣຸດ

ເຮົາສາມາດສະແດງຄວາມຮັກ ແລະ ຄວາມເມດຕາແກ່ຜູ້ຄົນທີ່ຢູ່ອ້ອມຕົວເຮົາ.

ຂະນະທີ່ທ່ານແບ່ງປັນເລື່ອງລາວຂອງນາງຣຸດກັບລູກໆຂອງທ່ານ (ທ່ານສາມາດໃຊ້ “ນາງຣຸດ ແລະ ນາງນາໂອມີ” ໃນ ເລື່ອງພຣະຄຳພີເດີມ, 100–103), ເຊື້ອເຊີນພວກເຂົາໃຫ້ຍົກມືຂຶ້ນທຸກຄັ້ງທີ່ພວກເຂົາໄດ້ຍິນການກະທຳທີ່ເມດຕາໃນເລື່ອງລາວນັ້ນ. ພວກເຂົາຍັງສາມາດແບ່ງປັນສິ່ງທີ່ພວກເຂົາຮູ້ສຶກ ເມື່ອຄົນອື່ນມີເມດຕາກັບພວກເຂົາ, ຫລື ເມື່ອພວກເຂົາມີເມດຕາກັບຄົນອື່ນໄດ້ນຳອີກ. ພຣະຜູ້ຊ່ວຍໃຫ້ລອດມີເມດຕາກັບເຮົາແນວໃດ? ເຮົາຈະສາມາດເຮັດຕາມຕົວຢ່າງຂອງພຣະອົງໄດ້ແນວໃດ? (ເບິ່ງ “Kindness Begins with Me,” Children’s Songbook, 145).

2:0
Ruth and Naomi

ນາງຣຸດ; 1 ຊາມູເອນ 1

ເຮົາສາມາດມີສັດທາໃນພຣະຜູ້ເປັນເຈົ້າ.

ເລື່ອງລາວຂອງນາງຣຸດ ແລະ ນາງຮັນນາສາມາດດົນໃຈລູກໆຂອງທ່ານໃຫ້ຄົງຄວາມຊື່ສັດໃນຊ່ວງເວລາທີ່ຍາກລຳບາກ. ໃຫ້ຄິດທີ່ຈະຊ່ວຍເຫລືອພວກເຂົາສ້າງຕາຕະລາງທີ່ລຽບງ່າຍພ້ອມດ້ວຍຫົວຂໍ້ ການທົດລອງ, ການກະທຳ, ພອນ. ແລ້ວພວກທ່ານສາມາດອ່ານ ນາງຣຸດ 1:3–5, 8, 16; 2:1–3, 8–12; 4:13–17; 1 ຊາມູເອນ 1:1–18 ນຳກັນ ແລະ ຂຽນຢູ່ກ້ອງຫົວຂໍ້ເຫລົ່ານັ້ນສິ່ງທີ່ພວກເຂົາພົບຢູ່ໃນຂໍ້ເຫລົ່ານີ້. ນາງຣຸດ ແລະ ນາງຮັນນາໄດ້ສະແດງສັດທາຂອງພວກນາງໃນພຣະຜູ້ເປັນເຈົ້າແນວໃດ? ແລ້ວທ່ານ ຫລື ລູກໆຂອງທ່ານກໍສາມາດແບ່ງປັນຕົວຢ່າງກ່ຽວກັບວິທີທີ່ພຣະຜູ້ເປັນເຈົ້າໄດ້ອວຍພອນພວກທ່ານໃນຊ່ວງເວລາທີ່ຍາກລຳບາກແນວໃດ.

1 ຊາມູເອນ 1:1–18

ພຣະບິດາເທິງສະຫວັນໄດ້ຍິນ ແລະ ຕອບຄຳອະທິຖານຂອງເຮົາ.

ເພື່ອຮຽນຮູ້ກ່ຽວກັບນາງຮັນນາ, ລູກໆຂອງທ່ານສາມາດອ່ານ 1 ຊາມູເອນ 1:1–18 ຫລື “ນາງຮັນນາ” ໃນ ເລື່ອງພຣະຄຳພີເດີມ (104–5) ຫລື ເບິ່ງ “Hannah’s Faith” (ວິດີໂອ, ຫ້ອງສະໝຸດພຣະກິດຕິຄຸນ). ມັນອາດເປັນການມ່ວນຊື່ນທີ່ຈະໂຍນໝາກບານໃຫ້ລູກຄົນໜຶ່ງ ແລະ ເຊື້ອເຊີນເຂົາໃຫ້ເລົ່າຕອນໜຶ່ງຂອງເລື່ອງລາວກ່ອນທີ່ຈະໂຍນໝາກບານໃຫ້ຄົນອື່ນ. ເຮົາຮຽນຮູ້ຫຍັງແດ່ກ່ຽວກັບການອະທິຖານຈາກຕົວຢ່າງຂອງນາງຮັນນາ?

1:15
Hannah

3:9
Hannah's Faith

ຊາມູເອນ ແລະ ເອລີ — Samuel Tells Eli the Truth [ຊາມູເອນບອກຄວາມຈິງກັບເອລີ], ໂດຍ ຣໍເບີດ ທີ ແບແຣັດ

1 ຊາມູເອນ 3:1–10

ເຮົາສາມາດໄດ້ຍິນ ແລະ ເຊື່ອຟັງສຸລະສຽງຂອງພຣະຜູ້ເປັນເຈົ້າ.

ບາງທີການສະແດງບົດບາດທີ່ລຽບງ່າຍສາມາດຊ່ວຍໃຫ້ລູກໆຂອງທ່ານຮຽນຮູ້ຈາກປະສົບການຂອງຊາມູເອນກັບການເປີດເຜີຍ. ລູກຄົນໜຶ່ງອາດທຳທ່າເປັນຊາມູເອນ, ແລະ ອີກຄົນໜຶ່ງສາມາດທຳທ່າເປັນເອລີ ຂະນະທີ່ທ່ານອ່ານ 1 ຊາມູເອນ 3:1–10 (ເບິ່ງ “ສາດສະດາຊາມູເອນ” ໃນ ເລື່ອງພຣະຄຳພີເດີມ, 106–9, ຫລື ວິດີໂອ “Samuel and Eli,” ຫ້ອງສະໝຸດພຣະກິດຕິຄຸນ ນຳອີກ). ເຮົາຮຽນຮູ້ຫຍັງແດ່ຈາກຊາມູເອນກ່ຽວກັບວິທີໄດ້ຍິນສຸລະສຽງຂອງພຣະຜູ້ເປັນເຈົ້າ? ເຮົາຈະສະແດງໃຫ້ເຫັນແນວໃດວ່າ ເຮົາເຕັມໃຈທີ່ຈະໄດ້ຍິນເມື່ອພຣະຜູ້ເປັນເຈົ້າກ່າວກັບເຮົາ?

2:10
Samuel the Prophet

1:58
Samuel and Eli
ຖາມລູກໆຂອງທ່ານວ່າ ພວກເຂົາຈະອະທິບາຍໃຫ້ໃຜຄົນໜຶ່ງເຂົ້າໃຈເຖິງວິທີທີ່ພຣະຜູ້ເປັນເຈົ້າກ່າວກັບພວກເຂົາແນວໃດ? ທ່ານສາມາດຊ່ວຍພວກເຂົາຊອກຫາຄຳຕອບໄດ້ໃນ ຄຳສອນ ແລະ ພັນທະສັນຍາ 6:22–23; 8:2–3; 9:7–9.

ຊ່ວຍໃຫ້ລູກໆຮຽນຮູ້ທີ່ຈະຮູ້ຈັກພຣະວິນຍານ. ມັນບໍ່ງ່າຍເລີຍທີ່ຈະແຍກແຍະລະຫວ່າງຄວາມຮູ້ສຶກຂອງເຮົາເອງ ແລະ ພຣະວິນຍານບໍລິສຸດ. ທຸກຄົນດີ້ນລົນກັບເລື່ອງນີ້ເປັນບາງຄັ້ງບາງຄາວ. ໃຫ້ຄວ້າທຸກໆໂອກາດທີ່ທ່ານຄວ້າໄດ້ເພື່ອຊ່ວຍໃຫ້ລູກໆຂອງທ່ານຮູ້ຈັກເວລາພວກເຂົາກຳລັງຮູ້ສຶກເຖິງອິດທິພົນຂອງພຣະວິນຍານ. ຍົກຕົວຢ່າງ, ຂະນະທີ່ທ່ານອ່ານ 1 ຊາມູເອນ 3:1–10 ແລະ ຂໍ້ພຣະຄຳພີທີ່ແນະນຳໃຫ້ໃນຄຳສອນ ແລະ ພັນທະສັນຍາ, ທ່ານສາມາດແບ່ງປັນປະສົບການຊຶ່ງພຣະຜູ້ເປັນເຈົ້າໄດ້ສິດສອນທ່ານໃນຈິດໃຈ ແລະ ໃນຫົວໃຈຂອງທ່ານ.

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ຊາມູເອນກຳລັງຕື່ນນອນຢູ່ຕຽງ — Boy Samuel Called by the Lord [ຊາຍໜຸ່ມຊາມູເອນຖືກເອີ້ນໂດຍພຣະຜູ້ເປັນເຈົ້າ], ໂດຍ ແຮຣີ ແອນເດີສັນ

ໜ້າກິດຈະກຳປະຖົມໄວ: ພຣະບິດາເທິງສະຫວັນໄດ້ຍິນ ແລະ ຕອບຄຳອະທິຖານຂອງເຮົາ — Boy Samuel Called by the Lord [ຊາຍໜຸ່ມຊາມູເອນຖືກເອີ້ນໂດຍພຣະຜູ້ເປັນເຈົ້າ], ໂດຍ ແຮຣີ ແອນເດີສັນ