“ວັນທີ 15–21 ເດືອນມິຖຸນາ. ‘[ພຣະຜູ້ເປັນເຈົ້າ] ເປັນເຈົ້າຂອງສະໜາມຮົບ’: 1 ຊາມູເອນ 17–18; 24–26; 2 ຊາມູເອນ 5–7,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)

“ວັນທີ 15–21 ເດືອນມິຖຸນາ. ‘[ພຣະຜູ້ເປັນເຈົ້າ] ເປັນເຈົ້າຂອງສະໜາມຮົບ,’” ຈົ່ງຕາມເຮົາມາ: ພຣະຄຳພີເດີມ 2026

David and Goliath [ດາວິດ ແລະ ໂກລີອາດ], ໂດຍ ສະຕີບ ແນເຕີຄ໊ອດ

ວັນທີ 15–21 ເດືອນມິຖຸນາ: “[ພຣະຜູ້ເປັນເຈົ້າ] ເປັນເຈົ້າຂອງສະໜາມຮົບ”

1 ຊາມູເອນ 17–18; 24–26; 2 ຊາມູເອນ 5–7

ນັບຕັ້ງແຕ່ເຜົ່າອິດສະຣາເອນໄດ້ໄປຕັ້ງຖິ່ນຖານຢູ່ໃນແຜ່ນດິນແຫ່ງຄຳສັນຍາ, ຊາວຟີລິດສະຕິນກໍໄດ້ທຽວຂູ່ເຂັນຄວາມປອດໄພຂອງພວກເຂົາຢ່າງບໍ່ລົດລະ. ພຣະຜູ້ເປັນເຈົ້າໄດ້ປົດປ່ອຍພວກເຂົາຫລາຍເທື່ອໃນອະດີດ, ແຕ່ບັດນີ້ ພວກຜູ້ປົກຄອງຂອງຊາດອິດສະຣາເອນໄດ້ຮຽກຮ້ອງວ່າ, “ພວກຂ້ານ້ອຍຕ້ອງການກະສັດ … [ເພື່ອ] ນຳໜ້າພວກຂ້ານ້ອຍອອກໄປສູ່ສະໜາມຮົບ” (1 ຊາມູເອນ 8:19–20). ສະນັ້ນໂຊນຈຶ່ງໄດ້ຖືກເຈີມໃຫ້ເປັນກະສັດ. ແຕ່ເມື່ອຍັກໃຫຍ່ໂກລີອາດໄດ້ມາຮ້ອງທ້າກອງທະຫານຊາວອິດສະຣາເອນ, ໂຊນ—ທັງກອງທະຫານຂອງເພິ່ນ—ໄດ້ “ມີຄວາມຢ້ານກົວຫລາຍ” (1 ຊາມູເອນ 17:11). ໃນມື້ນັ້ນ, ບໍ່ແມ່ນກະສັດໂຊນທີ່ໄດ້ຊ່ວຍເຫລືອຊາວອິດສະຣາເອນ ແຕ່ແມ່ນທ້າວນ້ອຍຄົນລ້ຽງແກະຊື່ ດາວິດ, ຜູ້ບໍ່ໄດ້ສວມເຄື່ອງປ້ອງກັນຕົວ ແຕ່ໄດ້ນຸ່ງຫົ່ມດ້ວຍສັດທາໃນພຣະຜູ້ເປັນເຈົ້າ. ການຕໍ່ສູ້ເທື່ອນີ້ພິສູດໃຫ້ຊາວອິດສະຣາເອນ, ແລະ ທຸກຄົນທີ່ຕໍ່ສູ້ທາງວິນຍານ, ເຫັນວ່າ “ພຣະຜູ້ເປັນເຈົ້າບໍ່ຈຳເປັນໃຊ້ດາບ ແລະ ຫອກ” ແລະ ວ່າ “ພຣະຜູ້ເປັນເຈົ້າເປັນເຈົ້າຂອງສະໜາມຮົບ” (1 ຊາມູເອນ 17:47).

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

1 ຊາມູເອນ 17

ດ້ວຍຄວາມຊ່ວຍເຫລືອຈາກພຣະຜູ້ເປັນເຈົ້າ, ເຮົາສາມາດເອົາຊະນະຄວາມທ້າທາຍທຸກຢ່າງ.

ເລື່ອງລາວຂອງດາວິດ ແລະ ໂກລີອາດເປັນເລື່ອງລາວທີ່ຮູ້ຈັກກັນດີທີ່ສຸດໃນພຣະຄຳພີ. ແນ່ນອນ, ຕາມປົກກະຕິແລ້ວເຮົາຈະສຸມໃຈໃສ່ດາວິດ. ແຕ່ເທື່ອນີ້, ຂະນະທີ່ທ່ານອ່ານ 1 ຊາມູເອນ 17, ໃຫ້ໄຕ່ຕອງຖ້ອຍຄຳຂອງຫລາຍຄົນຢູ່ໃນບົດນີ້ (ເບິ່ງ ລາຍຊື່ຢູ່ຂ້າງລຸ່ມ). ທ່ານຮຽນຮູ້ຫຍັງແດ່ກ່ຽວກັບເຂົາເຈົ້າ ແລະ ແຮງຈູງໃຈຂອງເຂົາເຈົ້າ? ທ່ານຮຽນຮູ້ຫຍັງແດ່ກ່ຽວກັບດາວິດ? ເພິ່ນແຕກຕ່າງແນວໃດ?

ໂກລີອາດ: ຂໍ້ທີ 8–10, 43–44
ເອລີອາບ: ຂໍ້ທີ 28
ໂຊນ: ຂໍ້ທີ 33
ດາວິດ: ຂໍ້ທີ 26, 32, 34–37, 39, 45–47

ເລື່ອງລາວຂອງທ່ານ, ເຖິງແມ່ນວ່າບໍ່ເປັນທີ່ຮູ້ຈັກຄືຂອງດາວິດ, ແຕ່ແນ່ໃຈໄດ້ວ່າຈະລວມທັງຄວາມທ້າທາຍໃນລະດັບດຽວກັບໂກລີອາດ ທີ່ຕ້ອງເອົາຊະນະ ແລະ ໂອກາດທີ່ຈະໃຊ້ສັດທາໃນພຣະຜູ້ເປັນເຈົ້າ. ຕົວຢ່າງຂອງດາວິດສິດສອນທ່ານຫຍັງແດ່ກ່ຽວກັບການປະເຊີນໜ້າກັບຄວາມຍາກລຳບາກໃນເລື່ອງລາວຂອງທ່ານ? ທ່ານອາດຈະອ່ານຂ່າວສານຂອງປະທານຄະມຽວ ເອັນ ຈອນສັນ ນຳອີກ “Invite Christ to Author Your Story” (Liahona, Nov. 2021, 80–82) ໂດຍມີຄວາມທ້າທາຍຂອງທ່ານຢ່າງໜຶ່ງຢູ່ໃນໃຈ. ຊອກຫາຄຳຕອບສຳລັບຄຳຖາມເຊັ່ນນີ້: ພຣະຜູ້ເປັນເຈົ້າຕ້ອງການໃຫ້ເຮົາເບິ່ງຄວາມທ້າທາຍຂອງເຮົາແນວໃດ? ພຣະອົງໄດ້ຊ່ວຍເຮົາໃນອະດີດແນວໃດ? ເຮົາຈະສາມາດສະແດງໃຫ້ເຫັນວ່າເຮົາໄວ້ວາງໃຈພຣະອົງ ເພື່ອຂຽນເລື່ອງລາວຂອງເຮົາໄດ້ແນວໃດ?

ທ່ານອາດຈະຮູ້ແລ້ວວ່າ ມີບົດທີ່ໜ້າເສົ້າຢູ່ຫລາຍບົດ ໃນຊ່ວງຫລັງຂອງເລື່ອງລາວຂອງດາວິດ (ເບິ່ງ, ຍົກຕົວຢ່າງ, 2 ຊາມູເອນ 11). ຖ້າຫາກທ່ານມີໂອກາດໃຫ້ຄຳແນະນຳດາວິດຫລັງຈາກການຕໍ່ສູ້ກັບໂກລີອາດ, ທ່ານຈະວ່າແນວໃດ? ຄຳແນະນຳນີ້ອາດໃຊ້ໄດ້ກັບຊີວິດຂອງທ່ານແນວໃດ?

ເບິ່ງ “The Lord Will Deliver Me” (ວິດີໂອ), ຫ້ອງສະໝຸດພຣະກິດຕິຄຸນ.

1 ຊາມູເອນ 17:26–50

ບຸກຄົນໜຶ່ງທີ່ມີສັດທາໃນພຣະຄຣິດສາມາດສ້າງຄວາມແຕກຕ່າງໄດ້.

ນອກຈາກຄວາມທ້າທາຍສ່ວນຕົວແລ້ວ, ເຮົາຍັງປະເຊີນກັບບັນຫາໃຫຍ່ ແລະ ຊັບຊ້ອນ ທີ່ມີຜົນກະທົບຕໍ່ໂລກທັງໂລກນຳອີກ. ເມື່ອພະລັງຂອງຄວາມຊົ່ວຮ້າຍ “ທ້ອນໂຮມກຳລັງ … ເຂົ້າສູ່ເສິກ” ຕ້ານກັບພະລັງຂອງຄວາມດີ (1 ຊາມູເອນ 17:1), ເຮົາອາດສົງໄສວ່າ ຄວາມພະຍາຍາມຂອງແຕ່ລະຄົນຈະສ້າງຄວາມແຕກຕ່າງໄດ້ແນວໃດ. ທ່ານພົບເຫັນຫຍັງແດ່ໃນເລື່ອງລາວຂອງດາວິດ ທີ່ໃຫ້ຄວາມຫວັງແກ່ທ່ານ?

ເບິ່ງ “Let Us All Press On,” Hymns, no. 243 ນຳອີກ.

ໂຢນາທານ ແລະ ດາວິດ — True Friendship and Self-Respect [ມິດຕະພາບທີ່ແທ້ຈິງ ແລະ ການນັບຖືຕົນເອງ], ໂດຍ ວິວສັນ ອອງ (ລາຍລະອຽດ)

1 ຊາມູເອນ 18

“ໂຢນາທານຮັກ [ດາວິດ] ຫລາຍເທົ່າກັບຮັກຕົນເອງ.”

ຂະນະທີ່ທ່ານອ່ານ 1 ຊາມູເອນ 18, ໃຫ້ພິຈາລະນາການປຽບທຽບໂຊນ ແລະ ໂຢນາທານ ລູກຊາຍຂອງເພິ່ນ (ຜູ້ທີ່, ຖ້າບໍ່ແມ່ນເປັນເພາະດາວິດ, ຄົງຈະຄິດວ່າຕົນຈະກາຍເປັນກະສັດອົງຕໍ່ໄປ). ໂຊນ ແລະ ໂຢນາທານມີທ່າທີແນວໃດຕໍ່ຄວາມສຳເລັດຂອງດາວິດ? ທ່ານສາມາດຮຽນຮູ້ຫຍັງແດ່ຈາກປະສົບການນີ້?

ທ່ານພົບຫຍັງໃນທັດສະນະຄະຕິຂອງໂຢນາທານ ແລະ ການປະພຶດທີ່ເຕືອນໃຈທ່ານເຖິງພຣະເຢຊູຄຣິດ?

“ປຽບທຽບພຣະຄຳພີ” (1 ນີໄຟ 19:23). ພຣະຄຳພີໃຫ້ໂອກາດທີ່ດີໃນການຮຽນຮູ້ຈາກແຮງຈູງໃຈ ແລະ ການກະທຳຂອງຜູ້ຄົນຢ່າງດາວິດ, ໂຢນາທານ, ແລະ ໂຊນ. ທ່ານຈະພົບວ່າບໍ່ມີໃຜໃນພຣະຄຳພີທີ່ໄຮ້ຂໍ້ບົກພ່ອງ. ສະນັ້ນ ຂະນະທີ່ທ່ານອ່ານ, ຍົກຕົວຢ່າງ, ກ່ຽວກັບການເລືອກທີ່ຊື່ສັດຂອງດາວິດ, ຈົ່ງເປີດໃຈຮຽນຮູ້ຄວາມຜິດພາດຂອງເພິ່ນນຳອີກ. ການເຮັດເຊັ່ນນັ້ນຊ່ວຍໃຫ້ເຮົາລະບຸຄວາມອ່ອນແອທີ່ຈະເກີດຂຶ້ນໃນຕົວເຮົາເອງ ແລະ “ຮຽນຮູ້ໃຫ້ຮອບຄອບດີກວ່າທີ່ [ຄົນອື່ນ] ເປັນມາ” (ມໍມອນ 9:31).

1 ຊາມູເອນ 24–26

ການໃຫ້ອະໄພເປັນເສັ້ນທາງທີ່ແນ່ນອນສູ່ສັນຕິສຸກ ແລະ ການປິ່ນປົວ.

ໃນ 1 ຊາມູເອນ 24–26, ໃຫ້ຊອກຫາບົດຮຽນກ່ຽວກັບຄວາມທະນົງຕົວ, ການໃຫ້ອະໄພ, ແລະ ການຄວບຄຸມຕົນເອງ. ທ່ານອາດພິຈາລະນາທີ່ຈະອ່ານຂ່າວສານຂອງແອວເດີ ມາກ ເອ ບະແຣກ “Christlike Poise” ເປັນສ່ວນໜຶ່ງຂອງການສຶກສາຂອງທ່ານ (Liahona, May 2023, 60–63) ນຳອີກ. ດາວິດ, ອາບີກາຍ, ແລະ ຄົນອື່ນໆສະແດງທ່າທີ—ຫລື ບໍ່ໄດ້ສະແດງທ່າທີ—ເໝືອນພຣະຄຣິດໃນບົດເຫລົ່ານີ້ແນວໃດ? ໂອກາດໃດແດ່ທີ່ທ່ານມີ ເພື່ອສະແດງທ່າທີເໝືອນພຣະຄຣິດ?

ຂ່າວສານຂອງຊິດສະເຕີ ຄຣິດສະຕິນ ຢີ “Beauty for Ashes: The Healing Path of Forgiveness” (Liahona, Nov. 2022, 36–39) ສາມາດຊ່ວຍທ່ານສຶກສາ 1 ຊາມູເອນ 25. ອາບີກາຍເປັນເໝືອນພຣະເຢຊູຄຣິດແນວໃດ?

2 ຊາມູເອນ 5:17–25

ພຣະຜູ້ເປັນເຈົ້າສາມາດຊີ້ນຳເຮົາ.

ເຖິງແມ່ນຫລັງຈາກດາວິດໄດ້ເອົາຊະນະໂກລີອາດ, ແຕ່ບັນຫາຂອງເພິ່ນກັບຊາວຟີລິດສະຕິນຍັງບໍ່ໝົດໄປ. ຂະນະທີ່ທ່ານອ່ານ 2 ຊາມູເອນ 5:17–25, ໃຫ້ພິຈາລະນາວິທີທີ່ຕົວຢ່າງຂອງດາວິດສາມາດຊ່ວຍທ່ານໃນຄວາມທ້າທາຍທີ່ທ່ານປະເຊີນແນວໃດ (ເບິ່ງ 1 ຊາມູເອນ 23:2, 10–11; 30:8; 2 ຊາມູເອນ 2:1 ນຳອີກ). ທ່ານໄດ້ຮັບພອນໂດຍການເຮັດຕາມການເປີດເຜີຍທີ່ທ່ານໄດ້ຮັບແນວໃດ?

2 ຊາມູເອນ 7

ຄຳວ່າ “ເຮືອນ” ຂອງພຣະຜູ້ເປັນເຈົ້າ ທີ່ສັນຍາກັບດາວິດ ໝາຍເຖິງສິ່ງໃດ?

ເມື່ອດາວິດໄດ້ສະເໜີສ້າງເຮືອນ, ໝາຍເຖິງພຣະວິຫານ, ໃຫ້ແກ່ພຣະຜູ້ເປັນເຈົ້າ (ເບິ່ງ 2 ຊາມູເອນ 7:1–3), ພຣະຜູ້ເປັນເຈົ້າໄດ້ຕອບວ່າ ລູກຊາຍ ຂອງດາວິດຈະເປັນຄົນສ້າງພຣະວິຫານໃຫ້ພຣະອົງ (ເບິ່ງ ຂໍ້ທີ 12–15; ເບິ່ງ 1 ຂ່າວຄາວ 17:1–15 ນຳອີກ). ແລ້ວພຣະຜູ້ເປັນເຈົ້າໄດ້ກ່າວອີກວ່າ ພຣະອົງຈະສ້າງ “ເຮືອນ,” ໃຫ້ດາວິດ ໝາຍເຖິງເຊື້ອສາຍ, ແລະ ບັນລັງຂອງເພິ່ນຈະຄົງຢູ່ຕະຫລອດໄປ (ເບິ່ງ 2 ຊາມູເອນ 7:11, 16, 25–29; ເພງສັນລະເສີນ 89:3–4, 35–37). ຄຳສັນຍານີ້ໄດ້ສຳເລັດຜົນໃນພຣະເຢຊູຄຣິດ, ກະສັດນິລັນດອນຂອງເຮົາ, ຜູ້ເປັນເຊື້ອສາຍຂອງດາວິດ (ເບິ່ງ ມັດທາຍ 1:1; ລູກາ 1:32–33; ໂຢຮັນ 18:33–37).

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

1 ຊາມູເອນ 17:20–54

ສັດທາໃນພຣະເຢຊູຄຣິດສາມາດຊ່ວຍໃຫ້ເຮົາມີຄວາມກ້າຫານ.

ທ່ານອາດຈະຕ້ອງການໃຊ້ “ດາວິດ ແລະ ໂກລີອາດ” ໃນ ເລື່ອງພຣະຄຳພີເດີມ, 112–16, ເພື່ອຊ່ວຍລູກໆຂອງທ່ານໃຫ້ຄຸ້ນເຄີຍກັບສິ່ງທີ່ໄດ້ເກີດຂຶ້ນໃນ 1 ຊາມູເອນ 17:20–54. ແລ້ວທ່ານສາມາດໃຫ້ພວກເຂົາເລົ່າເລື່ອງ ໂດຍການໃຊ້ຮູບພາບ ຫລື ແຕ້ມເສັ້ນໃນໂຄງຮ່າງນີ້. ຖາມພວກເຂົາວ່າ ພຣະຜູ້ເປັນເຈົ້າປະສົງໃຫ້ພວກເຂົາຮຽນຮູ້ຫຍັງຈາກເລື່ອງລາວນີ້.

2:36
David and Goliath
ທ່ານ ແລະ ລູກໆຂອງທ່ານສາມາດເຮັດລາຍການກ່ຽວກັບຄວາມທ້າທາຍທີ່ຫຍຸ້ງຍາກທີ່ພວກເຂົາອາດປະເຊີນໃນຊີວິດຂອງພວກເຂົາ. ແລ້ວຊ່ວຍພວກເຂົາຊອກຫາສິ່ງທີ່ດາວິດໄດ້ກ່າວ ທີ່ສາມາດຊ່ວຍໃນຄວາມທ້າທາຍເຫລົ່ານີ້ (ເບິ່ງ 1 ຊາມູເອນ 17:26, 32, 34–37, 45–47). ແບ່ງປັນວິທີທີ່ພຣະເຢຊູຄຣິດໄດ້ຊ່ວຍທ່ານລະຫວ່າງທີ່ມີຄວາມທ້າທາຍ.
ລູກໆຂອງທ່ານສາມາດເດີນຂະບວນຄືກັບວ່າພວກເຂົາເປັນດາວິດ ກຳລັງຈະໄປຕໍ່ສູ້ກັບໂກລີອາດ ຂະນະທີ່ຮ້ອງເພງກ່ຽວກັບຄວາມກ້າຫານ, ເຊັ່ນ “ຂໍໃຫ້ເຮົາເດີນໄປ” (ເພງສວດ ແລະ ເພງຂອງເດັກນ້ອຍ, 10).

1 ຊາມູເອນ 18:1–4

ໝູ່ເພື່ອນທີ່ດີສາມາດເປັນພອນຈາກພຣະເຈົ້າໄດ້.

ທ່ານຈະສາມາດຊ່ວຍລູກໆຂອງທ່ານຮຽນຮູ້ຈາກມິດຕະພາບຂອງໂຢນາທານ ແລະ ດາວິດໄດ້ແນວໃດ? ວິທີໜຶ່ງຄືເອົາເຈ້ຍຫົວໃຈສອງໃບໃຫ້ລູກແຕ່ລະຄົນ, ໃບໜຶ່ງເປັນຕົວແທນໃຫ້ດາວິດ ແລະ ອີກໃບໜຶ່ງເປັນຕົວແທນໃຫ້ໂຢນາທານ. ແລ້ວອ່ານວະລີສອງສາມອັນນຳກັນ ຈາກ 1 ຊາມູເອນ 18:1–4 ທີ່ເນັ້ນເຖິງຄວາມຮັກຂອງໝູ່ເພື່ອນສອງຄົນທີ່ມີຕໍ່ກັນ. ແລ້ວລູກໆຂອງທ່ານສາມາດຂຽນ ຫລື ແຕ້ມໃສ່ເຈ້ຍຫົວໃຈວ່າ ພວກເຂົາສາມາດສະແດງຄວາມຮັກຕໍ່ໝູ່ເພື່ອນແນວໃດ.

2 ຊາມູເອນ 5:19, 23

ຖ້າເຮົາຕ້ອງການການຊີ້ນຳ, ເຮົາສາມາດທູນຂໍຈາກພຣະບິດາເທິງສະຫວັນ.

ໃນບົດເຫລົ່ານີ້, ດາວິດໄດ້ກາຍເປັນກະສັດຂອງອິດສະຣາເອນ. ມັນອາດເປັນສິ່ງມ່ວນຊື່ນສຳລັບລູກໆຂອງທ່ານ ທີ່ຈະທຳທ່າເປັນກະສັດ ຫລື ລາຊີນີ. ພວກເຂົາຈະຕັ້ງກົດໝາຍຢ່າງໃດແດ່? ພວກເຂົາຈະເພິ່ງໃຜເພື່ອຄວາມຊ່ວຍເຫລືອ? ຊ່ວຍລູກໆຂອງທ່ານຄົ້ນພົບວ່າ ເມື່ອດາວິດຕ້ອງການຄວາມຊ່ວຍເຫລືອ, ເພິ່ນ “ຖາມ,” ຫລື ອະທິຖານ, ສຳລັບຄຳຕອບ. ຍົກຕົວຢ່າງ, ຂະນະທີ່ທ່ານອ່ານ 2 ຊາມູເອນ 5:19, 23, ໃຫ້ເຊື້ອເຊີນລູກໆໃຫ້ຟັງເບິ່ງຄຳວ່າ “ຖາມ” ແລະ ໃຫ້ກອດແຂນເມື່ອພວກເຂົາໄດ້ຍິນຄຳນັ້ນ. ເປັນຫຍັງດາວິດຈຶ່ງຕ້ອງຂໍຄວາມຊ່ວຍເຫລືອຈາກພຣະຜູ້ເປັນເຈົ້າ ໃນບົດບາດໃໝ່ຂອງເພິ່ນ?
ເລົ່າໃຫ້ກັນຟັງກ່ຽວກັບເວລາທີ່ພວກທ່ານອະທິຖານຂໍຄວາມຊ່ວຍເຫລືອຈາກພຣະບິດາເທິງສະຫວັນ. ການໃຫ້ພຣະອົງຊ່ວຍເຫລືອພວກທ່ານສ້າງຄວາມແຕກຕ່າງແນວໃດ?

2 ຊາມູເອນ 7:16–17

ພຣະເຢຊູຄຣິດເປັນກະສັດນິລັນດອນຂອງເຮົາ.

ກະສັດທີ່ເຮົາອ່ານໃນພຣະຄຳພີເດີມລ້ວນແຕ່ມີຂໍ້ບົກພ່ອງ, ແລະ ອານາຈັກຂອງພວກເພິ່ນທັງໝົດກໍໄດ້ສິ້ນສຸດລົງ. ແຕ່ພຣະເຢຊູຄຣິດເປັນກະສັດທີ່ສົມບູນແບບ ແລະ ຈະປົກຄອງຕະຫລອດໄປ. ທ່ານສາມາດຊ່ວຍລູກໆຂອງທ່ານໃຫ້ຄົ້ນພົບສິ່ງນີ້ ໂດຍການອ່ານນຳກັນກ່ຽວກັບສິ່ງທີ່ສາດສະດານາທານໄດ້ບອກກະສັດດາວິດໃນ 2 ຊາມູເອນ 7:16–17. ອານາຈັກຂອງດາວິດຈະບໍ່ມີວັນສິ້ນສຸດໄດ້ແນວໃດ? ຊ່ວຍລູກໆຂອງທ່ານຊອກຫາ ແລະ ອ່ານຂໍ້ພຣະຄຳພີທີ່ສິດສອນວ່າ ພຣະເຢຊູຄຣິດ, ຊຶ່ງເປັນລູກຫລານຂອງດາວິດ, ເປັນກະສັດຂອງເຮົາແນວໃດ, ເຊັ່ນ ລູກາ 1:32–33; ໂຢຮັນ 18:33–37; ແລະ ພຣະນິມິດ 19:16. ພຣະເຢຊູແຕກຕ່າງຈາກກະສັດຂອງໂລກແນວໃດ? ເຮົາໃຫ້ກຽດພຣະເຢຊູຄຣິດວ່າເປັນກະສັດນິລັນດອນຂອງເຮົາແນວໃດ?

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ດາວິດ ແລະ ໂກລີອາດ — ຮູບພາບດາວິດ, ໂດຍ ດຽວລີນ ມາສ໌

ໜ້າກິດຈະກຳປະຖົມໄວ: ສັດທາໃນພຣະເຢຊູຄຣິດສາມາດຊ່ວຍໃຫ້ເຮົາມີຄວາມກ້າຫານ — ຮູບພາບດາວິດ, ໂດຍ ດຽວລີນ ມາສ໌