“ວັນທີ 8–14 ເດືອນມິຖຸນາ. ‘[ພຣະຜູ້ເປັນເຈົ້າ] ເບິ່ງພາຍໃນຈິດໃຈ’: 1 ຊາມູເອນ 8–10; 13; 15–16,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)
“ວັນທີ 8–14 ເດືອນມິຖຸນາ. ‘[ພຣະຜູ້ເປັນເຈົ້າ] ເບິ່ງພາຍໃນຈິດໃຈ,’” ຈົ່ງຕາມເຮົາມາ: ພຣະຄຳພີເດີມ 2026
Beside Still Waters [ບໍ່ນ້ຳອັນສົດໃສ ແລະ ມິດງຽບ], ໂດຍ ຊາຍມັນ ດູວີ
ວັນທີ 8–14 ເດືອນມິຖຸນາ: “[ພຣະຜູ້ເປັນເຈົ້າ] ເບິ່ງພາຍໃນຈິດໃຈ”
1 ຊາມູເອນ 8–10; 13; 15–16
ໂຊນເປັນຄົນລ້ຽງລໍ. ເຖິງແມ່ນວ່າຈະສູງ ແລະ ສະຫງ່າງາມກໍຕາມ, ເພິ່ນ “ຖື [ຕົນເອງ] ວ່າບໍ່ມີຄວາມສຳຄັນ” ແລະ ລະອາຍໃຈກ່ຽວກັບມໍລະດົກຂອງຄອບຄົວຂອງເພິ່ນ (ເບິ່ງ 1 ຊາມູເອນ 9:2–3, 21; 15:17). ໃນວັນທີ່ເພິ່ນຈະຖືກນຳສະເໜີໃນຖານະກະສັດຕໍ່ອິດສະຣາເອນ ເພິ່ນບໍ່ໄດ້ປະກົດຕົວ; ເພິ່ນຕື່ນເຕັ້ນຫລາຍ ເພິ່ນເລີຍ “ລີ້ຢູ່” (1 ຊາມູເອນ 10:21–22). ເມື່ອຫລຽວເບິ່ງໂຊນ, ທ່ານອາດເດົາບໍ່ອອກວ່າເພິ່ນຈະນຳພາຊາວອິດສະຣາເອນໄປສູ່ໄຊຊະນະສັດຕູຂອງພວກເພິ່ນ—ຫລື ວ່າຕໍ່ມາເພິ່ນຈະກາຍເປັນຄົນທະນົງຕົວ ແລະ ກະບົດຕໍ່ພຣະຜູ້ເປັນເຈົ້າ.
ດາວິດເປັນຄົນລ້ຽງແກະ. ຮູບຮ່າງຂອງເພິ່ນບໍ່ໄດ້ເປັນທີ່ໜ້າປະທັບໃຈດັ່ງອ້າຍເຈັດຄົນຂອງເພິ່ນ. ໃນວັນທີ່ຊາມູເອນໄດ້ມາເລືອກກະສັດອົງໃໝ່ຂອງອິດສະຣາເອນ, ເບິ່ງຄືວ່າຈະບໍ່ກຸ້ມຄ່າທີ່ຈະລວມເອົາດາວິດເຂົ້າຢູ່ໃນບັນດາຜູ້ທີ່ຈະເປັນໄປໄດ້, ສະນັ້ນເພິ່ນຈຶ່ງຖືກປະຢູ່ທີ່ທົ່ງກັບຝູງແກະ. ເມື່ອຫລຽວເບິ່ງດາວິດ, ທ່ານອາດເດົາບໍ່ອອກວ່າເພິ່ນຈະມີສັດທາ ແລະ ຄວາມກ້າຫານທີ່ຈະເອົາຊະນະຍັກ ແລະ ກາຍມາເປັນກະສັດທີ່ໄດ້ຮັບຜົນສຳເລັດຫລາຍທີ່ສຸດຂອງອິດສະຣາເອນ.
ແຕ່ພຣະຜູ້ເປັນເຈົ້າມອງຂ້າມສາຍາຂອງເຮົາ, ຮູບລັກສະນະພາຍນອກຂອງເຮົາ, ຄວາມບໍ່ໝັ້ນໃຈຂອງເຮົາ. ກົງກັນຂ້າມ, ພຣະອົງເບິ່ງ, “ພາຍໃນຈິດໃຈ” (1 ຊາມູເອນ 16:7). ແລະ ແມ່ນແຕ່ເມື່ອຈິດໃຈຂອງເຮົາຂ້ອນຂ້າງບໍ່ແນ່ນອນພໍ, ຖ້າເຮົາເຕັມໃຈ, ພຣະອົງຈະປ່ຽນໃຫ້ເຮົາ “ເປັນຄົນໃໝ່” (1 ຊາມູເອນ 10:9).
ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ
1 ຊາມູເອນ 8
ພຣະເຢຊູຄຣິດເປັນກະສັດຂອງເຮົາ.
1 ຊາມູເອນ 8 ເລົ່າເຖິງເຫດການທີ່ຈະປ່ຽນຊາຕາກຳຂອງຊາວອິດສະຣາເອນຕະຫລອດໄປ. ເພື່ອເປັນການປົກປ້ອງຈາກສັດຕູຂອງເຂົາເຈົ້າ, ຊາວອິດສະຣາເອນຢາກໄດ້ສິ່ງທີ່ເພື່ອນບ້ານເຂົາເຈົ້າມີ—ນັ້ນກໍຄືກະສັດທີ່ຈະປົກຄອງເຂົາເຈົ້າ. ຂະນະທີ່ທ່ານອ່ານກ່ຽວກັບຄຳຂໍຮ້ອງຂອງເຂົາເຈົ້າ ແລະ ການຕອບສະໜອງຂອງພຣະຜູ້ເປັນເຈົ້າ, ໃຫ້ຄິດກ່ຽວກັບວ່າທ່ານມອງໄປຫາຜູ້ໃດສຳລັບຄວາມປອດໄພ ແລະ ການຊີ້ນຳ. ໃຫ້ພິຈາລະນາຄວາມໝາຍທີ່ຈະປ່ອຍໃຫ້ພຣະຜູ້ເປັນເຈົ້າ “ເປັນເຈົ້າຊີວິດຂອງ [ທ່ານ]” (1 ຊາມູເອນ 8:7).
ຕະຫລອດອາທິດທີ່ຈະມາເຖິງ, ທ່ານຈະອ່ານກ່ຽວກັບຈຳນວນກະສັດທີ່ຖືກເອີ້ນໃຫ້ນຳພາອິດສະຣາເອນ. ຂະນະທີ່ທ່ານຮຽນຮູ້ກ່ຽວກັບພວກເພິ່ນ, ໃຫ້ພິຈາລະນາຄຳຖາມດັ່ງຕໍ່ໄປນີ້:
-
ຄຳເຕືອນຂອງພຣະຜູ້ເປັນເຈົ້າໄດ້ເກີດເປັນຈິງແນວໃດໃນ 1 ຊາມູເອນ 8:10–18?
-
ລູກຫລານຂອງອິດສະຣາເອນຖືກກະທົບກະເທືອນໂດຍທາງເລືອກຂອງເຂົາເຈົ້າທີ່ຈະມີກະສັດທາງໂລກແນວໃດ?
-
ພຣະເຢຊູຄຣິດແຕກຕ່າງຈາກບັນດາກະສັດທາງໂລກແນວໃດ? ໃຫ້ພິຈາລະນາວ່າມີອິດທິພົນທາງໂລກໃດແດ່ທີ່ທ່ານຈຳເປັນຕ້ອງກຳຈັດຈາກຊີວິດຂອງທ່ານເພື່ອຈະໃຫ້ພຣະຄຣິດເປັນກະສັດຂອງທ່ານ?
ເບິ່ງ “ພຣະຜູ້ໄຖ່ແຫ່ງອິດສະຣາເອນ,” ເພງສວດ ແລະ ເພງຂອງເດັກນ້ອຍ, 5 ນຳອີກ.
1 ຊາມູເອນ 9–10; 16:1–13
ພຣະເຈົ້າເອີ້ນຜູ້ຄົນໂດຍການພະຍາກອນ ເພື່ອໃຫ້ຮັບໃຊ້ໃນອານາຈັກຂອງພຣະອົງ.
ອ່ານກ່ຽວກັບວິທີທີ່ພຣະເຈົ້າໄດ້ເລືອກກະສັດຂອງອິດສະຣາເອນ ຢູ່ໃນ 1 ຊາມູເອນ 9–10 ແລະ 16 (ເບິ່ງ ໂດຍສະເພາະ 9:15–17; 10:1–12; 16:1–13). ໃຫ້ຊອກຫາຂໍ້ທີ່ຊ່ວຍໃຫ້ທ່ານເຂົ້າໃຈຄວາມໝາຍຂອງ “ການເອີ້ນຈາກພຣະເຈົ້າໂດຍການພະຍາກອນ” ໃນສາດສະໜາຈັກຂອງພຣະຜູ້ເປັນເຈົ້າໃນວັນເວລານີ້ (ຫລັກແຫ່ງຄວາມເຊື່ອ 1:5). ທ່ານອາດພິຈາລະນາທີ່ຈະວາງຕົວທ່ານເອງຢູ່ໃນພື້ນທີ່ຂອງຜູ້ນຳທີ່ສະເໜີການເອີ້ນ (ຊາມູເອນ), ຄົນທີ່ຖືກເອີ້ນ (ໂຊນ ແລະ ດາວິດ), ແລະ ຜູ້ຄົນທີ່ພວກເພິ່ນຖືກເອີ້ນໃຫ້ຮັບໃຊ້ (ຊາວອິດສະຣາເອນ). ທ່ານຮຽນຮູ້ຫຍັງແດ່ຈາກຖ້ອຍຄຳ ແລະ ການກະທຳຢູ່ໃນບົດເຫລົ່ານີ້?
ຮູບພາບຂອງຊາມູເອນກຳລັງຫົດສົງໂຊນ, ໂດຍ ພີ ແມນ, © Lifeway Collection/ໄດ້ຮັບອະນຸຍາດຈາກ goodsalt.com
1 ຊາມູເອນ 13:5–14; 15
“ການເຊື່ອຟັງກໍດີກວ່າການຖວາຍ.”
ເມື່ອພິຈາລະນາເຫັນໂຊນເບິ່ງຄືວ່າຂີ້ອາຍຢູ່ໃນ 1 ຊາມູເອນ 10, ມັນເປັນເລື່ອງແປກທີ່ຈະອ່ານກ່ຽວກັບການ “ກະບົດຕໍ່ສູ້” ແລະ “ຄວາມອວດດີ” ຂອງເພິ່ນ ຫລັງຈາກເພິ່ນໄດ້ກາຍເປັນກະສັດແລ້ວ (1 ຊາມູເອນ 15:23). ທ່ານຄິດວ່າເປັນຫຍັງສິ່ງນີ້ຈຶ່ງໄດ້ເກີດຂຶ້ນ? ໃນ 1 ຊາມູເອນ 13:5–14, ມີທັດສະນະຄະຕິ ແລະ ພຶດຕິກຳໃດແດ່ທີ່ທ່ານເຫັນວ່າໄດ້ນຳມາສູ່ການຕົກຕ່ຳຂອງເພິ່ນ?
ໃນ 1 ຊາມູເອນ 15, ທ່ານຈະໄດ້ອ່ານກ່ຽວກັບພຣະບັນຍັດຂໍ້ໜຶ່ງຈາກພຣະຜູ້ເປັນເຈົ້າວ່າ ໂຊນບໍ່ໄດ້ເຊື່ອຟັງເພາະເພິ່ນໄດ້ຄິດວ່າເພິ່ນມີເຫດຜົນທີ່ດີ. ເພື່ອຈະຮຽນຮູ້ຈາກທາງເລືອກທີ່ບໍ່ດີຂອງໂຊນ, ໃຫ້ເບິ່ງ ຂໍ້ທີ 22 ແລະ ເອົາຄຳທີ່ວ່າ “ເສຍສະລະ” ແລະ “ແກະໂຕດີທີ່ສຸດ” ເຂົ້າມາແທນສິ່ງທີ່ເບິ່ງຄືວ່າດີ ແຕ່ບໍ່ສຳຄັນເທົ່າກັບການໄດ້ຍິນ ແລະ ການເຊື່ອຟັງພຣະຜູ້ເປັນເຈົ້າ. ທ່ານໄດ້ຮັບພອນບໍ ເມື່ອທ່ານໄດ້ໃຫ້ພຣະປະສົງຂອງພຣະຜູ້ເປັນເຈົ້າມາກ່ອນໃນຊີວິດຂອງທ່ານ?
1 ຊາມູເອນ 16:6–12
“[ພຣະຜູ້ເປັນເຈົ້າ] ເບິ່ງພາຍໃນຈິດໃຈ.”
ທ່ານເຄີຍຕັດສິນບາງສິ່ງ ຫລື ບາງຄົນອີງຕາມຮູບລັກສະນະ “ພາຍນອກ,” ແລ້ວພົບເຫັນວ່າທ່ານຕັດສິນຜິດບໍ? ບາງທີທ່ານໄດ້ກິນບາງສິ່ງທີ່ບໍ່ແຊບເທົ່າຮູບລັກສະນະພາຍນອກຂອງມັນ. ຫລື ບາງທີທ່ານໄດ້ຕັດສິນບາງຄົນຢ່າງບໍ່ເປັນທຳ.
ເມື່ອຊາມູເອນຊອກຫາກະສັດອົງໃໝ່ຂອງອິດສະຣາເອນ, ພຣະຜູ້ເປັນເຈົ້າໄດ້ສິດສອນວິທີທາງທີ່ດີກວ່າໃຫ້ເພິ່ນ. ອ່ານກ່ຽວກັບເລື່ອງນີ້ຢູ່ໃນ 1 ຊາມູເອນ 16:6–7, ແລະ ພິຈາລະນາທີ່ຈະຂຽນວິທີທີ່ຜູ້ຄົນຕັດສິນຄົນອື່ນຕາມຮູບລັກສະນະ “ພາຍນອກ.” ທ່ານສາມາດພົບເຫັນບາງຕົວຢ່າງຢູ່ໃນຂ່າວສານຂອງແອວເດີ ຄຣິສຕອບ ຈີ ຈິໂຣ-ຄາຣິເອ “We Are His Children” (Liahona, Nov. 2023, 114–16). ຄຳວ່າ “ເບິ່ງພາຍໃນຈິດໃຈ,” ດັ່ງທີ່ພຣະຜູ້ເປັນເຈົ້າເບິ່ງ ໝາຍຄວາມວ່າແນວໃດ? (1 ຊາມູເອນ 16:7). ທ່ານສາມາດພົບເຫັນຕົວຢ່າງຂອງເລື່ອງນີ້ນຳອີກ, ຢູ່ໃນຂ່າວສານຂອງແອວເດີ ຄຣິສຕອບ ຈີ ຈິໂຣ-ຄາຣິເອ. ບາງທີທ່ານສາມາດຄິດເຖິງເວລາອື່ນຕອນທີ່ພຣະຜູ້ຊ່ວຍໃຫ້ລອດໄດ້ມອງຂ້າມຮູບລັກສະນະພາຍນອກຂອງບຸກຄົນ. (ເບິ່ງ, ຍົກຕົວຢ່າງ, ມາຣະໂກ 12:41–44; ລູກາ 5:1–11; 19:1–9; ໂຢຮັນ 4:5–30; ໂມເຊ 6:31–36.) ທ່ານຮຽນຮູ້ຫຍັງແດ່ຈາກຕົວຢ່າງເຫລົ່ານີ້?
ທ່ານສາມາດຕິດຕາມຕົວຢ່າງຂອງພຣະຜູ້ຊ່ວຍໃຫ້ລອດໃນທາງທີ່ທ່ານເບິ່ງຄົນອື່ນ—ແລະ ເບິ່ງຕົວທ່ານເອງແນວໃດ? ການເຮັດແນວນີ້ອາດມີຜົນກະທົບຕໍ່ການປະຕິສຳພັນຂອງທ່ານກັບຄົນອື່ນແນວໃດ? ໃຫ້ພິຈາລະນາທີ່ຈະບອກຄົນໃດຄົນໜຶ່ງກ່ຽວກັບຄວາມດີງາມທີ່ທ່ານເຫັນໃນຈິດໃຈຂອງເຂົາ.
ເບິ່ງ Ulisses Soares, “Brothers and Sisters in Christ,” Liahona, Nov. 2023, 70–73 ນຳອີກ.
ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.
ແນວຄິດສຳລັບການສິດສອນເດັກນ້ອຍ
1 ຊາມູເອນ 8
ພຣະເຢຊູຄຣິດເປັນກະສັດຂອງເຮົາ.
-
ຂະນະທີ່ທ່ານອ່ານ 1 ຊາມູເອນ 8 ກັບລູກໆຂອງທ່ານ, ໃຫ້ຊ່ວຍພວກເຂົາຊອກຫາເຫດຜົນທີ່ຊາມູເອນໄດ້ບອກຊາວອິດສະຣາເອນວ່າ ການມີກະສັດເປັນຄວາມຄິດທີ່ບໍ່ດີ. ເປັນຫຍັງມັນຈຶ່ງເປັນເລື່ອງທີ່ດີກວ່າທີ່ຈະມີພຣະເຢຊູຄຣິດເປັນກະສັດຂອງເຮົາ? ບາງທີພວກທ່ານສາມາດເຮັດມົງກຸດດ້ວຍເຈ້ຍນຳກັນ ແລະ ປ່ຽນຜຽນກັນສວມໃສ່ມັນ ແລະ ແບ່ງປັນບາງສິ່ງທີ່ພວກທ່ານສາມາດເຮັດເພື່ອສະແດງໃຫ້ເຫັນວ່າເຮົາຢາກໃຫ້ພຣະເຢຊູເປັນກະສັດຂອງເຮົາ. (ເບິ່ງ ເຢເຣມີຢາ 23:5; ຄຳສອນ ແລະ ພັນທະສັນຍາ 45:59 ນຳອີກ.)
1 ຊາມູເອນ 8:6; 9:15–17; 10:1–24; 16:1–13
ຜູ້ຄົນທີ່ຮັບໃຊ້ໃນສາດສະໜາຈັກໄດ້ຖືກເອີ້ນຈາກພຣະເຈົ້າ.
-
ເລື່ອງລາວທີ່ພຣະເຈົ້າເລືອກໂຊນ ແລະ ດາວິດໃຫ້ເປັນກະສັດ ສາມາດຊ່ວຍລູກໆຂອງທ່ານໃຫ້ເຂົ້າໃຈວິທີທີ່ຜູ້ຄົນຖືກເອີ້ນໃຫ້ຮັບໃຊ້ໃນສາດສະໜາຈັກໃນທຸກວັນນີ້ໂດຍການເປີດເຜີຍ. ເພື່ອສິດສອນພວກເຂົາເລື່ອງລາວເຫລົ່ານີ້, ທ່ານສາມາດຂຽນເຫດການຈາກເລື່ອງລາວລົງໄວ້ໃນເຈ້ຍ, ແລະ ລູກໆຂອງທ່ານສາມາດຈັດມັນຕາມລຳດັບໃຫ້ຖືກຕ້ອງ ຂະນະທີ່ພວກທ່ານອ່ານຂໍ້ພຣະຄຳພີນຳກັນ (ເບິ່ງ “ທ້າວນ້ອຍດາວິດ” ໃນ ເລື່ອງພຣະຄຳພີເດີມ, 110–11 ນຳອີກ). ແລ້ວທ່ານສາມາດເວົ້າລົມກ່ຽວກັບເວລາຕອນທີ່ພຣະເຈົ້າໄດ້ອວຍພອນທ່ານດ້ວຍພະລັງທາງວິນຍານ ເພື່ອຈະບັນລຸການມອບໝາຍ ຫລື ການເອີ້ນ (ເບິ່ງ 1 ຊາມູເອນ 10:9–10).
1:16Young David
-
ນີ້ອາດເປັນເວລາທີ່ດີນຳອີກທີ່ຈະສິດສອນລູກໆຂອງທ່ານກ່ຽວກັບ ຫລັກແຫ່ງຄວາມເຊື່ອຂໍ້ທີຫ້າ. ບອກພວກເຂົາວ່າທ່ານໄດ້ຮັບການເອີ້ນຂອງທ່ານໃນສາດສະໜາຈັກແນວໃດ? ທ່ານຮູ້ໄດ້ແນວໃດວ່າ ທ່ານໄດ້ຮັບການເອີ້ນຈາກພຣະເຈົ້າ?
The Prophet Samuel Anoints David to Be King of Israel in Bethlehem [ສາດສະດາຊາມູເອນຫົດສົງດາວິດໃຫ້ເປັນກະສັດຂອງອິດສະຣາເອນໃນເບັດເລເຮັມ], ໂດຍ ບາເລຈ໌ ບາລອກ
1 ຊາມູເອນ 16:1–13
ພຣະຜູ້ເປັນເຈົ້າເບິ່ງພາຍໃນຈິດໃຈ.
-
ບົດຮຽນທີ່ໃຊ້ສິ່ງຂອງສາມາດຊ່ວຍລູກໆຂອງທ່ານໃຫ້ເຂົ້າໃຈຫລັກທຳທີ່ຢູ່ໃນ 1 ຊາມູເອນ 16:7. ຍົກຕົວຢ່າງ, ທ່ານສາມາດສະແດງໃຫ້ພວກເຂົາເຫັນອາຫານບາງຢ່າງ ຫລື ປຶ້ມທີ່ມີເຈ້ຍຫໍ່ ຫລື ຂອງປົກທີ່ບໍ່ເຂົ້າກັບສິ່ງຂອງທີ່ແທ້ຈິງທາງໃນ. 1 ຊາມູເອນ 16:7 ແລະ ບົດຮຽນທີ່ໃຊ້ສິ່ງຂອງນີ້ແນະນຳຫຍັງແດ່ກ່ຽວກັບວິທີທີ່ເຮົາຄວນເບິ່ງຕົວເຮົາເອງ ແລະ ຄົນອື່ນ? ຮ້ອງເພງທີ່ເນັ້ນຫລັກທຳນີ້, ເຊັ່ນ “ຄວາມເມດຕາເລີ່ມຈາກເຮົາ” (ເພງສວດ ແລະ ເພງຂອງເດັກນ້ອຍ, 69).
ໃຊ້ບົດຮຽນທີ່ໃຊ້ສິ່ງຂອງ. ເມື່ອລູກໆຂອງທ່ານມີບາງສິ່ງທີ່ເຫັນ ແລະ ສຳຜັດໄດ້ທີ່ກ່ຽວຂ້ອງກັບຫລັກທຳພຣະກິດຕິຄຸນ, ພວກເຂົາມັກຈະຈົດຈຳສິ່ງນັ້ນໄດ້ດີກວ່າ. ຍົກຕົວຢ່າງ, ຂະນະທີ່ທ່ານອ່ານ 1 ຊາມູເອນ 16:7 ກັບພວກເຂົາ, ທ່ານສາມາດປ່ອຍໃຫ້ພວກເຂົາຊ່ວຍທ່ານຊອກຫາຕົວຢ່າງພາບລວງຕາເພື່ອສະແດງໃຫ້ເຫັນຈຸດທີ່ເຮົາຄວນພະຍາຍາມເບິ່ງດັ່ງທີ່ພຣະຜູ້ເປັນເຈົ້າເບິ່ງ—ໂດຍການເບິ່ງ “ພາຍໃນຈິດໃຈ”—ແທນທີ່ຈະຕັດສິນອີງຕາມຮູບລັກສະນະ “ພາຍນອກ.”
-
ທ່ານ ແລະ ລູກໆຂອງທ່ານສາມາດແບ່ງປັນປະສົບການ ຊຶ່ງໃນນັ້ນທ່ານໄດ້ຮຽນຮູ້ວ່າເປັນຫຍັງທ່ານຄວນ “ເບິ່ງພາຍໃນຈິດໃຈ” ບໍ່ພຽງແຕ່ຮູບລັກສະນະ “ພາຍນອກ” (ຂໍ້ທີ 7). ພວກທ່ານອາດປ່ຽນຜຽນກັນບອກກັນແລະກັນກ່ຽວກັບຄຸນສົມບັດທີ່ດີງາມ ທີ່ພວກທ່ານເຫັນໃນຈິດໃຈຂອງກັນແລະກັນ.
ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.