“ວັນທີ 22–28 ເດືອນມິຖຸນາ. ‘ຂໍໂຜດຟັງຄຳອະທິຖານຂອງພວກເຂົາດ້ວຍ’: 2 ຊາມູເອນ 11–12; 1 ກະສັດ 3; 6–9; 11,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)

“ວັນທີ 22–28 ເດືອນມິຖຸນາ. ‘ຂໍໂຜດຟັງຄຳອະທິຖານຂອງພວກເຂົາດ້ວຍ,’” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026

Solomon Dedicates the Temple at Jerusalem [ໂຊໂລໂມນອຸທິດພຣະວິຫານທີ່ນະຄອນເຢຣູຊາເລັມ], ໂດຍ ເຈມສ໌ ທີໂຊ ແລະ ຄົນອື່ນໆ

ວັນທີ 22–28 ເດືອນມິຖຸນາ: “ຂໍໂຜດຟັງຄຳອະທິຖານຂອງພວກເຂົາດ້ວຍ”

2 ຊາມູເອນ 11–12; 1 ກະສັດ 3; 6–9; 11

ໂຊນ, ດາວິດ, ແລະ ໂຊໂລໂມນ, ກະສັດສາມຄົນທຳອິດຂອງອິດສະຣາເອນ, ລ້ວນເລີ່ມຕົ້ນດ້ວຍຄຳສັນຍາອັນຫລວງຫລາຍ. ຖ່ອມຕົວ, ກ້າຫານ, ແລະ ມີສະຕິປັນຍາ, ພວກເພິ່ນແຕ່ລະຄົນເປັນທີ່ພໍໃຈຕໍ່ພຣະຜູ້ເປັນເຈົ້າ—ຢ່າງໜ້ອຍກໍໃນຊ່ວງທຳອິດ. ໜ້າເສົ້າໃຈທີ່, ກະສັດແຕ່ລະຄົນກໍໄດ້ຍອມຈຳນົນຕໍ່ຄວາມອ່ອນແອຂອງມະນຸດ ແລະ ການລໍ້ລວງ. ພວກເພິ່ນໄດ້ໃຫ້ຄວາມປາດຖະໜາຂອງຕົນເອງມາກ່ອນຄວາມປາດຖະໜາຂອງພຣະຜູ້ເປັນເຈົ້າ. ແລະ ດັ່ງທີ່ເຮົາໄດ້ເປັນຊໍ້າແລ້ວຊໍ້າອີກໃນພຣະຄຳພີ—ແລະ ໃນຊີວິດຂອງເຮົາເອງ—ມັນໄດ້ນຳໄປສູ່ຄວາມເສົ້າສະຫລົດໃຈ.

ແຕ່ບາງສິ່ງທີ່ສຳຄັນໄດ້ເກີດຂຶ້ນລະຫວ່າງການປົກຄອງຂອງໂຊໂລໂມນ ທີ່ໄດ້ໃຫ້ຄວາມຫວັງບາງຢ່າງສຳລັບຄວາມໝັ້ນຄົງໃນຊີວິດຂອງຜູ້ຄົນແຫ່ງພັນທະສັນຍາ. ໂຊໂລໂມນໄດ້ສ້າງພຣະວິຫານ. ມັນຕັ້ງໃຈທີ່ຈະເປັນບ້ານອັນຖາວອນຂອງພຣະຜູ້ເປັນເຈົ້າ ຫລາຍກວ່າຫໍເຕັນສັກສິດທີ່ເຄີຍເປັນມາ. ແລະ ມັນຈະເປັນຕົວແທນເຖິງທີ່ປະທັບອັນຖາວອນຂອງພຣະຜູ້ເປັນເຈົ້າໃນທ່າມກາງຜູ້ຄົນຂອງພຣະອົົງ. ໂຊໂລໂມນໄດ້ຮູ້ວ່າ ຜູ້ຄົນຈະສືບຕໍ່ປະເຊີນກັບຄວາມອ່ອນແອ ແລະ ການທົດລອງຫລາກຫລາຍປະເພດ. ໃນການອຸທິດບ້ານອັນສັກສິດຫລັງໃໝ່, ໂຊໂລໂມນໄດ້ອ້ອນວອນກັບພຣະຜູ້ເປັນເຈົ້າວ່າ, “ຖ້າພວກເຂົາ … ກັບໃຈໃໝ່ຢ່າງຈິງໃຈແທ້, … ຂໍໂຜດຟັງຄຳອະທິຖານຂອງພວກເຂົາດ້ວຍ” (1 ກະສັດ 8:47–49). ນັ້ນຄືສ່ວນຂອງສິ່ງທີ່ພັນທະສັນຍາພຣະວິຫານເຮັດເພື່ອເຮົາ—ມັນສ້າງການເຊື່ອມຕໍ່ກັບພຣະເຈົ້າ. ມັນຮັກສາຄຳສັນຍາໃຫ້ເຮົາວ່າ ຜ່ານທາງການກັບໃຈຂອງເຮົາ ແລະ ພຣະເມດຕາຂອງພຣະອົງ, ພຣະອົງສາມາດ “ຢູ່ກັບ [ເຮົາ]” ແລະ ບໍ່ມີວັນປະຖິ້ມເຮົາ (1 ກະສັດ 6:13).

ສຳລັບພາບລວມຂອງພຣະທຳ 1 ກະສັດ, ເບິ່ງ “ກະສັດ” ໃນ ຄູ່ມືພຣະຄຳພີ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

2 ຊາມູເອນ 11; 12:1–14

ພຣະຜູ້ເປັນເຈົ້າສາມາດຊ່ວຍໃຫ້ເຮົາເລືອກທາງເລືອກທີ່ດີເມື່ອເຮົາຖືກລໍ້ລວງໃຫ້ເຮັດບາບ.

ບາງເທື່ອເຮົາກໍເບິ່ງຜູ້ຄົນທີ່ເບິ່ງຄືວ່າເຂັ້ມແຂງໃນສັດທາຂອງພວກເຂົາ, ແລະ ເຮົາກໍສັນນິຖານເອົາວ່າ ພວກເຂົາບໍ່ຖືກກະທົບໂດຍການລໍ້ລວງ. ການເລືອກທີ່ໜ້າເສົ້າສະຫລົດໃຈຂອງດາວິດທີ່ຖືກບັນຍາຍຢູ່ໃນ 2 ຊາມູເອນ 11 ສະແດງໃຫ້ເຫັນຢ່າງຊັດເຈນວ່າ ມັນບໍ່ເປັນເຊັ່ນນັ້ນ. ໃຫ້ພິຈາລະນາວ່າ ບົດຮຽນໃດທີ່ທ່ານຮຽນຮູ້ຈາກປະສົບການຂອງເພິ່ນ. ຄຳຖາມດັ່ງຕໍ່ໄປນີ້ອາດຊ່ວຍທ່ານໃນການສຶກສາ 2 ຊາມູເອນ 11–12:

ດາວິດໄດ້ເລືອກເຮັດສິ່ງໃດທີ່ໄດ້ພາເພິ່ນລົງໄປສູ່ເສັ້ນທາງທີ່ບາບຫລາຍຂຶ້ນກວ່າເກົ່າ? ມີທາງເລືອກທີ່ຊອບທຳຢ່າງໃດແດ່ທີ່ເພິ່ນສາມາດເລືອກເຮັດແທນໄດ້? (ເບິ່ງວິດີໂອ “To Look Upon,” ຫ້ອງສະໝຸດພຣະກິດຕິຄຸນ ນຳອີກ.)

4:15
To Look Upon

ການໃຊ້ວິດີໂອ. ວິດີໂອສາມາດຊ່ວຍໃຫ້ທ່ານເຫັນພາບເລື່ອງລາວຈາກພຣະຄຳພີ ແລະ ພິຈາລະນາວິທີທີ່ມັນນຳໃຊ້ກັບທ່ານ. ໃຫ້ຄິດທີ່ຈະໃຊ້ມັນເພື່ອເສີມຂະຫຍາຍການສິດສອນ ແລະ ການຮຽນຮູ້. ຍົກຕົວຢ່າງ, ຂະນະທີ່ເບິ່ງ “To Look Upon” (ຫ້ອງສະໝຸດພຣະກິດຕິຄຸນ), ໃຫ້ຄິດທີ່ຈະຢຸດວິດີໂອຢູ່ຫລາຍໆຈຸດເພື່ອໄຕ່ຕອງ ຫລື ສົນທະນາບາງຄຳຖາມທີ່ມີແນະນຳໃນກິດຈະກຳນີ້.
ຜູ້ປໍລະປັກພະຍາຍາມເຮັດສິ່ງໃດແດ່ ເພື່ອພາທ່ານລົງໄປສູ່ເສັ້ນທາງແຫ່ງຄວາມບາບ? ມີທາງເລືອກໃດແດ່ທີ່ທ່ານສາມາດເຮັດໃນເວລານີ້ ເພື່ອຄົງຢູ່ໃນຄວາມປອດໄພທາງວິນຍານ?
ໃຫ້ສັງເກດປະຕິກິລິຍາຂອງດາວິດຕໍ່ເລື່ອງລາວຂອງນາທານໃນ 2 ຊາມູເອນ 12:1–6. ປະຕິກິລິຍາຂອງເພິ່ນບອກຫຍັງກ່ຽວກັບວິທີທີ່ດາວິດເບິ່ງຕົນເອງ? ພຣະຜູ້ເປັນເຈົ້າໄດ້ກະທຳສິ່ງໃດເພື່ອຊ່ວຍໃຫ້ທ່ານເບິ່ງຕົນເອງຢ່າງແມ້ນຍຳຍິ່ງຂຶ້ນ?
ທ່ານຈະສະຫລຸບເຫດການຕ່າງໆຂອງ 2 ຊາມູເອນ 11–12 ເປັນຄຳເຕືອນປະໂຫຍກດຽວແນວໃດ?

ການອ່ານກ່ຽວກັບການເລືອກທີ່ບໍ່ດີຂອງດາວິດ ສາມາດພາໃຫ້ທ່ານຮຽນຮູ້ກ່ຽວກັບອັນຕະລາຍຂອງຮູບພາບລາມົກ ແລະ ບາບທາງເພດ. ແຫລ່ງຊ່ວຍເຫລືອທີ່ດີສຳລັບສິ່ງນີ້ກໍຄື ສຳລັບຄວາມເຂັ້ມແຂງຂອງຊາວໜຸ່ມ: ຄູ່ມືສຳລັບການເລືອກ, ໂດຍສະເພາະແມ່ນພາກທີ່ມີຫົວຂໍ້ວ່າ “ຈະເຮັດຫຍັງໃນຊ່ວງເວລານີ້” ແລະ “ຮ່າງກາຍຂອງເຈົ້າສັກສິດ” (ໜ້າທີ 21–28). ບາງເທື່ອທ່ານສາມາດເບິ່ງໃນແຫລ່ງຊ່ວຍເຫລືອສຳລັບຄຳແນະນຳທີ່ໜ້າຈະຊ່ວຍດາວິດໃຫ້ເລືອກທາງເລືອກທີ່ດີກວ່ານີ້. ຫລື ທ່ານສາມາດອ່ານ “ພຣະເຢຊູຄຣິດຈະຊ່ວຍເຫລືອເຈົ້າ” (ໜ້າທີ 6–9), ໂດຍຊອກຫາສິ່ງທີ່ໜ້າຈະຊ່ວຍດາວິດກັບຄືນມາຫາພຣະຜູ້ເປັນເຈົ້າ.

ໃຫ້ຄິດທີ່ຈະຮ້ອງເພງສວດເຊັ່ນ “ຂໍເພິ່ງພຣະທຸກຊົ່ວໂມງ” (ເພງສວດ ແລະ ເພງຂອງເດັກນ້ອຍ, 12) ແລະ ໄຕ່ຕອງວິທີທີ່ພຣະຜູ້ຊ່ວຍໃຫ້ລອດໄດ້ເຮັດໃຫ້ທ່ານເຂັ້ມແຂງຂຶ້ນ ເມື່ອທ່ານປະເຊີນກັບການລໍ້ລວງ.

ເບິ່ງ 2 ນີໄຟ 28:20–24; Ulisses Soares, “Seek Christ in Every Thought,” Liahona, Nov. 2020, 82–85; “Taking Charge of Technology,” ຫ້ອງສະໝຸດພຣະກິດຕິຄຸນ; “Watch Your Step” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

1 ກະສັດ 3:1–15

ຂອງປະທານແຫ່ງການແຍກແຍະຄວາມແຕກຕ່າງຊ່ວຍເຮົາໃຫ້ແຍກແຍະໄດ້ວ່າອັນໃດຖືກ ແລະ ອັນໃດຜິດ.

ຖ້າຫາກພຣະຜູ້ເປັນເຈົ້າໄດ້ກ່າວກັບທ່ານວ່າ, “ເຈົ້າຢາກໄດ້ຫຍັງຈາກເຮົາ” (1 ກະສັດ 3:5), ທ່ານຈະທູນຂໍສິ່ງໃດ? ແມ່ນຫຍັງທີ່ປະທັບໃຈທ່ານກ່ຽວກັບຄຳຮ້ອງຂໍຂອງໂຊໂລໂມນ? ໃຫ້ໄຕ່ຕອງວ່າ ເປັນຫຍັງ “ສະຕິປັນຍາ” ທີ່ຈະ “ຮູ້ຈັກຄວາມແຕກຕ່າງລະຫວ່າງຄວາມດີ ແລະ ຄວາມຊົ່ວ” (ຂໍ້ທີ 9) ຈຶ່ງເປັນຂອງປະທານທີ່ມີຄ່າ. ທ່ານສາມາດເຮັດສິ່ງໃດເພື່ອສະແຫວງຫາຂອງປະທານນີ້?

ເບິ່ງ ໂມໂຣໄນ 7:12–19 ນຳອີກ.

1 ກະສັດ 6–8; 9:1–9

ຜ່ານທາງພັນທະສັນຍາທີ່ໄດ້ເຮັດໃນບ້ານຂອງພຣະຜູ້ເປັນເຈົ້າ, ພຣະຜູ້ເປັນເຈົ້າຊົງສະຖິດຢູ່ກັບເຮົາ.

ໃນ 1 ກະສັດ 6–7 ທ່ານຈະພົບຄຳອະທິບາຍທີ່ລະອຽດກ່ຽວກັບບ້ານອັນສັກສິດທີ່ໂຊໂລໂມນໄດ້ສ້າງໃຫ້ພຣະຜູ້ເປັນເຈົ້າ. ລາຍລະອຽດເຫລົ່ານັ້ນອາດເບິ່ງຄືວ່າບໍ່ສຳຄັນສຳລັບທ່ານເທົ່າທີ່ມັນສຳຄັນຕໍ່ຊາວອິດສະຣາເອນສະໄໝບູຮານ. ແຕ່ການອ່ານບົດເຫລົ່ານີ້ອາດເຮັດໃຫ້ທ່ານເຂົ້າໃຈວ່າ ມັນສຳຄັນຕໍ່ພວກເຂົາຫລາຍສໍ່າໃດທີ່ຈະມີບ້ານຂອງພຣະຜູ້ເປັນເຈົ້າ. ເປັນຫຍັງມັນຈຶ່ງສຳຄັນຕໍ່ທ່ານ?

ທ່ານອາດໄຕ່ຕອງວ່າ ສ່ວນທີ່ແຕກຕ່າງກັນຂອງພຣະວິຫານຂອງໂຊໂລໂມນອາດເປັນສັນຍາລັກເຖິງຫຍັງ. ຍົກຕົວຢ່າງ, ໃຫ້ພິຈາລະນາວ່າ ເຄຣູບີມ, ຕົ້ນໄມ້, ແລະ ດອກໄມ້ໃນ 1 ກະສັດ 6:35 ອາດເປັນຕົວແທນເຖິງຫຍັງ. (ເບິ່ງ ປະຖົມມະການ 3:24 ນຳອີກ.)

ບົດທີ 8 ບັນທຶກຄຳອະທິຖານຂອງໂຊໂລໂມນຕອນທີ່ກຳລັງຈະສ້າງພຣະວິຫານສຳເລັດ (ເບິ່ງ ຂໍ້ທີ 22–61). ໃຫ້ຄິດທີ່ຈະຂຽນລາຍການພອນຕ່າງໆທີ່ໂຊໂລໂມນໄດ້ທູນຂໍ. ແມ່ນຫຍັງທີ່ປະທັບໃຈທ່ານກ່ຽວກັບພອນເຫລົ່ານີ້? (ໃຫ້ສັງເກດຄຳສັນຍາຂອງພຣະຜູ້ເປັນເຈົ້າໃນ 1 ກະສັດ 6:11–13; 9:1–9 ນຳອີກ.) ຖ້າຫາກທ່ານເຄີຍໄປບ້ານຂອງພຣະຜູ້ເປັນເຈົ້າ, ໃຫ້ຄິດກ່ຽວກັບປະສົບການຂອງທ່ານເມື່ອນະມັດສະການຢູ່ທີ່ນັ້ນ. ການຮັກສາພັນທະສັນຍາພຣະວິຫານໄດ້ຊ່ວຍໃຫ້ທ່ານເຂົ້າເຖິງພອນຂອງພຣະຜູ້ເປັນເຈົ້າແນວໃດ?

ເບິ່ງ ຄຳສອນ ແລະ ພັນທະສັນຍາ 109; Henry B. Eyring, “I Love to See the Temple,” Liahona, May 2021, 28–31 ນຳອີກ.

1 ກະສັດ 8:61; 11:1–11

“ໃຈຂອງເພິ່ນບໍ່ໄດ້ສັດຊື່ຕໍ່ພຣະຜູ້ເປັນເຈົ້າ.”

ການ “ສັດຊື່ຕໍ່ [ພຣະຜູ້ເປັນເຈົ້າ]” ໝາຍຄວາມວ່າແນວໃດ? (1 ກະສັດ 8:61). ມັນແຕກຕ່າງຈາກການກະທຳທີ່ດີພ້ອມຂອງເຮົາບໍ? ແຕກຕ່າງແນວໃດ? ອ່ານ 1 ກະສັດ 11:1–11, ແລະ ສັງເກດສິ່ງທີ່ພຣະຜູ້ເປັນເຈົ້າໄດ້ກ່າວກ່ຽວກັບໃຈຂອງໂຊໂລໂມນ. ທ່ານອາດໄຕ່ຕອງວ່າ ມີອິດທິພົນໃດໃນຊີວິດຂອງທ່ານບໍ່ທີ່ສາມາດຫັນຫົວໃຈຂອງທ່ານໜີຈາກພຣະຜູ້ເປັນເຈົ້າ ແລະ ໄປສູ່ “ພຣະອື່ນໆ.”

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

2 ຊາມູເອນ 11

ພຣະຜູ້ເປັນເຈົ້າສາມາດຊ່ວຍເຮົາເມື່ອເຮົາຖືກລໍ້ລວງ.

“ກະສັດດາວິດ” ໃນ ເລື່ອງພຣະຄຳພີເດີມ, 117–20, ສາມາດຊ່ວຍທ່ານເລົ່າເລື່ອງລາວໃນ 2 ຊາມູເອນ 11 ໃຫ້ລູກໆຂອງທ່ານຟັງໄດ້. ທ່ານອາດຂໍໃຫ້ລູກໆຂອງທ່ານຊີ້ບອກທາງເລືອກຜິດໆທີ່ດາວິດໄດ້ເລືອກ ແລະ ແນະນຳທາງເລືອກທີ່ດີທີ່ເພິ່ນສາມາດເລືອກແທນ. ມີສິ່ງໃດແດ່ທີ່ເຮົາສາມາດເຮັດໄດ້ເມື່ອເຮົາກຳລັງຖືກລໍ້ລວງ ທີ່ສາມາດຊ່ວຍໃຫ້ເຮົາເລືອກທາງເລືອກທີ່ດີ?

2:11
King David
ການອ່ານກ່ຽວກັບບາບທີ່ເສົ້າສະຫລົດໃຈຂອງດາວິດ ອາດເປັນໂອກາດທີ່ດີ ທີ່ຈະສົນທະນາກ່ຽວກັບໄພອັນຕະລາຍຂອງຮູບພາບລາມົກ. ວິດີໂອ “What Should I Do When I See Pornography?” (ຫ້ອງສະໝຸດພຣະກິດຕິຄຸນ) ມີຄູ່ມືທີ່ເປັນປະໂຫຍດ. ຊ່ວຍລູກໆຂອງທ່ານວາງແຜນກ່ຽວກັບສິ່ງທີ່ພວກເຂົາຈະເຮັດເມື່ອພວກເຂົາພົບເຫັນຮູບພາບລາມົກ.

5:46
What should I do when I see pornography?

1 ກະສັດ 8:22–61

ການເຮັດພັນທະສັນຍາໃນບ້ານຂອງພຣະຜູ້ເປັນເຈົ້າ—ແລະ ການຮັກສາພັນທະສັນຍາ—ຊ່ວຍໃຫ້ເຮົາຍ່າງໄປຕາມທາງຂອງພຣະອົງ.

ຂະນະທີ່ທ່ານ ແລະ ລູກໆຂອງທ່ານຮຽນກ່ຽວກັບການອຸທິດພຣະວິຫານໃນ 1 ກະສັດ 8, ທ່ານສາມາດເບິ່ງຮູບຂອງພຣະວິຫານໃນໂຄງຮ່າງຂອງອາທິດນີ້. ໃຫ້ລູກໆຂອງທ່ານເວົ້າກ່ຽວກັບລາຍລະອຽດທີ່ພວກເຂົາເຫັນຢູ່ໃນຮູບ. ທ່ານອາດເນັ້ນໜັກໃສ່ ຂໍ້ທີ 57–58. ການ “ດຳເນີນຊີວິດຕາມທີ່ [ພຣະຜູ້ເປັນເຈົ້າ] ຕ້ອງການໃຫ້ດຳເນີນ” ໝາຍຄວາມວ່າແນວໃດ? (1 ກະສັດ 8:58). ບາງເທື່ອລູກໆຂອງທ່ານກໍສາມາດຍ່າງໄປກ້າວໜຶ່ງສຳລັບແຕ່ລະຄຳຕອບທີ່ພວກເຂົາຕອບ.
ບອກລູກໆຂອງທ່ານວ່າ ການຮັກສາພັນທະສັນຍາທີ່ທ່ານເຮັດໃນພຣະວິຫານຊ່ວຍໃຫ້ທ່ານຍ່າງໄປຕາມທາງຂອງພຣະຜູ້ເປັນເຈົ້າແນວໃດ? ທ່ານອາດບອກພວກເຂົາວ່າ ພັນທະສັນຍາເຫລົ່ານີ້ໝາຍເຖິງຫຍັງ (ເບິ່ງ ຄູ່ມືທົ່ວໄປ, 27.2, ຫ້ອງສະໝຸດພຣະກິດຕິຄຸນ). ພວກທ່ານຍັງສາມາດຮ້ອງເພງນຳກັນເຊັ່ນ “ພຣະເຈົ້າມອບພຣະວິຫານແກ່ເຮົາ” (ເພງສວດ ແລະ ເພງຂອງເດັກນ້ອຍ, 68) ນຳອີກ.

ພາບປະກອບພຣະວິຫານຂອງໂຊໂລໂມນ, ໂດຍ ແຊມ ລໍເລີ

1 ກະສັດ 11:1–11

ເຮົາສາມາດໃຫ້ພຣະເຈົ້າເປັນທີໜຶ່ງໃນຊີວິດຂອງເຮົາ.

ການອ່ານກ່ຽວກັບວິທີທີ່ບັນດາມະເຫສີຂອງໂຊໂລໂມນໄດ້ຊັກຈູງເພິ່ນ ສາມາດນຳໄປສູ່ການສົນທະນາກ່ຽວກັບຕົວຢ່າງຂອງ “ພຣະອື່ນໆ”—ຫລື ສິ່ງທີ່ຄົນທັງຫລາຍບູຊາ ຫລື ຮັກ ແທນທີ່ຈະເປັນພຣະຜູ້ເປັນເຈົ້າ. ເຮົາຈະສະແດງໃຫ້ເຫັນວ່າ ເຮົາຮັກພຣະອົງຫລາຍກວ່າສິ່ງອື່ນໃດໃນຊີວິດຂອງເຮົາໄດ້ແນວໃດ?

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ໜ້າກິດຈະກຳປະຖົມໄວ: ການເຮັດພັນທະສັນຍາໃນບ້ານຂອງພຣະຜູ້ເປັນເຈົ້າຊ່ວຍໃຫ້ເຮົາຍ່າງໄປຕາມທາງຂອງພຣະອົງ — Dedication of the Temple of Solomon in Jerusalem [ການອຸທິດພຣະວິຫານຂອງໂຊໂລໂມນໃນນະຄອນເຢຣູຊາເລັມ], ໂດຍ ວິວລຽມ ໂຮລ໌