“Meei 25–31. ‘Iehova e Kateirakea aia Tia Kamaiu: Taan Motiki Taeka 2–4; 6–8; 13–16,” Nakomai, Iriirai—Ibukin te Mweenga ao te Taromauri: Te O Tetemanti 2026 (2026)
“Meei 25–31. ‘Iehova E Kateirakea Aia Tia Kamaiu,’” Nakomai, Iriirai: Te O Tetemanti 2026
“I a Bon Iriko”—Tebora te Burabeti n Aine, mairoun Des Leavitt
Meei 25– 31: “Iehova e Kateirakea aia Tia Kamaiu”
Tani Motiki-Taeka 2–4; 6–8; 13–16
Ti bane n ataia bwa aekara aron te bure, namakinan te nakobuaka iai, ao imwina te rairanano ao ni motikia ni biti kawaira. Ma n angiin te tai ti mwanuokina are ti motikia mai imwaina, ao, ngkana ti kaitara ma te kariiri, ti kunea bwa ti a manga karaoa riki te bure. Te banna aei e kaoti n tainako inanon te boki ae Tani Motiki-Taeka. Ni kairoroaki man aia koaua ao aron aia taromauri kaain Kanaan—ake koraki ake a bon riai ni kakionakoaki man te aba—tibun Iteraera a urui aia berita ma te Uea ao a tannako mairouna n aki taromauria. Ao n tokina, a kabua Ana kamanomano ao a bwaka inanon te tautoronaki. Ao ni katoa tai are e riki aei, te Uea e anganiia aia tai bwa a na rairinanoia ao e kateirake te tia kamaiu, te mataniwi n te tanga ni buaka ae e aranaki bwa te tia “motikitaeka.” Aki bane n raoiroi tani moti taeka n aia boki Tani Motiki-Taeka, ma tabeman ibuakoia a kamwakura aia onimaki ae korakora ni kainaomataia tibun Iteraera ao ni manga kanakoraoi aroia n aia reitaki n te berita ae tabu ma te Uea. Karaki aikai a kauringiira bwa e aki kakaawaki bwa baika aika ti katikaki nako mairoun Iesu Kristo, bon Ngaia te Tia Kabooa Iteraera ao e tauraoi n taainako ni kamaiuiira ao ni butimwaira ngkai ti oki Nakoina.
Ibukin rinanoakin aia boki tani motiki taeka, taraa “Tani Motiki-Taeka, ana boki” n te Bible Dictionary.
Iango ibukin te Kamatebwai n te Mweenga ao n te Taromauri
Tani Motiki-Taeka 2:1–19; 3:5–12
E kabwarai au bure te Uea ni katoatai ngkana I raira nanou.
Te boki ae Tani Motiki-Taeka e kona n ae taeka ni kauring ao ni kaunga nano. Kakaei kauring ao kaunganano aikai ngkai ko wareka Tani Motiki-Taeka 2:1–19; 3:5–12. E kanga am namakin n te kauring ao te kaunganano ni kaineti nakoim?
Te katooto, ngkana Tani Motiki-Taeka 2:19 bon ibukim ao ibukin kaririakim nakon ae iaoia tibun Iteraera ngkoa, tao tera ae e na taekinaki? Ngkana Tani Motiki-Taeka 3:9 bon iaon tera ae e a tia ni karaoia te Uea ibukin kamaiuam, tao tera ae e na taekinaki?
Iangoia ni wareka te titiraki ao kaekaana iaon iteraniba 9 inanon Ibukin Kakorakoraia Kairake: Te Kairi ibukin Karaoan Rinerine. Tera am namakin bwa aio e kaineti nakon aia taneiai tibun Iteraera inanon te boki ae Tani Motiki-Taeka? Tera ae reiakiniko aio iaon Iesu Kristo?
Tani Motiki-Taeka 4:1–15
I kona n kaungaia tabeman bwa a na karekea aia onimaki iroun te Uea.
N tabetai ana onimaki temanna te aomata e kona ni kaungai aia onimaki tabeman. Inanon Tani Motiki-Taeka 4, te aomata ane temanna anne bon Tebora. Wareka rongorongona inanon Tani Motiki-Taeka 4:1–15, ao nora ana anainano are a rootaki iai aomata ake irarikina. Aikai tabeua titiraki aika a na buokiko ni iangoia bwa e kanga te bwai are e rinanona ni kaineti nakon maium:
-
Ko na kanga ni kabwarabwara aron te bwai are a mena inanon tibun Iteraera n te tai anne? (taraa kibu 1–3). Tera bwaai aika titebo aika ko noori ae a kona n riki ni boong aikai—bon nakon temanna ao te botanaomata?
-
Tera ana taeka ao ana mwakuri Tebora ake a kaotia nakoim bwa iai ana onimaki iroun te Uea? E kanga ana mwakuri neienne n rootiia tabeman? Tera riki ae anaa nanom iroun neienne?
-
Tera n am iango ae nanonna Tebora n ana titiraki n te kibu 14; “Tiaki e nako n rimoam Iehova?” E kanga te Uea n “nako n” rimoam? (tara Reirei ao Berita aika a Tabu 84:87-88).
Iangoia bwa e na kanga am onimaki iaon Iesu Kristo ni kona ni kakabwaiaia tabeman n aron ana onimaki Tebora ni kakabwaia Baraka ao tibun Iteraera ake tabeman. Ni buokiko ni iangoa aio, ko na bae ni kamatebwaia ana rongorongo Unimwaane Neil L. Andersen “Ti Taetaekina Kristo” (Riaona, Nobembwa 2020, 88–91). Kakaea n te rongorongo (1) bukin te taetae n akea tukam iaon te Tia Kamaiu ao (2) aron karaoana.
Imwina ko kona ni korei rinanin bwaai ake ko ataia iaon Iesu Kristo—man koroboki aika tabu, man aia taeka burabeti aika maiu, ao man oin am taneiai. Antai ae e kainanoia n atai baikai? Ko na kanga n tibwaia?
Tara naba Mataio 5:14–16; 1 Betero 3:15; “Each Life That Touches Ours for Good,” Anene n Taromauri, nambwa 293.
Kaungaa te tibwatibwa. Ngkana ngkoe te tia reirei—n te mweenga ke n te taromauri—“anganiia taan reiakinaki te tai n tibwatibwa imarenaia n te bwai are a reiakinna iaon te Tia Kamaiu, ao Ana euangkerio. Ni karaoan aei e na buokiia ni iangoia inanoia taian koaua ake a reiakinaki ao n tataekinna” (Reirei n Ana Kawai te Tia Kamaiu,26). Te katooto, ngkana kam kamatebwaia Tani Motiki-Taeka 4 ni bootaki, ko kona n anganiia taan reiakinaki n tatabemaniia bwaai aika a onoti bwa a na kakaea inanon te mwakoro anne ao imwina kaoiia bwa a na tibwa te bwai are a kunea imarenaia.
Tani Motiki Taeka 6-8
Te Uea e kona ni karaoi kakai ngkana I onimakina Ana kawai.
Ngkai ko wareka Tani Motiki-Taeka 6–8, norii taai ngke te Uea e tuanga Kiteon bwa e na kakoauai bwaai aika kanga ana bon taraa n aki reke. Tao E a tia naba n tuangko aekakin anne?
Tera ae ko namakinna bwa e kataia te Uea n reireiniko inanon te karaki aei? Ko a tia n nora te Uea bwa e karaoa Ana mwakuri ni kawai aika a taraa n aki kona ni karaoaki?
Tani Motiki-Taeka 13–16
E kakorakoraai te Atua ngkai I teimatoa n onimaki nakon au berita aika tabu.
Tamton e bua korakorana n rabwata ao n tamnei ibukina bwa e uruaka ana berita ma te Atua, n raonaki ma ake a kaeineti riki nakoia tenaan i Natareta (ibukin rongorongoia tenaan i Natareta, taraa Warekaia Iteraera 6:1–6; Tan Motiki Taeka 13:7). Ngkai ko wareka rongorongon Tamton inanon Tani Motiki-Taeka 13–16, norii kiibu ake a kaotia bwa te Uea e memena iroun Tamton, n aron naba kiibu are e kaotia bwa e aki rangi matoa ana motinnano Tamton nakon te Uea.
Ko na bae naba ni iangoi raoi berita aika tabu ake ko karaoi ma te Atua. E kanga berita aikai n uota mwaakan te Atua nakon maium? Tera ae ko reiakinna man te bwai are e rinanona Tamton are e kaungako bwa ko na teimatoa ni koaua n am berita ma te Atua?
Titita Ann M. Dibb e reirei: “Tamton e bungiaki ma ana konabwai ae korakora. Tinana e anganaki te berita, ‘E na moan ni karika kamaiuaia Iteraera mai inanon baia I-Biritia’ [Tani Motiki-Taeka 13:5]. Ma ngke e a ikawairake Tamton, e taratara riki nakon ana kariiri te aonaaba nakon ana kairi te Atua. E karaoi rinerine akanne ibukina bwa a ‘kakukure [ia]’ [Tani Motiki-Taeka 14:3] nakon riki are ibukina bwa rinerine akanne a bon eti. Ae okioki, koroboki aika tabu a kabongana te kibuntaeka ‘ao e waerio’ [Tani Motiki-Taeka 14:7] ngke a taekina ana mwananga Tamton, ana mwakuri, ao ana rinerine. Ngke e na riai n teirake ao ni kaotanako otana ni kakoroan nanon te kantaninga ibukina ae korakora, Tamton e taonakinako ni bwain te aonaaba, e kabua korakorana are e a tia n anganna te Atua, ao e mate, ni moantaai” (“Arise and Shine Forth,” Riaona, Meei 2012, 118).
Taraa naba Dallin H. Oaks, “Berita aika Tabu ao Mwioko,” Riaona, Meei 2024, 93–96; Ulisses Soares, “Kakoaua n ara Berita aika a Tabu Rinanon Iesu Kristo,” Riaona, Meei 2024, 17–21.
Iango ibukin Reiakinaia Ataei
Ibukina bwa te Tabati aio bon te moan Tabati n te namwakaina, a kaungaaki taan reirei n te Moanrinan bwa a na kabonganai waaki n reirei ake n te “Appendix B: Katauraoaia Ataei nakon Maiuakinan ana Kawai ni Berita te Atua.”
Tani Motiki-Taeka 3:7–9, 12–15
Iesu Kristo bon au Tia Kamaiu.
-
Tani Motiki-Taeka 3 e kabwarabwara te baeten are e reireia aron mwaakan te Tia Kamaiu ni kainaomataira man te bure. Ni buokiia am ataei ni kinaa te baeten aei, ko kona ni korei kibuntaeka aikai: “e karaoa ae buakaka,” “e tang nakon te Uea,” ao “e kateirakea te tia kaimaiu.” Imwina a kona am ataei ni kakaei taeka aikai n Tani Motiki-Taeka 3:7–9 ao Tani Motiki-Taeka 3:12–15. Tera ae ti reiakinna iaon te Uea man te baeten aei?
-
Ni katuruturua bwa Iesu Kristo bon ara tia Kamaiu, ko kona n rikoi tamnei aika mwaiti iaoia aomata, ni ikotaki ma tamnein Iesu, ao kawenei ni kabarakii. Anganiia ataei te tai bwa a na ikaruoruo n rairii tamnei. Ngkana a kunea tamnein Iesu, anenea te anene Iaona, n aron “He Sent His Son” (Aia Boki n Anene Ataei,, 34-35), ao tuangiia am ataei arona ngke E kamaiuko.
Tani Motiki-Taeka 4:1–15
I kona ni kaungaia tabeman bwa e na reke aia onimaki iroun te Uea.
-
Ko kona ni kabongana “Tebora te Burabeti n Aine” inanon Karaki man Te O Tetemanti, 92–95, ni karakina te karaki nakoia am ataei are n Tani Motiki-Taeka 4. Tibwaia i marenami bwa tera ae e kaungaa nanom n taekan Tebora. E kanga ana onimaki iroun te Uea ni kakabwaiaia aomata ake i rarikina? Tera ae ti kona ni karaoia ni buokiia tabeman ni kakorakorai riki aia onimaki iaon Iesu Kristo?
2:9Deborah the Prophetess
Tani Motiki-Taeka 7:1–21
E kona te Uea ni kabonganai baika a mangori ni karaoa te mwakuri ae korakora.
-
Kabongana Tani Motiki-Taeka 7:4–7, n te iteraniba n te waaki ni kakukurei n te wiiki aei, ke “Ana Tanga ni Buaka Kiteon” inanon Karaki man te O Tetemanti, 96–99, n reireiniia am ataei bwa e kanga te Uea ni kauarerekei mwaitiia ana tanga ni bukaka Iteraera. Bukin tera E tangiria te Uea bwa e na rangi n uarereke ana taanga ni buaka Kiteon? (taraa Tani Motiki-Taeka 7:2).
2:37The Army of Gideon
-
A kona am ataei ni korea tamnein te kabaang, te nangoa, te buu, te oi, ao te katiibu n ran ao maroroakinna bwa e ngaa mai ibuakon bwaai aikai ae a na tangiria n tain te buaka. Imwina a kona ni wareka Tani Motiki-Taeka 7:16 n reiakinna bwa tera ae e tuangiia ana taan buaka Kiteon te Uea bwa a na kabonganaa. Ngkai ko wareka taekan te buaka inanon Tani Motiki-Taeka 7:19–21, tibwaia imarenami bwa tera ae kam reiakinna iaon te Uea man te karaki aei.
E katikii ni Kabwakai Bouan te Tembora Tamton, iroun James Tissot ao tabeman
Tani Motiki-Taeka 13:5
Kawakinan berita aika tabu e anganai te kakorakoraaki.
-
Ana berita Tamton ma te Uea e anganna te korakora n rabwatana, n aron naba ara berita aika tabu a anganiira te korakora n tamneira. A na bae ni kukurei am ataei ni karaoi takakaro ni kamarurung ao maroroakinna bwa a kanga takakaro ni kamarurung akanne ni buoka kakorakoraan rabwatara. E kanga kawakinan ara berita aika tabu ni karika tamneira bwa e na korakora? (taraa Motiaea 18:8–10; Reirei ao Berita aika Tabu 20:77, 79).
Ibukin iango riki tabeua, taraa te beeba ni kaongora n te namwakaina aio n Te Rao maekatiin.