Ruta; 1 Tamuera 1–7

E matoatoa te maiu ibukiia aine aika a tia ni mate buuia inanon rooro nako. Ma ngke e mate buun Ruta, te bwai are e riananona e rangi ni kangaanga. Ni katein Iteraera n te tai anne, te aine ae akea buuna ke natina te mwaane akea inaomataia ni bwaibwai ao e karako aroia ni karekei maiuiia. Ngkai ko wareka karakinan Ruta, ataia bwa e kanga te Uea ni bita te kangaanga nakon kakabwaia aika korakora. Tera ae ko ataia iaon Ruta are e na kona ni buokia iai? E kanga Boati ni kamaiua Ruta man te kangaanga ae e mena inanona? (taraa Ruta 4:4–10). A kanga Ruta ao Boati n riki bwa kanga aron Iesu Kristo?

Taraa naba “Be Still, My Soul,” Anene n Taromauri, nambwa 124.

Tao e mwaiti ae ko a tia ni kabua, n aron are e riki nakon Ruta ao Naomi (taraa Ruta 1:1–5). Ke tao, n aron Ana, ko kariariai kakabwaia ake ko bon tuai man karekei (taraa 1 Tamuera 1:1–10). A kanga aine aikai ni kaota aia onimaki iroun te Atua? Tera ae ko reiakinna man aia banna ni katooto?

E koaua, tiaki ni kabane ake a tataro ibukin te nati ao karekea natina, ao akea te buu ae mate buuna e tiku n aki manga iein. Ma aomata nako ake a tan nakon te Tia Kamaiu a karekea Ana buoka ao Ana kairiiri. Iangoia bwa ko kanga n “roko n onimakina” te Uea (Ruta 2:12) inanon am tai ni kangaanga.

Taraa naba Amy A. Wright, “Kamaiuaki n te Bong Anne iroun Kristo,” Riaona, Nobembwa 2023, 9–11.

Ngke a roko aia kairiribai ni buakaniia, e teretere bwa tibun Iteraera a taku bwa man ti karekean irouia te ake ni berita ao a na kamanoaki mai iai. Ngkai ko wareka 1 Tamurea 4–6, iangoia bwa bukin tera e aki mwakuri. (Nora naba aia mwakuri natin Eri mwaane aika aki raraoi, ake a beku bwa ibonga n te umwa, n 1 Tamuera 2:12–25.) Tera n am iango ae e kataia te Uea n reireiniia Ana aomata? Tera ae ko reiakinna n te bwai ae riki nakoia I-Biritia imwin anaakin te aake? (taraa mwakoro 5–6). Tera ae ko reiakinna man ana kekeiaki Iteraera ni manga karekea Ana kamanomano te Uea inanon 1 Tamuera 7?

Ko kona ni karekea kairam n te tamnei man warekan ana baebaeti n nebonebo Anna n 1 Tamuera 2:1–10. Tera ae ko kunea n ana taeka are e kona ni buokiia natin Eri mwaane ao tibun Iteraera ni kabane?

Iai taai ae, ko na bae n namakina ae ai aron Tamuera, ae e ongo bwanaan te Uea ma e aki kinaa. N ai arora naba, e riai Tamuera n reiakinna bwa e na kanga ni kinaa bwanaan te Uea. Ngkai ko kamatebwaia 1 Tamuera 3, tera ae ko reiakinna mairoun te ataeinimwaane aei ngke e ongo ao n ongotaeka ni bwanaan te Uea? Ko na bae naba ni kakaei kiibu riki tabeua ao korei ni karinanii ni kaotii kainibaire ake a na kona ni buoka temanna ni kinaa bwanaan te Uea: 1 Uea 19:11–12; Ruka 24:15–32; 3 Nibwaai 11:3–7; Reirei ao Berita aika Tabu 6:22–23; 8:2–3; 9:7–9.

N taai tabetai, ko na bae n namakinna bwa e a in karawa ao e a aki tangiria te Atua ni kan reitaki ma ngkoe. E taku Beretitenti Russell M. Nelson: “E koaua bwa e tangiria raoi te Atua ni kan taetae ma ngkoe? “Eng!” (“Te Kaotioti ibukin te Ekaretia, Te Kaotioti ibukin Maiiura,” Riaona, Meei 2018, 93–96). Ngkai ko kamatebwaia ana rongorongo Beretitenti Nelson, tera ae ko kunea bwa e kaunga nanom n ongo ao n ongotaeka nakon bwanaan te Uea? Tera ae e kaoko Beretitenti Nelson bwa ko na karaoia, ao tera kakabwaia aika e beritani? Ko kona ni kunei naba kakao ao kakabwaia aika beritanaki iaon te kaotioti inanon “Nakonako n Otan te Atua,” (Ibukin Kakorakoraia Kairake: Te Kairi ibukin Karaoan Rinerine, 16–20). Baireia n rinea teuana te bwai are ko kona ni karaoia ni “kakorakora am konabwai ni maiun tamneim ni karekea te kaotioti.”

• Ngkai ko tibwaua karakinan Ruta ma am ataei (ko kona ni kabongana “Ruta ao Naomi” inanon Karaki man te O Tetemanti, 100–103), kaoiia bwa a na katei baia ni katoaa te tai are a ongo taekan te mwakuri n akoi inanon te karaki. A kona naba n tibwaia bwa tera aia namakin ngkana tabeman a karaoa te akoi nakoia, ke ngaiia a karaoa te akoi nakoia tabeman. E kanga aron ana akoi te Tia Kamaiu nakoira? Ti na kanga n iriira Ana banna ni katooto? (taraa “Kindness Begins with Me” Aia Boki n Anene Ataei, 145).

  

  2:0

• Karakinan Ruta ao Anna e kona ni kaungaia am ataei n tiku ni matoa n onimaki inanon taai aika a kangaanga. Iangoia ni buokiia ni karaoa te tiata ae bebete ma atu n reirei n Kataaki, Mwakuri, Kakabwaia. Imwina kam kona ni bootaki ni wareka Ruta 1:3–5, 8, 16; 2:1–3, 8–12; 4:13–17; 1 Tamuera 1:1–18 ao korei iaan atu n reirei baike a kunei inanon kiibu aikai. A kanga Ruta ao Anna ni kaota aia onimaki iroun te Uea? Ngkoe ke am ataei kam kona ni tibwa ami taneiai bwa e kanga te Uea ni kakabwaiako inanon taai ni kangaanga.

• N reiakina taekan Anna, a kona am ataei ni wareka 1 Tamuera 1:1–18 ke “Anna” inanon Karaki man Te O Tetemanti (104–5) ke mataku n “Hannah’s Faith” (witeo, Gospel Library). E na bae ni kaunga kakibaan te boro nakon te ataei ao kaoiia bwa a na karakina mwakoron te karaki imwain batinakin te boro nakon temanna. Tera ae ti reiakinna iaon te tataro man ana banna ni katooto Anna?

  

  1:15

  

  3:9

• Tao te takakaro n te kaotioti ae uarereke e na kona ni buokiia am ataei n reiakina te bwai are e rinanona Tamuera n te kaotioti. Te teei temanna e kona n riki bwa aongkoa Tamuera, ao temanna e na riki bwa Eri ngkai ko wareka 1 Tamuera 3:1–10 (taraa naba “Tamuera te Burabeti” inanon Karaki man te O Tetemanti, 106–9, ke te witeo “Samuel and Eli,” Gospel Library). Tera ae ti reiakinna mairoun Tamuera iaon aron te ongora nakon bwanaan te Uea? Ti na kanga ni kaotia bwa ti tauraoi n ongo ngkana e taetae nakoira te Uea?

  

  2:10

  

  1:58

• Titirakiniia am ataei bwa a na kanga ni kabwarabwara nakon temanna bwa e kanga te Uea n taetae nakoia. Ko kona ni buokiia ni kakaei kaeka inanon Reirei ao Berita aika Tabu 6:22–23; 8:2–3; 9:7–9.