1 Tamuera 17–18; 24–26; 2 Tamuera 5–7

Karakinan Tawita ao Koria bon teuana te karaki ae rangi n ataaki i nanon booki aika tabu. E koaua, ti kabanei riki nanora iaon Tawita. Ma n te tai aei, ngkai ko kamatebwaia 1 Tamuera 17, iangoi naba aia taeka aomata aika a kakaokoro n te mwakoro aio (tarai aara aika oti inano). Tera ae ko reiakinna iaoia ao tera bukin te bwai are a karaoia? Tera ae ko reiakinna iaon Tawita? E kangaa ni kaokoro?

• Koria: kiibu 8–10, 43–44

• Eriaba: kibu 28

• Tauro: kibu 33

• Tawita: kiibu 26, 32, 34–37, 39, 45–47

E ngae ngke am karaki, e aki rangi n ataaki n aron Tawita, ma bon iai naba kakaewenako ae kanga buburan Koria ae ko na tokanikai iaoia ao taai ni kamwakura te onimaki iroun te Uea. Tera ae e reireiniko ana banna ni katooto Tawita ni kaitaraan te tia kakaitara inanon am karaki? Ko kona naba ni wareka ana rongorongo Beretitenti Camille N. Johnson “Kaoa Kristo Bwa E na Korea Am Karaki” (Riaona, Nobembwa 2021, 80–82) ma teuana am kangaanga n am iango. Tarai kaekaan titiraki n aron aikai: E kanga te Uea n tangirai bwa N na norii au kangaanga? E kanga Ngaia ni buokai mai imwaina? N na kanga ni kaotia bwa I onimakinna bwa E na korea au karaki?

Tao ko bon ataia ae tabeua mwakoro ake imwina a taekin kangaanga ni karakin Tawita (taraa, te katooto n, 2 Tamuera 11). Ngkana e reke am tai n angan Tawita tabeua taeka n reirei imwin buakana ma Koria, tera ae ko na taekinna? E na kanga te reirei aei ni kaineti nakon maium?

Taraa naba “The Lord Will Deliver Me” (witeo), Gospel Library.

3:24

Irarikin are bon oin ara kangaanga, ti kaitaraaki naba, ma kangaanga aika mwaiti ake a korakora mwiia nakon te aonaaba ae bwanin. Ngkana e a korakora te buakaka ni “ikotaki … ni buaka” ni kaitaraa korakoran te raoiroi (1 Tamuera 17:1), ti na bae ni iangoia bwa e kanga ara kekeiaki ibon iroura ni karika te kaokoro. Tera ae ko kunea n ana karaki Tawita ae e anganiko te kaantaninga?

Taraa naba “Waki Nako,” Anene n Taromauri, nambwa. 243.

Ngkai ko wareka 1 Tamuera 18, iangoia n nora te kaokoro iroun Tauro ao natina ae Ionatan (are, ngkana tiaki ibukin Tawita, ao tao e na bon riki n uea imwiina). A kanga aroia Tauro ao Ionatan ni butimwaea rikiraken Tawita? Tera ae ko kona n reiakinna man te taneiai aei?

Tera ae ko kunea n anuan ao ana mwakuri Ionatan are e kauringko iai iaon Iesu Kristo?

Inanon 1 Tamuera 24–26, taratarai reirei iaon te kainikatonga, te kakabwarabure, ao te taotaonannano. Ko na tangiria naba ni iangoia ni wareka ana marooro Unimwaane Mark A. Bragg “Teei n Aekan Kristo” bwa mwakoron am kamatebwai (Riaona, Meei 2023, 60–63). A kanga Tawita, Abikaira, ao ake tabeman ni kaota—ke n aki kaota—te tei n aekan Kristo inanon mwakoro aikai? Tera taai aika a reke iroum ae ko tei n aekan Kristo?

Ana rongorongo Titita Kristen Yee “Te Tamaroa n Oneaki Mwiina n te Mannang: Kawain te Kabwarabure” (Riaona, Nobembwa 2022, 36–39) e kona ni buokiko ni kamatebwaia 1 Tamuera 25. E kanga Abikaira n riki bwa aekakin Iesu Kristo?

Imwin are e konaa Koria Tawita, e aki toki ana kangaanga ma I-Biritia. Ngkai ko wareka 2 Tamuera 5:17–25, iangoia bwa e kanga ana katooto Tawita ni buokiko ni kangaanga ake ko kaitara ma ngaai (taraa naba 1 Tamuera 23:2, 10–11; 30:8; 2 Tamuera 2:1). Ko kanga n tia ni kakabwaiaki man karaoan nanon te kaotioti are ko karekea?

Ngke e angananona Tawita bwa e na katea te auti, are nanonna te tembora, ibukin te Uea (taraa 2 Tamuera 7:1–3), e kaeka te Uea bwa natin Tawita te mwaane e na kateia (taraa kiibu 12–15; taraa naba 1 Rongorongo 17:1–15). E taku naba te Uea bwa boni Ngaia ae E na katea ana “auti,” Tawita nanona ana kariki, ao ana kaintokanuea a na akea tokina (taraa 2 Tamuera 7:11, 16, 25–29; Taian Areru 89:3–4, 35–37). E kakoroaki nanon te berita aio iroun Iesu Kristo, ara Uea n aki totoki, are ngaia kanoan Tawita (taraa Mataio 1:1; Ruka 1:32–33; Ioane 18:33–37).

• Ko na bae n tangiria ni kabongana “Tawita ao Koria” inanon Karaki man te O Tetemanti, 112–16, ni buokiia am ataei ni mataata raoi ma te bwai ae riki inanon 1 Tamuera 17:20–54. Imwina ko kona ni kariaia bwa a na manga taekina te karaki ni kabonganai tamnei ke korobanna n tamnei ake inanon te mwakoro aio. Titirakiniia bwa tera n aia iango ae e tangiria te Uea bwa a na reiakinna man te karaki aei.

  

  2:36

• Kam kona ngkoe ao am ataei ni korei rinanin bwaai aika a kangaanga ake a kona ni kaitarai inanon maiuia. Imwina buokiia ni kunea bwa tera ae taku Tawita bwa e kona n ibuobuoki ma kangaanga aikai (taraa 1 Tamuera 17:26, 32, 34–37, 45–47). Tibwaia bwa e kanga Iesu Kristo n tia ni buokiko inanon am tai n rinanon te kangaanga.

• A kona am ataei ni mwaati n aiaron Tawita n nako ni buaka ma Koria ngkai a anenea te anene ibukin taekan te ninikoria, n aron “I Will Be Valiant” (Aia Boki n Anene Ataei, 162).

• Ko na kanga ni buokiia am ataei n reiakinaki man aia iraorao Ionatan ao Tawita? Teuana te kawai bon anganakiia ataei n tatabemania nako te aati te beeba, teuana ae tei ibukin Tawita ao are teuana ibukin Ionatan. Imwina uai warekii tabeua kiibu man 1 Tamuera 18:1–4 are e katuruturua aia tangira rao aika uoman aikai n aia namakin i bon imarenaia. Am ataei a kona imwina ni korea ke ni korotamnei iaon te aati bwa a na kanga ni kaota te tangira nakon raraoia.

• Inanon mwakoro aikai, e a riki ngkai Tawita bwa uean Iteraera. E na rangi ni kaunga ngkana am ataei a riki bwa aongkoa te uea te mwaane ke te uea te aine. Tera tuua aika a na karaoi? A na nakon antai ni karekea buokaia? Buokiia am ataei ni kunea bwa ngkana e kainanoa buokana Tawita, e “bubuti,” ke n tataro, ibukin kaeka. Te katooto, ngkai ko wareka 2 Tamuera 5:19, 23, kaoiia ataei bwa a na kakauongo nakon te taeka ae “titiraki” ao ni booti baia ngkana a ongo. Bukin tera Tawita e kainanoa ana ibuobuoki te Uea ni mwiokoana ae boou?

• Marooro i marenaia iaon taai ngke a tataro nakon Tamara are i Karawa ibukin ana ibuobuoki. Tera te kaokoro ngkai ko karikia bwa E na buokiko?

• Uea ake ti wareki rongorongoia n te O Tetemanti iai kabwakaia, ao a bane n toki ueaia. Ma Iesu Kristo bon te Uea ae kororaoi ao e na tautaeka n aki toki. Ko kona ni buokiia am ataei ni kunea aio ni bootaki ni warekia bwa tera ae tuanga te Uea are Tawita te burabeti Natan n 2 Tamuera 7:16–17. E na kanga n akea tokin abanuean Tawita? Buokiia am ataei ni kakaea ao ni wareki kiibu are a reirei bwa Iesu Kristo, are kanoan Tawita, bon ara Uea, n aron Ruka 1:32–33; Ioane 18:33–37; ao Te Kaotioti 19:16. E kanga ni kaokoro Iesu Kristo ma ueea aika iaon te aba? Ti kanga ni karinea Iesu Kristo bwa ara Uea ae Akea Tokina?