1 Tamuera 8–10; 13; 15–16

1 Tamuera 8 e taekina te bwai are e riki are e na bita aron Iteraera n aki toki. Ibukin kamanoaia ni kaaitaraiia aia kairiribai, a tangira te bwai are iai irouiia kaain rarikiia Iteraera—te Uea ae na tautaekaniia. Ngkana ko wareka taekan aia bubuti ao ana kaeka te Uea, iangoia bwa antai ae ko na taraia ibukin te mano ao te kairiiri. Iangoia bwa tera ae nanonaki n angan te Uea “n tautaeka[niko]” (1 Samuel 8:7).

N wiiki aika a na roko, ko na wareka taekan mwaitiia ueea ake a weteaki bwa a na kaira Iteraera. Ngkana ko reiakina aroia, iangoi titiraki aika a kaotaki i mwiina:

• A kangaa ni kakoroaki bukin ana kakauring te Uea i nanon 1 Tamuera 8:10–18?

• A kanga natin Iteraera n rootaki man aia rinerine n tangiran te uea i aon te aba?

• E kanga ni kaokoro Iesu Kristo mairouia ueea i aon te aba? Iangoi bwaain te aonaaba ae e kariiriko are ko tangiria ni kamwawaa man maium ao ni karika Iesu bwa am Uea.

Taraa naba “Rejoice, the Lord Is King!,” Hymns, no. 66.

Wareka taekana bwa e kanga te Atua n rineia uean Iteraera n 1 Tamuera 9–10 ao 16 (taraa raoi 9:15–17; 10:1–12; 16:1–13). Tarai rongorongo ae na buokiko n oota bwa tera nanon te “weteaki mairoun te Atua, man te taetae ni burabeti” i nanon ana Ekaretia ni boong aikai (Taekan te Onimaki 1:5). Ko kona n iangoa arom n riki bwa te tia kairiiri ni kanakoa te wewete (Tamuera), te aomata are e a tia ni weteaki (Tauro ao Tawita), ao aomata ake a weteaki bwa a beku ibukiia (Iteraera). Tera ae ko reiakinna man ana taeka ao aia mwakuri i nanon mwakoro aikai?

Iangoa aron taraan aki kakarongoaan Tauro n 1 Tamuera 10, e kamiimi warekan arona n “rarawa” ao te “nanomatoa” i mwiin rikina n uea (1 Tamuera 15:23). “Bukin tera n am iango ngkai e riki aei? N 1 Tamuera 13:5–14, tera anuana ao aroarona ae ko nooria bwa e kairia nakon bwakana?

In 1 Tamuera 15, ko na wareka taekan te tua mairoun te Uea are e aki ongeaaba iai Tauro ibukina bwa e taku irouna bwa iai bukina ae raoiroi. N reiakina aron buakakan ana rinerine Tauro, taraa mwakoro 22 ao onea mwiin taeka aika “anga karea” ao “neneaia tiibu” ma bwaai aika a taraa n raoiroi ma aki riki kakaawaki nakon ongoraean ao te ongotaeka nakon te Uea. Ko kanga n tia ni kakabwaiaaki ngke ko moanbwaia moa nanon te Uea i nanon maium?

Ko a tia ni karaoa am babaire ae nako man “tarataraan tinanikun” te bwai ke temanna, ao n kunea bwa ko kaairua? Ke tao ko a tia ni kana te bwai ae aki rangi n tamaroa ma aron taraakina. Ke tao ko motika taekan temanna n ae aki riai.

Ngke e kakaea te uea ae boou ibukin Iteraera Tamuera, e reireinna te Uea te kawai ae tamaroa riki. Wareka taekana n 1 Tamuera 16:6–7, ao ni iangoa karaoan rinanin aia kawai aomata n motika taekaia tabeman man “tarakiia.” Ko kona ni kunei katooto tabeua n ana rongorongo Unimwaane Christophe G. Giraud-Carrier “Ngaira Bon Natina” (Riaona, Nob. 2023, 114–16). Tera ae nanonaki n taraa “are n te nano,” n aron are e karaoia te Uea? (1 Tamuera 16:7). Ko konaa ni kunei katooton aio, naba, n ana rongorongo Unimwaane Giraud-Carrier. Ko na bae n kona n iangoi taai tabeua ngke e aki tarai tinanikuia aomata n taraakia te Tia Kamaiu. (N te katooto, taraa Mareko 12:41–44; Ruka 5:1–11; 19:1–9; Ioane 4:5–30; Mote 6:31–36.) Tera ae ko reiakinna man banna ni katooto aikai?

Ko na kanga n iriira ana banna ni katooto te Tia Kamaiu n te kawai ae ko nooria iai tabeman—ao bon ngkoe? E kanga karaoan aio n roota arom n rereitaki ma tabeman? Iangoa tuangakin temanna aron te raoiroi ae ko nooria i nanoia.

Taraa naba Ulisses Soares, “Tarira ao Mwaanera i Nanon Kristo,” Riaona, Nob. 2023, 70–73.

• Ngkai ko wareka 1 Tamuera 8 ma am ataei, buokiia ni kunei bukina ngkai Tamuera e tuangiia Iteraera taekan karekean te uea bwa te iango ae buakaka. Bukin tera ngkai e tamaroa bwa ti na karika Iesu Kristo bwa ara uea? Tao kam kona ni bootaki ni karaoa te baunuea man te beebwa ao kabutia ni bwainna ao n tibwaa te bwai ae ti kona ni kaotia bwa ti tangira Iesu bwa ara Uea. (Taraa naba Ieremia 23:5; Reirei ao Berita aika Tabu 45:59.)

• Rongorongon te Atua n rineiia Tauro ao Tawita n riki bwa taian uea e kona ni buokiia am ataei n oota bwa a kanga aomata ni weteaki bwa a na beku inanon te Ekaretia n boong aikai man te kaotioti. Reireiniia karaki aikai, ko kona n korei bwaai aika a riki man karaki aikai i aon te beebwa, ao a konaa am ataei ni karinaniia n etina raoi ngkai kam bootaki ni wareka taekan te koroboki aika tabu (taraa naba “Young David” i nanon Karaki man te O Tetemanti, 110–11). I mwiina kam kona n marooroa taekan taai ngke e kakabwaiako te Atua ma mwaakan te tamnei n kakoroa nanon katabeam ke weteakim (taraa 1 Tamuera 10:9–10).

  

  1:16

• Aio naba te tai ae e tamaroa n reireia ami ataei te kanimaua n Taekan te Onimaki. Tuangiia bwa ko kanga ni karekea weteakim n te Ekaretia. Ko na kanga n ataia bwa ko weteaki iroun te Atua?

• Te reirei ma te bwai e kona ni buokiia ami ataei n oota n te reirei n 1 Tamuera 16:7. Te katooto, ko kona ni kaota nakoia amwarake tabeua ke te boki ma nirana ke kunna mai tinaniku are aki boraoi ma etin kanoana. Tera ae anga 1 Tamuera 16:7 ao te bwai ni kamataata n te reirei bwa ti na kanga n taraira ao aomata tabeman? Anenea kunan te tangira ae katuruturua te reirei aei, n aron “Love One Another” (Aia Boki n Anene Ataei, 136).

  Kabongana te reirei ma bwaai ni kabotau. Ngkana iai te bwai ae ana nooria ke n riinga am ataei n irekereke ma ana reirei te euangkerio, a na kona n ururingnga riki. Te katooto, wareka 1 Tamuera 16:7 ma ngaiia, ko konaa n tuangiia bwa a na buokiko ni kunei katooto ni kamatataan te iango are ti riai ni kataia n nooria n ai aron ana taratara te Uea—man tataraan “te nano”—nakon te motikitaeka ae nako man “taraan tinanikun te aomata.”

• Kam kona n tibwai taneiai ngkoe ma am ataei ake ko a tia n reiakinna bwa bukin tera ko riai n “taratara te nano,” tiaki ti “tinanikun taraana” (kiibu 7). Kam kona naba n ikaairuoruo ni marooro iroumi taekan anuan maiu aika a raraoi ake kam kaai n nooria i nanomi.