Warekaia Iteraera 11–14; 20–24; 27

Ni Warekaia Iteraera 11:11–17, 24–29, ataakin te kangaanga are e kaitara ma ngaia Mote ao katokana are e baireia te Atua. N am iango ao tera ae nanonna Mote ngke e taku bwa e kantaningaia “a bia riki ni burabeti ana aomata Iehova ni kabaneia”? (te kibu 29). Ngkai ko iangoa raoi te titiraki aei, tarai kaekaia ake a kona n reke n ana rongorongo Beretitenti Russell M. Nelson“Te Kaotioti ibukin te Ekaretia, Te Kaotioti ibukin Maiura” (Riaona,, Meei 2018, 93–96).

Taekinana bwa ti kona ni karekei ni kabane kaotioti, ma, e aki nanonaki bwa ti kona ni kabane ni kairiia ana aomata te Atua n aron Mote. Te bwai ae riki i nanon Warekaia Iteraera 12 e kamataata raoi aio. Tera totokoan kangaanga ae ko kunea n te mwakoro aei? Tera ae ko namakinna bwa e tangiria te Uea bwa kona mataata n te kaotioti ae onoti ao iriran Ana burabeti?

Taraa naba 1 Nibwaai 10:17; Reirei ao Berita aika Tabu 28:1–7; Dallin H. Oaks, “Two Lines of Communication,” Liahona,, Nobembwa 2010, 83–86.

Tabeman aomata ana bae ni miimi n reiakinna bwa Mote, te tia kairiiri ae rangi ni korakora are e tei i matan Barao ao ni karaoi kakai aika a kakamataku ma mwaakan te Uea, e bon rang naba “n nimamanei” (Warekaia Iteraera 12:3). Tera ae nanonaki n te nimamanei? Ko kona ni rinanoa ana kabwarabwara Unimwaane David A. Bednar “Bwaina te Nimamannei ao te Nanorinano” (Riaona, Meei 2018, 30–33) ke i nanon “Meek, Meekness” i nanon te Kairi nakon Koroboki aika Tabu (Gospel Library).

Tera ae ko reiakinna man ana katooto Mote n nimamanei i nanon te Otinako 18:13–25; Warekaia Iteraera 11:26–29; Warekaia Iteraera 12; Ebera 11:24–27; ao Mote 1:10–11? Ko kona naba n iangoa raoi aron te Tia Kamaiu n kaota te nimamannei (taraa Mataio 11:29; 27:11–14; Ruka 22:41–42; Ioane 13:4–5). Tera ae a rereiniko kiibu aikai?

Ngkai ko wareka Warekaia Iteraera 13–14, kataia iangoia bwa ko mena n te tabo are a mena iai tenaan Iteraera. Bukin tera n am iango ngkai a tangiria ni kan “okira Aikubita”? (Warekaia Iteraera 14:3). Ko na kanga ni kabwarabwara te “nano” ae kaokoro are e reke iroun Kareba? (Warekaia Iteraera 14:24). Tera ae kakukureiko ibukin ana onimaki Kareba ao Iotua, ao ko na kanga ni kamwakuri aia katooto nakon kangaanga ake ko kaitara ma ngaai?

Burabeti n ana Boki Moomon a ataa te karaki are e koreaki ni Warekaia Iteraera 21:4–9 ao n ataa bonganana n te aro n tamnei. Wareka aia reirei ibukin te karaki aei n 1 Nibwaai 17:40–41; Aramwa 33:18–22; ao Ereman 8:13–15. Aikai tabeua titiraki bwa kona n iangoia raoi:

• Tera ae kona n tei ibukina te naeta te buraati?

• Tera ae e tei ibukina ana tena te naeta?

• A riai tibun Iteraera n “[taraa] te naeta are te burati” (Warekaia Iteraera 21:9) bwa aonga ni kamaiuaki. Bukin tera n am iango ngkai tabeman aomata a rawa n taraia? Iai te bwai ae ai aron aei ae tia n riki nakoim?

• Tera ae ko namakinna bwa e anaaki nanom iai bwa ko na karaoia riki n “taraa natin te Atua ma te onimaki” ao ko na kamaiuaki? (Ereman 8:15).

Warekan rongorongo ikai a kona ni kauringko taai tabeua i nanon koroboki aika tabu ngke a tangiria aomata n kabanei nanoia iroun Kristo. Te katooto, kabotaua rongorongo n Warekaia Iteraera 21:4–9 ma Mataio 14:25–31 ao 1 Nibwaai 8:24–28 (tarai naba tamnei ae ni kabanean kanoan te reirei n te wiiki aei). Tera ae kona ni kamwawaira mairoun Kristo? E kanga ni kakabwaiaiia aomata ake a tiku ni kabanea nanoia i Rouna?

Taraa naba “Jesus, the Very Thought of Thee” (Hymns, no. 141).

Ngke Baraka, Uean Moaba, e ataia bwa a na nang kaoti kaain Iteraera, e wewetea Baraam, te mwaane ae kinaaki n te uawi e anga kakabwaia ao te kamaraia. E tangiria Baraka bwa e na kamaraiaia Iteraera. Ataia bwa e kanga Baraka ni kataia ni kaumaka Baraam (taraa Warekaia Iteraera 22:5–7, 15–17), ao iangoi taian kariiri ake ko kaitara ma ngaai ni kaitara ana kantaninga te Atua. Tera ae kakukurei n ana kaeka Baraam n Warekaia Iteraera 22:18, 38; 23:8, 12, 26; 24:13? Ae kananokawaki, bwa e rootaki Baraam ao ni kamwaneia Iteraera (taraa Warekaia Iteraera 31:16; Iuta 1:11). Iangoia bwa ko na kanga n teimatoa ni kakaonimaki nakon te Uea n aki tabe man aia kairoro tabeman.

• Tuangiia am ataei ngkana a uring tabeua Ana kakai te Uea ake e karaoia ni buokiia Iteraera (Taraa “The Plagues of Egypt” ao “The Passover” n Karaki man te O Tetemanti, 67–74). Ngkanne ko kona ni kakimototoa ibukiia Warekan Iteraera 11:4–10, katereterea bwa te Uea e aki kukurei ibukina bwa a ngurengure Iteraera. Tera kakabwaia ae ti mwaninga n taai tabetai?

• Ngkana kam anene ke ni kakauongo nakon te anene ibukin te kakaaitau, n aron “Wareki Am Bai” (Anene n Taromauri, nambwa. 241), a kona am ataei n korea tamnein taian kakabwaia are e a tia n anganiia te Uea.

• Ni kabwarabwara Warekaia Iteraera 12, ko kona n tuangiia am ataei bwa e aki kukurei te Uea iroun Aaron ao Miriam, tarin ao mwanen Mote. Kaoiia bwa a na wareki Warekaia Iteraera 12:1–8 ni kakaea bwa bukin tera. Iangoa kabonganaan Gospel Art Book ni buokiia ami ataei bwa a na kunei katotooia aomata i nanon koroboki aika tabu ake a karinea ana burabeti te Uea ao n tia ni kakabwaiaaki. Ti na kanga ni kakabwaiaaki ngkana ti iriiria ana burabeti te Uea?

• Ko kona ni kabongana “Mote ao te Naeta ae te Buraati” n Karaki man te O Tetemanti, 83–84, ni buokiia am ataei n reiakinna bwa tera ae riki n Warekaia Iteraera 21:6–9. E kanga n riki te naeta ae buraati bwa ai aron Iesu Kristo? (taraa Ioane 3:14–15). A na kona ni kukurei ami ataei ni karaoan te naeta man te beebwa ao ni korea i aona tabeua bwaai ake a kona ni karaoia n “taraa natin te Atua ma te onimaki” (Ereman 8:15).

  

  1:2

• Ataei ake a ikawai riki a kona n rinea teuana man koroboki aika tabu aikai ao n tibwaia bwa tera reke n otaia n te karaki: 1 Nibwaai 17:41; Aramwa 33:18–20; Ereman 8:13–15; Reirei ao Berita aika Tabu 6:36.

• Kamataata Warekaia Iteraera 22:1–18 ibukia ami ataei, katuruturua bwa e kanga Baraam n rawa ni katekebuakaia ana aomata te Atua, e ngae ngke Baraka, uean Moaba, e na anganna te karineaki ao te kaubwai. I mwina ko kona n tuangiia ataei bwa a na kakaai i nanon kiibu aikai kibuntaeka are a namakina kaotan nanomaakan Baraam n iriira te Atua: Warekaia Iteraera 22:18; 23:26; 24:13. Tao ko kona ni kaoiia ataei n anaa teuana te kibuntaeka ae a tangiria ao koreia iaon te kaati ni buokiia ni uringnga n ogotaeka nakon te Uea.