Te Tabaenako ao Anga karea

Ngke e tua te Atua nakon Mote bwa e na katea te tabaenako n aia tabo ni kaembwa tibun Iteraera, E kaota bukin oin kateana: “bwa I aonga ni maeka i buakoia” (Te Otinako 25:8). Inanon te tabaenako, maekan te Atua ikekei e oneaki mwiina n aake ni berita—te bwaoki te kai, ae niniraki n te koora, ae kanoana te reekoti ae koreaki ae taekan ana berita te Atua ma ana aomata. E kawakinaki te ati n te ruu, ae te kabanea n tabu, ae kaokoroaki man nikiran ni kabane te tabaenako man te rabuna. Te rabuna aei bon te kanikinaa ibukin maenakora man mweengan te Atua ibukin te Bwaka, n aron naba kawaira n oki Nakoina rinanon te Tia Kamaiu.

Irarikin Mote, ti bon tii ataa temanna te aomata are e kona n rin n te “tabo ae moanibaan te tabu” (Te Otinako 26:34)—te ibonga ae rietaata. N aroia ibonga ake tabeman, e riai moa n tebokaki ao ni kabiraki ao ni kunikaiaki n te kunikai ae tabu ae kanikinaean nakoana. Tetaina n te ririki, n te bong are e aranaki bwa Bongin te Mwakuri ni Kamaiu, e na anga karea te ibonga ae rietaata n tei ibukiia aomata imwaain rinna n tii ngaia inanon te tabaenako. N te rabuna, e kabuoki karea aika boiarara. Te bubu ae boiarara ae waerake nako karawa e tei ibukin aia tataro aomata ae waerake nakon te Atua. Ngkanne te ibonga ae rietaata, e uota raraan te man are te bwai n anga karea, e na mwananga rinanon te rabuna ao n roko n ana kaintokanuea te Atua, ae te kanikina ibukin te aati ni berita

N ataakina bwa tera am atatai ibukin Kristo ao tabena n ana babaire Tamana are i Karawa, ko kona n nooria bwa e kanga te tabaenako ni kainetiira nakon te Tia Kamaiu? N aron te tabaenako ao te ati ni berita inanona, e tei ibukin maekan te Atua i buakoia Ana aomata, Iesu Kristo bon maekan te Atua i buakoia Ana aomata. N aron te ibonga ae rietaata, Iesu Kristo bon te Tia Raoi imarenara ma te Atua te Tama. E rinanon te rabuna bwa e na karekea te raoi ibukira man raoiroin raraana ae bon oin Ana anga karea.

Ko na bae ni kinai tabeua aron taraan ana tabaenako Iteraera, ai moarara riki ngkana ko a tia n roko n te tembora ni karekei oin am otenanti. Te tembora bon ana auti te Uea—Ana tabo ni maeka ibuakoia Ana aomata. N aron te tabaenako ae te tabo ae te kabanea n tabu, te ruu ae te tiretio inanon te tembora e tei ibukin maekan te Atua. N rin inanona, ti riai moa n tebokaki ao ni kabiraki. Ti kabonganai kunnikai aika tabu. Ti karaoi berita aika tabu. Ti tataro n te baonikarea are a waerake ara tataro mai iai nakon te Atua. Ao n te kabane ti a rin rinanon te rabuna nakon mweengan te Atua.

Tao te kabanea ni kakaawaki n titebo imarenan tembora aika ngkai ao te tabaenako n taai ake ngkoa bwa ni kauoua, ngkana e oota raoi te aba iai, e kakorakora ara onimaki iroun Iesu Kristo ao ni kaoniira n te kakaitau ibukin Ana anga karea ni kamaiu. E tangiriia natina ni kabane te Atua bwa a na rin inanon Ana maeka; E tangira “te abanuea ibukia ibonga” ao ibonga aine (Te Otinako 19:6). Ma ara bure a tukiira man reken te kakabwaia anne, bwa “bon akea te bwai ae bareka ae kona ni maeka ma te Atua” (1 Nibwaai 10:21). Ngaia are te Atua te Tama e kanakomaia Iesu Kristo, “mataniwia ibonga i bukini bwai aika raraoi aika nangi roko” (Ebera 9:11). E bwenaua te rabuna ibukira ao ni kakorakoraia ni kabane ana aomata te Atua “n aki maku ni kania te kaintokanuea are e akoaki te aba iai, ti aonga ni karekea te akoaki” (Ebera 4:16).

N te bong aei, oin te kantaninga ibukin te tembora e riaon riki karekean te karietataaki i bon ibukira. Imwiin karekean oin ara otenanti ao karaoan berita aika tabu ma te Atua, ti kona n tei bwa taan bonomwii ibukiia ara bakatibu ao ni karekei otenanti ibukiia. N teina, ti kona n riki bwa aekan te ibonga ae rietaata are ngkoa—ao te Kabanea n Rietaata n Ibonga man Korakora—kaukan te kawai nakon ana maeka te Atua ibukiia tabemwaang.

Te reirei ibukin te mwakuri ni kamaiu ao te raoiakinaki a reiakinaki ma te mwaaka n te mwakuri n anga karea ibukiia maan, are e kakaraoaki mai imwaaina n ana tua Mote. A anga aia karea Atam ao Ewa. A oota n te kanikina ae taekan ana anga karea te Tia Kamaiu. Ao a reiakina aei nakoia natiia.

Kanikinaean te anga karea ibukin te man e taraa ni karekea te namakin ae e kamaraki n ana Bong ni Kamaiu Iteraera n taai ake ngkoa (“Yom Kippur” n te taetae n Ebera). Kainnanoan te bukamaru aei ni katoa ririki e kabwarabwaraaki n Nakoaia Ibonga 16:30: “Bwa e na karaoaki kabwaran ami bure n te bongi naba aei, ni kaitiakingkami, kam na itiaki man ami bure ni kabane i matan Iehova.” Aei e butimwaea te Atua bwa e na teimatoa ni mena i buakoia aomata. E koro bukin te mwakuri ni kamaiu aei rinanon kakaokoron te bukamaru. N teuana mai buakon aikai, e tiringaki te kooti ibukin aia bure aomata, ao te ibonga ae rietaata e anaa raraan te kooti nakon te tabo ae te kabanea n tabu. Imwiina, e katokaa baina te ibonga i aon te kooti ae maiu ao ni kaoti aia bure tibun Iteraera—kanikinaean ae a kamwaingaki buure akanne nakon te kooti. Imwiina ao e kanakoaki te kooti man ana kaembwa Iteraera.

Inanon bukamaru n taromauri aikai, te kooti e tei ibukin Iesu Kristo, n tei ibukin aia bure aomata. Akea te bure ae kariaiakaki n ana maeka te Atua. Ma irarikin are a na kamaunaaki ke ni kakionakoaki taan bure, e a tia te Atua ni katauraoa te kawai riki teuana—e na tiringaki te kooti ke ni kanakoaki n onea mwiin anne. “Ao te kooti e na uoti nako aia buakaka ni kabane i aona” (Nakoaia Ibonga 16:22).

Bukamaru aikai a kotea te kawai are e a tia ni katauraoia te Uea ni kaokira nakon mweengana—Iesu Kristo ao Ana Mwakuri ni Kamaiu. Te Tia Kamaiu e “anai rawawatara, ao e uouoti nanokawakira,” riki “ara bure ni kabaneira” (Itaia 53:4, 6). E tei n ara tabo, e anga maiuna ibukin kabwaraan buure, ao i mwiina e tokanikai iaon te mate rinanon Mangautina. Ana anga karea te Tia Kamaiu bon “te kabanea n anga karea ae kakannato; eng, ae tiaki te karea ae te aomata, ao tiaki naba te man, ao tiaki naba aekaia maan ni kiba nako; ba e na riai n tiaki te anga karea n aomata ma e na riai n te anga karea ae akea tiana ao akea tokina” (Aramwa 34:10). Bon Ngaia kakoroan bukin bwaai ni kabane n te anga karea n taai ake ngkoa are kainetaki nakoina.

Ibukin aei, imwiin bwaninin ana anga karea, E taku, “Kam na aki manga oki n uota kawawaean te raraa nakoiu; eng, ami karea … a riai n toki. … Ao kam na anganai bwa ami karea te nano ae uruaki ao te tamnei ae raraoma” (3 Nibwaai 9:19–20).

Ngaia ngkana ko kunei karaki n te O Tetemanti ibukin te anga karea ao te umwa (ke imwiina, te tembora)—ao e na rang ni mwaiti ae ko na kunea— uringnga bwa oin ana kantaninga ni kabane n te moan tai bon kakorakorakin am onimaki iroun te Mesia, ae Iesu Kristo. Reita are ko warekia ao n reiakinna ma am taromauri i nanon Umwana. Kariaia bwa kona bita nanom ao am iango Nakoina. Iangoa te bwai ae E a tia ni karaoia ni uotiko ni kaokiko nakon mweengan te Atua—ao tera ae ko na karaoia bwa kona Iriiria.