« ថ្ងៃទី១៨–២៤ ខែឧសភា ‹ ចូរឲ្យមានកម្លាំង និងចិត្តក្លាហានចុះ › » ៖ យ៉ូស្វេ ១–៨; ២៣–២៤ ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរសញ្ញាចាស់ ឆ្នាំ២០២៦ ( ឆ្នាំ២០២៦ )
« ថ្ងៃទី១៨–២៤ ខែឧសភា ‹ ចូរឲ្យមានកម្លាំង និងចិត្តក្លាហានចុះ › » ចូរមកតាមខ្ញុំ ៖ ព្រះគម្ពីរសញ្ញាចាស់ ឆ្នាំ២០២៦
Moses Ordaining Joshua [ ម៉ូសេកំពុងតែងតាំងយ៉ូស្វេ ] ដោយ ដារ៉ែល ថូម៉ាស ( សេចក្តីលម្អិត )
ថ្ងៃទី១៨–២៤ ខែឧសភា ៖ « ចូរឲ្យមានកម្លាំង និងចិត្តក្លាហានចុះ »
យ៉ូស្វេ ១–៨; ២៣–២៤
ជាច្រើនជំនាន់បានកន្លងផុតទៅ ប៉ុន្តែការសន្យារបស់ព្រះអម្ចាស់ហៀបនឹងបានបំពេញហើយ ៖ គឺនៅទីបញ្ចប់ កូនចៅអ៊ីស្រាអែលបានគ្រងដែនដីសន្យាទុកជាមរតក ។ ប៉ុន្តែពួកគេបានជួបនឹងទន្លេយ័រដាន់ ក្រុងយេរីខូរ និងប្រជាជនដ៏ខ្លាំងក្លាដែលបានបដិសេធព្រះអម្ចាស់ ( សូមមើល នីហ្វៃទី១ ១៧:៣៥ ) ។ ហើយពួកគេនឹងត្រូវប្រឈមមុខនឹងរឿងទាំងអស់នេះដោយគ្មានអ្នកដឹកនាំជាទីស្រឡាញ់របស់ពួកគេឡើយគឺម៉ូសេ ។ ស្ថានភាពនោះអាចធ្វើឲ្យពួកសាសន៍អ៊ីស្រាអែលមួយចំនួនមានអារម្មណ៍ទន់ខ្សោយ ហើយភ័យខ្លាច ប៉ុន្តែព្រះអម្ចាស់បានមានបន្ទូលថា « ចូរឲ្យមានកម្លាំង និងចិត្តក្លាហានចុះ » ។ តើពួកគេមានហេតុផលអ្វីខ្លះទើបមានចិត្តក្លាហាន? វាពុំមែនដោយសារកម្លាំងរបស់ពួកគេផ្ទាល់នោះទេ—ឬមិនមែនដោយសារតែកម្លាំងរបស់ម៉ូសេ ឬយ៉ូស្វេដែរ—ប៉ុន្តែដោយសារ « ព្រះយេហូវ៉ាជាព្រះនៃឯង ទ្រង់គង់ជាមួយនៅកន្លែងណាដែលឯងទៅផង » ( យ៉ូស្វេ ១:៩ ) ។ នៅពេលយើងមានឧបសគ្គ និងការលំបាកផ្ទាល់ខ្លួនដែលត្រូវពុះពារ នោះរឿងអស្ចារ្យអាចកើតឡើងនៅក្នុងជីវិតរបស់យើង ដោយសារតែ « ព្រះយេហូវ៉ានឹងធ្វើការអស្ចារ្យនៅក្នុងពួក [ យើង ] » ( យ៉ូស្វេ ៣:៥ ) ។
សម្រាប់ទិដ្ឋភាពទូទៅស្ដីពីគម្ពីរយ៉ូស្វេ សូមមើល « យ៉ូស្វេ » នៅក្នុងសេចក្ដីណែនាំដល់បទគម្ពីរទាំងឡាយ ។
គំនិតសម្រាប់ការរៀនសូត្រនៅឯគេហដ្ឋាន និងនៅឯសាសនាចក្រ
យ៉ូស្វេ ១:១–៩
ព្រះនឹងគង់ជាមួយខ្ញុំ បើខ្ញុំព្យាយាមស្មោះត្រង់ចំពោះទ្រង់ ។
សូមនឹកស្រមៃថា តើវានឹងមានសភាពបែបណាដែរ បើយ៉ូស្វេត្រូវបានហៅជំនួសម៉ូសេនោះ ។ សូមកត់សម្គាល់ពីអ្វីដែលព្រះអម្ចាស់បានមានបន្ទូលនៅក្នុង យ៉ូស្វេ ១:១–៩ ដើម្បីលើកទឹកចិត្តលោក ។ សូមគិតពីឧបសគ្គធំៗដែលបងប្អូនជួបប្រទះ តើអ្វីទៅនៅក្នុងខគម្ពីរទាំងនេះដែលផ្ដល់ភាពក្លាហានដល់បងប្អូន ?
ឈ្មោះថា យ៉ូស្វេ ( Yehoshua ឬ Yeshua ជាភាសាហេរព្រើរ ) មានន័យថា « ព្រះយេហូវ៉ាជួយសង្រ្គោះ » ។ ហើយព្រះនាម ព្រះយេស៊ូវ ចេញមកពីពាក្យ Yeshua ។ ដូច្នេះ នៅពេលបងប្អូនអានអំពីយ៉ូស្វេ សូមពិចារណាអំពីតួនាទីរបស់លោកក្នុងការដឹកនាំកូនចៅអ៊ីស្រាអែលឆ្លងកាត់ទន្លេយ័រដាន់ និងចូលទៅក្នុងដែនដីសន្យា ។ តើបេសកកម្មរបស់លោកស្រដៀងទៅនឹងអ្វីដែលព្រះគ្រីស្ទធ្វើសម្រាប់យើងយ៉ាងដូចម្តេច ?
យ៉ូស្វេ ១:៨
ព្រះបន្ទូលរបស់ព្រះអាចធ្វើឲ្យផ្លូវរបស់យើងរីកចម្រើន ។
នៅពេលដែលទ្រង់បានលើកទឹកចិត្តយ៉ូស្វេ ព្រះអម្ចាស់បានប្រទានឱវាទនៅក្នុង យ៉ូស្វេ ១:៨ អំពីបទគម្ពីរ ឬ « ព្រះបន្ទូលនៃក្រឹត្យវិន័យ » ។ ដោយគិតពីការទទួលខុសត្រូវដ៏ធ្ងន់របស់យ៉ូស្វេ ហេតុអ្វីឱវាទនេះប្រហែលជាមានប្រយោជន៍ជាពិសេស ?
នៅពេលព្រះអម្ចាស់អញ្ជើញយើងឲ្យអានព្រះគម្ពីរ ទ្រង់តែងតែប្រើពាក្យដែលមានហួសពីការគ្រាន់តែអាន ។ ទ្រង់ក៏សន្យានូវពរជ័យដ៏អស្ចារ្យផងដែរ ។ តារាងខាងក្រោមអាចជួយបងប្អូនរកឃើញការអញ្ជើញ និងពរជ័យដែលបានសន្យាទាំងនេះ ៖
|
ការអញ្ជើញ |
ពរជ័យដែលបានសន្យា | |
|---|---|---|
|
យ៉ូស្វេ ១:៨ | ការអញ្ជើញ ស្មឹងស្មាធទាំងយប់ទាំងថ្ងៃ | ពរជ័យដែលបានសន្យា
|
ការអញ្ជើញ
| ពរជ័យដែលបានសន្យា
| |
ការអញ្ជើញ
| ពរជ័យដែលបានសន្យា
| |
ការអញ្ជើញ
| ពរជ័យដែលបានសន្យា រីកចម្រើននៅលើដែនដី | |
ការអញ្ជើញ
| ពរជ័យដែលបានសន្យា
| |
ការអញ្ជើញ
| ពរជ័យដែលបានសន្យា
| |
|
( រ័សុល អិម ណិលសុន « Hear Him » Liahona ខែឧសភា ឆ្នាំ២០២០ កថាខណ្ឌចុងក្រោយនៅលើទំព័រ ៨៩ | ការអញ្ជើញ
| ពរជ័យដែលបានសន្យា
|
តើព្រះអម្ចាស់បានបំពេញសេចក្តីសន្យាទាំងនេះនៅក្នុងជីវិតរបស់បងប្អូនដោយរបៀបណា ? ឥឡូវនេះប្រហែលជាពេលល្អដើម្បីវាយតម្លៃទម្លាប់សិក្សាព្រះគម្ពីររបស់បងប្អូនហើយ ។ តើអ្វីដែលកំពុងធ្វើបានល្អ ? តើបងប្អូនមានអារម្មណ៍ការបំផុសគំនិតឲ្យធ្វើអ្វី ដើម្បីមានបទពិសោធន៍ដ៏មានអត្ថន័យបន្ថែមទៀតជាមួយនឹងព្រះបន្ទូលនៃព្រះ ?
សូមមើលផងដែរ « ពេលខ្ញុំស្វែងយល់គម្ពីរពិសិដ្ឋ » ទំនុកតម្កើង ល.រ. ១៥៩ ។
យ៉ូស្វេ ២
ទាំងសេចក្ដីជំនឿ និងការងារគឺចាំបាច់ចំពោះសេចក្ដីសង្គ្រោះ ។
ពួកគ្រីស្ទាននៅសម័យព្រះគម្ពីរសញ្ញាថ្មីបានឃើញរ៉ាហាបជាគំរូមួយនៃអនុភាពទាំងសេចក្ដីជំនឿ និងការងារ ( សូមមើល ហេព្រើរ ១១:៣១; យ៉ាកុប ២:២៥ ) ។ នៅពេលបងប្អូនអាន យ៉ូស្វេ ២ សូមពិចារណាពីតួនាទីនៃសេចក្ដីជំនឿ និងការងាររបស់រ៉ាហាបនៅក្នុងការសង្គ្រោះខ្លួននាង គ្រួសារនាង និងអ្នកស៊ើបការសម្ងាត់សាសន៍អ៊ីស្រាអែល ។ តើការណ៍នេះបង្រៀនបងប្អូនអ្វីខ្លះអំពីរបៀបដែលសេចក្ដីជំនឿរបស់បងប្អូនលើព្រះគ្រីស្ទ និងការងាររបស់បងប្អូនអាចជះឥទ្ធិពលដល់ខ្លួនបងប្អូន និងមនុស្សដទៃ ?
រ៉ាហាបនៅក្បែរបង្អួច ។ Waiting for the Promise [ កំពុងរង់ចាំការសន្យា ] ដោយ អេលស្ពេធ យ៉ង់ ( សេចក្តីលម្អិត )
យ៉ូស្វេ ៣–៤
ដោយមានសេចក្ដីជំនឿលើព្រះយេស៊ូវគ្រីស្ទ ខ្ញុំអាចដកពិសោធន៍នូវ « ការអស្ចារ្យ »របស់ព្រះ ។
ព្រះអម្ចាស់បានធ្វើការអស្ចារ្យក្នុងចំណោមរាស្ដ្រទ្រង់ នៅពេលទ្រង់បានដឹកនាំពួកគេទៅកាន់ដែនដីសន្យា ហើយទ្រង់អាចធ្វើដូចគ្នានឹងបងប្អូនដែរ ។ ទាំងនេះគឺជាសំណួរមួយចំនួនដើម្បីណែនាំការសិក្សារបស់បងប្អូន យ៉ូស្វេ ៣–៤ ៖
-
តើបងប្អូនគិតថាហេតុអ្វីពួកសាសន៍អ៊ីស្រាអែលត្រូវការញែកខ្លួនពួកគេឲ្យបរិសុទ្ធពីមុនពួកគេឆ្លងទន្លេយ័រដាន់ ? ( សូមមើល យ៉ូស្វេ ៣:៥ ) ។
-
សូមកត់ចំណាំថា ទឹកទន្លេបានញែកចេញបន្ទាប់ពី « បាតជើងរបស់ពួកសង្ឃ … ចុះទៅក្នុងទឹកនៅមាត់ទន្លេ » ( យ៉ូស្វេ ៣:១៣, ១៥ ) ។ ហេតុអ្វីការណ៍នោះមានសារៈសំខាន់ ?
-
ព្រឹត្តិការណ៍សំខាន់ៗជាច្រើនទៀតដែលបានកើតឡើងនៅឯទន្លេយ័រដាន់ សូមមើល ពង្សាវតារក្សត្រ ទី២ ២:៦–១៥; ៥:១–១៤ និង ម៉ាកុស ១:៩–១១ ។ តើបងប្អូនមើលឃើញព្រឹត្តិការណ៍ទាំងនេះមានទាក់ទងគ្នាអ្វីខ្លះ ?
-
តើព្រះអម្ចាស់បានធ្វើ « ការអស្ចារ្យ » នៅក្នុងជីវិតបងប្អូនយ៉ាងដូចម្តេច ? ( យ៉ូស្វេ ៣:៥ ) ។ តើបងប្អូនអាចដកពិសោធន៍—ឬស្គាល់—កិច្ចការអស្ចារ្យទាំងនោះកាន់តែញឹកញាប់យ៉ាងដូចម្តេច ? ( ឧទាហរណ៍ សូមមើល យ៉ូស្វេ ៣:១៧ ) ។
យ៉ូស្វេ ៦–៨
ការគោរពប្រតិបត្តិអញ្ជើញព្រះចេស្តារបស់ព្រះចូលក្នុងជីវិតរបស់ខ្ញុំ ។
យ៉ូស្វេ ៦–៨ ទាក់ទងនឹងការប្រយុទ្ធគ្នានៅលើដែនដីនៃទីក្រុងយេរីខូរ និងក្រុងអៃយ ។ នៅពេលបងប្អូនអានជំពូកទាំងនេះ សូមពិចារណាអំពីរបៀបដែលបងប្អូនប្រយុទ្ធនឹងការល្បួង ( ឧទាហរណ៍ សូមមើល យ៉ូស្វេ ៧:១០–១៣ ) ។ តើបងប្អូនបានរៀនអំពីរបៀបដែលព្រះអាចជួយបងប្អូន និងអ្វីដែលបងប្អូនត្រូវធ្វើដើម្បីទទួលបានព្រះចេស្តារបស់ទ្រង់អ្វីខ្លះ ? ឧទាហរណ៍ តើអ្វីដែលធ្វើឲ្យបងប្អូនចាប់អារម្មណ៍អំពីសេចក្តីណែនាំរបស់ព្រះអម្ចាស់សម្រាប់ការយកក្រុងយេរីខូរ ? ( សូមមើល យ៉ូស្វេ ៦:១–៥ ) ។ ប្រហែលដំណើររឿងនៅក្នុង យ៉ូស្វេ ៧ នឹងបំផុសគំនិតបងប្អូនឲ្យកំណត់បើ « មានរបស់ដែលសម្រាប់បំផ្លាញ » នៅក្នុងជីវិតបងប្អូនដែលបងប្អូនត្រូវយកចេញ ( យ៉ូស្វេ ៧:១៣ ) ។
យ៉ូស្វេ ២៣–២៤
« ចូររើសយកព្រះណាដែលឯងចង់គោរពប្រតិបត្តិតាមនៅថ្ងៃនេះចុះ » ។
ការបង្រៀនចុងក្រោយរបស់យ៉ូស្វេទៅកាន់ពួកសាសន៍អ៊ីស្រាអែលនៅក្នុង យ៉ូស្វេ ២៣–២៤ រួមបញ្ចូលការព្រមានសំខាន់ៗ ឱវាទ និងពរជ័យដែលបានសន្យា ។ ប្រហែលជាបងប្អូនអាចធ្វើបញ្ជីនៃអ្វីដែលបងប្អូនរកឃើញ ។ ដោយពិចារណាអ្វីៗដែលសាសន៍អ៊ីស្រាអែលបានឆ្លងកាត់ តើបងប្អូនគិតថា ហេតុអ្វីយ៉ូស្វេបានជ្រើសរើសដើម្បីប្រាប់ពួកគេនូវរឿងទាំងនេះនៅចុងបញ្ចប់នៃជីវិតរបស់គាត់ទៅវិញ ? តើបងប្អូនរកឃើញអ្វីខ្លះដែលបំផុសគំនិតបងប្អូនឲ្យ « តោងជាប់នឹងព្រះយេហូវ៉ា » ? ( យ៉ូស្វេ ២៣:៨ ) ។
សូមមើលផងដែរ ឌែល ជី រិនឡាន់ « Choose You This Day » Liahona ខែវិច្ឆិកា ឆ្នាំ២០១៨ ទំព័រ ១០៤–១០៦ ។
គំនិតសម្រាប់បង្រៀនកុមារ
យ៉ូស្វេ ១–៤; ៦
« ចូរឲ្យមានកម្លាំង និងចិត្តក្លាហានចុះ » ។
-
នេះគឺជារបៀបមួយចំនួនដើម្បីជួយកូនៗបងប្អូន « ឲ្យមានកម្លាំង និងចិត្តក្លាហាន » ( យ៉ូស្វេ ១:៦ ) តាមរយៈព្រះយេស៊ូវគ្រីស្ទ ។ សូមអញ្ជើញពួកគេឲ្យស្វែងរកឃ្លាដែលនិយាយដដែលៗក្នុង យ៉ូស្វេ ១:៦, ៩ និង ១៨ និងសរសេរវាទុក ឬទន្ទេញវា ។ សូមជួយកូនៗបងប្អូនគិតពីស្ថានភាពដែលពួកគេត្រូវការសារលិខិតនេះ ដូចជាយ៉ូស្វេត្រូវការសារនេះដែរ ។ បងប្អូនក៏អាចមើលជាមួយគ្នានូវដំណើររឿងនៅក្នុង យ៉ូស្វេ ១–៤; ៦ ( សូមមើលផងដែរ « Joshua the Prophet » និង « រ៉ាហាប និងអ្នកស៊ើបការណ៍ » នៅក្នុង ដំណើររឿងព្រះគម្ពីរសញ្ញា ទំព័រ ៨៥–៩១ ) ។ តើប្រជាជននៅក្នុងដំណើររឿងទាំងនេះបង្ហាញសេចក្តីក្លាហាន និងកម្លាំងនៅក្នុងព្រះអម្ចាស់ដោយរបៀបណា ?
2:59Joshua the Prophet
1:39Rahab and the Spies
យ៉ូស្វេ ១:៨
ការសិក្សាបទគម្ពីរនាំមកនូវពរជ័យដល់ខ្ញុំ ។
-
សូមអាន យ៉ូស្វេ ១:៨ អាចបំផុសគំនិតកូនៗបងប្អូនឲ្យអានបទគម្ពីរដោយខ្លួនឯង ។ សូមជួយពួកគេស្វែងរកពាក្យនៅក្នុងខគម្ពីរទាំងនេះដែលបង្រៀនពួកគេ របៀប និង មូលហេតុ យើងគួរតែអានព្រះគម្ពីរ ។ ពួកគេអាចរកមើលពាក្យដូចគ្នានេះនៅក្នុង នីហ្វៃទី១ ១៥:២៣–២៤; នីហ្វៃទី២ ៣១:២០; ៣២:៣; យ៉ាកុប ៤:៦; ហេលេមិន ៣:២៩–៣០ ។ បងប្អូនក៏អាចជួយពួកគេបង្កើត និងអនុវត្តផែនការអានព្រះគម្ពីរផងដែរ ។
យ៉ូស្វេ ៣–៤
ខ្ញុំត្រូវតែទទួលបុណ្យជ្រមុជទឹកដើម្បីចូលទៅក្នុងនគរស្ថានសួគ៌ ។
-
បងប្អូនអាចនឹងប្រើដំណើររឿងរបស់ពួកសាសន៍អ៊ីស្រាអែលឆ្លងទន្លេយ័រដាន់ជានិមិត្តរូបនៃពិធីបុណ្យជ្រមុជទឹក—ការបោះបង់ជីវិតចាស់របស់យើងនៅទីរហោស្ថាន ហើយចាប់ផ្តើមជីវិតថ្មីក្នុងទំនាក់ទំនងនៃសេចក្ដីសញ្ញាជាមួយនឹងព្រះ ។ ដូច្នេះនៅពេលបងប្អូនអានជាមួយគ្នានៅ យ៉ូស្វេ ៣–៤ ( ឬ « ព្យាការីយ៉ូស្វេ » នៅក្នុង ដំណើររឿងព្រះគម្ពីរសញ្ញាចាស់ ទំព័រ ៨៥–៨៩ ) បងប្អូនក៏អាចមើលរូបភាពព្រះយេស៊ូវកំពុងទទួលបុណ្យជ្រមុជទឹក ហើយពន្យល់ថាព្រះយេស៊ូវបានទទួលបុណ្យជ្រមុជទឹកក្នុងទន្លេដូចគ្នាដែលពួកសាសន៍អ៊ីស្រាអែលបានឆ្លងកាត់ ។ បន្ទាប់មកបងប្អូនអាចច្រៀងចម្រៀងដូចជា « ពិធីបុណ្យជ្រមុជទឹក » ( សៀវភៅចម្រៀងកុមារ ទំព័រ ៥៤–៥៥ ) ។ សូមចែកចាយគ្នាទៅវិញទៅមកអំពីរបៀបដែលការទទួលបុណ្យជ្រមុជទឹកគឺដូចជាការចាប់ផ្ដើមជីវិតថ្មីក្នុងនគររបស់ព្រះយេស៊ូវគ្រីស្ទ ។
2:59Joshua the Prophet
យ៉ូស្វេ ២៤:១៥
ខ្ញុំអាចជ្រើសរើសបម្រើព្រះយេស៊ូវគ្រីស្ទ ។
-
តើបងប្អូនអាចធ្វើអ្វីខ្លះដើម្បីជួយកូនៗបងប្អូនរៀនជ្រើសរើសដើរតាមព្រះយេស៊ូវគ្រីស្ទ ដូចដែលយ៉ូស្វេបានអញ្ជើញពួកសាសន៍អ៊ីស្រាអែលឲ្យធ្វើ ? បងប្អូនអាចអញ្ជើញពួកគេឲ្យ ៖
-
ទន្ទេញឃ្លាខ្លីមួយ ចេញពី យ៉ូស្វេ ២៤:១៥ ។ សូមព្យាយាមធ្វើឲ្យវាសប្បាយសម្រាប់កូនៗបងប្អូន ។ ចំនួនពាក្យដែលពួកគេទន្ទេញអាចអាស្រ័យលើអាយុរបស់ពួកគេ ។
-
ស្វែងរកដំណើររឿង អំពីមនុស្សដែលបានជ្រើសរើសបម្រើព្រះយេស៊ូវគ្រីស្ទ ។ ពួកគេអាចមើលនៅក្នុងទស្សនាវដ្តី ប្រិយមិត្ត សៀវភៅរូបភាពដំណឹងល្អ ឬ ដំណើររឿងក្នុងព្រះគម្ពីរសញ្ញាចាស់ និងដំណើររឿងក្នុងព្រះគម្ពីរផ្សេងទៀត ។
-
សម្តែងតាមស្ថានភាព ដែលពួកគេអាចជ្រើសរើសធ្វើតាម ហើយបម្រើព្រះអង្គសង្គ្រោះ ។
-
សូមប្រើសកម្មភាពផ្សេងៗ ។ « កុមារទាំងអស់មានភាពខុសគ្នាៗ ហើយនៅពេលពួកគេចម្រើនវ័យឡើង នោះតម្រូវការរបស់ពួកគេនឹងផ្លាស់ប្តូរ ។ ការធ្វើឲ្យវិធីសាស្ត្របង្រៀនរបស់អ្នកមានភាពចម្រុះនឹងជួយអ្នកឲ្យបំពេញតម្រូវការផ្សេងៗរបស់ពួកគេ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ៣១ ) ។
សម្រាប់គំនិតបន្ថែម សូមមើលការចុះផ្សាយទស្សនាវដ្តី ប្រិយមិត្ត នៅខែនេះ ។