« ថ្ងៃទី១១–១៧ ខែឧសភា ‹ នោះចូរប្រយ័ត្ន ក្រែងភ្លេចព្រះយេហូវ៉ា › ៖ ចោទិយកថា ៦–៨; ១៥; ១៨; ២៩–៣០; ៣៤ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ព្រះគម្ពីរសញ្ញាចាស់ ឆ្នាំ២០២៦ ( ឆ្នាំ២០២៦ )
« ថ្ងៃទី១១–១៧ ខែឧសភា ‹ នោះចូរប្រយ័ត្ន ក្រែងភ្លេចព្រះយេហូវ៉ា› » ចូរមកតាមខ្ញុំ ៖ ព្រះគម្ពីរសញ្ញាចាស់ ឆ្នាំ២០២៦
Moses on Mount Nebo [ ម៉ូសេនៅលើភ្នំនេបូរ ] ដោយ John Steel, © Providence Collection/បានអាជ្ញាប័ណ្ណពី goodsalt.com
ថ្ងៃទី១១–១៧ ខែឧសភា ៖ « នោះចូរប្រយ័ត្ន ក្រែងភ្លេចព្រះយេហូវ៉ា »
ចោទិយកថា ៦–៨; ១៥; ១៨; ២៩–៣០; ៣៤
ការងារបម្រើរបស់ម៉ូសេនៅលើផែនដីបានចាប់ផ្តើមនៅលើភ្នំមួយ នៅពេលព្រះបានមានបន្ទូលទៅកាន់គាត់ចេញពីគុម្ពបន្លាដែលមានភ្លើងឆេះ ( សូមមើល និក្ខមនំ ៣:១–១០ ) ។ ការងារបម្រើនោះក៏បានបញ្ចប់នៅលើភ្នំផងដែរ ជាង ៤០ ឆ្នាំក្រោយមក នៅពេលព្រះបានប្រទានឲ្យម៉ូសេ មើលឃើញដែនដីសន្យាពីលើកំពូលភ្នំនេបូរ ( សូមមើល ចោទិយកថា ៣៤:១–៤ ) ។ ម៉ូសេបានចំណាយពេលក្នុងជីវិតរបស់គាត់ដើម្បីរៀបចំកូនចៅអ៊ីស្រាអែលចូលទៅកាន់ដែនដីសន្យានោះ ហើយគម្ពីរចោទិយកថាកត់ត្រាការបង្រៀន ការរំឭក ការដាស់តឿន និងការអង្វរចុងក្រោយជាមួយកូនចៅអ៊ីស្រាអែល ។ ការអានពាក្យសម្ដីរបស់លោកបញ្ជាក់យ៉ាងច្បាស់ថាគោលបំណងពិតប្រាកដនៃការងារបម្រើរបស់ម៉ូសេ—ការរៀបចំតម្រូវការរបស់មនុស្ស—មិនមែនអំពីការរស់រានមានជីវិតនៅក្នុងទីរហោស្ថាន ការយកឈ្នះលើមារសត្រូវ ឬការកសាងប្រជាជាតិនោះទេ ។ គឺវាអំពីការរៀនស្រឡាញ់ព្រះ គោរពទ្រង់ និងបន្តនៅស្មោះត្រង់ចំពោះទ្រង់ ។ នោះគឺជាការរៀបចំដែលយើងទាំងអស់គ្នាត្រូវការដើម្បីចូលទៅកាន់ដែនដីសន្យានៃជីវិតដ៏នៅអស់កល្បជានិច្ច ។ ដូច្នេះទោះបីជាម៉ូសេ មិនដែលបានឈានជើងចូលទៅក្នុង « ស្រុកដែលមានទឹកដោះ និងឃ្មុំហូរហៀរ » ( និក្ខមនំ ៣:៨ ) ដោយសារតែសេចក្តីជំនឿ និងសេចក្តីស្មោះត្រង់របស់លោក លោកពិតជាបានចូលទៅដែនដីសន្យា ដែលព្រះបានរៀបចំសម្រាប់អស់មនុស្សទាំងឡាយណាដែលធ្វើតាមទ្រង់ ។
សម្រាប់ទិដ្ឋភាពទូទៅស្ដីពីគម្ពីរចោទិយកថា សូមមើល« ចោទិយកថា » នៅក្នុងសេចក្តីណែនាំដល់បទគម្ពីរទាំងឡាយ ។
គំនិតសម្រាប់ការរៀនសូត្រនៅឯគេហដ្ឋាន និងនៅឯសាសនាចក្រ
ចោទិយកថា ៦:៤–៧; ៨:២–៥, ១១–១៧; ២៩:១៨–២០; ៣០:៦–១០, ១៤–២០
« ត្រូវឲ្យឯងស្រឡាញ់ព្រះយេហូវ៉ា ជាព្រះនៃឯងឲ្យអស់ពីចិត្ត » ។
ក្រឹត្យវិន័យលោកម៉ូសេបានរួមបញ្ចូលពិធីខាងក្រៅ និងទម្លាប់ជាច្រើន ។ ដូចដែលបងប្អូននឹងឃើញនៅក្នុងការប្រឹក្សារបស់ម៉ូសេនៅក្នុងចោទិយកថា ព្រះអម្ចាស់ក៏មានការព្រួយបារម្ភអំពីស្ថានភាពខាងក្នុងរបស់រាស្ដ្រទ្រង់—ស្ថានភាពខាងវិញ្ញាណនៅក្នុងចិត្តរបស់ពួកគេផងដែរ ។
នៅក្នុងសារលិខិតខាងក្រោម សូមរកមើលពាក្យ ចិត្ត និងជញ្ជឹងគិតពីអ្វីដែលវាអាចជានិមិត្តរូប ។ បងប្អូនប្រហែលជាគិតថាវគ្គបទគម្ពីរទាំងនេះជាប្រភេទនៃការពិនិត្យមើលខាងវិញ្ញាណលើចិត្តរបស់បងប្អូន ។ តើរោគវិនិច្ឆ័យអ្វីដែលបងប្អូននឹងផ្តល់ឲ្យខ្លួនឯង ? តើបងប្អូននឹងចេញវេជ្ជបញ្ជាការព្យាបាលអ្វីខ្លះ ដើម្បីកែលម្អសុខភាពខាងវិញ្ញាណនៃចិត្តរបស់បងប្អូន ? សូមសរសេរចំណាប់អារម្មណ៍របស់បងប្អូន
-
ចោទិយកថា ៦:៤–៧ ៖
-
ចោទិយកថា ៨:២–៥ ៖
-
ចោទិយកថា ៨:១១–១៧ ៖
-
ចោទិយកថា ២៩:១៨–២០ ៖
-
ចោទិយកថា ៣០:៦–១០ ៖
-
ចោទិយកថា ៣០:១៤–២០ ៖
របៀបមួយដើម្បីរៀបចំគំនិតបងប្អូនអាចជាការគូររូបបេះដូង ហើយសរសេរអ្វីដែលព្រះអម្ចាស់មានព្រះបន្ទូលថា បងប្អូនគួរមាននៅក្នុងចិត្តបងប្អូន ។ បន្ទាប់មក បងប្អូនអាចសរសេរនៅខាងក្រៅរូបនោះនូវអ្វីៗដែលបងប្អូនគួររក្សានៅខាងក្រៅចិត្តបងប្អូន ។
តើបងប្អូនបង្ហាញថា បងប្អូនស្រឡាញ់ព្រះអស់ពីចិត្តបងប្អូនដោយរបៀបណា ? ដើម្បីទទួលបានគំនិតជាច្រើន សូមមើល « ស្រឡាញ់ព្រះ និងស្រឡាញ់អ្នកជិតខាងរបស់អ្នក » នៅក្នុង ដើម្បីកម្លាំងនៃយុវជន ៖ សេចក្តីណែនាំដើម្បីធ្វើការជ្រើសរើស ទំព័រ ១០–១២ ។
សូមមើលផងដែរ អិម រ័សុល បាឡឺដ « តើអ្នកស្រឡាញ់ខ្ញុំជាជាងរបស់ទាំងនេះឬអី ? » លីអាហូណា ខែវិច្ឆិកា ឆ្នាំ២០២១ ទំព័រ ៥១–៥៣ ។
ស្វែងរកគំនិតយោបល់ខាងវិញ្ញាណផ្ទាល់ខ្លួនរបស់បងប្អូន ។ ចូរមកតាមខ្ញុំ ផ្ដល់យោបល់នូវវគ្គបទគម្ពីរ និងគោលការណ៍ដើម្បីផ្ដោតលើបទគម្ពីរ ប៉ុន្តែសូមកុំឲ្យការណ៍នោះជាការកំណត់ដល់ការសិក្សារបស់បងប្អូនឡើយ ។ នៅពេលបងប្អូនអានចោទិយកថា បងប្អូនអាចរកឃើញគោលការណ៍ដែលមិនបានគូសបញ្ជាក់នៅទីនេះ ។ ចូរឲ្យព្រះវិញ្ញាណដឹកនាំបងប្អូនទៅរកអ្វីដែលបងប្អូនចង់រៀន ។
ចោទិយកថា ៦:៤–១២, ២០–២៥
« នោះចូរប្រយ័ត្ន ក្រែងភ្លេចព្រះយេហូវ៉ា » ។
ពួកសាសន៍អ៊ីស្រាអែលដែលបានចូលទៅកាន់ដែនដីសន្យាភាគច្រើនមិនបានឃើញគ្រោះកាចនៅស្រុកអេស៊ីព្ទ ឬបានឆ្លងកាត់សមុទ្រក្រហមឡើយ ។ ម៉ូសេបានដឹងថា ពួកគេ—និងជំនាន់នាពេលអនាគត—ត្រូវចងចាំពីអព្ភូតហេតុរបស់ព្រះ និងក្រឹត្យវិន័យរបស់ព្រះដើម្បីបន្តធ្វើជារាស្ត្ររបស់ព្រះ ។
តើដំបូន្មានអ្វីខ្លះដែលបងប្អូនរកឃើញនៅក្នុង ចោទិយកថា ៦:៤–១២, ២០–២៥ ដែលអាចជួយបងប្អូនឲ្យចងចាំពីរឿងអស្ចារ្យនានាដែលព្រះបានធ្វើសម្រាប់បងប្អូន ? តើបងប្អូនត្រូវបានបំផុសគំនិតឲ្យធ្វើអ្វីខ្លះ ដើម្បីឲ្យបន្ទូលរបស់ព្រះនឹង« នៅជាប់ក្នុងចិត្តឯងចុះ » រៀងរាល់ថ្ងៃ ? (ខទី ៦ ) ។
បងប្អូនក៏អាចសិក្សាសារលិខិតរបស់ ជេន អ៊ី នូមែន « រក្សាសំឡេងនៃរាស្ត្រក្នុងសេចក្ដីសញ្ញាក្នុងជំនាន់ដែលកំពុងពេញវ័យ » ( លីអាហូណា ខែវិច្ឆិកា ឆ្នាំ២០២៣ ទំព័រ ៣៦–៣៨ ) ហើយពិចារណាពីរបៀបដែលបងប្អូននឹងបន្តសេចក្ដីជំនឿរបស់បងប្អូនលើព្រះគ្រីស្ទដល់មនុស្សជំនាន់ក្រោយ ។
សូមមើលផងដែរ ចោទិយកថា ១១:១៨–២១; ឌែល ជី រិនឡាន់ « Consider the Goodness and Greatness of God » Liahona ខែឧសភា ឆ្នាំ២០២០ ទំព័រ ៤១–៤៤; Bible Dictionary « Frontlets or phylacteries » ។
ចោទិយកថា ១៥:១–១៥
ការជួយដល់មនុស្សដែលទ័លក្រតម្រូវឲ្យមានដៃសប្បុរស និងដួងចិត្តដែលស្ម័គ្រ ។
យើងមិនទាន់ថ្ងៃនោះទេ « នឹងគ្មានអ្នកទាល់ក្រនៅជាមួយនឹងឯងឡើយ » ( ចោទិយកថា ១៥:៤ ) ដូច្នេះគោលការណ៍ទាំងឡាយអំពីការជួយដល់ជនទ័លក្រនៅក្នុង ចោទិយកថា ១៥ គឺនៅតែមានតម្លៃ ទោះបីជាការអនុវត្តជាក់លាក់បានផ្លាស់ប្តូរក៏ដោយ ។ សូមចំណាំនូវអ្វីដែល ខទី ១–១៥ បង្រៀនអំពីមូលហេតុដែលយើងជួយមនុស្សដែលទ័លក្រ និងអាកប្បកិរិយារបស់យើងទាក់ទងនឹងការជួយនោះ ។
តើវាមានន័យដូចម្តេចដើម្បី « ឲ្យលាដៃ » ដល់អ្នកទាំងឡាយដែលទ័លក្រ ? ( ខទី ៨, ១១ ) ។ តើបងប្អូនរៀនអ្វីខ្លះពីគំរូរបស់ព្រះអម្ចាស់អំពីការជួយមនុស្សដែលទ័លក្រ ? ( សូមមើល ខទី ១៥ ) ។
សូមមើលផងដែរ « តើខ្ញុំបានធ្វើល្អឬទេ ? » ទំនុកតម្កើង ល.រ. ១៣៨ ។
ចោទិយកថា ១៨:១៥–១៩
ម៉ូសេគឺ « ដូច » ព្រះយេស៊ូវគ្រីស្ទ ។
ពេត្រុស នីហ្វៃ មរ៉ូណៃ និងព្រះអង្គសង្គ្រោះផ្ទាល់បានចាប់ផ្ដើមនៅការព្យាករនៅក្នុង ចោទិយកថា ១៨:១៥–១៩ ( សូមមើល កិច្ចការ ៣:២០–២៣; នីហ្វៃទី១ ២២:២០–២១; យ៉ូសែប ស្ម៊ីធ—ប្រវត្តិ ១:៤០; នីហ្វៃទី៣ ២០:២៣ ) ។ តើបងប្អូនរៀនអ្វីខ្លះ អំពីព្រះអង្គសង្គ្រោះមកពីខគម្ពីរទាំងនេះ ? សូមគិតពីអ្វីដែលបងប្អូនបានអានអំពីម៉ូសេនៅប៉ុន្មានសប្តាហ៍កន្លងទៅនេះ ។ តើម៉ូសេ « ដូច » ព្រះយេស៊ូវគ្រីស្ទដោយរបៀបណា ?
ព្រះយេស៊ូវគ្រីស្ទបានប្រាប់រាស្ដ្រទ្រង់នៅអាមេរិកបុរាណថា « យើងនេះហើយដែលលោកម៉ូសេមានប្រសាសន៍ » ( នីហ្វៃទី៣ ២០:២៣ ) ។
ចោទិយកថា ២៩:៩; ៣០:១៥–២០
ព្រះអម្ចាស់អញ្ជើញខ្ញុំឲ្យជ្រើសរើសរវាងល្អ និងអាក្រក់ ។
វាអាចគួរឲ្យចាប់អារម្មណ៍នៅក្នុងការប្រៀបធៀបពាក្យសម្តីរបស់ម៉ូសេនៅក្នុង ចោទិយកថា ២៩:៩; ៣០:១៥–២០ ជាមួយនឹងការបង្រៀនចុងក្រោយខ្លះៗរបស់លីហៃទៅកាន់គ្រួសាររបស់លោកនៅក្នុង នីហ្វៃទី២ ២:២៦–២៩; ៤:៤ ។ តើលីហៃបានពន្យល់បន្ថែមលើអ្វីដែលលោកម៉ូសេបានបង្រៀនយ៉ាងដូចម្តេច ? តើបងប្អូនរកឃើញអ្វីខ្លះនៅក្នុងខគម្ពីរទាំងនេះ ដែលបំផុសគំនិតបងប្អូនដើម្បី « រើសយកជីវិត » ? ( ចោទិយកថា ៣០:១៩ ) ។
គំនិតសម្រាប់បង្រៀនកុមារ
ចោទិយកថា ៦:៥
ខ្ញុំអាចស្រឡាញ់ព្រះអស់ពីដួងចិត្តរបស់ខ្ញុំ ។
-
ដើម្បីជួយកុមារបងប្អូនយល់ ចោទិយកថា ៦:៥ បងប្អូនអាចគូររូបបេះដូង គ្រោងនៃរាងកាយ និងដៃដ៏រឹងមាំ ។ កូនៗបងប្អូនអាចចង្អុលទៅរូបភាពនៅពេលបងប្អូនអានពាក្យ « ចិត្ត » « ព្រលឹង » និង« កម្លាំង » នៅក្នុងខគម្ពីរនោះ ។ តើយើងបង្ហាញព្រះអម្ចាស់ថា យើងស្រឡាញ់ទ្រង់ដោយអស់ពីចិត្ត ព្រលឹង និងអស់ពីកម្លាំងរបស់យើងយ៉ាងដូចម្ដេច ?
ចោទិយកថា ៦:៦–១៥
ខ្ញុំអាចរក្សាព្រះបន្ទូលនៃព្រះនៅក្នុងដួងចិត្តរបស់ខ្ញុំ ។
-
សូមអានជាមួយកូនៗបងប្អូននូវដំបូន្មានរបស់ព្រះអម្ចាស់ដល់ពួកសាសន៍អ៊ីស្រាអែលដើម្បីដាក់វគ្គបទគម្ពីរនៅកន្លែងដែលពួកគេនឹងឃើញវាជារៀងរាល់ថ្ងៃ ( សូមមើល ចោទិយកថា ៦:៦–៩ ) ។ ការណ៍នេះអាចជំរុញឲ្យបងប្អូន និងកូនៗបងប្អូនគិតរកវិធីធ្វើឲ្យប្រាកដថា បងប្អូនមិន « ភ្លេចព្រះយេហូវ៉ា » ( ខទី ១២ ) និងដើម្បីចងចាំអ្វីដែលទ្រង់បានធ្វើសម្រាប់បងប្អូន ។
-
បងប្អូនអាចចង្អុលបង្ហាញថា ចោទិយកថា ៦:១៣, ១៦ និង ៨:៣ បានជួយព្រះអង្គសង្គ្រោះអំឡុងពេលដ៏សំខាន់មួយក្នុងព្រះជន្មរបស់ទ្រង់ ។ ដើម្បីមើលពីរបៀប សូមអានជាមួយគ្នា ម៉ាថាយ ៤:១–១០ ។ បន្ទាប់មក បងប្អូនអាចចែកចាយជាមួយគ្នានូវវគ្គបទគម្ពីរមួយចំនួនដែលបានជួយបងប្អូនក្នុងពេលមានតម្រូវការ ។
ចោទិយកថា ១៨:១៥–១៨
ពួកព្យាការីបង្រៀនយើងអំពីព្រះយេស៊ូវគ្រីស្ទ ។
-
នៅពេលបងប្អូនអាន ចោទិយកថា ១៨:១៨ ជាមួយគ្នា សូមជួយកូនៗបងប្អូនឲ្យយល់ថា ព្យាការីដូចជាម៉ូសេនៅក្នុងខគម្ពីរនេះ គឺជាព្រះយេស៊ូវគ្រីស្ទ ។ ប្រហែលជាបងប្អូនអាចមើលរូបភាពនៃអ្វីដែលម៉ូសេបានធ្វើ និងអ្វីដែលព្រះយេស៊ូវគ្រីស្ទបានធ្វើ ហើយអនុញ្ញាតឲ្យកូនៗបងប្អូនផ្គូផ្គងវា ( សូមមើល សៀវភៅរូបភាពដំណឹងល្អ ល.រ. ១៥, ១៦, ៣៨, ៣៩ ) ។ តើព្យាការីរបស់យើងសព្វថ្ងៃនេះបង្រៀនយើងអ្វីខ្លះអំពីព្រះអង្គសង្រ្គោះ ?
ចោទិយកថា ២៩:១២–១៣; ៣០:៨–១០
ដោយសារសេចក្ដីសញ្ញារបស់ខ្ញុំ ខ្ញុំជាផ្នែកនៃរាស្ដ្ររបស់ព្រះ ។
-
ការពិភាក្សាអំពី ចោទិយកថា ២៩:១២–១៣ ផ្ដល់ឱកាសមួយសម្រាប់បងប្អូន និងកូនៗបងប្អូនដើម្បីពិភាក្សាពីសេចក្ដីសញ្ញាដែលពួកគេនឹងធ្វើ ឬបានធ្វើជាមួយព្រះវរបិតាសួគ៌ ។ តើវាមានអត្ថន័យយ៉ាងណាដើម្បីធ្វើជារាស្ត្ររបស់ព្រះ ? តើសេចក្ដីសន្យារបស់យើងធ្វើឲ្យយើងក្លាយជារាស្ដ្ររបស់ព្រះយ៉ាងដូចម្ដេច ? ( សូមមើល ខទី ១៣; សូមមើលផងដែរ ម៉ូសេ ១៨:៨–១០ ) ។
-
ប្រសិនបើកូនៗបងប្អូនត្រូវការជំនួយក្នុងការយល់ដឹងថាអ្វីទៅជាសេចក្ដីសញ្ញា សូមផ្ដល់យោបល់ថា ពួកគេស្វែងរកនិយមន័យមួយនៅក្នុង « សេចក្ដីសញ្ញា » នៅក្នុងសេចក្តីណែនាំដល់បទគម្ពីរទាំងឡាយ ( បណ្ណាល័យដំណឹងល្អ ) ។ តើព្រះ និងពួកសាសន៍អ៊ីស្រាអែលបានសន្យាអ្វីខ្លះជាមួយគ្នានៅក្នុង ចោទិយកថា ៣០:៨–១០ ? តើយើងបានសន្យាអ្វីខ្លះជាមួយព្រះ ? ( សូមមើល គោលលទ្ធិ និងសេចក្តីសញ្ញា ២០:៣៧, ៧៧ ) ។ តើការសន្យាទាំងនេះភ្ជាប់យើងជាមួយទ្រង់ដោយរបៀបណា ? សូមពិចារណាច្រៀងចម្រៀងអំពីសេចក្ដីសញ្ញាជាមួយគ្នាដូចជាបទ « Standing on the Promises » ( បណ្ណាល័យដំណឹងល្អ ) ។
សម្រាប់គំនិតបន្ថែម សូមមើលការចុះផ្សាយទស្សនាវដ្តី ប្រិយមិត្ត នៅខែនេះ ។