Mabhuku eNhoroondo Ari muTestamente Yekare

Kazhinji, nyaya idzi dzinotaurwa kubva pane mamwe maonero ezvinhu. Sezvazvisingabviri kutarisa ruva, ibwe, kana muti kubva kudivi rinopfuura rimwechete panguva imwechete, zvinotongoitika chete kuti tsananguro yenhoroondo inozoratidza maonero ezvinhu emunhu kana boka revanhu vari kuinyora. Maonero ezvinhu aya anosanganisira rudzi kana dzinza rinobva vanyori uye tsika nezvitendo zvavo. Kuziva izvi kunokwanisa kutibatsira kunzwisisa kuti vanyori uye navaunganidzi vemabhuku enhoroondo aya vakanangisa pfungwa pane rumwe ruzivo apo vachisiya rumwe. Vakaita fungidziro idzo dzingangova dzisina kuitwa nevamwe. Uye vakasvika pamhedzisiro maererano neruzivo urwu uye nefungidziro idzi. Tinotokwanisa kunyangwe kuoona maonero ezvinhu akasiyana-siyana nemumabhuku ose eBhaibheri (uye dzimwe nguva mukati mebhuku rimwechetero). Apo patinoziva zvakawanda nezve maonero ezvinhu aya, tinokwanisawo kunzwisisa zvirinani mabhuku enhoroondo.

Mamwe maonero ezvinhu anowanikwa mumabhuku ose enhoroondo yechinyakare eTestamente Yekare ndeayo maonero ezvinhu evana vaIsraeri, vanhu vechibvumirano vaMwari. Rutendo rwavo muna Ishe rwakavabatsira kuona ruoko Rwavo muupenyu hwavo uye munyaya dzenyika yavo. Apo mabhuku enhoroondo epanyama asingawanzoona zvinhu nenzira iyi, maonero ezvinhu epamweya aya chikamu cheizvo zvinoita kuti mabhuku enhoroondo eTestamente Yekare ave akakosha zvikuru kudaro kuvanhu avo vari kutsvaga kuvaka rutendo rwavo pachavo muna Mwari.

Mabhuku enhoroondo anotangira apo bhuku raDeuteronomio parinoperera, nemakore ekunhendereka murenje kwavaIsraeri ava kuda kuguma. Bhuku raJoshua rinoratidza vana vaIsraeri vagadzirira kupinda muKanani, nyika yavo yechipikirwa, uye rinotsanangura matorero avakaiita. Mabhuku anotevera, Vatongi kusvika kuna 2 Makoronike anoratidza chiitiko cheIsraeri munyika yechipikirwa, kubva panguva yavakagaramo kusvikira panguva yavakakundwa neAsiria uye Babironi. Mabhuku aEzra uye Nehemia anotaura nezve kudzoka kwemapoka akati wandei evaIsraeri kuguta ravo guru, Jerusarema, makumi emakore pashure. Pokupedzisira, bhuku raEstere rinorondedzera nyaya yevaIsraeri vachigara muutapwa pasi pehutongi hwePersia.

Uye ipapo ndipo panogumira nhevedzano yeTestamente Yekare. Vamwe vaverengi vokutanga veBhaibheri vanoshamiswa kuwana kutivatopedza chaizvo kuverenga nyaya yeTestamente Yekare vasati vaverenga zvakawanda kupfuura hafu yemapeji ayo. Mushure maEstere hatiwani ruzivo rwakawanda pamusoro penhoroondo yevaIsraeri. Panzvimbo paizvozvo, mabhuku anotevera—kunyanya mabhuku evaporofita vacho—anoenderana nenguva yakapuwa nemabhuku enhoroondo yechinyakare. Hushumiri hwamuporofita Jeremia, semuenzaniso, hwakaitika munguva yezviitiko zvakanyorwa muna 2 Madzimambo 22–25 (uye tsananguro inoenderana iri muna 2 Makoronike 34–36). Kuziva izvi kunokwanisa kushandura maverengero aunoita zvose tsananguro dzenhoroondo uye nemabhuku ehuporofita.

Apo paunoverenga Testamente Yekare, sezvazvinoita neipi zvayo nhoroondo, unokwanisa kuverenga pamusoro pevanhu vachiita kana kutaura zvinhu izvo, kumaziso emazuva ano, zvinoratidzika sezvisingazivikanwi kana kunyangwe zvinotambudza pfungwa. Tinofanira kutarisira izvi—vanyori veTestamente Yekare vakaona nyika kubva pamaonero ezvinhu aiva, nedzimwe nzira, akasiyana zvakanyanya needu. Chisimba, hukama hwemarudzi, uye nezvinzvimbo zvemadzimai ndedzimwe dzenyaya idzo vanyori vechinyakare dzavangangova vakaona zvakasiyana nezvatinoita nhasi uno.

Saka chii chatinofanira kuita apo patinosangana nezvikamu mumagwaro matsvene zvinoratidzika sezvinotambudza pfungwa? Chokutanga, zvingangobatsira kufunga pamusoro pendima imwe neimwe mumamiriro ezvinhu ayakanyorwa nezvayo. Inoenderana sei nechirongwa chaMwari cheruponeso? Inoenderana sei nezvaunoziva pamusoro pehunhu hwaBaba Vokudenga naJesu Kristu? Inoenderana sei nezvokwadi zvakazarurwa muna mamwe magwaro matsvene kana nedzidziso dzevaporofita vanorarama? Uye inoenderana sei nezevezero dzeMweya kumwoyo wako pachako nekupfungwa dzako pachako?

Pane dzimwe nguva, ndima yacho inogona kusaratidzika kuenderana zvakanaka nezvipi zvazvo zveizvi. Dzimwe nguva ndima yacho inogona kuita sechidimbu chepazuru chisingaratidzike sokunge chine nzvimbo pakati pezvimwe zvidimbu zvawaronga kare. Kuedza kumanikidzira chidimbu kuti chikwane haisiyo nzira yakanakisisa. Asiwo kana kuora mwoyo nepazuru yose haisiwo nzira yakanakisisa. Panekudaro, ungangoda kuisa chidimbu chacho parutivi kwechinguva. Apo paunodzidza zvizhinji uye woisa pamwechete zvimwe zvidimbu zvizhinji zvepazuru, ungangogona kuona zvirinani mapindirano anoita zvidimbu zvacho pamwechete.

Zvinokwanisawo kubatsira kuyeuka kuti pamwepo nekuva nedivi rimwechete remaonero ezvinhu, nhoroondo dzemagwaro matsvene dzinokwanisa kushandurwa nezvikanganiso zvevanhu. Semuenzaniso, kwemazana emakore, “zvinhu zvizhinji zvakajeka uye zvakakosha [zvakabviswa] kubva [muBhaibheri],” kusanganisira zvokwadi zvakakosha pamusoro pedzidziso, zvisungo, uye zvibvumirano (1 Nifai 13:28; onawo ndima 26, 29, 40). Panguva imwecheteyo, tinofanira kuva tinoda kubvuma kuti maonero ezvinhu edu pachedu anemuganhuwo: panozogara paine zvinhu zvatisinganzwisisi zvakazara uye mibvunzo yatisati tokwanisa kupindura.

Asi panguva ino, mibvunzo isina kupindurwa haifaniri kutidzivirira kubva kumatombo akakosha echokwadi chokusingaperi ayo anowanikwa muTestamente Yekare—kunyangwe kana matombo akakosha iwayo dzimwe nguva akavigwa parukangarabwe rwezviitiko zvinotambudza pfungwa uye musarudzo dzakaipa dzakaitwa nevanhu vanoita zvikanganiso. Pamwe akakoshesesa ematombo anokosha aya inyaya uye ndima dzinopupura nezverudo rwaMwari—kunyanya idzo dzinonongedzera pfungwa dzedu kukuzvipira kwaJesu Kristu. Achitariswa kubva kudivi ripi zvaro, matombo akakosha akaita seaya anopenya zvakangojeka nhasi sezvaaiita kare ikako. Uye nokuda kwokuti rondedzero idzi dzinotaura nezve vanhu vechibvumirano vaMwari—varume nemadzimai vakanga vane utera hwevanhu asi zvakadaro vaida uye vaishandira Ishe—matombo akakosha echokwadi azere mumabhuku enhoroondo yeTestamente Yekare.