Abakɔsɛm Nwoma a ɔwɔ Ahyɛmu Dadaw no mu no

Sɛ yɛrekã ara, wɔkãa nsɛm yinom fi mbrɛ wosi hwɛ adze mu. Dɛmara dɛ ɔnnkɛyɛ yie dɛ ebɔhwɛ nhyiren, ɔbotan, anaa edua fi bɔbor bea kor wɔ mber kor noara mu no, ɔda edzi pefee dɛ abakɔsɛm mu asɛm no bɛda nyimpa anaa nyimpa kuw no a wɔkyerɛwee no hɔn nhumu edzi. Ɔkyerɛwfo no ne man anaa ebusua a ofi mu na hɔn kusum na dza wɔgye dzi bɛkã nhumu yi ho. Yeruhu iyi no botum aboa hɛn ma yɛatse ase dɛ abakɔsɛm nwoma akyerɛwfo na mboanofo tsimii wɔ ndzɛmba horow binom do, ber a wogyaa binom fii mu. Wɔyɛɛ nsusui a binom rennyɛ. Na wogyinaa nsɛm horow na nsusui yinom do dze buaa ndzɛmba. Yetum mpo hu nhumu asorɔtow wɔ Bible no nyina mu (na ɔtɔfabi a wɔ nwoma kor noara mu). Mber dodow a yeruhu nhumu yinom no, nna yebotum atse abakɔsɛm nwoma no ase yie.

Nhumu kor a ɔnnyɛ nã wɔ Ahyɛmu Dadaw abakɔsɛm nwoma ne nyinara mu nye nhumu a ɔfa Israelmba, Nyankopɔn n’ahyɛmu nkorɔfo no ho. Hɔn gyedzi wɔ Ewuradze mu no boaa hɔn ma wohun Ne nsa wɔ hɔn abrabɔ mu na wɔ hɔn ɔman nsɛm mu. Ber a wiadze abakɔsɛm nwoma nntaa nnhu ndzɛmba wɔ kwan yi mu no, sunsum mu nhumu yi kã dza ɔma Ahyɛmu Dadaw mu abakɔsɛm nwoma som bo dodow ma nkorɔfo a wɔrohwehwɛ akyekyer hɔnara hɔn gyedzi wɔ Nyankopɔn mu no.

Abakɔsɛm nwoma no hyɛ ase wɔ beebi a Deuteronomy gyaa hɔ no, ber a nna Israelfo hɔn mfe pii ekyimakyima wɔ sar no do no reba ewiei no. Joshua nwoma no kyerɛ Israelmba no a wɔayɛ krado dze bɛhɛn Canaan, hɔn anohoba asaase no, na ɔkã mbrɛ osii bedzii hɔn nsamu ho asɛm. Nwoma a odzidzi do no, fi Atsɛmbuafo dze kesi 2 Mbermunsɛm no, kyerɛ Israel no sũahu wɔ anohoba asaase no do, ofi mber a wɔkɛtsenaa do dze kɛpem mber a Assyria na Babylon dzii hɔn do konyim no. Ezra na Nehemiah nwoma no kã Israelfo ekuwekuw beberee hɔn nsanekyir kɔ hɔn ahenkurow, Jerusalem, mfe du mfe du ekyir no ho asɛm. Ewiei no, Esther nwoma no kã Israelfo a nna wɔtse nkowaasom mu wɔ Persiafo mbra ase no ho asɛm.

Na hɔ na Ahyɛmu Dadaw no mu dza osisii no wie. Mber a odzi kan Bible akenkanfo bi hɔnho bow hɔn dɛ nokwar ara wowie Ahyɛmu Dadaw no mu asɛm kenkan ansaana woewie ne nkrataafa a ɔbor ne fã akenkan. Esther ekyir no, yennya nsɛm dodow biara fa Israelfo hɔn abakɔsɛm no ho. Mbom, nwoma a odzi do no—nkanka nkɔnhyɛfo nwoma no—fata dɛ ɔhyɛ dza osisii ne mber no a abakɔsɛm nwoma dze mae no mu. Mfatoho, nkɔnhyɛnyi Jeremiah no somdwuma no kɔr do ber a dza wɔkyerɛɛw no wɔ 2 Ahemfo 22–25 mu sisii no (na n’asɛm ne nsɛdo mu wɔ 2 Mbermunsɛm 34–36). Iruhu iyi botum enya nhyɛdo wɔ kwan a ekenkan abakɔsɛm nsɛnkãe na nkɔnhyɛsɛm nwoma ebien no do.

Sɛ erekenkan Ahyɛmu Dadaw no, dɛ mbrɛ eyɛ abakɔsɛm biara no a, annyɛ a ebɛkenkan nkorɔfo a wɔreyɛ anaa wɔrekã ndzɛmba a, wɔ ndɛ da enyiwa mu no, ɔyɛ nwanwa anaa mpo ɔhaw ho asɛm. Ɔwɔ dɛ hɛn enyi da iyi kwan dɛ—Ahyɛmu Dadaw akyerɛwfo no hun wiadze no fi nhumu a nna, wɔ akwanhorow bi mu no, ɔsor hɛn dze no koraa. Ewurkadze, ebusua nkitahodzi, na mbaa hɔn asɛdze yɛ nsɛmansɛm no bi ara a tsetse akyerɛwfo no tumii hun no soronko sen ma yɛyɛ no ndɛ no.

Ntsi, ebɛnadze na ɔwɔ dɛ yɛyɛ sɛ yehyia nsɛnsin wɔ kyerɛwsɛm no mu a ɔyɛ dɛ ɔhaw a? Odzi kan, obotum ayɛ mboa dɛ ebɔhwɛ asɛnsin kor biara wɔ nhumu ɔtrɛ mu. Osi dɛn na ɔfata Nyankopɔn no nkwagye nhyehyɛɛ mu? Osi dɛn na ɔfata dza inyim fa Ɔsor Egya na Jesus Christ hɔn su ho? Osi dɛn na ɔfata nokwar horow a woeyi akyerɛ wɔ kyerɛwsɛm binom mu anaa nkɔnhyɛfo atseasefo hɔn nkyerɛkyerɛ no? Na osi dɛn na ɔfata Sunsum no n’awasa ndze wɔ ɔwoara w’akoma na w’adwen mu?

Ɔto mber bi a, asɛnsin no nye iyinom mu biara rennsaa yie. Ɔtɔfabi a asɛnsin no botum ayɛ tse dɛ nhyehyɛdze sin a ɔnntse dɛ ma ɔkã esinesin a ahyehyɛ dada no ho. Erobɔ mbɔdzen ahyɛ sin no ma ɔafata no nnyɛ kwan papa. Mbom eregyaa nhyehyɛdze no nyina egu hɔ so nnyɛ. Mbom, ibehia dɛ edze gu hɔ mber kakra. Ber a isũa yie na ehyehyɛ nhyehyɛdze beberee no, ibotum ehu mbrɛ wosi dze esinesin no bɔ mu sisi enyim yie.

Obotum asan so ayɛ mboa dɛ ebɛkaa dɛ dza ɔkã nnkohu nhumu tsitsir bi nyina ho no nye dɛ, nyimpa mfom wɔ nsunsuando wɔ kyerɛwsɛm mu abakɔsɛm do. Mfatoho, bɔbor mfeha mfeha no, “nsɛm a ɔda ndzɛmba edzi pefee na dza ɔsom bo no mu pii [nna] woyii fii [Bible] no mu,” a nokwar a ohia horow fa nkyerɛkyerɛ, ayɛdze horow, na ahyɛmudzi horow ho kã ho (1 Nephi 13:28; hwɛ nyiyimu 26, 29, 40 so). Mber kor noara no, ɔwɔ dɛ yenya pɛ na yɛgye to mu dɛ hɛnara hɛn nhumu so tɔ sin: aber biara no ndzɛmba bɔwɔ hɔ a yɛnnkɛtse ase yie na nsɛmbisa a yennkotum eyi ano sesei.

Naaso, onnyi dɛ nsɛmbisa a wonnyii ano no siw hɛn kwan fi onnyiewiei nokwar aboɔdzembo a ɔsom bo no ho a yehu no wɔ Ahyɛmu Dadaw mu no—mpo sɛ ɔtɔfabi a na wɔdze aboɔdzembo yinom esuma famu mbotan ɔhaw sũahu horow na nsanmuyi horow mu a nyimpa a wonndzi mu na wɔyɛe. Bia aboɔdzembo yinom dza ɔsom bo dodow no nye nsɛm na nsɛnsin a wɔgye Nyankopɔn no ho dase—tsitsir ara dza wɔdze hɛn adwen kɔ Jesus Christ n’afɔrbɔ ho no. Yɛhwɛ fi beebiara a, aboɔdzembo tse dɛ iyinom hyerɛn dɛmara ndɛ dɛ mbrɛ wɔyɛe tsetse no. Na osiandɛ nsɛm yinom kã Nyankopɔn no nkorɔfo ho asɛm ntsi—mbarimba na mbaa a nna wɔwɔ nyimpa mberɛwyɛ naaso wɔdɔe na wɔsoom Ewuradze no—nokwar aboɔdzembo nnyɛ nã wɔ Ahyɛmu Dadaw abakɔsɛm nwoma no mu.