“Ebɔbira 27–Esusow Aketseaba 3. ‘Krɔnkrɔn ma Ewuradze: Exodus 35–40; Leviticus 1; 4; 16; 19,” Bra, Bɛka Mo Do—Dze Ma Fie na Asɔr: Ahyɛmu Dadaw 2026 (2026)

“Ebɔbira 27–Esusow Aketseaba 3. ‘Krɔnkrɔn ma Ewuradze,’” Bra, Bɛka Mo Do: Ahyɛmu Dadaw 2026

Rio de Janeiro Brazil Temple

Ebɔbira 27–Esusow Aketseaba 3: “Krɔnkrɔn ma Ewuradze”

Exodus 35–40; Leviticus 1; 4; 16; 19

Worifi Egypt—dɛ mbrɛ nna ohia no—ennwie Nyankopɔn no botae horow ma Israelmba no. Nna ahotɔ abrabɔ wɔ anohoba asaase do no mpo nnyɛ Nyankopɔn no botae no korakoraa ma hɔn. Nna iyinom yɛ anamɔn nko dze kɔ dza nna Nyankopɔn pɛ ankasa ma No nkorɔfo: “Hom nyɛ krɔnkrɔn: na emi Ewuradze hom Nyankopɔn meyɛ krɔnkrɔn” (Leviticus 19:2). Nyankopɔn sii dɛn hyehyɛe ma No nkorɔfo aayɛ krɔnkrɔn ber a nna wɔatsena ndɔmmum mu mbasantsen pii ekyir no? Ɔhyɛɛ hɔn mbra dɛ wɔnyɛ krɔnkrɔn bea wɔ sar no do—ntamadan. Ɔmaa hɔn ahyɛmudzi horow na mbra dɛ ɔnweɔn hɔn ndzeyɛe na ɔnsesa hɔn akoma. Na Ɔhyɛɛ hɔn mbra dɛ wɔmbɔ mbowa afɔr dze kyerɛkyerɛɛ hɔn hɔn bɔn ho werdambɔ ho asɛm. Nna iyi nyinara rekyerɛ hɔn adwen, akoma, na abrabɔ dze akɔ Agyenkwa no do. Ɔno nye nokwar anamɔn kwan dze kɔ krɔnkrɔnyɛ ho, ma Israelfo no, na ma hɛn. Hɛn nyinara yedzi mber wɔ bɔn ndɔmmum mu, na wɔto nsa frɛ hɛn nyinara dɛ yenngya bɔn ekyir na yɛnkã Jesus Christ do, nyia a ɔabɔ anohoba dɛ, “Na emi mubotum mayɛ hom krɔnkrɔn’’ (Nkyerɛkyerɛ na Ahyɛmudzi 60:7).

Epɛ Leviticus nwoma no mbobɔdo a, hwɛ “Leviticus” wɔ Kyerɛwsɛm no Kwankyerɛ no mu.

Adwenkyerɛ horow ma Adzesũa wɔ Fie na wɔ Asɔr

Exodus 35–40; Leviticus 19

Ewuradze pɛ dɛ meyɛ krɔnkrɔn.

Exodus 35–40 kã Israelfo no hɔn mbɔdzembɔ dɛ wobesi ntamadan, bea ayɛdze horow bɔboa hɔn ma wɔayɛ nkorɔfo krɔnkrɔn. Ber a ekekenkan etsir yinom no, hwehwɛ ndzɛmba a Ewuradze kãa kyerɛɛ No nkorɔfo no dɛ wɔmfa nto ntamadan no mu no. Ebɛnadze na ndzɛmba yinom botum egyina hɔ ama? Ebɛnadze na wosusu ma wo fa eroto wɔ krɔnkrɔnyɛ mu ho? Tsitsir ara hwɛ mbrɛ ndzɛmba yinom si dan w’adwendwen kɔ Agyenkwa no do. Ereyɛ nhyehyɛɛ tse dɛ iyi botum aboa wo:

Ebɛn adze na ihu?	Ebɛnadze na iyi botum egyina hɔ ama?
Ebɛn adze na ihu? Ahyɛmu adaka (Exodus 37:1–9; 40:20–21)	Ebɛnadze na iyi botum egyina hɔ ama? (Hwɛ Exodus 25:20–22; Guide to the Scriptures, “Ark of the Covenant”)
Ebɛn adze na ihu? Eduhuam afɔrmbukyia (Exodus 40:26–27; san so hwɛ Exodus 30:1, 6–8)	Ebɛnadze na iyi botum egyina hɔ ama? (Hwɛ Nyikyerɛ 8:3–4)
Ebɛn adze na ihu? Kandzea-dua anaa nkandzeadua (Exodus 37:17–24)	Ebɛnadze na iyi botum egyina hɔ ama? (Hwɛ Matthew 5:14–16; John 8:12)
Ebɛn adze na ihu? Afɔrbɔ ho afɔrmbukyia (Exodus 38:1–7; san so hwɛ Exodus 27:1; 29:10–14)	Ebɛnadze na iyi botum egyina hɔ ama? (Hwɛ Kyerɛwsɛm no Kwankyerɛ, “Afɔrbɔ”)
Ebɛn adze na ihu? Eguarsɛn mu nsu (Exodus 30:17–21)	Ebɛnadze na iyi botum egyina hɔ ama? (Hwɛ 2 Mbermunsɛm 4:6; Isaiah 1:16; Jeremiah 33:8)

Nokwar, yɛwɔ mbeambea krɔnkrɔn ara nnyɛ hɛn krɔnkrɔn. Leviticus 19 kã mbra na mbrasɛm ho asɛm a Ewuradze dze mae ama ɔaaboa Israelfo no ma hɔn krɔnkrɔnyɛ akɔ enyim. Ebɛnadze na ihu no wɔ mbrasɛm yinom mu a obotum aboa wo ma ahwehwɛ krɔnkrɔnyɛ efi Ewuradze hɔ? Ebɛnadze na inya ho nkenyan dɛ ebɛyɛ ma edze fapem yinom abɔ bra emu mu?

Hwɛ Henry B. Eyring, “Holiness and the Plan of Happiness,” Liahona, Ɔberɛfɛw 2019, 100–103; “The Tabernacle” (video), Asɛmpa Nwoma Korabea so.

Fa ndwom krɔnkrɔn dzi dwuma. Ndwom wɔ tum kɛse dɛ ɔto nsa frɛ Sunsum no ne nhyɛdo ma ɔba na ɔkyekyer gyedzi wɔ Jesus Christ mu. Nsɛm a ɔwɔ asɔr ndwom mu no taa hyɛ nkyerɛkyerɛ a ɔwɔ kyerɛwsɛm mu no dzen. Mfatoho, erotow asɔr ndwom tse dɛ “More Holiness Give Me” (Asɔr Ndwom, nkanee 131) botum ahyɛ nsɛm a wɔkyerɛkyerɛɛ no wɔ Leviticus 19 mu no dzen. Obotum asan so aboa wo ma adwendwen afa ebɛyɛ krɔnkrɔn yie tse dɛ Agyenkwa no n’asekyerɛ ho na adwendwen mbrɛ Orisi roboa wo ma ato wɔ krɔnkrɔnyɛ mu ho.

Exodus 35:4–35; 36:1–7

Ewuradze se me dɛ me mfa ɔpɛ akoma mbɔ m’afɔr.

Afe no a wofi Egypt ekyir no, wobotum akã dɛ Israelmba nye Jehovah nkitahodzi no annwɔwdo yie. Na mbom, ber a ekenkan Exodus 35:4–35 na 36:1–7 no, hwɛ mbrɛ Israelfo no sii maa mbrasɛm no dɛ wonsi ntamadan no no ho mbuae. Ebɛnadze na isũa fi Israefo no hɔ a obotum aboa wo ma asom Ewuradze yie?

Bia Ɔrennserɛ wo ndadze a ɔsom bo, ndwera, anaa ndua nnsi ntamadan. Ebɛnadze na Ewuradze dze ama wo, na ebɛnadze na Ɔreserɛ wo ma edze ama? Ebɛn mber na “w’akoma abɔ [wo] hyew dɛ bɛyɛ edwuma no’’?

Hwɛ Nsɛntsir na Nsɛmbisa, “Sacrifice,’’ Asɛmpa Nwoma Korabea so.

Israelfo roboaboa ayɛyɛdze ano ama ntamadan no — Israelmba no dze “ɔpɛ akoma” maa ayɛyɛdze a wɔdze besi ntamadan no (Exodus 35:5). Corbert Gauthier yɛɛ nsaano mfonyin no, © Lifeway Collection/licensed from goodsalt.com

Exodus 40:12–14

Temple ayɛdze horow no wɔdze maa wɔ tsetseberdo.

Exodus 40:12–14 kyerɛ tsetse ayɛdze horow a wɔsan so yɛ no wɔ hɛn nda mu wɔ Ewuradze fie. Nyiyimu bi kã ho wɔ ha a obotum aboa wo ma esũa mbrɛ ayɛdze horow yinom si gye Jesus Christ no ho dase:

Nhohoree: Ndwom 51:2; Ezekiel 36:25–27
Erehyɛ ntar krɔnkrɔn: Isaiah 61:10; Matthew 22:11–14; Nyikyerɛ 19:7–8
Ngosera: Luke 4:18–19; Ndwuma 10:38

Leviticus 1:1–9; 4; 16

Osian Jesus Christ n’afɔrbɔ no ntsi, mubotum enya bɔnfakyɛ.

Bia Leviticus nwoma no dodow no bɛyɛ nwanwa ama hɛn—mbowa afɔrbɔ, atɔrmuadze a bɔgya na nsu kã ho, na mbra a ɔhwɛ abrabɔ ne nhwehwɛmu nketsenketse do. Naaso nna atɔrmuadze yinom wɔ dɛ wɔkyerɛkyerɛ fapem a yenyim—nnuho, krɔnkrɔnyɛ, na Agyenkwa no no Werdambɔ. Ibohu fapem yinom ber a ekenkan Leviticus 1:1–9; 4; 16 no, hwɛ nsɛmbisa tse dɛ iyinom:

Ebɛn nkasafua anaa nsɛnsin na muhu a ɔbɔ me nkaa fa Jesus Christ na No werdam afɔrbɔ no ho?
Ebɛnadze na musũa wɔ Agyenkwa no n’afarbɔ ho fi afɔrbɔ yinom mu?
Misi dɛn tse dɛ nkorɔfo yinom a wɔbɔɔ afɔr yinom no?

Ewuradze nnhia mbowa afɔrbɔ bio. Mbom afɔrbɔ da ho yɛ asɛmpa ne fapem a ohia. Ama eesũa afa afɔrbɔ asorɔtow a Ewuradze rohwehwɛ ho asɛm no, sũa 3 Nephi 9:19–20; Nkyerɛkyerɛ na Ahyɛmudzi 64:34. Irisi dɛn ayɛ afɔrbɔ asorɔtow yinom ho ayɛyɛdze? Ebɛnadze na Moses 5:7 kyerɛkyerɛ wo fa mbrɛ ɔwɔ dɛ isi hwɛ afɔrbɔ ho?

Hwɛ “Thoughts to Keep in Mind: The Tabernacle and Sacrifice.”

Adwenkyerɛ horow ma Erekyerɛkyerɛ Mbofra

Exodus 35:20–29; 36:1

Ewuradze ama me akyɛdze dɛ me mfa mboa N’edwuma.

N’apɔwdo n’apɔwdo yi n’ewiei no Israelfo no hɔn sardo ntamadan no ne nsaano mfonyin bi wɔ hɔ. Ibotum nye wo mbofra no ahwɛ na ebisa hɔn ndzɛmba a nkyɛ wobehia dze besi ntamadan no. Nkyii wobotum abɔ mu akenkan Exodus 35:20–29 dze ahwehwɛ mbrɛ wosii nyaa ndzɛmba yinom. Ewuradze esi dɛn ato nsa frɛ hɛn dɛ yɛmma wɔ N’ahenman ne nkyekyeree ho?
Hwɛ dɛ enye hɔn bɛkenkan Exodus 36:1 dze ahwehwɛ dza Ewuradze dze maa Bezaleel na Aholiab ma wɔdze boae sii ntamadan no. Nkyii ibotum nye wo mbfra no akasa afa dza etse ho nka dɛ Ewuradze dze ama hɔn dɛ wɔmfa mboa N’ahenman ne nkyekyeree ho. Yebesi dɛn botum dze ndzɛmba yinom edzi dwuma dze ehyira binom?

Exodus 40:17–34

Mutum tse Ewuradze nka wɔ mbeambea krɔnkrɔn.

Exodus 40:17–34 kyerɛkyerɛw ndzɛmba a nna ɔkã Israelfo hɔn ntamadan no ho. Bia ɔwo na wo mbofra no botum ehu no wɔ nyiyimu yinom mu na ntamadan ho mfonyin no a ɔwɔ n’apɔwdo yi n’ewiei no mu. Kasa fa mbrɛ ntamadan n’afã kor biara besi botum akyerɛkyerɛ Agyenkwa no anaa Ɔsor Egya hɔn ho asɛm. Mfatoho, dase adaka no botum abɔ hɛn nkaa afa Nyankopɔn ne mbrasɛm ho, afɔrmbukyia no botum abɔ hɛn nkaa afa Jesus Christ n’afɔrbɔ, na dza ɔkekã ho ho.
Mbeambea krɔnkrɔn bɛn na yɛwɔ no ndɛ a wɔboa hɛn ma yɛtse nka dɛ yɛabɛn Jesus Christ ho yie? Edze bɛka nkɔmbɔdzi yi ho no, hom botum abɔ mu ahwɛ video “Temples” no (Asɛmpa Nwoma Korabea). Hom botum asan so atow ndwom bi tse dɛ “Holy Places” (Asɛmpa Nwoma Korabea). Hom nye homho nkyɛ atsenka a hom nya fa mbeambea krɔnkrɔn tse dɛ temple ho.

Leviticus 1:1–4

Osian Jesus Christ n’afɔrbɔ no ntsi, mubotum enya bɔnfakyɛ.

Nna mbowa afɔrbɔ a wɔkãa ho asɛm wɔ Ahyɛmu Dadaw mu no wɔdɛ ɔkyerɛkyerɛ Israelmba no bɔnfakyɛ a ɔnam Jesus Christ do ho asɛm. Hwɛ mbrɛ erekenkan afɔrbɔ yinom ho asɛm besi botum ayɛ dɛmara dze ama wo mbofra. Ibotum dze Jesus Christ a ɔwɔ Gethsemane na mbeamudua no do ho mfonyin akyerɛ (hwɛ Gospel Art Book, nkanee 56, 57) ber a enye mbofra no kenkan Leviticus 1:1–4. Boa hɔn ma wɔnhwehwɛ nkasafua anaa nsɛnsin a ɔbɔ hɔn nkaa fa Jesus Christ n’afɔrbɔ no ho.
Wobotum asan so abɔ mu akenkan 3 Nephi 9:19–20 dze ahwehwɛ dza wɔhyɛ hɛn ho mbra dɛ yɛmfa mbɔ afɔr kyɛn mbowa. Edze akoma a abobɔ nye sunsum a abotow bɛma Ewuradze n’asekyerɛ nye dɛn? Hwɛ Kyerɛwsɛm no Kwankyerɛ, “Broken Heart,” (Asɛmpa Nwoma Korabea) fa nya mboa yi asɛmbisa yi ano.

Epɛ bi akã ho a, hwɛ bosoom yi Friend dawurbɔ krataa mu.

tsetse ntamadan — The Ancient Tabernacle [Tsetse Ntamadan No], Bradley Clark yɛɛ nsaano mfonyin no

Primary dwumadzi krataafa: Mubotum atse Nyankopɔn ne nka wɔ mbeambea krɔnkrɔn — The Ancient Tabernacle [Tsetse Ntamadan No], Bradley Clark yɛɛ nsaano mfonyin no