“Mei 4–10. ‘Yupela i Noken Bikhet long Bikpela na Yupela i Noken Pret: Namba 11–14; 20–24; 27,” Kam, Bihainim Mi—Bilong Haus na Sios: Olpela Testamen 2026 (2026)
“Mei 4–10. ‘Yupela i Noken Bikhet long Bikpela na Yupela i Noken Pret,’” Kam, Bihainim Mi: Olpela Testamen 2026
ples i drai klostu long Sainai
Mei 4–10: “Yupela i Noken Bikhet long Bikpela na Yupela i Noken Pret”
Namba 11–14; 20–24; 27
I no inap kisim 40-pela yia long ol pikinini bilong Israel wokabaut long ples i drai long Sainai go long graun God i promis long givim ol, Kenan. Tasol dispela em taim ol pikinini bilong Israel i mas wokabaut—i no bilong ol go kamap hariap long Kenan, tasol bilong ol luksave gut long ol i husat, na ol bai kamap husat olsem ol manmeri i mekim kontrak wantaim God, na go klostu moa long Em.
Buk bilong Namba i stori long sampela samting i kamap insait long dispela 40-pela yia, wantaim ol samting ol pikinini bilong Israel i mas lainim bipo long ol go insait long graun God promis long givim ol. Ol lainim pasin bilong stap aninit long ol wokman bilong Bikpela (lukim Namba 12). Ol lainim pasin bilong bilip long strong bilong God, wankain long taim ol i lukim olsem em i hat long ol mekim samting bihaintaim (lukim Namba 13–14). Na ol lainim tu olsem sapos ol i no bilip long God, dispela bai bagarapim sol bilong ol, tasol ol i ken lukluk long Jisas Krais long oraitim ol (lukim Namba 21:4–9).
Long sampela samting, yumi wankain ol lain bilong Israel long dispela taim. Yumi save pinis long yumi bai pilim olsem wanem sapos sol bilong yumi i stap long ples i nogut, na ol samting yumi lainim ken helpim yumi long redi long kisim dispela ples God promis long givim yumi: laip i stap gut oltaim oltaim wantaim Papa bilong yumi.
Long lukim ol liklik toktok bilong olgeta samting insait long buk bilong Namba, lukim “Numbers” insait long Bible Dictionary.
Ol Sampela Tingting bilong Lainim long Haus na long Sios
Namba 11:11–17, 24–29; 12
God i ken toktok long olgeta manmeri, tasol Em save stiaim Sios bilong Em long maus bilong profet bilong Em.
Luksave long hevi i kamap long Moses, na God i tok wanem rot bilong stretim dispela hevi, long Namba 11:11–17, 24–29. Yu ting wanem as bilong dispela toktok bilong Moses, olsem em i laikim olsem “olgeta [manmeri bilong God] i kamap profet”? (ves 29). Taim yu tingting long dispela askim, painim ol bekim insait long dispela toktok bilong Presiden Russell M. Nelson “Revelation for the Church, Revelation for Our Lives” (Liahona, Mei 2018, 93–96).
Taim yumi tok yumi ken kisim ol toktok i kam long God, em i no bilong yumi go pas long ol manmeri bilong God olsem Moses. Ol samting i kamap long Namba 12 i tok klia long dispela. Wanem ol tok lukaut yu painim long dispela sapta? Yu ting Bikpela i laikim yu long save gut long wanem samting, long kisim revelesen long Em, na bihainim profet bilong Em?
Lukim tu 1 Nifai 10:17; Doktrin na ol Kavanen 28;1–7; Dallin H. Oaks, “Two Lines of Communication,” Liahona, Nov. 2010, 83–86.
Lukluk long ol samting i dia moa. Sampela lain i save pilim hevi long ritim ol samting bilong wan wan wik, insait long Kam, Bihainim Mi. Taim yu ritim ol samting bilong wan wan wik, bihainim wanem samting Spirit i stiaim yu long mekim. Skelim wanem samting yu laikim na wanem samting ol lain yu skulim i bai laikim long en. Em i moa gutpela long save gut na bihainim wanpela as toktok long wanpela wik. Dispela bai helpim yu moa, i no bilong yu ritim planti sapta.
Namba 12:3
“Moses em i man bilong daunim em yet.”
Sampela i kirap nogut taim ol lainim olsem Moses, dispela man i gat strong long sanap long ai bilong king bilong Isip na mekim ol mirakel wantaim strong bilong Bikpela, em man bilong “daunim em yet” tru (Namba 12:3). Wanem as bilong yumi daunim yumi yet? Yu ken ritim tok bilong Elda David A. Bednar “Meek and Lowly of Heart” (Liahona, Mei 2018, 30–33) o “Meek, Meekness” insait long Guide to the Scriptures (Gospel Library).
Yu lainim wanem samting long pasin bilong Moses long daunim em yet, long Kisim Bek 18:13–25; Namba 11:26–29; Namba 12; Hibru 11:24–27; and Moses 1:10–11? Yu ken tingting long wanem rot Jisas Krais i daunim em yet (lukim Matyu 11:29; 27:11–14; Luk 22:41–42; Jon 13:4–5). Ol dispela samting skulim yu wanem?
Namba 13–14
Mi ken gat gutpela tingting long ol samting bai kamap bihain sapos mi bilip long Bikpela.
Taim yu ritim Namba 13–14, traim putim yu yet long ples bilong ol Israel. Bilong wanem yu ting ol laik “go bek long Isip”? (Namba 14:3). Yu bai toktok long “narakain tingting” Kalep i gat olsem wanem? (Namba 14:24). Wanem samting i mekim yu bel kirap, long bilip bilong Kalep na Josua, na yu bai bihainim wanem samting tupela i mekim long ol hevi yu bungim olsem wanem?
10-pela bilong ol dispela man i poret; Josua na Kalep tasol i bilip strong. Joshua and Caleb: Obedient Spies, Douglas Klauba. i mekim. © Lifeway Collection/laisens i kam long goodsalt.com
Namba 21:4–9
Sapos mi lukluk long Jisas Krais wantaim bilip, em i ken oraitim sol bilong mi.
Ol profet bilong Buk bilong Momon i save long stori insait long Namba 21:4–9 na ol luksave long wanem rot dispela tok em bikpela tumas, na bilong helpim spirit bilong yumi. Ritim wanem ol i toktok long en, long dispela stori, long 1 Nifai 17:40–41; Alma 33:18–22; na Hilaman 8:13–15. Hia em sampela askim long tingim taim yu ritim ol ves antap:
-
Snek ol i mekim long bras i makim wanem samting?
-
Taim ol snek nogut kaikai ol Israel, dispela i makim wanem samting?
-
Ol Israel i mas “lukluk long snek bras” (Namba 21:9) na ol i bai orait. Bilong wanem yu ting sampela i les long lukluk? Wankain samting i save kamap long yu, o nogat?
-
Bel bilong yu i kirap long mekim wanem moa, long “lukluk long Pikinini bilong God wantaim bilip” long oraitim yu? (Helaman 8:15).
Taim yu ritim ol dispela ves, em i ken helpim yu tingim ol narapela taim, insait long tok bilong God, ol manmeri i mas lukluk long Krais wanpela tasol. Kain olsem, skelim tok long Namba 21:4–9 wantaim Matyu 14:25–31 na 1 Nifai 8:24–28 (lukim tu ol piksa long pinis bilong olgeta dispela toktok). Wanem samting save pulim yumi go longwe long Krais? Em i save blesim ol husat i save lukluk na stap wantaim Em olgeta taim olsem wanem?
Lukim tu “Jesus, the Very Thought of Thee” (Hymns, no. 141).
Namba 22–24
Mi ken bihainim laik bilong God, wankain long taim ol narapela i tokim mi long noken bihainim.
Taim Balak, king bilong Moap, i save olsem ol Israel i kam klostu, em i singautim Balam. Balam em wanpela man bilong mekim ol tok blesing na ol toktok bilong bagarapim ol narapela. Balak i laikim em mekim wanpela tok bilong bagarapim ol Israel. Lukim Balak i strong long Balam i mekim dispela olsem wanem (lukim Namba 22:5–7, 15–17), na tingting long sampela traim yu ting bai kamap long yu long mekim yu abrusim laik bilong God. Ol bekim bilong Balam, long Namba 22:18, 38; 23:8, 12, 26; 24:13, i mekim yu bel kirap long wanem? Tasol long bihain, Balam i harim tok bilong ol narapela na em givim baksait long ol Israel (lukim Namba 31:16; Jut 1:11). Tingting long wanem rot yu ken stap strong wantaim Bikpela taim ol narapela i toktok strong long pulim yu long mekim narapela samting.
Ol Sampela Tingting bilong Lainim ol Pikinini
Namba 11:4–10
Mi mas bel gut na tok tenkyu long olgeta samting God i givim mi.
-
Askim ol pikinini bilong yu sapos ol tingim sampela ol mirakel Bikpela i mekim bilong helpim ol Israel (see “The Plagues of Egypt” and “The Passover” in Old Testament Stories, 67–74). Bihain, yu ken stori gut long ol long Namba 11:4–10, na toktok moa olsem ol Israel i lusim tingting pinis long blesing God i givim ol na ol bin kros na toktok planti. Yumi save lusim tingting long wanem sampela ol blesing?
-
Taim yupela singim o harim wanpela song i toktok long pasin bilong bel gut na tenkyu, olsem “Count Your Blessings” (Hymns, no. 241), ol pikinini bilong ken droim piksa bilong ol blesing Bikpela i givim ol.
Namba 12
Bikpela i laik bai mi mas bihainim profet bilong Em.
-
Long statim Namba 12, yu ken tokim ol pikinini bilong yu olsem Bikpela i no wanbel wantaim Aron na Miriam, brata na susa bilong Moses. Askim ol long ritim Namba 12:1–8 long painimaut wanem as. Yu ken yusim Gospel Art Book long helpim ol pikinini bilong yu painim sampela lain husat i bihainim profet bilong Bikpela, na Bikpela i blesim ol long dispela. Yumi bai kisim blesing taim yumi harim na bihainim profet bilong Bikpela olsem wanem?
Namba 21:6–9
Mi ken lukluk long Jisas Krais.
-
Yu ken yusim “Moses and the Brass Serpent” insait long Old Testament Stories, 83–84, long helpim ol pikinini bilong yu lainim wanem samting kamap long Namba 21:6–9. Snek bras i wankain olsem Jisas Krais olsem wanem? (lukim Jon 3:14–15). Ol pikinini bilong yu ken mekim wanpela snek long pepa na raitim ol sampela isi samting ol i ken mekim long “lukluk wantaim bilip long Pikinini bilong God” (Hilaman 8:15).
1:2Moses and the Brass Serpent
-
Ol pikinini i bikpela liklik i ken makim wanpela bilong ol dispela ves na toktok long wanem samting moa dispela tok i skruim wantaim save ol i gat long dispela stori: 1 Nifai 17:41; Alma 33:18–20; Hilaman 8:13–15; Doktrin na ol Kavanen 6:36.
Bronze Serpent, Brent Evans i mekim
Namba 22–24
Mi ken bihainim laik bilong God, wankain long taim ol narapela i tokim mi long noken bihainim.
-
Sotim Namba 22:1–18 bilong ol pikinini bilong yu. Toktok moa long wanem Balam i mekim. Em i no laik long mekim tok bilong bagarapim ol manmeri bilong God, wankain tu long taim Balak, king bilong Moap, i laik givim em biknem na moni. Bihain yu ken helpim ol pikinini bilong yu painim ol dispela ves. Ol dispela ves i toktok long ating Balam i pilim olsem em i laik bihainim God: Namba 22:18; 23:26; 24:13. Ating ol pikinini bilong yu ken makim wanpela hap tok ol i laikim, na raitim long wanpela kat long helpim ol tingim long harim na bihainim Bikpela.
Long kisim sampela moa tingting, lukim Friend piksa buk bilong dispela mun.