“Epril 27–Mei 3. ‘Holines long Bikpela: Kisim Bek 35–40; Wok Pris 1; 4; 16; 19,” Kam, Bihainim Mi—Bilong Haus na Sios: Olpela Testamen 2026 (2026)
“Epril 27–Mei 3. ‘Holines long Bikpela,’” Kam, Bihainim Mi: Olpela Testamen 2026
Rio de Janeiro Brazil Tempel
Epril 27–Mei 3: “ Holines long Bikpela”
Kisim Bek 35–40; Wok Pris 1; 4; 16; 19
Taim ol Israel lusim kantri Isip, em bikpela samting, tasol dispela i no inapim wanem wok God i gat long ol pikinini bilong Israel. Na tu, gutpela sindaun long graun God promis long givim ol em i no namba wan samting God i laikim. Dispela ol samting em ol hap hap bilong wanem God laikim tru ol manmeri bilong Em mas bihainim: “Yupela i mas stap holi na bihainim ol gutpela stretpela pasin mi save laikim. Long wanem, mi God, Bikpela bilong yupela, mi holi na pasin bilong mi em i gutpela na stretpela olgeta” (Wok Pris 19:2). God i mekim plen bilong mekim ol manmeri bilong em kamap holi olsem wanem, bihain long ol i stap long kalabus planti yia tru? Em tokim ol long mekim wanpela ples i holi insait long ples i drai na nogat man long en—em haus sel bilong lotu. Em givim ol ol kontrak na ol lo bilong stiaim ol samting ol i mekim, na bilong senisim bel na tingting bilong ol. Na Em tokim ol long ofaim ol animal. Dispela em bilong lainim ol long samting ol i mekim long rausim sin bilong ol. Olgeta dispela samting Em mekim bilong soim bel, tingting na laip bilong ol long Jisas Krais. Jisas Krais tasol em trupela rot bilong yumi bihainim long stap holi, long ol Israel long bipo na yumi long nau. Yumi bin stap insait long kalabus bilong sin, na Jisas Krais i laik bai yumi givim baksait long sin ba bihainim Em. Em i promis olsem, “Mi yet ken mekim yu kamap klin” (Doktrin na ol Kavanens 60:7).
Long lukim ol liklik toktok bilong olgeta samting insait long buk bilong Wok Pris, lukim “Leviticus” insait long Bible Dictionary.
Ol Sampela Tingting bilong Lainim long Haus na long SIos
Kisim Bek 35–40; Wok Pris 19
Bikpela i laikim mi long kamap holi.
Kisim Bek 35–40 i stori long ol Israel sanapim haus sel bilong lotu bilong mekim ol wok i holi tru bilong helpim ol stap klinpela manmeri tru. Taim yu ritim ol dispela sapta, painim ol samting Bikpela i askim ol manmeri bilong Em long putim insait long haus sel bilong Em. Ol dispela samting makim wanem samting? Ol dispela samting i tokim yu wanem, long kamap klin moa? Skelim wanem rot ol dispela samting i mekim yu tingting long Jisas Krais. Yu ken mekim wanpela lista olsem:
|
Wanem ol samting yu painim? |
Dispela i makim wanem? |
|---|---|
Wanem ol samting yu painim? Bokis Kontrak (Kisim Bek 37:1–9; 40:20–21) | Dispela i makim wanem? (Lukim Kisim Bek 25:20–22; Guide to the Scriptures, “Ark of the Covenant”) |
Wanem ol samting yu painim? Alta bilong smok i gat gutpela smel (Kisim Bek 40:26–27; lukim tu Kisim Bek 30:1, 6–8) | Dispela i makim wanem? (Lukim Kamapim Tok Hait 8:3–4) |
Wanem ol samting yu painim? Stik lam (Kisim Bek 37:17–24) | Dispela i makim wanem? (Lukim Matyu 5:14–16; Jon 8:12) |
Wanem ol samting yu painim? Alta bilong kukim ol ofa (Kisim Bek 38:1–7; lukim tu Kisim Bek 27:1; 29:10–14) | Dispela i makim wanem? (Lukim Guide to the Scriptures, “Sacrifice”) |
Wanem ol samting yu painim? Dis bilong waswas (Kisim Bek 30:17–21) | Dispela i makim wanem? (Lukim 2 Stori 4:6; Aisaia 1:16; Jeremaia 33:8) |
Taim yumi stap insait tasol long ol ples i holi, dispela i no inap mekim yumi kamap klin. Nogat. Wok Pris 19 i toktok long ol lo Bikpela i givim ol Israel long helpim kamap klin moa yet. Yu painim wanem samting insait long ol dispela lo we ol bai helpim yu kamap klin long ai bilong Bikpela? Bel bilong yu i kirap long mekim wanem long bihainim tru ol dispela samting yu tingim long en?
Lukim tu Henry B. Eyring, “Holiness and the Plan of Happiness,” Liahona, Nov. 2019, 100–103; “The Tabernacle” (vidio), Gospel Library.
The Tabernacle
Yusim ol musik bilong lotu. Musik i gat strong bilong bringim kam Spirit na strongim bilip bilong yu long Jisas Krais. Ol samting insait long wan wan song i strongim as bilong ol tok bilong God. Kain olsem, taim yu singim wanpela song olsem “More Holiness Give Me” (Hymns, no. 131), dispela i ken strongim sampela samting yu lainim long Wok Pris 19. Em i ken helpim yu tu long tingting wanem as bilong yumi kamap klin olsem Jisas Krais, na tingting long wanem rot Em i helpim yu long kamap klin moa.
Kisim Bek 35:4–35; 36:1–7
Bikpela i askim mi long mekim ol ofa bilong mi wantaim bel.
Long yia bihain long ol Israel lusim kantri Isip, ol i no stap gut wantaim Bikpela. Tasol taim yu ritim Kisim Bek 35:4–35 na 36:1–7, lukim wanem rot ol Israel i bekim tok bilong God taim Em tokim ol long sanapim haus sel bilong lotu. Yu lainim wanem samting long pasin ol Israel i mekim we em bai helpim yu mekim gut wok bilong God?
Em bai i no inap askim yu long givim ol ston i dia tumas, ol laplap, o plang bilong sanapim haus sel bilong lotu. Bikpela i givim yu wanem samting, na em laikim yu mekim wanem kain ofa? Wanem taim “[yu] laikim tumas long wok”?
Lukim tu Topics and Questions, “Sacrifice,” Gospel Library.
Ol Israel “i laik givim” ofa bilong ol long sanapim haus sel bilong lotu (Kisim Bek 35:5). Corbert Gauthier i droim dispela piksa,© Lifeway Collection/laisens i kam long goodsalt.com
Kisim Bek 40:12–14
God i givim ol wok bilong tempel long bipo.
Kisim Bek 40:12–14 i toktok long wok bilong lotu long bipo. Ol dispela wok i save kamap long taim bilong yumi nau insait long haus bilong Bikpela. Hia em ol sampela ves bilong helpim yu lainim wanem rot ol dispela wok i tokaut long Jisas Krais:
-
Wok bilong wasim: Buk Song 51:2; Esekiel 36:25–27
-
Werim ol klos i tambu: Aisaia 61:10; Matyu 22:11–14; Kamapim Tok Hait 19:7–8
-
Putim wel antap long het: Luk 4:18–19; Aposel 10:38
Wok Pris 1:1–9; 4; 16
Ofa bilong Jisas Krais tasol i ken rausim sin bilong mi.
Buk bilong Wok Pris i ken luk kranki liklik long yumi—ol ofa bilong animal, ol wok bilong lotu i yusim blut na wara, na ol lo bilong bosim olgeta samting long laip bilong ol man. Tasol ol dispela wok bilong lotu na ol dispela lo i stap bilong lainim yumi long ol pasin yumi save long en—tanim bel, stap klin long ai bilong God, na ofa Jisas Krais mekim bilong rausim sin. Long painim ol dispela samting taim yu ritim Leviticus 1:1–9; 4; 16, skelim ol kain askim:
-
Wanem ol toktok yu painim i mekim mi tingim Jisas Krais na ofa Em mekim bilong rausim sin bilong yumi?
-
Mi lainim wanem samting long ol dispela ofa, long ofa Jisas Krais i mekim?
-
Mi wankain olsem ol dispela lain husat i mekim ol dispela ofa olsem wanem?
Bikpela i no laikim yumi long mekim moa ol ofa bilong animal. Tasol ofa em wanpela bikpela as tingting bilong gutnius. Long lainim moa long wanem kain ol ofa Bikpela i laikim, ritim 3 Nifai 9:19–20; Doktrin na ol Kavanen 64:34. Yu wok long mekim ol dispela ofa olsem wanem? Moses 5:7 i skulim yu wanem samting long yu mas luksave long ofa yu mekim olsem wanem?
Lukim tu “Sampela Toktok bilong Tingting: Haus Sel bilong God na ol Ofa.”
Ol Sampela Tingting bilong Lainim ol Pikinini
Kisim Bek 35:20–29; 36:1
God i givim mi ol presen bilong helpim wok bilong Em i kamap.
-
Long pinis bilong ol dispela toktok i gat wanpela piksa bilong haus sel bilong ol Israel, long ples i drai tru. Ating yu wantaim ol pikinini bilong yu ken lukim, na yu ken askim ol wanem ol samting ol i mas gat long sanapim dispela haus sel. Bihain yupela i ken ritim Kisim Bek 35:20–29 wantaim long painim wanem rot ol kisim ol dispela samting. Bikpela i laik yumi mas mekim liklik wok bilong sanapim kingdom bilong Em olsem wanem?
-
Ating yupela ken ritim Kisim Bek 36:1 long painimaut wanem samting Bikpela i givim Besalel na Oholiap long helpim long sanapim haus sel bilong lotu. Bihain, yu ken toktok wantaim ol pikinini bilong yu long wanem samting yu pilim olsem Bikpela i givim ol long helpim long sanapim kingdom bilong Em. Yumi bai yusim ol dispela samting long blesim ol narapela olsem wanem?
Rome Italy Tempel
Kisim Bek 40:17–34
Long ol ples i holi, mi ken pilim Bikpela em i stap.
-
Kisim Bek 40:17–34 i toktok long ol samting i stap insait long haus sel bilong ol Israel. Ating yu wantaim ol pikinini bilong yu ken painim ol insait long dispela ves na long piksa long pinis bilong olgeta dispela toktok. Toktok long wanem rot wan wan hap bilong haus sel i ken skulim yumi long Jisas Krais o Papa long Heven. Kain olsem, Bokis Kontrak i ken mekim yumi tingim ol lo bilong God, na alta i ken mekim yumi tingim ofa bilong Jisas Krais, na i go het olsem.
-
Wanem ol ples holi yumi gat long nau, we i save helpim yumi pilim olsem Jisas Krais stap klostu long yumi? Taim yupela i toktok, yupela ken lukim dispela vidio “Temples” (Gospel Library). Yupela ken singim wanpela song olsem “Holy Places” (Gospel Library). Toktok namel long yupela long yupela pilim olsem wanem long ol ples holi olsem tempel.
What Is a Temple?
Wok Pris 1:1–4
Ofa bilong Jisas Krais tasol i ken rausim sin bilong mi.
-
Ol ofa bilong animal Olpela Testamen i toktok long en, em bilong lainim ol pikinini bilong Israel olsem Jisas Krais i save lusim ol sin. Taim yupela ritim, tingim wanem rot ol dispela ofa i ken mekim wankain long ol pikinini bilong yu. Yu ken soim ol piksa bilong Jisas Krais long Gaden Getsemani na long diwai kros (lukim Gospel Art Book, nos. 56, 57) taim yu wantaim ol pikinini bilong yu ritim Wok Pris 1:1–4. Helpim ol painim ol hap toktok we i mekim ol tingim ofa Jisas Krais i mekim.
-
Yupela ken ritim 3 Nifai 9:19–20 wantaim long painimaut wanem samting yumi mas ofaim long God. Yumi mas mekim wanem samting tru, long ofaim bel na spirit i sori long ol samting nogut yumi mekim, long Bikpela? Lukim Guide to the Scriptures, “Broken Heart” (Gospel Library) long kisim helpim long bekim dispela askim.
Long kisim sampela moa tingting, lukim Friend piksa buk bilong dispela mun.